Сустрэча з актывам Віцебскай вобласці

Прэзідэнт Беларусі Аляксандр Лукашэнка 15 снежня правёў сустрэчу з актывам Віцебскай вобласці.

Першай тэмай стала эпідэміялагічная сітуацыя, звязаная з захваральнасцю на COVID-19. Як праінфармаваў удзельнікаў нарады намеснік старшыні Віцебскага аблвыканкама Уладзімір Пенін, які курыруе сацыяльную сферу, захваральнасць на COVID-19 ідзе на спад, колькасць захварэлых складае 25% ад піку апошняй хвалі. Першым кампанентам вакцыны прышчэплены 43,5% насельніцтва, чакаецца, што да канца года іх колькасць вырасце да 50%.

"Вялікіх праблем у гэтым напрамку няма. Адзінае, трэба адзначыць, што апошнім часам павялічылася колькасць хворых на грып, - сказаў Уладзімір Пенін. - Што датычыцца кавіду, на сённяшні момант у нас усё пад кантролем, пытанняў няма".

Адным з праблемных пытанняў ён абазначыў няхватку фінансавання ў сферы аховы здароўя, што ўплывае на тэрміны рэканструкцыі ўстаноў. Асабліва гэта актуальна для Віцебскай абласной бальніцы: яна пабудавана ў 1980-я гады і з таго часу практычна капітальна не рамантавалася. Кадры ва ўстанове вельмі добрыя, але абсталяванне даўно трэба абнавіць, адзначылі ў аблвыканкаме. Абласны бюджэт з гэтым не справіцца, дадалі там.

"Лічыце і дакладвайце. Абласная бальніца павінна быць абласной. Калі не будзе абласной бальніцы, як лячыць людзей? - спытаў Прэзідэнт. - Гэта нядобра. У нас ужо ў абласных бальніцах праблем практычна няма".

"Будзем напружвацца і закупляць абсталяванне. А палаты, знешні выгляд - гэта ўжо зробіце самі. Упірайцеся, напружвайцеся ў сельскай гаспадарцы, прамысловасці, збірайце грошы, з шапкай хадзіце па вобласці, але гэта хаця б зрабіце. А з абсталяваннем пастараюся дапамагчы, - заявіў Кіраўнік дзяржавы. - Вы ведаеце: лішніх грошай няма. Але тым не менш гэта галоўнае: калі мы цяпер не прымем меры па насычэнні нармальным абсталяваннем нашых бальніц, сучаснымі лякарствамі нашых бальніц - заўтра гэта адгукнецца. Людзей лячыць трэба".

Уладзімір Пенін таксама дадаў, што і ў сферы культуры ёсць пэўныя пытанні: неабходна абнавіць канцэртную базу "Славянскага базару". Па адукацыі і сацыяльным абслугоўванні насельніцтва асаблівых праблем няма.

"Мы заўсёды гаворым, што ў нас праблема з кадрамі, зарплатамі. У вас што, няма гэтых праблем?" - удакладніў Аляксандр Лукашэнка.

"Зарплату ўсім хочацца больш. Таму гэта праблема ёсць. Але ў той жа час сказаць, што гэта адна з галоўных праблем, - я так не сказаў бы", - адказаў намеснік старшыні аблвыканкама.

Падрабязна аб сітуацыі з амбулаторным лячэннем хворых з кавідам і стане спраў у міжрэгіянальных цэнтрах па аказанні меддапамогі Кіраўніку дзяржавы далажыў начальнік галоўнага ўпраўлення па ахове здароўя Віцебскага аблвыканкама Міхаіл Вішнявецкі. Размова таксама ішла аб узроўні захваральнасці на каранавірус цяпер,  своечасовым накіраванні пацыентаў з COVID-19 на рэабілітацыю.

Кіраўнік дзяржавы растлумачыў, што ў Беларусі выразная сістэма аказання дапамогі пацыентам з каранавірусам выбудавана такім чынам, каб не ўтрымліваць іх у стацыянарах працяглы час, а пераводзіць на рэабілітацыю па меры стабілізацыі стану здароўя. Такая сістэма дала магчымасць не дапусціць перагрузкі бальніц, падкрэсліў Прэзідэнт.

