Селектарная нарада па пытаннях уборачнай кампаніі і пераадолення наступстваў стыхіі

Прэзідэнт Беларусі Аляксандр Лукашэнка 19 ліпеня сабраў селектарную нараду.

На парадку дня былі два асноўныя пытанні - ход бягучай уборачнай кампаніі і пераадоленне наступстваў стыхіі, якая апошнім часам закранула шэраг рэгіёнаў краіны.

У Палацы Незалежнасці ў Мінску і па відэасувязі ў селектарнай нарадзе прынялі ўдзел вышэйшыя службовыя асобы, кіраўнікі Урада і Адміністрацыі Прэзідэнта, шэрага міністэрстваў і ведамстваў, упаўнаважаныя Кіраўніка дзяржавы ў абласцях і горадзе Мінску, кіраўнікі аблвыканкамаў і ўсіх раёнаў краіны.

"Давайце па-рабочаму правядзём нашу нараду. Галоўнае не ў тым, якія ў вас там працэнты. Гэта важна, але яны ніколі дакладнымі не бываюць. Па розных прычынах, у тым ліку і суб'ектыўных. Таму па-дзелавому: чаго не хапае, якая патрэбна дапамога. З наступнага тыдня па ўсіх пытаннях, якія будуць узняты, будзе кантроль за выкананнем. Гэта галоўнае. Таму што атрымліваецца так: мы з вамі сабраліся, пагаварылі, нібыта вы бойка мне - і міністры, і члены Урада, і іншыя на месцах - далажылі, як мы гераічна пачалі працаваць, а потым аказваецца, што не зусім так. Таму па-дзелавому, канкрэтна і галоўнае - недахопы", - падкрэсліў Аляксандр Лукашэнка.

Кіраўнік дзяржавы адзначыў, што цяпер настаў вырашальны этап летняй уборачнай кампаніі. "У гэтым годзе, нягледзячы на некаторыя абставіны, у нас сітуацыя павінна быць значна лепшая, чым у мінулыя гады. Асабліва на ўборцы ўраджаю і нарыхтоўцы травяных кармоў. Ужо так, як сёлета, сельскую гаспадарку мы ніколі не падтрымлівалі, можна сказаць, у гісторыі наогул. І тэхніка была перададзена, і пытанні фінансавыя, матэрыяльныя вырашаны. Калі недзе нехта нешта недапрацаваў - мы і сабраліся, каб абмеркаваць. Папярэджваю ўсіх: адказнасць будзе вельмі сур'ёзная. Таму мы і вырашылі правесці селектарную нараду. Прычына перш за ўсё ў тым, што ў нас сёння ў полі небывалы ўраджай", - заявіў Прэзідэнт.

Паводле яго слоў, ураджайнасць чакаецца значна вышэйшая за мінулагоднюю. Як дакладваюць Прэзідэнту, валавы збор каласавых складзе амаль 10 млн т. Разам з тым Аляксандр Лукашэнка падкрэслівае: гэта павінен быць мінімум. "10 мільёнаў - гэта нядрэнна, але гэта ніжняя мяжа. Усё, што звыш дзесяці, - гэта добра. 11 - вельмі добра. Таму трэба імкнуцца да таго, каб мець у гэтым годзе 11 мільёнаў тон і атрымаць добры ўраджай. І не толькі каласавых, але і рапсу", - звярнуў увагу Аляксандр Лукашэнка.

"Аднак гэта ў тэорыі. Хлябы пакуль па большай частцы стаяць на палях, іх трэба ўбраць хутка. Прычым хутка і без страт. Як заўсёды. Тады і ўсе патрэбнасці ў збожжы на год наперад закрыем, кармавую базу забяспечым і на імпарце сэканомім валюту. Больш таго, і рэзерв пэўны створым на будучы год. Як звычайна, у нас ёсць падводныя камяні", - заўважыў Прэзідэнт.

Аб умовах надвор'я і гаспадарчым падыходзе

Кіраўнік дзяржавы звярнуў увагу, што ўмовы надвор'я такія, што тэрміны развіцця раслін апярэджваюць мінулагоднія прыкладна на 10-12 дзён. Значыць, зрушыліся і тэрміны ўборкі.

"Мы вымушаны будзем убіраць адначасова некалькі культур, ды яшчэ само жніво накладваецца на нарыхтоўку траў другога і трэцяга ўкосаў, а таксама на сяўбу азімых крыжакветных. Што рабіць у гэтай сітуацыі, вопыт таксама ў нас ёсць, нічога прыдумваць не трэба. Патрэбны высокая арганізацыя работ, добрая матывацыя аграрыяў і жалезная дысцыпліна. Пакуль - нават тое, што я бачу простым вокам, - мы гэтага не маем", - падкрэсліў Аляксандр Лукашэнка.

Ён заўважыў, што гаспадарчае стаўленне нават, здавалася б, да штодзённых рэчаў, дапаможа значна сэканоміць фінансавыя рэсурсы. Напрыклад, калі не ганяць штодзень туды-сюды камбайны праз усю тэрыторыю гаспадаркі, а забяспечыць іх абслугоўванне і ахову на палях, то ўдасца зберагчы тысячы і тысячы долараў.

"Я чаму так строга стаўлю пытанне. У нас сельская гаспадарка не прыватная, ды і прыватнікам мы ж дапамагаем, такія датацыі сельскай гаспадарцы даём. Вы ж прасілі, плакалі, што вам патрэбны тэхніка, камбайны, трактары, угнаенні. Наколькі толькі магчыма і немагчыма, мы вам гэта далі. Дык мае дзяржава права спытаць? Мае. Выконвайце", - запатрабаваў Прэзідэнт.

Ён таксама звярнуў увагу на недапушчальнасць страт збожжа пры ўборцы ўраджаю: "Мы ад элементарнага можам атрымаць каласальны грашовы эфект".

"Таксама неабходна аператыўная каардынацыя ўсіх дзеянняў на ўсіх узроўнях кіравання. Гэта датычыцца ў тым ліку і МУС, і МНС", - дадаў Аляксандр Лукашэнка.

