Сустрэча з Надзвычайным і Паўнамоцным Паслом Кітая ў Беларусі Се Сяаюнам

Прэзідэнт Беларусі Аляксандр Лукашэнка 5 верасня сустрэўся з Надзвычайным і Паўнамоцным Паслом Кітая ў Беларусі Се Сяаюнам, які завяршае сваю дыпламатычную місію ў краіне.

"Мы вельмі сур'ёзную ўвагу ўдзялялі візіту вашага Прэм'ер-міністра ў Беларусь - Лі Цяна. Мы задаволены гэтым візітам. Вельмі шмат цяпер працуем ва Урадзе над пытаннямі развіцця адносін па тых пытаннях і праблемах, якія былі абазначаны ў час візіту Прэм'ер-міністра КНР", - заявіў Кіраўнік дзяржавы.

Аляксандр Лукашэнка асабліва адзначыў, што Прэм'ер Дзяржаўнага савета КНР вельмі высока ацаніў развіццё парка "Вялікі камень", чаму беларускі бок таксама ўдзяляе першараднае значэнне. Пастаянна расце колькасць рэзідэнтаў парка, што сведчыць аб вялікай цікавасці да яго кітайскіх таваравытворцаў і не толькі.

Прэзідэнт таксама падзякаваў кітайскаму боку за аказаную тэхнічную дапамогу. "Сіламі Кітайскай Народнай Рэспублікі мы заканчваем будаўніцтва двух сацыяльных аб'ектаў, якія будуць садзейнічаць і ўмацаванню здароўя нашага насельніцтва і будуць іміджавымі. Гэта плавальны басейн і стадыён, які, я вельмі спадзяюся, мы ў асноўным закончым у гэтым годзе", - сказаў ён.

Паводле слоў Аляксандра Лукашэнкі, у Беларусі хацелі б дасягнуць узроўню супрацоўніцтва з рэгіёнамі Кітая па аналогіі з тым, як гэта адбываецца ў міжрэгіянальным узаемадзеянні з Расіяй.

"Новая тэма ў нас з'явілася. Вельмі добра развіваецца з падачы Сі Цзіньпіна. Ён некалі на сустрэчы звярнуў маю ўвагу на рэгіёны Кітайскай Народнай Рэспублікі. Таму што, кажа, у нас некаторыя рэгіёны - гэта больш, чым асобныя дзяржавы ў свеце. І па насельніцтве, і па ВУП. Трыльёны долараў. Таму ў нас пачалося такое сур'ёзнае супрацоўніцтва з рэгіёнамі КНР", - адзначыў Кіраўнік дзяржавы.

"Мы таксама будзем уважліва да гэтага ставіцца і развіваць супрацоўніцтва з рэгіёнамі. Мы хацелі б, каб узровень гэтага супрацоўніцтва быў прыкладна такім, як у нас з рэгіёнамі Расійскай Федэрацыі. Гэта значыць, вопыт ужо ёсць паглыблення і пашырэння такога супрацоўніцтва", - дадаў Аляксандр Лукашэнка.

"Дзякую вам за тую каласальную падтрымку, якую вы аказалі нам пры ўступленні ў Шанхайскую арганізацыю супрацоўніцтва. За тую падтрымку, якую вы аказваеце нам па супрацоўніцтве з краінамі БРІКС. У бліжэйшы час у Казані адбудзецца сур'ёзная нарада краін БРІКС і партнёраў, на якой мы таксама будзем прысутнічаць", - сказаў Кіраўнік дзяржавы.

"Хачу Вас папрасіць, перадайце майму сябру, вельмі блізкаму майму сябру, - Старшыні КНР Сі Цзіньпіну самыя добрыя пажаданні. Здароўя яму, даўгалецця. Асабліва палітычнага. Гэта чалавек, якога ў Беларусі не толькі ведаюць, але і любяць. І я вельмі рады, што ў нас устанавіліся такія добрыя і цёплыя адносіны", - сказаў беларускі лідар.

Ён таксама адзначыў уклад пасла ў развіццё двухбаковых адносін. "Вы можаце прыязджаць у Беларусь без усялякіх віз. Вы ніколі не будзеце госцем. Прыязджайце як у сваю краіну, мы з задавальненнем будзем Вас сустракаць. Дзякуй Вам вялікі за ўсё тое, што Вы зрабілі за час работы паслом у Беларусі", - падзякаваў Аляксандр Лукашэнка.

Прэзідэнт падкрэсліў, што за час работы ў Беларусі Се Сяаюн стаў узорам паводзін пасла ў краіне знаходжання. "Я не мог з Вамі не сустрэцца. Перш за ўсё хачу Вам выказаць удзячнасць за ўсё тое, што вы зрабілі для нашай краіны. Вы рабілі ўсё для таго, каб умацаваць нашы адносіны з Кітаем, хоць яны і так былі на вельмі высокім узроўні, - сказаў Кіраўнік дзяржавы. - Вы вельмі сур'ёзна папрацавалі разам з намі, і мы падпісалі дэкларацыю аб усепагодным усебаковым стратэгічным партнёрстве Беларусі і Кітайскай Народнай Рэспублікі. Гэта вельмі высокі, напэўна, самы высокі ўзровень адносін паміж дзяржавамі, з якімі Кітайская Народная Рэспубліка мае адносіны".

Што датычыцца фундаменту адносін, Аляксандр Лукашэнка адзначыў, што гандлёвы абарот паміж Беларуссю і Кітаем складае амаль $8 млрд. Такім чынам, Кітай для Беларусі ў гандлі з'яўляецца другім партнёрам пасля Расіі.

Се Сяаюн у сваю чаргу перадаў Кіраўніку беларускай дзяржавы сардэчнае прывітанне ад Старшыні КНР Сі Цзіньпіна і таксама ад Прэм'ера Дзяржсавета Лі Цяна.

"Я прапрацаваў у Беларусі больш за 1400 дзён, гэта значыць 4 гады. І я ўвесь гэты час адчуваў глыбокія і моцныя дружалюбныя пачуцці беларускага народа да мяне і пасольства Кітая ў Беларусі. Ганаруся тым, што быў накіраваны ў якасці пасла ў дружалюбную Беларусь і стаў сведкам і ўдзельнікам гістарычнага працэсу развіцця кітайска-беларускіх адносін", - адзначыў Се Сяаюн.

Пасол таксама падкрэсліў важнасць таго, што кітайска-беларускія адносіны выйшлі на новую гістарычную вышыню.

Ён звярнуў увагу, што за апошнія 4 гады Аляксандр Лукашэнка і Сі Цзіньпін чатыры разы правялі сустрэчы, намецілі план і абазначылі курс развіцця двухбаковых адносін.

Менавіта дзякуючы асабістаму клопату і пад стратэгічным кіраўніцтвам Старшыні КНР і Прэзідэнта Беларусі кітайска-беларускія адносіны падтрымліваюць добрую дынаміку развіцця і дасягнулі беспрэцэдэнтна высокага ўзроўню - усепагоднага і ўсебаковага стратэгічнага партнёрства.