Асобна абмяркоўвалася тэма забяспечанасці кадрамі сферы аховы здароўя і асабліва замацавання маладых спецыялістаў. Паводле слоў Міхаіла Вішнявецкага, моладзь імкнецца паехаць у Мінск і іншыя вялікія гарады, таму ў малых населеных пунктах адчуваецца дэфіцыт кадраў. "Ігар Пятровіч, гэта праблема, трэба думаць над гэтай праблемай", - звярнуўся Аляксандр Лукашэнка да Кіраўніка Адміністрацыі Прэзідэнта Ігара Сергяенкі.

Кіраўнік дзяржавы звярнуў увагу: кадравы дэфіцыт і праблема замацавання маладых спецыялістаў характэрны і для сферы сельскай гаспадаркі. Таму падыход да іх вырашэння трэба шукаць комплексны, утрымліваць у тым ліку і з выкарыстаннем адміністрацыйнага рэсурсу. "Паглядзець, напэўна, трэба па адпрацоўцы. Урача рыхтуем, гэта нам нятанна абыходзіцца, а ён - развярнуўся і паехаў. Абавязкова адпрацоўка. У наш час проста трымаць, утрымаць, не пускаць - цяжка. Калі цябе дзяржава падрыхтавала, а ты вырашыў кудысьці пераехаць або паехаць, адпрацуй або заплаці і едзь. Тады падумаюць тысячу разоў", - падкрэсліў Прэзідэнт.

Важны фактар для замацавання спецыялістаў - прадастаўленне жылля. Таму тэма жыллёвага будаўніцтва таксама закраналася на сустрэчы Прэзідэнта з актывам. "Вядома, трэба жыллё для настаўнікаў, урачоў. Як бы ні было цяжка", - акцэнтаваў увагу Кіраўнік дзяржавы.

"Як я пераканаўся, мы часам штучна ствараем праблему ў жыллёвым будаўніцтве, аддаўшы гэта жулікам, асабліва ў Мінску і абласных цэнтрах", - сказаў Прэзідэнт. На прыкладзе сталіцы ён нагадаў, як удалося істотна знізіць кошт квадратнага метра жылля для чаргавікоў, калі яго ўзвядзеннем даручылі заняцца не прыватным кампаніям, а дзяржаўным трэстам: "Без аддзелкі - $500, а ў той час $1,5 тыс. каштаваў квадратны метр у Мінску".

"Хто з прыватнікаў будаваў у Мінску жыллё? У яго адзін стол, і той у сваёй кватэры, і табурэтка. Ён прыходзіў у банк, браў крэдыт. Заключаў дагавор з трэстам, дзякуй богу, мы іх не развалілі. Яны прыходзілі і яму будавалі дом Ён іх трымаў на галодным пайку, патрошку плаціў. Пабудавалі яму жыллё - ён прадаваў утрая даражэй, розніцу - у кішэнь. Навошта нам такія будаўнікі? Мы не супраць прыватніка. Але было строгае патрабаванне (з Мінска пачалося): калі ў цябе, у прыватніка, свая база, як у будаўнічага трэста, - ідзі, будуй, купляй на конкурсе разам з дзяржаўнымі трэстамі жыллё (участак пад забудову. - Заўвага) і будуй", - адзначыў Аляксандр Лукашэнка.

Гаворачы пра сферу культуры, Кіраўнік дзяржавы пацікавіўся, якія зарплаты ў работнікаў галіны. Як далажылі Прэзідэнту, самыя нізкія ў бібліятэках, школах мастацтваў.

"Трэба заняцца гэтай праблемай. У нас, напэўна, і ў вёсцы як былі бібліятэкі, так і засталіся. Тое ж самае і ў раённых цэнтрах: трэба паглядзець", - адзначыў Кіраўнік дзяржавы.

На думку Прэзідэнта, гэта пытанне трэба падрабязна прапрацаваць і прыняць комплекснае рашэнне для ўсёй краіны. Асобна ўтрымліваць вялікія бібліятэкі ў сельскай мясцовасці немэтазгодна, лічыць Аляксандр Лукашэнка. "Трэба даць выразныя арыенціры, што тут рабіць, - сказаў ён. - Гэтым пытаннем трэба займацца сур'ёзна. Я разумею, што тут і Урад павінен даць арыенцір. А можа, нават і прыняць нейкае рашэнне, выпрацаваць сістэму".

"Трэба прадметна займацца канкрэтнымі пытаннямі, і яшчэ раз падкрэсліваю: трэба цаніць людзей разумных, адукаваных (работнікаў бібліятэк. - Заўвага). Іх на вуліцу не выкінеш, і яны нам патрэбны. Іх трэба працаўладкаваць, задзейнічаць, каб яны карысць прыносілі", - падкрэсліў Прэзідэнт.