Аб ўстараненні парушэнняў

Асаблівая роля ва ўборачнай кампаніі адводзіцца Камітэту дзяржаўнага кантролю і Генеральнай пракуратуры. Паводле існуючых даных, ёсць цэлы букет розных парушэнняў: крадзяжы, карупцыя, прыпіскі, негатоўнасць тэхнікі і зернесушыльных комплексаў і іншыя. "Негатоўнасць камбайна, хоць аднаго, або сушылкі - гэта злачынства", - папярэдзіў Кіраўнік дзяржавы.

Паводле інфармацыі МУС, ужо ў час пасяўной кампаніі бягучага года выяўлены 142 злачынствы. У асноўным крадуць паліва. Супрацоўнікамі міліцыі канфіскавана больш за 50 т паліва, 14 т збожжа, 17 т камбікармоў, 7 т угнаенняў, 50 л сродкаў аховы раслін. Таксама задакументавана 29 фактаў атрымання хабару службовымі асобамі прадпрыемстваў АПК.

Так, узбуджана крымінальная справа ў дачыненні да начальніка Пастаўскага вытворчага ўчастка і тэхніка-лабаранта Полацкага камбіната хлебапрадуктаў, якія за два дні ўчынілі крадзеж 9 т збожжа пшаніцы.

Аб гатоўнасці тэхнікі

Актуальнай праблемай застаецца гатоўнасць тэхнікі. "Хай сабе 2% машын не змаглі давесці да розуму. Але, як адзначае Камітэт дзяржкантролю, з правераных па рэспубліцы сельгасарганізацый практычна ў кожнай пятай зернесушыльныя комплексы не гатовы да работы. А куды ўпаўнаважаныя, а куды памочнікі (Прэзідэнта. - Заўвага) глядзяць? Некаторыя факты з пазіцыі рацыянальнай логікі наогул растлумачыць немагчыма", - заявіў Прэзідэнт.

Напрыклад, у ААТ "Мядзелаграсэрвіс" на пачатак уборкі былі няспраўнымі тры з сямі збожжаўборачных камбайнаў, у чатырох не пройдзены дзяржтэхагляд. Пры гэтым збожжаўборачны камбайн "Дон-1500Б" 2005 года выпуску ўвогуле не быў зарэгістраваны ў органах Дзяржтэхнагляду.

"Гэта як зразумець? Калі райаграсэрвіс у сваёй роднай гаспадарцы не можа выдаць стапрацэнтную гатоўнасць тэхнікі, што мы можам патрабаваць ад іншых? - спытаў Кіраўнік дзяржавы. - Некаторыя ўжо забылі, што 2024 год мы аб'явілі Годам якасці. І размова не толькі пра тэхніку. Ужо на пачатковым этапе ўборачнай кампаніі ўстаноўлены факты няякаснай уборкі ўраджаю".

Паводле яго слоў, такія парушэнні зафіксаваны ў асобных гаспадарках Івацэвіцкага, Жабінкаўскага, Камянецкага, Столінскага, Светлагорскага, Карэліцкага, Навагрудскага, Валожынскага, Асіповіцкага раёнаў.

Аналагічная сітуацыя з працоўнай і тэхналагічнай дысцыплінай на нарыхтоўцы кармоў. У многіх гаспадарках не праведзена падкормка азотнымі ўгнаеннямі шматгадовых траў пасля першага ўкосу, што адмоўна паўплывае на іх ураджайнасць з другога ўкосу.

Аб праблемных пытаннях

"Хачу пачуць слушныя даклады па праблемных пытаннях. Якое становішча ў рэгіёнах з кадрамі: вадзіцелі, механізатары, камбайнеры? Я ж яшчэ зімой папярэджваў, што ў кожнага губернатара на стале павінен ляжаць план па прыцягненні механізатарскіх кадраў. Прамысловасць і горад павінны падставіць плячо, таму што людзей з вёскі мы як пыласосам выцягваем. Што мы маем на сённяшні дзень з гатоўнасцю збожжаўборачных камбайнаў, сушыльнай і зернеачышчальнай гаспадаркі? Барані бог у якой-небудзь гаспадарцы мы знойдзем камбайн, які стаіць і не працуе па нейкіх прычынах, а яшчэ горш зернесушылку. Як складваецца сітуацыя на месцах, якія пытанні патрабуюць неадкладнага вырашэння? Што трэба зрабіць, каб паставіць на лінейку гатоўнасці неабходны парк тэхнікі?" - абазначыў тэмы для размовы Прэзідэнт.

Таксама Аляксандр Лукашэнка пацікавіўся ва Урада і кіраўнікоў абласцей, якую дапамогу аказваюць аграрыям вытворцы сельскагаспадарчай тэхнікі.

"Ці ёсць праблемы ў яе эксплуатацыі, абслугоўванні? Як вырашаюцца пытанні забеспячэння палівам? Ці вырашаны ўсе пытанні пастаўкі сельскагаспадарчай прадукцыі па дзяржзаказе? Мяркую, што ў бягучым годзе праблем з нарыхтоўкай харчовага збожжа не павінна быць. Трэба аператыўна ўсё заказанае збожжа прыняць, своечасова за яго разлічыцца. Для гэтага ўсё ёсць. Прыёмка збожжа павінна быць кругласутачнай", - запатрабаваў Кіраўнік дзяржавы.

"Мы таксама абавязаны дапамагчы ўбраць ураджай на асабістых падворках грамадзян. Тут галоўныя адказныя - райвыканкамы, сельсаветы і кіраўнікі гаспадарак. Майце на ўвазе: падмануць або ўтаіць якія-небудзь факты не атрымаецца. Гатовы выслухаць любыя пытанні, якія патрабуюць вырашэння на рэспубліканскім узроўні", - рэзюмаваў беларускі лідар.

У час нарады Кіраўнік дзяржавы запатрабаваў перш за ўсё далажыць на злобу дня: як устараняюцца наступствы стыхіі ў рэгіёнах.

"Людзі да гэтага часу крыўдзяцца: тое не зроблена, гэта не зроблена. Вы ведаеце, што раніцай і вечарам я пастаянна быў на сувязі з членамі ўрада, міністрамі, якія гэтым займаліся. Даручыў паглядзець, што не зроблена, як рэагуюць людзі, што Камітэт дзяржкантролю, што старшыня Камітэта дзяржбяспекі далажылі аб існуючых праблемах", - заявіў Аляксандр Лукашэнка.

