Грамадскае аб’яднанне "Беларускі саюз жанчын"
Грамадскае аб’яднанне "Беларускі саюз жанчын" (БСЖ) створана 14 снежня 1991 года. Яно аб’ядноўвае жаночыя арганізацыі па тэрытарыяльнай і прафесійнай прыкметах.
Дзейнасць БСЖ накіравана на садзейнічанне ў абароне правоў і законных інтарэсаў жанчын, сям’і і дзяцей, забеспячэнне дастойнага становішча жанчыны ў грамадстве, павышэнне яе ролі ў грамадска-палітычным, сацыяльна-эканамічным і культурным жыцці краіны.
У радах арганізацыі – члены Савета Рэспублікі і дэпутаты Палаты прадстаўнікоў Нацыянальнага сходу, кіраўнікі рэспубліканскіх органаў дзяржаўнага кіравання, арганізацый і прадпрыемстваў, дзелавых колаў і бізнес-супольнасцей. Пры БСЖ створаны аб’яднаныя арганізацыі ААТ “ААБ Беларусбанк”, ААТ “Белаграпрамбанк”, Генеральнай пракуратуры, Міністэрства па надзвычайных сітуацыях.
БСЖ прадстаўлены ў Нацыянальным савеце па гендарнай палітыцы пры Савеце Міністраў, Нацыянальнай камісіі па правах дзіцяці, Грамадскім савеце пры Міністэрстве ўнутраных спраў. Гэта дае магчымасць арганізацыі актыўна ўдзельнічаць у заканатворчай дзейнасці, павышаць жаночы ўплыў у грамадстве, уносіць істотны ўклад у развіццё краіны.
Саюз жанчын уключыўся ў работу па дасягненні Мэт устойлівага развіцця.
БСЖ вядзе актыўную дабрачынную і гуманітарную дзейнасць па аказанні дапамогі, у тым ліку жанчынам, сем’ям, дзецям, якія маюць у ёй патрэбу. Акрамя ўдзелу ў агульнарэспубліканскіх акцыях і мерапрыемствах рэалізуе шэраг традыцыйных праектаў:
"Здаровая жанчына – здаровая нацыя" (сумесна з Міністэрствам аховы здароўя). Штогод у гадавіну катастрофы на Чарнобыльскай АЭС у пацярпелыя рэгіёны выязджаюць прадстаўнікі БСЖ і медыцынскія работнікі (анколагі, эндакрынолагі, гінеколагі, кардыёлагі і інш.), якія праводзяць кансультацыі для жанчын.
"Моцная сям’я – моцная дзяржава" (сумесна з Міністэрствам інфармацыі). Рэспубліканскі творчы конкурс, у якім штогод удзельнічаюць больш як сотня журналісцкіх творчых работ, прысвечаных праблемам сям’і, дзяцінства і мацярынства.
"Жанчына года". Штогадовы рэспубліканскі конкурс, галоўная мэта якога – падтрымка жанчын, якія дабіліся значных поспехаў у розных сферах дзейнасці і прымаюць актыўны ўдзел у жаночым руху.
"Музей маці". У Беларусі па ініцыятыве БСЖ створаны музеі маці або куткі мацярынскай славы, якія сталі цэнтрамі культурна-асветнай работы.
"Тыдзень Маці". Па ініцыятыве БСЖ у 1998 годзе заснаваны Дзень Маці – 14 кастрычніка. Штогод напярэдадні свята з 7 па 14 кастрычніка па ўсёй краіне праходзяць мерапрыемствы, прысвечаныя маці.
"Сям’я года". Праводзіцца сумесна з Міністэрствам працы і сацыяльнай абароны.
ДАДОМУ.by. Адзіны інтэрнэт-партал стаў яркім прыкладам дзяржаўна-прыватнага партнёрства на карысць сямейнага ўладкавання дзяцей, якія засталіся без апекі бацькоў. У яго стварэнні прынялі ўдзел БСЖ, Міністэрства адукацыі, Міністэрства аховы здароўя, Міністэрства працы і сацыяльнай абароны.
"Беларусь памятае". БСЖ ініцыяваў акцыю "Беларусь памятае. Жаночы твар Перамогі", у час якой праведзены мерапрыемствы да 75-годдзя вызвалення Беларусі ад нямецка-фашысцкіх захопнікаў. У цэнтры ўвагі былі жанчыны, іх гераічны і працоўны подзвіг.