Пракурор Віцебскай вобласці Ігар Украінец на сустрэчы далажыў аб крымінагеннай сітуацыі. Адзначана стабілізацыя крымінагеннай абстаноўкі, зніжэнне агульнай злачыннасці. Пракуратура вобласці таксама праводзіць работу па папярэджанні падзяжу жывёлы.

"Усе органы праваахоўнага блока могуць выконваць і выконваюць пастаўленыя задачы. Работа праводзіцца сур'ёзная. Узаемадзеянне ў гэтым напрамку забяспечана", - запэўніў Ігар Украінец. Ён канстатаваў, што ёсць пэўныя недахопы, але калі ацэньваць работу ў цэлым, то яна настроена на належным узроўні.

Аляксандр Лукашэнка папярэдзіў аб спробах, што прадаўжаюцца, расхістаць сітуацыю ў краіне перад рэферэндумам і заклікаў у сувязі з гэтым сілавікоў і дзяржслужачых не расслабляцца.

"Сітуацыя, не скажу, што крытычная, гэта не сітуацыя мінулага года. Але заўсёды заклікаю вас, што нам ні ў якім разе нельга расслабляцца. І не толькі праваахоўным органам. Яны задзейнічаны па поўнай. Ім спуску няма і не будзе. Мы недацягваем у дзяржструктурах. Дзяржаўныя служачыя павінны страпянуцца. Самае галоўнае: нам трэба працаваць з насельніцтвам і працаваць не фармальна", - падкрэсліў Прэзідэнт.

Аляксандр Лукашэнка адзначыў, што ў дзяржструктурах часам узнікаюць значныя прабелы ў рабоце з насельніцтвам, у гэтым яму даводзілася пераконвацца не раз. Прэзідэнт расказаў, як у сябе на малой радзіме на вуліцы сутыкнуўся з дзвюма жанчынамі з-пад Оршы: яны прыехалі ў Александрыю, разлічваючы на сустрэчу з Кіраўніком дзяржавы, каб вырашыць свае праблемы.

"Яны мне кучу папер, а пытанне і выедзенага яйца не вартае: туалет нехта пабудаваў, агароджу не перанёс, 70 сантыметраў ні туды, ні сюды. Ідзе нейкая спрэчка ў БТІ, раёне - жах. Другая купіла дом - нешта не так, нешта не гэтак, - адзначыў Прэзідэнт. - Абедзве ноч з Оршы ішлі пяшком (не было на чым прыехаць), ведаючы, што я знаходжуся ў гэтай вёсцы. Звычайныя, простыя жанчыны. І, ведаеце, мне неяк не па сабе стала".

Кіраўнік дзяржавы звярнуў увагу, што яму даводзіцца часта сутыкацца з такімі пытаннямі. Ён абурыўся, чаму мясцовыя органы ўлады не могуць разабрацца з такімі праблемамі.

"Ужо пенсіянеркі, а мы прымушаем іх хадзіць па краіне. Гэта недапушчальна. Я помню, адкуль я сам. Не думаю, што ў гэтай зале сядзяць усе дзеці міністраў і сакратароў ЦК. Не забывайцеся, адкуль вы і куды мы вернемся", - падкрэсліў Аляксандр Лукашэнка.

Ён адзначыў, што ва ўмовах санкцыйнай палітыкі калектыўнага Захаду трэба актыўней працаваць і шукаць розныя шляхі пераадолення тых ці іншых складанасцей, а не наракаць на санкцыі. "Той, хто з гэтым працуе, спакойна знайшлі шляхі і працуюць, - сказаў Прэзідэнт. - Так, будуць нюансы, будуць і праблемы. Але трэба варушыцца. Мы павінны выстаяць".

Паводле слоў Аляксандра Лукашэнкі, трэба шукаць шляхі выжывання, і не проста выжывання, а руху наперад у такой сітуацыі. "Гэта маё строгае патрабаванне да вас. Таму вычляняйце тыя пытанні, якія балючыя для нас на Віцебшчыне, і вырашайце. Не будзеце вырашаць - да мяне і ва Урад не хадзіце, мы вас больш падтрымліваць не будзем. Таму што тыя вялікія рэсурсы, якія ў адпаведнасці з маім рашэннем былі накіраваны ў Віцебскую вобласць, пачынаючы ад вёскі і заканчваючы НПЗ і іншымі, такіх рэсурсаў я не накіроўваў ні ў адну вобласць. І я чакаю ад вас аддачы, як бы ні было цяжка", - заявіў беларускі лідар.