Разам з тым ён заўважыў, што ёсць такія грамадзяне, для якіх усё заўсёды будзе дрэнна. "Людзі не хочуць разумець, што гэта надзвычайная сітуацыя. Вайна проста, толькі няма стральбы з аўтаматаў і кулямётаў. Тое ж самае, што на вайне. І ніхто не задаецца пытаннем: а што ты зрабіў для таго, каб пераадолець гэту катастрофу?" - адзначыў Прэзідэнт.

Ён звярнуў увагу, што ёсць грамадзяне, якія дапамагаюць прыбіраць завалы і дрэвы, што ўпалі, аказваюць садзейнічанне работнікам камунальных службаў. "Сапраўдныя мужыкі", - ахарактарызаваў іх кіраўнік дзяржавы. З іншага боку, ёсць і такія, якія чакаюць, што ўлады вырашаць усе праблемы, і пальцам не варухнуць.

"Гэта мае прэтэнзіі як Прэзідэнта да людзей. Але ж, калі ў цэлым паглядзець, ёсць вялікая колькасць недахопаў. Гэта наша хвароба: бравурныя даклады - вось там добра, там добра. Навошта вы мне хлусіце? Я ж пераправеру, вы гэта ведаеце", - папярэдзіў Аляксандр Лукашэнка.

У ходзе нарады Прэзідэнт таксама выказаў крытыку за адсутнасць адэкватнай рэакцыі на наступствы стыхіі на першым этапе.

"Ніякай рэакцыі, акрамя звычайнай рэакцыі энергетыкаў. Адэкватнай рэакцыі на гэту падзею - хуткай, зладжанай, ваеннай - не было. Вельмі дрэнная работа па папярэджванні і ў першыя гадзіны і дні работы. Я гэта бачыў. Таму пачаў калашмаціць губернатараў і іншых", - заявіў беларускі лідар.

Старшыня КДК Васіль Герасімаў расказаў пра некаторыя недахопы, выяўленыя ў працэсе ліквідацыі наступстваў стыхіі ў Беларусі. Напрыклад, не ўсюды было наладжана належнае ўзаемадзеянне паміж рознымі органамі пры прыняцці мер аператыўнага рэагавання. Акрамя таго, у шэрагу выпадкаў замест аператыўных дзеянняў пачалі аб'яўляць тэндары па пошуку падрадчыкаў для правядзення рамонтных работ і ўстаранення наступстваў стыхіі.

"Ідуць дажджы, даху ў людзей у дамах няма, як і на жывёлагадоўчых памяшканнях, а яны таргуюцца, па якой цане шыфер завезці, - абурыўся Прэзідэнт. - У гэты надзвычайны час трэба было шыфер укласці, а потым ужо дагаворвацца аб аплаце".

Значны аб'ём работ трэба правесці і па аднаўленні электрычнасці. І ў сувязі з гэтым Аляксандр Лукашэнка падкрэсліў неабходнасць звярнуць асаблівую ўвагу на жывёлагадоўчыя комплексы, фермы, гаспадаркі, дзе многія працэсы аўтаматызаваны і залежаць ад наяўнасці электраэнергіі. Нельга дапусціць, каб гэта прывяло да парушэння тэхналагічных працэсаў па нарыхтоўцы малака і гібелі жывёл, у тым ліку кароў. "Дах адновім, дом пабудуем, ваду пададзім, але карова загіне - не будзе прадуктаў харчавання", - заўважыў Кіраўнік дзяржавы.

Прэзідэнт растлумачыў, што сярод першачарговых аб'ектаў, куды былі накіраваны намаганні энергетыкаў, быў Мазырскі НПЗ. "Добра, што абышлося без катастрофы. Гэта былі б страты на сотні мільёнаў долараў. Бог нас пашкадаваў, - сказаў Аляксандр Лукашэнка. - Таму людзі павінны разумець, што нам трэба было там перш за ўсё зрабіць". На гэты час, паводле даных Прэзідэнта, забяспечана падача дастатковага аб'ёму электраэнергіі на гэта прадпрыемства і пачынаецца запуск тэхналагічных працэсаў.

Сярод праблемных момантаў, на якія звярнуў увагу кіраўнік КДК, была працэдура атрымання дапамогі з рэзерву матэрыяльных рэсурсаў для ліквідацыі надзвычайных сітуацый. Для гэтага, як аказалася, патрэбны праваўстаноўчыя дакументы на ўсе аб'екты, што ў шэрагу выпадкаў невыканальна.

"Аднавіце парушаныя дахі дамоў і іншае, а потым будзем разбірацца. Якія праваўстаноўчыя дакументы, калі на некаторыя памяшканні ў калгасах ніякіх дакументаў не будзе! Вы што, чакаеце, пакуль там жывёла загіне? - адрэагаваў Кіраўнік дзяржавы. - Гэта сведчыць аб тым, што не толькі ў МНС, але і ва ўрадзе не разабраліся з гэтым пытаннем".

Разам з тым Аляксандр Лукашэнка падкрэсліў, што ёсць людзі, якія гераічна сябе паводзілі і заслугоўваюць у тым ліку дзяржузнагарод. А ёсць тыя, хто праявіў расхлябанасць.

"Урокі мы павінны засвойваць з любой сітуацыі", - сказаў ён, даручыўшы Старшыні КДК разам з іншымі адказнымі прапрацаваць адпаведныя пытанні, уключаючы фарміраванне рэзерваў на выпадак такіх сітуацый у будучым.

"У пачатку жніўня вы павінны мне пакласці на стол усе гэтыя "ўрокі": гэтых узнагародзілі, гэтых прыцягнулі да адказнасці, тут закупілі, у рэзерв паклалі што нам трэба (таму што матэрыяльныя рэзервы будуць значна расходаваны, іх трэба будзе аднавіць). Ураду - на кантроль, каб у пачатку жніўня мне было даложана", - запатрабаваў Кіраўнік дзяржавы.

Як далажыў Міністр энергетыкі Віктар Каранкевіч, Мінэнерга разлічвае на працягу месяца ўстараніць усе наступствы ўрагану для энергетыкі краіны.

