Нарада па міжнародных пытаннях

Прэзідэнт Беларусі Аляксандр Лукашэнка 29 ліпеня сабраў нараду па міжнародных пытаннях.

У пачатку мерапрыемства Кіраўнік дзяржавы звярнуў увагу, што міжнародны парадак дня застаецца вельмі напружаным. Графік міжнародных сустрэч апошнім часам даволі насычаны. "Усё гэта патрабуе значнай канцэнтрацыі ўвагі на праведзеных і будучых мерапрыемствах", - растлумачыў Прэзідэнт неабходнасць правядзення нарады.

Аляксандр Лукашэнка адзначыў, што ў Беларусі прымаюцца правільныя рашэнні па наладжванні супрацоўніцтва з замежнымі краінамі, выбудоўваюцца адносіны на доўгатэрміновую перспектыву. У той жа час Прэзідэнт раскрытыкаваў Урад за недастатковую эфектыўнасць, настойлівасць пры рэалізацыі тых або іншых дамоўленасцей, дасягнутых на вышэйшым узроўні.

"Давайце дамовімся, што роля Прэзідэнта, як вобразна кажуць, - адкрыць акно ў тым ці іншым напрамку, стварыць агульную аснову, фундамент для будучых дамоўленасцей членаў Урада і Прэм'ер-міністра. А ўжо Урад (кіруемы Міністэрствам замежных спраў пад кантролем Адміністрацыі Прэзідэнта) павінен рэалізоўваць тыя ці іншыя дамоўленасці. Не гаворачы ўжо аб вашых дамоўленасцях - членаў Урада, - якіх вы дасягаеце ў працэсе сваіх паездак", - арыентаваў Кіраўнік дзяржавы.

"Турыстычных паездак быць не павінна. Ніякага турызму. Павінен быць вынік", - падкрэсліў Аляксандр Лукашэнка. Мэта гэтай нарады, паводле слоў Прэзідэнта, - зверыць гадзіннікі, прадумаць крокі на бліжэйшую перспектыву і дзеянні па выкананні тых дамоўленасцей, якія былі дасягнуты ў выніку візітаў у асобныя краіны.

Аляксандр Лукашэнка расказаў аб выніках перагавораў з Прэзідэнтам Расіі Уладзімірам Пуціным, якія прайшлі на востраве Валаам.

Прэзідэнт падкрэсліў, што з яго боку выбудаваны трывалы фундамент адносін з Расіяй, вырашаны як стратэгічныя пытанні (і па асноўных напрамках прыняты рашэнні), так і тактычныя. А ўжо далей перад Урадам стаіць задача развіваць супрацоўніцтва і прадметна дамаўляцца па тых ці іншых аспектах.

Аляксандр Лукашэнка адзначыў, што ў ліку пытанняў, якія заставаліся нявырашанымі на ўзроўні Урада і абмяркоўваліся на сустрэчы прэзідэнтаў дзвюх краін, былі тры асноўныя: новая формула цэнаўтварэння на нафту, утылізацыйны збор і перадаплата за нафту. "Вы паставілі, як звычайна бывае, нявырашаныя вамі з Урадам Расіі пытанні (а павінны былі вырашыць) - па нафтаформуле (новай формуле цэнаўтварэння), другое пытанне - утылізацыйны збор і трэцяе пытанне - аб перадаплаце за нафту", - звярнуўся Прэзідэнт да ўдзельнікаў нарады.

"Усе гэтыя пытанні мы абмеркавалі з Прэзідэнтам Пуціным. Больш таго, мы дамовіліся аб тым, што я сёння-заўтра (у залежнасці ад таго, як вы гэта падрыхтуеце) накірую яму пісьмовае пасланне, пісьмо, з выкладаннем сутнасці гэтых трох пытанняў", - растлумачыў Кіраўнік дзяржавы.

Напрыклад, што датычыцца перадаплаты за нафту, якую ў асноўным пастаўляе ў Беларусь кампанія "Раснафта", то гэта нават абурыла Прэзідэнта Расіі. "Гэтага быць не можа! Якая перадаплата? Усё жыццё працавалі без перадаплаты - зможам і далей працаваць", - перадаў беларускі лідар рэакцыю расійскага калегі.

Цэнтральнае месца ў парадку дня перагавораў займалі таксама пытанні забеспячэння бяспекі. "Яны закрыты характар насілі, - адзначыў Прэзідэнт. - Усе сілавыя структуры і міністры падключаны, Міністэрства замежных спраў - па пэўных пытаннях".

"Вось сутнасць гэтых перагавораў. Я яшчэ раз падкрэсліваю: узаемаразуменне знойдзена па ўсіх пытаннях, непрымання ніякага няма", - заявіў Аляксандр Лукашэнка.