"Апраўданні не прымаюцца. Санкцыі санкцыямі, а нам трэба жыць і быць акуратнымі", - дадаў Кіраўнік дзяржавы.

Аляксандр Лукашэнка адзначыў, што ў свеце адбываецца пастаяннае нагнятанне сітуацыі, ідзе процістаянне паміж геапалітычнымі ігракамі. Пандэмія яшчэ і абвастрыла ўсе супярэчнасці.

"Міма нас ні адна вайна не праходзіла ў мінулым, не пройдзе і цяпер. Не дай бог яна будзе развязана. Таму мая задача - уберагчы дзяржаву і народ ад вайны. Таму я ад вас патрабую маналіта і з'яднанасці, - заявіў Прэзідэнт. - Трэба дзейнічаць не разлічваючы ні на каго. Калі дапамогуць, гэта будзе ў плюс. Але трэба разлічваць толькі на сябе".

Ён звярнуў увагу і на пытанні тэрытарыяльнай абароны: "Я не хачу, каб наш народ чарговы раз апынуўся на лініі злому і не дай бог у цэнтры нейкай вайнушкі. А каб мы не апынуліся там, мы павінны быць да гэтага гатовы. Таму новы губернатар, старшыні райвыканкамаў, гарвыканкамаў, вы ведаеце, што ў нас ёсць тэрытарыяльная абарона і тэрытарыяльныя войскі".

Аляксандр Лукашэнка даручыў удзяліць гэтаму пытанню ўвагу, пачынаючы ад персанальнага складу і заканчваючы пытаннямі складання адпаведных планаў і матэрыяльнага забеспячэння. "Паглядзіце тыя аб'екты, якія вам давядзецца абараняць у выпадку чаго на месцах. Ва ўсім разбярыцеся", - сказаў ён.

Насцярожвае Прэзідэнта і магчымасць у сучасных рэаліях кібератак, што, калі не прымаць неабходных мер абароны, можа прывесці да самых сур'ёзных наступстваў. "Таму падумайце, як вы будзеце абараняць свае камп'ютары, сеткі і іншае", - даручыў Кіраўнік дзяржавы.

Аляксандр Лукашэнка падкрэсліў, што ў адносінах да Беларусі разгорнута сапраўдная гібрыдная вайна, і краіна стала галоўным звяном у спробах націску на Расію з боку Захаду. Прэзідэнт у сувязі з гэтым нагадаў аб узмацненні ваеннай актыўнасці НАТА і ЗША ў Чорным моры, фіксуемых пралётах авіяцыі па перыметры расійскіх і беларускіх граніц.

"З намі паспрабавалі размаўляць праз каляровую рэвалюцыю, бліцкрыг у мінулым годзе. І я вас заўсёды папярэджваў і адкрыта гаварыў: мы не ведаем, які новы рычаг яны будуць выкарыстоўваць для націску на нас. Але тое, што яны разгарнулі супраць нас гібрыдную вайну, - гэта факт. У СМІ, дыпламатычны націск, палітычны... Узмацнілі эканамічны націск. Вось вам гібрыд. І падышлі да ваенна-палітычнага процістаяння. Зразумела, мы вымушаны рэагаваць", - сказаў Кіраўнік дзяржавы.

Прадстаўляючы новага старшыню Віцебскага аблвыканкама Аляксандра Субоціна актыву рэгіёна, Прэзідэнт выказаў упэўненасць, што Віцебская вобласць у сэрцы практычна кожнага беларуса заўсёды была і застанецца калыскай духоўнасці беларускага народа. "Тысячагоддзе таму тут зараджаліся вытокі нашай дзяржаўнасці, - адзначыў Прэзідэнт. - А сёння Віцебск - фактычна культурная сталіца Беларусі. Я ўжо не гавару пра тое прыроднае хараство, якім славіцца наш Віцебск і Віцебшчына".

Гаворачы аб развіцці вобласці, Аляксандр Лукашэнка назваў некаторыя прыклады аказання рэгіёну падтрымкі з боку дзяржавы. Гэта і выдзяленне значных сродкаў для мадэрнізацыі нафтахімічнай прамысловасці, і беспрэцэдэнтныя льготы і прэферэнцыі для Аршанскага раёна, як узор для пераймання ўсёй краіне. Упамянуты былі таксама асаблівыя ўмовы работы аграпрамысловага комплексу ў рамках інтэграцыйных структур. "Гэта добры, нармальны шлях. Але ці ўдалося мабілізаваць сялян і перапрацоўку, каб зрабіць зрухі ў сельскай гаспадарцы?" - задаў пытанне Кіраўнік дзяржавы.