Паводле даных Мінэнерга на 19 ліпеня, электразабеспячэнне ў Гомельскай вобласці забяспечана ў частцы падачы электраэнергіі ўсім населеным пунктам, але ў 170 з іх - за кошт падключэння дызель-генератарных установак, якія, паводле слоў міністра, аператыўна замяняюць у выпадку выхаду са строю. Цяпер у гэтых населеных пунктах энергетыкі сканцэнтраваны на выкананні заявак людзей па падключэнні канкрэтных жылых дамоў. Аналагічныя заяўкі ёсць і ў іншых рэгіёнах краіны (усяго па Беларусі - больш за 3 тыс.), і яны таксама ў прыярытэце. Усяго ж за час разгулу стыхіі тэхналагічныя парушэнні ў электрасетках былі зафіксаваны на працягласці больш як 12,5 тыс. км, без электразабеспячэння ў Гомельскай вобласці засталіся 1175 населеных пунктаў.

"Калі вы скончыце работы па аднаўленні электрычных ліній, як гэта было да ўрагану?" - спытаў Кіраўнік дзяржавы.

"Тыя лініі, якія павінны быць задзейнічаны ў электразабеспячэнні населеных пунктаў, - на працягу месяца. Будуць працаваць дызель-генератары. Але мы складзём графік пасутачна і будзем рухацца па ўсіх населеных пунктах, каб з кожным днём колькасць дызель-генератараў змяншалася", - далажыў Віктар Каранкевіч. Паводле яго слоў, для паскарэння работ прыцягваюцца спецыялісты будаўніча-мантажнага комплексу (яны займаюцца аднаўленнем ліній электраперадачы ў лясным фондзе). А для ўзмацнення сфарміраваны дадатковыя брыгады энергетыкаў з усіх абласцей краіны з задзейнічаннем неабходнай тэхнікі. Усяго заняты на гэтых работах 1,5 тыс. чалавек.

"Трэба павялічваць", - арыентаваў Кіраўнік дзяржавы, запатрабаваўшы максімальна задзейнічаць усе кадравыя рэсурсы для правядзення аднаўленчых работ. Пры неабходнасці можна прыцягваць для дапамогі ваеннаслужачых.

Аляксандр Лукашэнка таксама паставіў задачу ў цэлым паглядзець на стан ліній электраперадачы і не проста аднавіць электразабеспячэнне, а замяніць апоры на новыя, дзе гэта неабходна.

"Губернатары, вазьміце гэта на кантроль. Патрабуйце, каб былі адноўлены ўсе лініі электраперадачы. А старыя лініі трэба замяніць. Гэта вялікая работа, не аднаго дня. Але мы з ім (Міністрам. - Заўвага) дамовіліся, што трэба рабіць. Гэта трэба ўзяць на кантроль", - даручыў беларускі лідар. З боку дзяржавы, запэўніў ён, будзе неабходная фінансавая падтрымка.

Узяць на кантроль адпаведныя пытанні Прэзідэнт даручыў і ўпаўнаважаным Кіраўніка дзяржавы ў абласцях. "Калі трэба, раздзяліце першачарговыя і працяглыя тэрміны. Прытым энергетыкаў трэба паднапружыць. Месяц - магчыма, гэта мнагавата (для першачарговых мер па аднаўленні энергазабеспячэння. - Заўвага). Я разумею, з улікам замены некаторых ліній электраперадачы, - сказаў Аляксандр Лукашэнка. - Няхай упаўнаважаныя разбяруцца па абласцях і даложаць. Прыярытэт - Гомельская вобласць і тыя вобласці, якія часткова пацярпелі". Што датычыцца тэрмінаў на правядзенне працяглых работ па мадэрнізацыі ліній электраперадачы, то яны таксама будуць устаноўлены распараджэннем Кіраўніка дзяржавы пасля аналізу сітуацыі з боку ўпаўнаважаных па рэгіёнах.

Заслухоўваючы даклад Міністра лясной гаспадаркі Аляксандра Куліка, Прэзідэнт даручыў да маразоў канчаткова завяршыць работу з драўнінай на бураломах.

Як далажыў Міністр, найбольш пацярпелі лесанасаджэнні з аб'ёмам драўніны 2,4 млн куб. м у Гомельскай і Магілёўскай абласцях, што складае каля 10-12% ад традыцыйнага аб'ёму гадавой высечкі па краіне. На правядзенне работ у гэтыя рэгіёны накіраваны 1,5 тыс. спецыялістаў, задзейнічана розная тэхніка, у тым ліку спецыялізаваная для распілоўвання і вывазу драўніны.

Аляксандр Лукашэнка заўважыў, што цяпер многія леснікі дапамагаюць энергетыкам вызваліць лініі электраперадачы ад дрэў, якія ўпалі. Гэта першачарговая задача, таму што неабходна аднавіць падачу электрычнасці ў населеныя пункты. "Але гэта работа павінна быць да раніцы завершана - па аднаўленні ліній электраперадачы. І леснікам, Мінлясгасу трэба пераходзіць да выканання гэтых функцый (па разборы буралому. - Заўвага)", - сказаў Кіраўнік дзяржавы.

Па даручэнні Прэзідэнта, у арганізацыі такіх работ будуць задзейнічаны губернатары, а нарыхтаваная сіламі рэгіёнаў драўніна з паваленага і пашкоджанага лесу будзе перададзена ў распараджэнне губернатараў. "Мною прынята рашэнне, каб вам дапамаглі на месцах губернатары. І таму, хто нарыхтуе драўніну ўласнымі сіламі, мы павінны аддаць. Прадумайце механізм", - звярнуўся да адказных службовых асоб Аляксандр Лукашэнка.

Што датычыцца тэрмінаў, неабходных на канчатковы разбор бураломаў, якія ўтварыліся ў выніку разгулу стыхіі, і вываз драўніны на перапрацоўку, то на гэта, паводле ацэнкі Міністра, спатрэбіцца каля трох месяцаў.

"Да маразоў трэба гэта ўсё зрабіць", - паставіў задачу Прэзідэнт.

"Прынята", - адказаў Міністр. Ён таксама папрасіў дадаткова выдзеліць каля сотні сартыментавозаў (лесавозаў) вытворчасці МАЗ.

"Трэба, каб МАЗ вырабіў да сотні гэтых аўтамабіляў і перадаў Міністру лясной гаспадаркі", - даручыў Кіраўнік дзяржавы. Як было адзначана, у цэлым попыт на драўніну ёсць як унутры краіны, так і за яе межамі, у гэтым годзе рэалізацыя ідзе поўным ходам, запатрабаваны розныя віды драўніны.

