Выставачныя праекты ў Палацы Незалежнасці
Інтэр'еры палаца неаднаразова ўпрыгожвалі экспазіцыі вядомых беларускіх мастакоў, дызайнераў, фатографаў, скульптараў, таленавітых аўтараў-пачаткоўцаў.
Першым выставачным праектам у Палацы Незалежнасці стала экспазіцыя жывапісу беларускага мастака, заслужанага дзеяча мастацтваў Валерыя Шкарубы, арганізаваная вясной 2017 года. Менавіта з гэтай выставы і пачалася новая традыцыя прэзентацый нацыянальнага мастацтва і творчасці ў Палацы Незалежнасці.
Летам 2018 года магчымасць прадставіць тут свае працы атрымала таленавітая творчая моладзь краіны: студэнты Беларускай дзяржаўнай акадэміі мастацтваў, Беларускага дзяржаўнага ўніверсітэта культуры і мастацтваў, Мінскага дзяржаўнага мастацкага каледжа імя А. К. Глебава.
У Зале ўрачыстых цырымоній палаца 5 кастрычніка 2018 года адкрылася выстава фатаграфій Аляксандра Аляксеева і Алега Лукашэвіча "Спадчына Беларусі. Адноўленыя архітэктурныя каштоўнасці". Аўтары захавалі неад'емны здабытак нашай краіны – помнікі архітэктуры як сведчанне велізарнай працы па іх аднаўленні і рэстаўрацыі, праведзенай за апошнія дзесяцігоддзі.
Гэты праект прыцягнуў асаблівую ўвагу высокіх гасцей Палаца Незалежнасці: Прэзідэнта Азербайджана Ільхама Аліева, Патрыярха Кірыла. Пасля ў Зале ўрачыстых цырымоній была адкрыта пастаянная экспазіцыя гэтых аўтараў. Наведвальнікам фотавыставы прадастаўлена магчымасць адкрыць для сябе Беларусь з унікальнай гісторыяй і культурай.
Лета 2019 года было адзначана правядзеннем у Беларусі II Еўрапейскіх гульняў. Часткай культурнай праграмы форуму стала выстава "Спорт ХХІ стагоддзя ў скульптуры", якая адкрылася ў Палацы Незалежнасці. Работы прадстаўлялі дзевяць відаў спорту. Вобразы атлетаў у метале і камені выразна перадавалі імкненне да новых перамог, напал спартыўных спаборніцтваў.
Адным з найбуйнейшых праектаў, што экспануюцца ў залах Палаца Незалежнасці апошнім часам, стала фотавыстава "Планета Беларусь" вядомага беларускага фотамастака Сяргея Плыткевіча. Аўтар дае магчымасць гасцям экспазіцыі паглядзець на Беларусь з вышыні птушынага палёту, імкнецца паказаць прыгажосць яе прыроды, галоўныя славутасці.
Палац Незалежнасці – выдатная выставачная пляцоўка не толькі для беларускіх майстроў. У час афіцыйнага візіту Прэзідэнта Азербайджана Ільхама Аліева ў Беларусь восенню 2018 года тут дэманстравалася выстава работ мастачкі з Азербайджана Наілі Гандзілавай, прымеркаваная да 25-годдзя ўстанаўлення дыпламатычных адносін паміж краінамі.
Вопыт арганізацыі выставачных праектаў у Палацы Незалежнасці плануецца прадаўжаць і развіваць.
Арганізацыя выставачных праектаў у Палацы Незалежнасці з часам працягваецца і развіваецца. Напрыклад, пасля ўстанаўлення Дня народнага адзінства на працягу некалькіх гадоў у Палацы Незалежнасці праходзілі выставы, прымеркаваныя да гэтага свята. Першая з іх - "Пояс адзінства" - адбылася ў 2021 годзе. Экспазіцыя ўключала шматлікія вырабы народных рамёстваў: ганчарнага мастацтва, лозапляцення, тканае нацыянальнае адзенне з вышыўкай, маляванкі, выцінанкі, батлейку, узоры іканапісу і многае іншае. Іх прадставілі ўстановы культуры горада Мінска і ўсіх абласцей краіны.
У 2022 годзе да Дня народнага адзінства Залу ўрачыстых цырымоній упрыгожылі каля паўсотні пейзажаў беларускіх жывапісцаў - прызнанага мэтра Мікалая Ісаёнка, вопытнай мастачкі Ганны Конанавай і маладога аўтара Ганны Садоўскай. Выстава называлася "Да Беларусi з любоўю i пяшчотай".
Знакавым для беларускай дзяржавы святам - Дню Перамогі і Дню Незалежнасці - у 2023 годзе былі прысвечаны выставы "У святле подзвігу" (25 карцін-успамінаў пра Вялікую Айчынную ад мастакоў, якія бачылі на свае вочы вайну і яе наступствы) і "Архітэктурная мазаіка Беларусі" (карціны больш як 40 беларускіх мастакоў розных пакаленняў, як заслужаных дзеячаў мастацтваў, так і майстроў, менш знаёмых шырокай публіцы, з выявай беларускіх гарадоў, невялікіх раённых цэнтраў і мястэчак, культавых і памятных будынкаў, помнікаў архітэктуры).
У кастрычніку 2023 года ў Зале ўрачыстых цырымоній экспанаваліся яркія і вельмі незвычайныя работы беларускага майстра Любові Кірылавай. Аўтарская выстава ўключала 34 карціны, якія на першы погляд практычна не адрозніваюцца ад палотнаў, напісаных алеем. Але на самай справе гэта мастацкі тэкстыль і карціны выкананы з умела падабраных шматкоў тканіны. Цікава, што Любоў Кірылава прымала ўдзел у рабоце над інтэр'ерамі Палаца Незалежнасці падчас яго будаўніцтва - яна афармляла Залу перагавораў у вузкім складзе, або "Слуцкую".