Ён нагадаў, што калі прымалася рашэнне аб стварэнні гэтых структур, асабліва падкрэслівалася: гэта не азначае простага спісання даўгоў - трэба прадэманстраваць рэальны рэзультат у аздараўленні фінансавага стану гаспадарак АПК. "Я папярэдзіў: калі толькі не будзе аддачы - крыўдуйце самі на сябе. І сёй-той там галовы закладваў, я гэта помню", - сказаў Прэзідэнт. На працягу зімы ён плануе разам з губернатарам наведаць некаторыя інтэграцыйныя структуры і прааналізаваць іх работу.

Аляксандр Лукашэнка адзначыў, што многія з праектаў, якія рэалізуюцца ў Віцебскай вобласці, былі асабіста ініцыяваны цяперашнім і ранейшым кіраўніцтвам рэгіёна. "Гэта характарызуе Мікалая Мікалаевіча (Шарснёва, ранейшага старшыню аблвыканкама. - Заўвага) як чалавека неабыякавага, балеючага за справу. Гэта я ведаю дакладна. А тое, што па некаторых з іх ёсць праблемы ў рэалізацыі, пытанне не толькі да кіраўніка вобласці. Урад і вы павінны былі гэтым займацца", - прадоўжыў Прэзідэнт.

Нараўне са складанасцямі Кіраўнік дзяржавы адзначыў і значныя вынікі асобных прамысловых і сельскагаспадарчых прадпрыемстваў Віцебскай вобласці, а таксама работу ў сферы культурнага развіцця рэгіёна, удасканалення інфраструктуры. "Як Віцебшчына змяняецца і наколькі стала больш парадку на зямлі, добра відаць, асабліва мне: я больш лятаю над краінай", - заўважыў Прэзідэнт.

"Вядома, я хацеў бы за ўсю гэту работу падзякаваць перш за ўсё Мікалаю Мікалаевічу (Шарснёву. - Заўвага)", - сказаў Аляксандр Лукашэнка, выказаўшы ўпэўненасць, што кампетэнцыям ранейшага губернатара будзе знойдзена дастойнае прымяненне.

Кіраўнік дзяржавы адзначыў, што ёсць прыклады дасягнення асобнымі прамысловымі і сельскагаспадарчымі прадпрыемствамі вялікіх вынікаў, але разам з тым хваліцца вобласці асабліва няма чым.

"Відавочна, што рэгіёну патрэбна перазагрузка. Калі хочаце - сур'ёзнае ўзварушванне. І ў мяне гэта не заржавее, - сказаў Аляксандр Лукашэнка. - Зрабіце, калі ласка, за зіму адпаведныя высновы".

Паводле яго слоў, за апошнія сем гадоў валавы рэгіянальны прадукт у вобласці скараціўся больш як на 8%. У бягучым годзе рэгіён адзіны, дзе прадаўжае зніжацца ВРП, у асноўным за кошт будаўніцтва і сельскай гаспадаркі. "У апошнія гады пагаршаюцца многія паказчыкі развіцця вёскі. Зніжаны пасяўныя плошчы і аб'ёмы збору сельскагаспадарчых культур. Скарацілася пагалоўе буйной рагатай жывёлы, вытворчасць малака, яек. Прычына - нізкая арганізацыя працы, незахаванне агратэхнічных тэрмінаў і рэгламентаў. Выканальніцкая дысцыпліна ні к чорту, і не трэба гаварыць, што ў вас не хапае кадраў, - сказаў Аляксандр Лукашэнка. - Трэба сабрацца, калі мы не хочам страціць краіну. Усяго ў вас хапае".

Прэзідэнт заявіў, што яго асабліва насцярожвае адсутнасць адчувальнага эканамічнага эфекту ад рэалізацыі Указа па развіцці аграпрамысловага комплексу Віцебскай вобласці. Работа аграпрамысловых аб'яднанняў застаецца стратнай. Без дзяржаўнай падтрымкі стратныя 72% сельскагаспадарчых арганізацый у рэгіёне.