Прэзідэнт таксама заявіў аб неабходнасці ў цэлым мабілізоўваць насельніцтва і спецыялістаў для ліквідацыі наступстваў стыхіі.

"Адгаворкі накшталт таго, што я не пайду, не хачу, не буду, не прымаюцца. Упаўнаважаныя Прэзідэнта на месцах, прымайце рашучыя дзеянні. Гэта раўнасільна вайне. Толькі без стральбы. Мабілізоўвайце насельніцтва", - падкрэсліў беларускі лідар. Прычым прыцягваць да работ кіраўнік дзяржавы даручыў таксама і тых, хто адбывае пакаранне: "Я ўжо гаварыў міністру ўнутраных спраў, ён падключыцца. У нас больш за 20 тыс. сядзельцаў і так званых "палітзняволеных". Туды, на прасеку, дапамажыце краіне".

Як далажыў на нарадзе Міністр па надзвычайных сітуацыях Вадзім Сіняўскі, у выніку праходжання 13-14 ліпеня навальнічнага фронту ў 74 раёнах Беларусі пацярпелі 949 населеных пунктаў, ад паваленых дрэў і элементаў даху загінулі 6 чалавек, з іх двое дзяцей. Траўмы атрымалі 72 чалавекі, з іх трое дзяцей. Да гэтага часу 24 пацярпелыя застаюцца ў бальніцах, уключаючы 7 дзяцей. Пяць чалавек застаюцца ў цяжкім стане.

На гэта Кіраўнік дзяржавы заўважыў, што калі такая колькасць пацярпелых, то недзе МНС недапрацавала загадзя ў плане папярэджання грамадзян аб ступені небяспекі надыходзячых з'яў надвор'я: "Не напружылі людзей. Так, было складана і нечакана. Я гэта бачыў і разумею. Але мяне не гэта цікавіць. Як працавала сістэма вашага міністэрства па надзвычайных сітуацыях?"

Міністр растлумачыў, што аб надыходзячых анамальных прыродных працэсах з 11 па 14 ліпеня ўсіх грамадзян краіны апавясцілі праз аператараў мабільнай сувязі, адпаведныя паведамленні трансліраваліся па тэлебачанні, радыё, распаўсюджваліся па Telegram-каналах і ў сацсетках.

На гэта Прэзідэнт слушна заўважыў, што ад метэаролагаў апошнім часам вельмі часта паступаюць папярэджанні аб магчымых неспрыяльных з'явах надвор'я, і людзі ўжо прывыклі, што такія прагнозы гучаць, але далёка не заўсёды збываюцца. "Магчыма тое, магчыма гэта. Вы людзей прывучылі: магчыма, а не было, магчыма, нешта было. Людзі ўжо прывыклі: як было ўчора, так будзе сёння. Вось да гэтай надзвычайнай сітуацыі (13-14 ліпеня. - Заўвага) вы адказна не змаглі падысці", - канстатаваў Аляксандр Лукашэнка.

Кіраўнік дзяржавы таксама крытыкаваў аператыўнасць дзеянняў службовых асоб пры рэагаванні на тое, што здарылася. "Нават калі вы загадзя не папярэдзілі. Здарылася - камісію па надзвычайнай сітуацыі ў Гомелі на працягу дзвюх-трох гадзін павінны былі стварыць і аказаць падтрымку і дапамогу людзям, мабілізаваць людзей, ваду, хлеб і іншае. Не праз паўтара дня, а неадкладна трэба было гэта задзейнічаць. А мы спазняліся на паўдня, на дзень", - падкрэсліў Прэзідэнт.

"Хутка і аператыўна трэба вырашаць пытанні. Урокі - вось галоўная з гэтага выснова. І я яшчэ раз патрабую ад упаўнаважаных і памочнікаў на месцах неадкладна выехаць на месцы і разабрацца з гэтымі пытаннямі", - даручыў Аляксандр Лукашэнка.

"Трэба - падключым армію. Наша краіна кампактная. Мы ведаем, што рабіць", - сказаў Кіраўнік дзяржавы.

Цяпер не час глыбока смуткаваць, заўважыў Аляксандр Лукашэнка, але высновы з таго, што адбылося, трэба зрабіць абавязкова. "Калі ў Каранкевіча (Міністра энергетыкі Віктара Каранкевіча. - Заўвага) не хапала слупоў або правадоў, па-народнаму кажучы, значыць, трэба зрабіць гэты запас. Калі вы не разгарнуліся як трэба, улічыце гэта, - звярнуўся Прэзідэнт да міністра МНС Вадзіма Сіняўскага. - Гэта павінен быць капітальны для нас урок".

Сапраўды, умовы надвор'я былі вельмі складанымі, нічога такога ў Беларусі даўным-даўно не здаралася. "Страшная з'ява. Трэба зрабіць высновы. Бог нас цюкнуў па макушцы (не ведаю, праўда, пакуль за што), але і пашкадаваў", - сказаў Аляксандр Лукашэнка. У той жа час горшага сцэнарыя, на яго думку, удалося пазбегнуць. Сітуацыя на Мазырскім НПЗ, на шчасце, заставалася пад кантролем, дарагое імпартнае абсталяванне прадаўжае працаваць. "Тут нас бог пашкадаваў. Стукнуў па галаве і пашкадаваў. Зрабіце з гэтага высновы", - папярэдзіў Кіраўнік дзяржавы.

"Рабіце адпаведныя высновы, і каб такой размовы больш не было", - адзначыў Прэзідэнт.

Віцэ-прэм'ер і ўпаўнаважаны Кіраўніка дзяржавы ў Гомельскай вобласці Анатоль Сівак далажыў аб ходзе ліквідацыі наступстваў стыхіі з акцэнтам на найбольш пацярпелую Гомельскую вобласць, звярнуўшы ў цэлым увагу на маштаб і буйны характар разбурэнняў.

"Непагода закранула населеныя пункты, у якіх пражывае 1,2 млн чалавек, - адзначыў Анатоль Сівак. - Працуем, робім вывады. Тыя каманды, якія дадзены, будуць выкананы".