"Восенню, напярэдадні 25-годдзя Дагавора аб стварэнні Саюзнай дзяржавы, у Мінску адбудуцца ўсе важнейшыя мерапрыемствы - і саюзны Саўмін, і Вышэйшы дзяржаўны савет. З Прэзідэнтам (Расіі. - Заўвага) мы дамовіліся, што да гэтага моманту павінны быць закрыты ўсе праблемныя пытанні - і па лініі саветаў бяспекі (дагавор аб гарантыях бяспекі. - Заўвага), і па тэмах Урада, - падкрэсліў беларускі лідар. - Усе пытанні павінны быць вырашаны да пачатку 4 квартала".

Звяртаючыся да Прэм'ер-міністра Рамана Галоўчанкі, Прэзідэнт звярнуў увагу: "Акрамя бягучага парадку дня (утылізацыйны збор, лакалізацыя па легкавых аўтамабілях, нафтаперапрацоўка) Вам не трэба забываць аб стратэгічных задачах новых галін і кампетэнцый для беларускай эканомікі - авіябудаванне, мікраэлектроніка, станкабудаванне". Сітуацыя, паводле слоў Аляксандра Лукашэнкі, склалася такім чынам, што расіяне адкрыты для супрацоўніцтва з Беларуссю, і ёсць магчымасць для краіны асвоіць, разам з космасам і атамнай энергетыкай, новыя кампетэнцыі, якія маюць важнейшае значэнне для будучага развіцця дзяржавы. "Задзелы ў гэтым напрамку - і ў авіябудаванні, і ў мікраэлектроніцы, і асабліва ў станкабудаванні - у нас ёсць", - падкрэсліў Кіраўнік дзяржавы.

Прэзідэнт звярнуў увагу, што ў расійскіх прадпрыемстваў вельмі высокі інтарэс да айчыннай прадукцыі машынабудавання, але для яго захавання ў будучым неабходна ўжо цяпер укладвацца ва ўдасканаленне тэхналогій, асваенне новых, больш сучасных вырабаў. "Трэба рухацца наперад. Расіяне ж выдзяляюць для гэтага сродкі. Толькі трэба разумна падыходзіць да гэтага і асвойваць", - арыентаваў Аляксандр Лукашэнка.

"Вы памятаеце аб маёй дамоўленасці з Прэзідэнтам Пуціным у ходзе яго апошняга наведвання Мінска. "Беларусь павінна быць незалежнай, самадастатковай краінай з устойлівай эканамічнай асновай", - гэта яго словы", - сказаў Кіраўнік дзяржавы. Па гэтых напрамках эканамічнага ўзаемадзеяння з Расіяй на нарадзе павінны прагучаць даклады віцэ-прэм'ера Пятра Пархомчыка, а таксама новых міністраў і пасла ў Расіі.

Аляксандр Лукашэнка звярнуў асаблівую ўвагу ўдзельнікаў мерапрыемства на тое, з якімі канкрэтнымі вынікамі для простых людзей прыйдзе Саюзная дзяржава да свайго юбілею. Прэзідэнт нагадаў аб даручэнні на пляцоўцы Пастаяннага камітэта СД комплексна прааналізаваць усе аспекты забеспячэння роўных правоў грамадзян і паставіў задачу звяртаць больш увагі на вырашэнне паўсядзённых праблем, з якімі да гэтага часу сутыкаюцца грамадзяне Беларусі і Расіі. На гэта ў першую чаргу трэба арыентаваць Пастаянны камітэт СД пад кіраўніцтвам Дзмітрыя Мезенцава, перакананы Прэзідэнт.

"Зроблена нямала, але і праблем хапае", - заўважыў Кіраўнік дзяржавы і назваў некаторыя з іх: надгляды ў аэрапортах, не адменены да гэтага часу роўмінг, немагчымасць купіць чыгуначныя білеты ў святочныя дні (не хапае цягнікоў). "Гэта чые пытанні?" - звярнуўся да прысутных Прэзідэнт.

Аляксандр Лукашэнка таксама закрануў тэму стварэння медыяхолдынга Саюзнай дзяржавы, адзначыўшы, што гэту работу трэба значна актывізаваць.

Кіраўнік дзяржавы нагадаў, што на саміце ШАС у ліпені бягучага года ў Астане Беларусь выступіла ў новым статусе - члена гэтай арганізацыі. Праведзены шэраг двухбаковых сустрэч. "Добрыя былі сустрэчы. Там дасягнуты былі і канкрэтныя дамоўленасці. Давайце іх рэалізоўваць", - адзначыў беларускі лідар.

"Трэба неадкладна вызначыць стратэгію руху да мэт, якія мы намецілі, - падкрэсліў Прэзідэнт. - І рабіць гэта трэба па гарачых слядах. Адкрываюцца каласальныя перспектывы. Перш за ўсё - дадатковыя магчымасці доступу на велізарны рынак тавараў і паслуг, абмен вопытам, прыцягненне інвестыцый. І галоўнае - дыверсіфікацыя лагістыкі і разлікаў, зніжэнне палітычных рызык. Усе беларускія ініцыятывы я абазначыў у Астане".

