Сустрэча з Апостальскім нунцыем Антэ Ёзічам

Прэзідэнт Беларусі Аляксандр Лукашэнка 23 жніўня сустрэўся з Апостальскім нунцыем Антэ Ёзічам, які завяршае сваю місію ў Беларусі.

"Мне з Вамі лёгка размаўляць як прадстаўніком рэлігійнай канфесіі, адной з асноўных у Беларусі, таму што нашы погляды - кіраўніцтва Беларусі і Ватыкана - практычна супадаюць, асабліва па пытаннях бяспекі. Бяспекі ў Еўропе. Пазіцыі абсалютна сугучныя. І гэта паказвае канфлікт ва Украіне, дзе мы займаем практычна аднолькавую пазіцыю, - сказаў Прэзідэнт. - Я з Вамі абсалютна згодны, і мы даўно аб гэтым гаворым: Еўропе, каб жыць спакойна і жыць так, як мы жывём (як бы мы ні плакаліся, жывём нядрэнна), - нам патрэбны новы дагавор аб міры, патрэбны новы мір, калі можна так сказаць, у Еўропе".

"Але для гэтага, думаю, што актыўнасці нашай царквы каталіцкай недастаткова. Трэба яшчэ, каб у еўрапейскіх краінах былі моцныя кіраўнікі, якія зыходзілі б з таго, што трэба бачыць інтарэсы і сваіх народаў. Не толькі падначальвацца і дзеля некага дзейнічаць. Трэба бачыць інтарэсы сваіх народаў. На жаль, няхай яны на мяне не пакрыўдзяцца, я такіх не бачу", - дадаў беларускі лідар.

Аляксандр Лукашэнка ахарактарызаваў самога Антэ Ёзіча як чалавека разумнага, адукаванага і вельмі дзейнага, хуткага і актыўнага. Пры гэтым таксама і добразычлівага.

"Нягледзячы на пэўныя абмежаванні, а на вашай пасадзе яны заўсёды ёсць (я гэта добра ведаю, паколькі сам накіроўваю сваіх паслоў у замежныя краіны), вы былі чалавекам прыстойным. Таму мне прыемна з вамі сустрэцца", - сказаў Кіраўнік дзяржавы.

Ён падзякаваў Антэ Ёзічу за дапамогу, аказаную пры вызваленні трыццаці беларускіх нашых грамадзян пасля пачатку СВА ва Украіне. "Мы гэта вельмі цэнім і будзем памятаць", - падкрэсліў Аляксандр Лукашэнка.

Прэзідэнт згадаў і пра свае кантакты з кіраўнікамі Святога Прастола. "Я з вялікай цеплынёй успамінаю свае сустрэчы з Папам Рымскім. Мне пашанцавала - усе кіраўнікі Каталіцкай царквы, з якімі я сустракаўся, былі таксама вельмі сур'ёзнымі і прыстойнымі людзьмі", - адзначыў ён.

Аляксандр Лукашэнка папрасіў Антэ Ёзіча падрыхтаваць будучага пасланніка Папы Рымскага ў Беларусі. "Каб ён быў лепшы, чым папярэдні - у гэтым сутнасць прагрэсу. Але мы будзем задаволены, калі новы пасланнік Папы Рымскага будзе такі, як Ёзіч. Мы абсалютна згодны з гэтым. Яшчэ раз паўтараю: мне прыемна з Вамі сустрэцца, абмеркаваць тыя пытанні, якія, магчыма, назбіраліся ў адносінах паміж Беларуссю і Ватыканам і таксама ў Каталіцкай царквы ў Беларусі", - дадаў Прэзідэнт.

Дыпламат Ватыкана падзякаваў за высокую ацэнку яго работы ў Беларусі. "Усё, што рабіў, вядома, я пасланнік папы Францыска, але я працаваў для вашага грамадства. Не толькі для католікаў, не толькі нашай царквы, а для ўсіх. І мне было вельмі прыемна", - сказаў ён.

Антэ Ёзіч адзначыў, што кожны год прыязджаў у Ватыкан і сустракаўся з Папам Рымскім. Калі я заходзіў у дзверы, ён сказаў: "А як Лукашэнка?" Не "банджорна" (добры дзень на італьянскай мове. - Заўвага), не добры дзень, а "як Лукашэнка?" Я заўважыў, што паміж вамі ёсць пэўныя добрыя адносіны, якія склаліся на важных добрых прынцыпах", - расказаў Апостальскі нунцый.