На селектарнай нарадзе Міністр сельскай гаспадаркі і харчавання Анатоль Ліневіч далажыў аб ходзе ўборачнай кампаніі, яе першых выніках і праблемных пытаннях.

Азімы ячмень - культура капрызная, але наша

Паводле слоў Міністра, у гэтым годзе ўборачная плошча збожжавых і зернебабовых культур складае 2,1 млн га. Гэта на 68 тыс. га больш, чым у мінулым годзе. Пасевы кукурузы дасягнулі 300 тыс. га.

"Убралі азімы ячмень. Выснова?" - спытаў Прэзідэнт.

"Культура наша. 800 тысяч тон сабралі, ураджайнасць вышэйшая за 30 цэнтнераў (з гектара. - Заўвага). Таму ў гэтым годзе мы не зніжаем пасяўныя плошчы", - далажыў Анатоль Ліневіч.

"Мы гаворым аб тым, што чакалі большага ад азімага ячменю", - заўважыў Аляксандр Лукашэнка.

Як растлумачыў кіраўнік Мінсельгасхарча, умовы перазімоўкі не дазволілі дабіцца лепшага выніку. Да таго ж, былі дапушчаны тэхналагічныя недапрацоўкі падчас догляду пасеваў.

"Значыць, выснова адна: азімы ячмень - гэта культура капрызная ва ўмовах рызыкоўнага земляробства, г.зн. у Беларусі. Таму трэба акуратна падбіраць палі. Ён вельмі дрэнна пераносіць маразы і выправае, калі шмат снегу. Таму выбірайце патрэбныя палі. Трэба ячмень вырошчваць, каб ураджай быў не ніжэйшы за 40 цэнтнераў", - падагульніў Кіраўнік дзяржавы.

Як далажылі Прэзідэнту, у некаторых гаспадарках ураджайнасць азімага ячменю і ўвогуле перавышае 100 ц/га. "Выбралі палі правільныя, папярэднікі нармальныя і тэхналогіі", - пракаменціраваў Аляксандр Лукашэнка.

"Рапс - культура рэнтабельная"

"Рапс пачалі ўбіраць. Што рапс паказвае ў гэтым годзе? Колькі працэнтаў убралі?" - удакладніў Прэзідэнт.

Паводле слоў Анатоля Ліневіча, убрана 75% плошчаў рапсу, сярэдняя ўраджайнасць складае 26 ц/га. "Рапсам займацца неабходна. У асноўным азімым. У паўночных рэгіёнах трэба займацца і яравым рапсам у тым ліку, таму што ўмовы перазімоўкі паказалі, што дзе адсутнічае снежнае пакрыццё, там рапс перазімаваў вельмі дрэнна", - адзначыў Міністр.

"Рапс - культура рэнтабельная. Грошай прыносіць, як малако ў жывёлагадоўлі. Трэба займацца. Але, як і па іншых культурах, трэба займацца грунтоўна. Вось асноўны вывад: рапсу быць, але яго трэба вырошчваць столькі, колькі мы можам убраць і апрацаваць нармальна" , - падкрэсліў Кіраўнік дзяржавы.

У той жа час ён звярнуў увагу, што нават у межах Віцебскай вобласці ўраджайнасць рапсу можа вельмі адрознівацца. Аляксандр Лукашэнка задаўся пытаннем: чаму ў адных атрымліваецца, а ў іншых - не?

"Недапрацоўваюць", - выказаў меркаванне Анатоль Ліневіч.

"Дык прымусьце іх працаваць! Не прымусіце вы - скажыце мне. Мы з Кубраковым (Міністр унутраных спраў Іван Кубракоў. - Заўвага) заўтра прымусім мёртвага працаваць", - вобразна выказаўся Прэзідэнт.

Разам з тым кіраўнік Мінсельгасхарча звярнуў увагу і на фактар надвор'я: у адной з гаспадарак азімы рапс пасеялі своечасова і з захаваннем тэхналогій, але некалькі дзён маразоў - і 95% пасеваў загінула.

"Што значыць "не хапае механізатараў"?"

Асобна Аляксандр Лукашэнка закрануў сітуацыю на месцах, звярнуўшы асаблівую ўвагу на ўкамплектаванне гаспадарак кадрамі і гатоўнасць тэхнікі.

"Калі Субоцін і Ліневіч будуць плакацца, што ім не хапае механізатараў і тэхнікі, іх трэба знімаць з пасад абодвух, - запатрабаваў Прэзідэнт. - Што значыць "не хапае механізатараў"? Знайдзіце іх у гарадах. Дамоўцеся з кіраўнікамі прадпрыемстваў".

Як расказаў Анатоль Ліневіч, па тэхнічных прычынах у цэлым па краіне прастойвае амаль паўсотня камбайнаў. Частка з іх - імпартныя, а значыць, ёсць праблемы з пастаўкай запчастак. Але гэтыя пытанні, паводле слоў Міністра, практычна ўжо вырашаны.

Аднак Кіраўнік дзяржавы гэтых тлумачэнняў не прыняў: "Чаму зімой не закупілі неабходныя камплектуючыя? Гэта глупства, што нельга купіць па імпартных камбайнах запчасткі".

"Затрымак па дзяржзаказе быць не павінна"

"Чаго яшчэ не хапае?" - спытаў Аляксандр Лукашэнка.

"Неабходна накіраваць Br130 млн на выкуп харчовага збожжа ў сялян", - сказаў Міністр.

"Міністр фінансаў, ніякіх затрымак па дзяржзаказе быць не павінна", - паставіў задачу Прэзідэнт.

Кіраўнік дзяржавы падкрэсліў: на рэспубліканскім узроўні ўсе пытанні, каб якасна правесці ўборачную кампанію, вырашаны. Прычым лепш, чым у былыя часы.

"Таму трэба напружвацца, арганізоўваць работу і ўбіраць. Дысцыпліна павінна быць жорсткая. Мне сорамна ўжо нават гаварыць пра нейкі крадзеж і іншае", - адзначыў Аляксандр Лукашэнка.