"Таму мной прынята рашэнне аб назначэнні на Віцебшчыну перспектыўнага кіраўніка, для якога наш віцебскі край з'яўляецца роднай зямлёй, Аляксандра Міхайлавіча Субоціна. Павінен вам сказаць шчыра: у яго было жаданне паехаць працаваць на радзіму. І я цаню, што ён рызыкнуў у складаны, няпросты час, праблем больш, чым калі-небудзь. І я вельмі хачу, каб у яго тут з вамі атрымалася", - заявіў Аляксандр Лукашэнка.

Прэзідэнт дадаў, што Аляксандр Субоцін непасрэдна прымаў удзел у распрацоўцы новых падыходаў да развіцця аграпрамысловага комплексу, стварэння аб'яднанняў. У пэўнай ступені з'яўляецца іх суаўтарам. "Упэўнены, разумее, як усё павінна быць рэалізавана на практыцы", - падкрэсліў Кіраўнік дзяржавы.

"Перш за ўсё неабходны строгая тэхналагічная і выканальніцкая дысцыпліна, эканомія ўсіх рэсурсаў. Новы губернатар, як чалавек навукі, думаю, гэта добра разумее", - адзначыў Аляксандр Лукашэнка. На яго думку, у першую чаргу ад гэтых фактараў залежаць вынікі работы прадпрыемстваў і вырашэнне існуючых праблем.

Прэзідэнт падкрэсліў, што мае вострую патрэбу ў мадэрнізацыі матэрыяльна-тэхнічная база аграпрамысловага комплексу. У рэгіёне зменшылася колькасць выкарыстоўваемай сельгастэхнікі: трактароў - на 10%, камбайнаў - на 30%. "Таму даставайце ўсё, што можа перамяшчацца і працаваць, і аднаўляйце", - запатрабаваў Кіраўнік дзяржавы. Даручэнне аказаць падтрымку ў гэтым пытанні раней ён даў і беларускім прадпрыемствам.

Акрамя таго, ёсць і кадравая праблема. Шэраг фармальных паказчыкаў у кадравай рабоце звяртае на сябе ўвагу і выклікае трывогу, заявіў Аляксандр Лукашэнка. Толькі за апошнія пяць гадоў тройчы змяніліся кіраўнікі ў Шумілінскім і Аршанскім райвыканкамах, двойчы - у Браслаўскім, Талачынскім, Дубровенскім і Бешанковіцкім.

"Вам, Аляксандр Міхайлавіч, трэба будзе разабрацца ў прычынах такой сітуацыі і знайсці рашэнні, выбудаваць зладжана працуючую кадравую вертыкаль у вобласці. Адсутнасць сістэмнасці ў рабоце з кадрамі ў рэгіёне недапушчальна", - падкрэсліў Прэзідэнт.

Асобнае пытанне, паводле яго слоў, стагнацыя прамысловага комплексу вобласці. Вынікі тут застаюцца залежнымі ад двух прадпрыемстваў - "Нафтана" і "Віцебскэнерга".

"Відавочна, што без новых кропак росту праблемы не вырашыць. У Віцебшчыны ёсць свае ўнікальныя перавагі, якія недавыкарысталі. А значыць, павінны, але не даюць патрэбнай фінансавай аддачы. Гэта багатыя водныя і лясныя рэсурсы, шырокія плошчы прыродаахоўных тэрыторый, значныя мінеральна-сыравінныя запасы: гліністай сыравіны, даламіту, торфу, сапрапеляў - яны сёння, на шчасце, маюць патрэбу ў распрацоўцы і попыт на іх ёсць", - сказаў Аляксандр Лукашэнка.

Ён звярнуў увагу на высокі ўзровень лясістасці Віцебскай вобласці, што дае магчымасць развіваць дрэваапрацоўку. Гэты напрамак прыносіць істотны даход, адзначыў Прэзідэнт. У сувязі з гэтым Кіраўнік дзяржавы таксама нагадаў аб даручэнні вывесці на рэнтабельную работу прадпрыемства "Віцебскдрэў".

На думку Аляксандра Лукашэнкі, развітыя магутнасці нафтахімічнай прамысловасці павінны надаваць імпульс вытворчасці палімерных і будаўнічых матэрыялаў. А набытыя кампетэнцыі ў вытворчасці абутку, дывановых вырабаў, ільноперапрацоўцы, харчовай прамысловасці, прыбора- і станкабудаванні, тэкстыльнай і швейнай прамысловасці неабходна канверсаваць у рэальнае развіццё і рост аб'ёмаў вытворчасці і продажаў.

