Рэлігія

Рэспубліка Беларусь - шматканфесійная дзяржава, у якой адсутнічаюць рэлігійныя канфлікты.

Заканадаўства краіны забяспечвае і гарантуе правы кожнага на свабоду веравызнання, на сацыяльную справядлівасць, роўнасць, абарону правоў і інтарэсаў незалежна ад адносін да рэлігіі і рэлігійнай прыналежнасці, на свабоду аб'яднання ў рэлігійныя арганізацыі.

Дзяржаўныя органы ў Беларусі на ўсіх узроўнях падтрымліваюць ініцыятывы рэлігійных арганізацый, накіраваныя на забеспячэнне дыялогу паміж канфесіямі на аснове павагі да правоў чалавека і рэлігійнай цярпімасці. У той жа час вядзецца работа па прадухіленні дзейнасці дэструктыўных рэлігійных арганізацый.

Свабода веравызнання ў Беларусі гарантавана Канстытуцыяй. Правы і свабоды вернікаў замацаваны таксама ў Законе Рэспублікі Беларусь "Аб свабодзе веравызнання і рэлігійных арганізацыях".

У Беларусі зарэгістравана 25 рэлігійных канфесій і напрамкаў. Агульная колькасць рэлігійных арганізацый на 1 студзеня 2023 г. - 3590, у тым ліку 173 рэлігійныя арганізацыі, якія маюць агульнаканфесійнае значэнне (рэлігійныя аб'яднанні, манастыры, місіі, брацтвы, сястрыцтвы, духоўныя навучальныя ўстановы), і 3417 рэлігійных абшчын.

Ва ўзаемаадносінах з рэлігійнымі арганізацыямі дзяржава кіруецца заканадаўча замацаваным прынцыпам роўнасці рэлігій перад законам і ўлічвае іх уплыў на фарміраванне духоўных, культурных і дзяржаўных традыцый беларускага народа.
Сабор Сашэсця Святога Духа

Вядучае месца ў рэлігійным жыцці краіны займае Беларуская праваслаўная царква, якая аб'ядноўвае 1733 праваслаўныя прыходы, 15 епархій, 6 духоўных навучальных устаноў, 36 манастыроў, 15 брацтваў, 9 сястрыцтваў, 1 місію.

У складзе Рымска-каталіцкай царквы ў Беларусі 4 епархіі, якія налічваюць 500 абшчын. Дзейнічаюць 6 духоўных навучальных устаноў, 11 місій і 9 манастыроў.

Пратэстанцкія рэлігійныя арганізацыі прадстаўлены 1040 рэлігійнымі абшчынамі, 21 аб'яднаннем, 22 місіямі і 5 духоўнымі навучальнымі ўстановамі 13-ці рэлігійных напрамкаў.

У трох іўдзейскіх рэгілійных аб'яднаннях налічваецца 51 рэлігійная абшчына, яны маюць 10 культавых будынкаў.

Таксама ў рэспубліцы дзейнічаюць 24 мусульманскія рэлігійныя абшчыны, 6 мячэцей і 3 малітвеныя дамы, у тым ліку Саборная мячэць у Мінску. Яе афіцыйнае адкрыццё адбылося 11 лістапада 2016 года з удзелам Прэзідэнта Рэспублікі Беларусь А.Р.Лукашэнкі і Прэзідэнта Турцыі Р.Т.Эрдагана.

У 2015 годзе зарэгістравана будысцкая абшчына ў Мінску ”Шэн Чэн Лінг“ традыцыі Бон.

Прэзідэнт Беларусі Аляксандр Лукашэнка ўдзяляе пільную ўвагу пытанням дзейнасці рэлігійных арганізацый. Традыцыйна праводзяцца сустрэчы Кіраўніка дзяржавы з членамі Сінода Беларускай праваслаўнай царквы і кіраўніцтвам Рымска-каталіцкай царквы ў Беларусі.

З 2008 года пры Упаўнаважаным па справах рэлігій і нацыянальнасцей дзейнічае Кансультатыўны міжканфесійны савет, дзейнасць якога нацэлена на развіццё міжканфесійнага дыялогу, захаванне традыцый талерантнасці, актывізацыю ўзаемадзеяння органаў дзяржаўнага кіравання з рэлігійнымі арганізацыямі ў вырашэнні сацыяльна значных пытанняў.

У духоўным плане значнай падзеяй для нашай краіны стала 550-годдзе аднойдзення цудатворнага Жыровіцкага абраза Божай Маці і 500-годдзе з дня заснавання Свята-Успенскага Жыровіцкага стаўрапігіяльнага мужчынскага манастыра – духоўнай святыні нашага народа.