Кіраўнікі рэгіёнаў краіны на селектарнай нарадзе далажылі Прэзідэнту аб сітуацыі на месцах. Асабліва што датычыцца ўборачнай кампаніі, Кіраўніка дзяржавы ў цэлым усе запэўнілі, што праблем, вырашэнне якіх патрабавала б асабістага ўключэння Прэзідэнта, няма. Карыстаючыся выпадкам, Аляксандр Лукашэнка падрабязна цікавіўся, як ідуць аднаўленчыя работы ў пацярпелых ад стыхіі раёнах.

Мінская вобласць. Чаканы каравай на 2,7 млн т і задача падставіць плячо краіне

"Ніякіх праблем, патрабуючых вашага рашэння, няма", - рапартаваў старшыня аблвыканкама Аляксандр Турчын.

У рэгіёне разлічваюць па выніках уборачнай кампаніі сабраць збожжавых і зернебабовых без уліку кукурузы не менш за 1,8 млн т. З улікам кукурузы - 2350 тыс.т. І яшчэ 300 тыс.т рапсу. Такім чынам, агульны намалот павінен скласці каля 2,7 млн т.

"Калі будзе тры, то, лічыце, вы гераічны подзвіг здзейснілі. Таму мы чакаем ад вас ураджаю. Міншчына павінна падставіць плячо краіне ў цэлым, - сказаў Аляксандр Лукашэнка. - І не забывайце, што на вашай тэрыторыі размешчана БНБК. Разам з Юрыем Шулейкам (віцэ-прэм'ер. - Заўвага) падключайцеся і прыводзьце ў парадак гэта прадпрыемства, каб яно працавала належным чынам на ўсю краіну".

Кіраўнік дзяржавы таксама пацікавіўся, як у Мінскай вобласці разабраліся з наступствамі стыхіі. Як далажыў старшыня аблвыканкама, стыхія закранула адну з вёсак: у многіх дамоў былі пашкоджаны дахі. Аднак аператыўна быў выдзелены шыфер, да месца здарэння накіравалі будаўнічыя брыгады. Работы ўжо завяршаюцца.

У некаторых раёнах пацярпелі жывёлагадоўчыя памяшканні, аднак сітуацыя не крытычная.

"Адключэнні электраэнергіі былі, але энергетыкі ўсё аператыўна ўстаранялі, убіралі завалы. Таму пытанняў, якія патрабуюць вырашэння на рэспубліканскім узроўні, у нас няма", - сказаў Аляксандр Турчын.

Віцебская вобласць. З наступнага тыдня стартуе актыўная фаза ўборкі па ўсіх культурах

"Моцных праблем, патрабуючых вашай увагі, няма. У сярэдзіне наступнага тыдня завяршаем уборку азімага рапсу, пачалі церабіць лён. Камбайны гатовы (у 99% пройдзены тэхагляд). З наступнага тыдня мы ўваходзім у актыўную фазу ўборкі па ўсіх культурах, таму да гэтага перыяду ўсё падцягнем", - далажыў старшыня Віцебскага абласнога выканаўчага камітэта Аляксандр Субоцін.

У рэгіёне пачата падрыхтоўка ўжо да асенніх палявых работ, са жніўня пачнуць сеяць азімы рапс.

"У вас якія пытанні ёсць да "цэнтра", чаго не хапае?" - запытаў Аляксандр Лукашэнка.

"Ніякіх няма. Што з'яўляецца, мы аператыўна вырашаем", - заявіў старшыня Віцебскага аблвыканкама.

Гродзенская вобласць. Пажаданне ад Прэзідэнта: дзейнічаць па-ваеннаму, адступаць няма куды

У Гродзенскай вобласці поўнасцю ўжо завяршылі ўборку азімага ячменю, сярэдняя ўраджайнасць склала 45,8 ц/га.

"Завяршаецца ўборка азімага рапсу (больш за 70% убрана пры сярэдняй ураджайнасці 39 ц/га). Калі ўзяць у цэлым збожжавую групу, на сённяшні час убрана 24%, - праінфармаваў Прэзідэнта старшыня Гродзенскага аблвыканкама Уладзімір Каранік. - Палівам вобласць забяспечана, з механізатарамі праблем таксама няма. Пачата падрыхтоўка ўжо да азімай сяўбы".

Паводле яго слоў, праблемных пытанняў, патрабуючых вырашэння на ўзроўні Кіраўніка дзяржавы, у рэгіёне таксама няма.

Аляксандр Лукашэнка пацікавіўся ў свайго памочніка па Гродзенскай вобласці Юрыя Караева, ці насцярожваюць яго якія-небудзь пытанні. Паводле слоў Юрыя Караева, ёсць пэўныя пытанні да тэхнікі: "Ёсць такія факты, што збожжаўборачныя камбайны, якія прайшлі тэхагляд, пасля двух-трох дзён работы ў полі ламаюцца і прастойваюць. Такіх некалькі дзясяткаў. Радуе, што камітэт па сельскай гаспадарцы аб гэтым дакладвае, не скрывае, бачаць гэта і працуюць над гэтым".

"Вы чалавек ваенны - дзейнічайце па-ваеннаму. Нават у Гродзенскай вобласці. Не дай бог, Гродзенская вобласць па нейкіх паказчыках спрацуе горш, чым іншыя вобласці. Вы прыпёртыя ўжо да сценкі - толькі наперад, адступаць няма куды. Ужо агляд скончыўся, і губернатара, і вас", - падкрэсліў Прэзідэнт.

Гомельская вобласць. Па пераадоленні наступстваў урагану дэ-факта рэжым надзвычайнай сітуацыі

У Гомельскай вобласці аграрыі выйшлі на ўборку 3,5% плошчы штодзень. "За 20 пагодлівых дзён маюць намер сабраць увесь палетак. Разлічваем атрымаць больш за 1,2 млн т зерня з кукурузай па выніках уборачнай кампаніі бягучага года", - запэўніў старшыня Гомельскага аблвыканкама Іван Крупко.

Паводле даных губернатара, на гэты час убрана 45% плошчы ўсіх культур. "Завершана ўборка свірэпіцы, азімага ячменю, засталося 98 працэнтаў азімага рапсу. Па аб'ёмных паказчыках атрымаем азімага ячменю на 30 тыс. т больш, рапсу - на 200% больш", - акцэнтаваў ён.

Гатоўнасць тэхнікі ў гаспадарках падтрымліваецца на ўзроўні 97-98%. "Непаладкі, якія выяўляюцца ў працэсе ўборкі, устараняюцца аператыўна, на працягу сутак", - растлумачыў старшыня аблвыканкама.