"Пастаўленая мной задача па рэалізацыі аднаго буйнога інвестыцыйнага праекта ў кожнай вобласці вельмі актуальна. Я думаю, Аляксандр Міхайлавіч "свой" праект прыдумае і створыць. Вядома, трэба завяршыць пачатыя праекты, якія прабуксоўваюць, адцягваюць на сябе народныя сродкі. Усе яны павінны пачаць працаваць на поўную моц і даць людзям дастойны кавалак хлеба, а дзяржаве - прыбытак," - падкрэсліў Прэзідэнт.

Размова ў першую чаргу ідзе пра аршанскі мясакамбінат і льнокамбінат, Мёрскі металапракатны завод і іншыя прадпрыемствы. Аляксандр Лукашэнка нагадаў аб сваім абяцанні пабываць у Мёрах і дэталёва азнаёміцца з работай новага завода. На поўную моц, дадаў ён, таксама павінен выйсці і мультымадальны прамыслова-лагістычны комплекс у пасёлку Балбасава.

Прэзідэнт выказаў занепакоенасць сітуацыяй у рэальным сектары эканомікі рэгіёна. "На жаль, сітуацыя ў рэальным сектары абласной эканомікі адмоўна ўплывае на дабрабыт грамадзян. Звярніце ўвагу на ўзровень даходаў насельніцтва. Па сярэдняй заработнай плаце вобласць знаходзіцца на апошніх месцах сярод рэгіёнаў. Зарплату меншую за 600 рублёў атрымлівае кожны пяты работнік. Як вы кадры будзеце ўтрымліваць? Гэтага быць не павінна", - падкрэсліў Аляксандр Лукашэнка.

Нядзіўна, што такія ўмовы непрывабныя для насельніцтва рэгіёна, адзначыў Прэзідэнт. "Задача новаму губернатару і вам - узняць давер жыхароў да абласной улады. Людзі павінны паверыць, што вы не толькі бачыце шляхі развіцця, але і здольны іх рэалізаваць", - дадаў Кіраўнік дзяржавы.

Новы старшыня Віцебскага аблвыканкама Аляксандр Субоцін у час яго прадстаўлення падкрэсліў, што ўступае на пасаду з поўным усведамленнем адказнасці і складанасці пастаўленых перад ім задач.

"Але, напэўна, самае важнае і тое, што мяне больш за ўсё натхняе, - тут мая радзіма, - дадаў Аляксандр Субоцін. - Я тут нарадзіўся, правёў лепшыя гады, вывучыўся. Тут жыве мая сям'я, ужо 10 гадоў, нягледзячы на ўсе мае перамяшчэнні, тут жывуць мае бацькі". Толькі гэтых асабістых акалічнасцей будзе дастаткова, каб імкнуцца палепшыць жыццё ў рэгіёне, лічыць губернатар. "Ніякага кантралёра не трэба. Калі маці падыдзе і скажа: "Сынок, нешта не тое робіцца", як я людзям у вочы буду глядзець? - заўважыў ён. - Давядзецца больш уважліва азірацца па баках і памятаць, што я па гэтай зямлі хадзіў, хаджу і буду хадзіць".

"Аляксандр Міхайлавіч, мама - гэта добра. Але ў яе ёсць недахоп - яна заўсёды нас пашкадуе. А я не пашкадую", - з гумарам адрэагаваў Прэзідэнт.

"Паверце, мама першая не пашкадуе. Каб не было сорамна глядзець людзям у вочы", - адказаў Аляксандр Субоцін.

"У яго было жаданне паехаць працаваць на радзіму. І я гэта цаню. Што ён рызыкнуў у складаны, няпросты час, - дадаў Прэзідэнт, расказваючы пра новага губернатара. - Калі я яму прапанаваў, ён нават слова не сказаў. Ён наогул старанны чалавек. І я вельмі хачу, каб у яго тут з вамі атрымалася. Усё будзе залежаць, па-першае, ад яго, і ад вас, па-другое. Ад гэтага калектыву, які перада мной сёння - паўтысячы чалавек - залежыць паўночны прыгажун - край нашай краіны, яго жыццё".

Аляксандр Лукашэнка, даючы наказ новаму губернатару, звярнуў увагу, што для дасягнення высокіх пастаўленых мэт яму давядзецца поўнасцю аддавацца рабоце, ажыццяўляць гэта нават на шкоду асабістым інтарэсам, менш часу праводзіць з сям'ёй. "Як толькі ты пачнеш самааддана працаваць, вось яны ўсе не будуць дрэнна працаваць - ім сорамна будзе. А віцябчане - людзі дастойныя, моцныя, і ў гэтым плане табе пашанцавала. Адданыя Віцебскай вобласці і Беларусі. Ёсць на каго абаперціся і табе, і мне таксама", - падкрэсліў Кіраўнік дзяржавы.