Аляксандр Лукашэнка прывёў у якасці прыкладу развіццё супрацоўніцтва з Пакістанам. З Прэм'ер-міністрам гэтай краіны Шахбазам Шарыфам Кіраўнік дзяржавы таксама правёў перагаворы на палях саміту ШАС у Астане. "Прэм'ер адкрыта сказаў: вось нас вельмі гэта цікавіць, нам гэта патрэбна… Калі ласка, прыедзьце да нас у Пакістан. Мы дамовіліся, што недзе ў канцы года я з візітам буду ў Пакістане. Да гэтага часу трэба мець пэўныя напрацоўкі. Пакістан - 200 з лішнім мільёнаў чалавек. Што больш трэба?" - сказаў Аляксандр Лукашэнка.

Кіраўнік дзяржавы адзначыў, што Беларусь запрошана на саміт БРІКС, які хутка пройдзе ў Казані. Гэта сур'ёзная структура аб'ядноўвае магутнейшыя дзяржавы планеты, ахоплівае больш за 40% насельніцтва Зямлі, заўважыў Прэзідэнт. "І мы зацікаўлены ўключыцца ў інтэграцыйныя працэсы на гэтай прасторы, - заявіў Аляксандр Лукашэнка. - БРІКС - яшчэ адна апора, з дапамогай якой мы зможам захоўваць раўнавагу і эканамічную ўстойлівасць".

Прэзідэнт даручыў МЗС сфарміраваць план беларускага ўдзелу на гэтай пляцоўцы і яго двухбаковых сустрэч.

Адным з членаў БРІКС з`яўляецца і Паўднёва-Афрыканская Рэспубліка, у развіцці супрацоўніцтва з якой Кіраўнік беларускай дзяржавы таксама бачыць перспектывы. "Сёння толькі мне Калаур (Старшыня праўлення Нацбанка. - Заўвага) далажыў аб паездцы ў Паўднёва-Афрыканскую Рэспубліку. Я таксама неяк ставіўся да гэтага: думаю, ПАР - у іх пэўная арыентацыя (у знешняй палітыцы. - Заўвага), ведаеце, якая. Але не тое што ніякага непрымання - ёсць просьба, каб мы працавалі ў ПАР. Развітая, нябедная краіна", - сказаў Прэзідэнт.

Аляксандр Лукашэнка такім чынам адзначыў, што да пераліку партнёраў Беларусі на Афрыканскім кантыненце можна дабавіць і ПАР. А гэта, напрыклад, Экватарыяльная Гвінея і Нігерыя на захадзе кантынента, Кенія - на ўсходзе, Зімбабвэ і Мазамбік - на поўдні.

"Не трэба расплывацца па ўсіх кантынентах. Я яшчэ раз гавару: у нас не тая эканоміка, каб глабалізмам займацца, трэба вызначыцца ў кожнай кропцы, чым мы будзем займацца, і зрабіць гэта", - падкрэсліў беларускі лідар.

Гаворачы пра саміт БРІКС, Аляксандр Лукашэнка адзначыў наяўнасць ініцыятывы дэлегатаў Усебеларускага народнага сходу аб падрыхтоўцы ад імя УНС звароту аб міры і ўнясенні яго на разгляд у БРІКС. "Вывучыце, далажыце", - даручыў ён.

"Заяўлены шэраг важнейшых візітаў у Беларусь. Хутка, як вы ведаеце, да нас прыбудзе Прэм'ер Дзяржсавета КНР Лі Цян. Першы віцэ-прэм'ер Снапкоў даложыць аб выпрацоўцы перагаворнай пазіцыі ў развіццё маіх дамоўленасцей з Сі Цзіньпінам", - сказаў Кіраўнік дзяржавы.

Прытым на перагаворах у Астане, расказаў Аляксандр Лукашэнка, лідары краін не абмяркоўвалі канкрэтныя пытанні, толькі абазначылі іх. "На што Сі Цзіньпін сказаў: "Вы не адштурхоўвайцеся толькі ад перагавораў са мной. Прыедзе Прэм'ер-міністр - усе канкрэтныя пытанні ў яго кампетэнцыі, і мы павінны іх вырашыць", - падзяліўся падрабязнасцямі Кіраўнік беларускай дзяржавы.

Ён канстатаваў, што пакуль у дакладах адказных асоб часта ёсць шмат размоў, але некаторыя канкрэтныя справы не вырашаюцца.

Аляксандр Лукашэнка таксама нагадаў аб праведзеных важнейшых візітах урадавай дэлегацыі ў Лацінскую Амерыку і Міністра замежных спраў у КНДР. "Паслухаем аб стратэгіі", - сказаў ён.