Прэзідэнт таксама зрабіў акцэнт на захаванні пераемнасці ў рабоце цяперашняга і ранейшага губернатараў: "Дзе б Мікалай Мікалаевіч ні працаваў, пакуль Аляксандр Міхайлавіч не скажа: "Усё, хопіць, я ў курсе справы, разбяруся сам", ты павінен быць тут, прыязджаць, дапамагаць, а недзе нешта і загрузіць на сябе. Гэта будзе ў скарбонку Беларусі".

Аляксандр Лукашэнка ў час сустрэчы таксама выказаўся пра работу пасля прыняцця абноўленай Канстытуцыі. Калі народ Беларусі на рэферэндуме падтрымае праект абноўленай Канстытуцыі, то за гэтым пойдзе вялікая і адказная работа, каб у шэрагу пытанняў па-новаму выбудаваць краіну.

"Важна, што будзе потым. Нам давядзецца пералапаціць сотні нарматыўна-прававых актаў. Трэба выбудаваць краіну ў цэлым. Не толькі ў плане нарматыўна-прававой культуры, але нам трэба будзе арганізацыйна дзе-нідзе па-новаму выбудаваць краіну. Гэта мая найважнейшая задача як Прэзідэнта. За мяне ніхто гэтыя пытанні не вырашыць. Я павінен арганізаваць гэту работу разам з Урадам, губернатарамі, старшынямі гар- і райвыканкамаў, разам з вамі - актывам. Для таго, каб краіна стабільна стаяла на тых апорах, на якіх павінна стаяць", - заявіў Кіраўнік дзяржавы.

"Упэўнены, калі вы крыху больш папрацуеце, паварушыцеся па-сапраўднаму, мы вырашым любыя праблемы. Ні ў адной краіне, я ўпэўнены, ні ў аднаго Прэзідэнта, як у мяне, няма такіх людзей, як вы", - падкрэсліў беларускі лідар.

Аляксандр Лукашэнка яшчэ раз звярнуў увагу: "Рэферэндум не пад Лукашэнку. Зразумейце вы нарэшце: не прагаласуюць людзі за змяненне Канстытуцыі, застанецца гэта, "аўтарытарная" Канстытуцыя - аб гэтай Канстытуцыі любы прэзідэнт будзе марыць".

Кіраўнік дзяржавы адзначыў, што пара пераразмеркаваць паўнамоцтвы паміж органамі ўлады, але ў той жа час важна не дапусціць разбалансіроўкі і канцэнтрацыі ўсіх паўнамоцтваў у адных руках. Беларусь павінна застацца маналітнай дзяржавай, каб у краіне не было двоеўладдзя.

"Я не хачу, каб нашы дзеці былі парабкамі. Мы прайшлі той шлях, калі з-пад бізуна не выходзілі, калі бегалі ў лапцях і працавалі на ўсіх, - падкрэсліў ён. - Я не хачу, каб тут была Рэч Паспалітая, як нашы суседзі гавораць, ад "можа да можа". Яны хочуць усю Беларусь у склад Польшчы. Не будзе гэтага. Гэта наша краіна".

Аляксандр Лукашэнка адзначыў, што ў суседніх дзяржавах - Польшчы, Літве, Латвіі, Украіне - шмат унутраных супярэчнасцей і праблем у эканоміцы і сацыяльнай сферы. За кошт канфлікту з Беларуссю яны так ці інакш спрабуюць вырашыць праблемныя пытанні ў сваіх краінах.

Беларусь жа заўсёды выступала за надзейнае супрацоўніцтва, прапаноўвала партнёрства ў розных галінах і хоча, каб у гэтых краінах усё складвалася добра, заявіў Прэзідэнт. Але іх улады прытрымліваюцца іншых мэт.

"Што за кіраўніцтва... Ці тое яшчэ будзе. Таму наша галоўная задача - трэба выстаяць, - падкрэсліў Аляксандр Лукашэнка. - Трымайце краіну. Будзе Лукашэнка, не будзе - гэта ваша краіна, мы з вамі яе выпесцілі за чвэрць стагоддзя і нікому не павінны аддаць".