У рэгіёне пачалі выкананне дзяржзаказу. "Праблем з адгрузкай няма. Адносна рапсу выкананы дзяржзаказ на 107%, ідзе рэалізацыя іншых харчовых культур. Увесь аб'ём будзе выкананы", - запэўніў Кіраўніка дзяржавы Іван Крупко.

Таксама старшыня Гомельскага аблвыканкама расказаў пра планы па сяўбе азімых культур.

Аляксандр Лукашэнка папрасіў віцэ-прэм'ера і ўпаўнаважанага Кіраўніка дзяржавы па Гомельскай вобласці Анатоля Сівака далажыць сітуацыю па пераадоленні надзвычайнай абстаноўкі пасля ўрагану.

Ужо ў бліжэйшы час будзе ўзгоднены графік падключэнняў населеных пунктаў Гомельскай вобласці да ліній электраперадачы ў штатным рэжыме. "Вызначаны месячны тэрмін, але будзем ісці са штодзённым нарошчваннем тэмпу. Зразумелая задача і па замене старых ліній", - сказаў Анатоль Сівак.

Па ўсіх напрамках сітуацыя на кантролі. Прымаюцца заяўкі ад жыхароў рэгіёна, якім патрабуецца дапамога ў аднаўленні пашкоджаных дамоў, дэпутаты і прадстаўнікі сельвыканкамаў праводзяць падваровыя абходы. Актывізавана і работа страхавых кампаній, пастаўлены адпаведныя задачы Мінфіну. Таксама на асаблівым кантролі - забеспячэнне будаўнічымі матэрыяламі, у тым ліку задзейнічанне рэзерваў.

"Аднаўленчыя работы ідуць, іх аб'ём значны. Усе даручэнні і задачы будуць выкананы", - запэўніў Анатоль Сівак.

"Я папрашу Вас, Вы ў Гомельскай вобласці дзейнічайце, як у сур'ёзнай надзвычайнай сітуацыі, прымайце меры. Галоўнае - урокі", - падкрэсліў Аляксандр Лукашэнка.

Магілёўская вобласць. Узмацніць патрабаванне, у рэгіёне працуюць не на поўную моц

У Магілёўскай вобласці трэба правесці ўборачную кампанію практычна на 340 тыс. га. Паводле слоў старшыні Магілёўскага аблвыканкама Анатоля Ісачанкі, ужо ўбрана 18%.

"Завяршылі ўборку азімага ячменю. Убіраем азімы рапс - 73% убрана. Адначасова пачалі здачу дзяржзаказу. Работы ідуць ва ўсіх раёнах вобласці. Паралельна церабім лён, вядзём нарыхтоўку кармоў, рыхтуемся да асенняй сяўбы", - далажыў Анатоль Ісачанка.

Ён прызнаў, што ёсць пытанні з гатоўнасцю тэхнікі і наяўнасцю дастатковай колькасці кадраў, але гэта не паўплывае на тэрміны правядзення і якасць уборачнай кампаніі. "Робім перакідку тэхнікі. Наш мехатрад з 12 камбайнаў працуе ў паўднёвых рэгіёнах і па меры паспявання збожжа ён будзе перамяшчацца да паўночных. Плюс мы будзем рабіць перакідку з гаспадарак", - адзначыў старшыня аблвыканкама.

"Спакойнага жыцця табе не будзе, ты гэта цудоўна ведаеш. І ўсе твае недахопы відаць, - заўважыў Прэзідэнт. - Патрабаванне павінна быць вельмі строгае. Магіляўчане працуюць сёння не на поўную моц, мякка кажучы".

Брэсцкая вобласць. Ёсць рэальныя кропкі росту, людзі ведаюць, што рабіць

"Завершана ўборка азімага ячменю. Намалочана 125 тыс. т пры ўраджайнасці большай за 42 ц/га, што на 28 тыс. т больш за мінулы год. Завяршаем уборку азімага рапсу, убрана 95% плошчы. Намалочана 215 тыс. т. Ураджайнасць 34 ц/га, што на 6 ц/га вышэй за ўзровень мінулага года. Усе раёны пачалі ўборку збожжавых, 31% ужо ўбраны. Намалочана 424 тыс. т, ураджайнасць у цэлым паказваем каля 40 ц/га", - расказаў першы намеснік старшыні Брэсцкага аблвыканкама Дзмітрый Гарадзецкі. У рэгіёне плануюць атрымаць у бункернай вазе каля 1,3 млн т збожжавых і зернебабовых і каля 225 тыс.т рапсу.

Аграрыі Брэсцкай вобласці забяспечаць выкананне дзяржзаказу ў поўным аб'ёме. У лік дзяржзаказу вядзецца пастаўка піваварнага ячменю, харчовага зерня жыта, пшаніцы і алейнага семя рапсу.

У паўднёва-заходнім рэгіёне завяршылі нарыхтоўку траў другога ўкосу. "Пачалі ўборку траў трэцяга ўкосу. У разліку на ўмоўную галаву жывёлы нарыхтавана 10,7 цэнтнера кармавых адзінак, што на 0,6 цэнтнера вышэй за ўзровень мінулага года. Па выніках 2024 года плануем нарыхтаваць травяных кармоў не ніжэй за мінулы год", - адзначыў першы намеснік старшыні Брэсцкага аблвыканкама.

Пачаліся работы па падрыхтоўцы да азімай сяўбы, плануем павялічыць плошчы азімага ячменю і рапсу.

Аляксандр Лукашэнка пацікавіўся, што ў Пінскім, Лунінецкім раёнах пасля ўрагану.

Кіраўнік рэгіёна далажыў, што ўсяго ў Брэсцкай вобласці стыхія закранула сем раёнаў, але найбольш пацярпелі менавіта Пінскі і Лунінецкі раёны.

У Лунінецкім раёне ў асноўным былі наступствы граду, былі пашкоджаны дахі і ў жылым фондзе, і на жывёлагадоўчых і іншых аб'ектах. З пункту гледжання разбурэнняў найбольш пацярпеў аграгарадок Лапаціна Пінскага раёна.

Праз тры гадзіны пасля праходжання ўрагану днём 14 ліпеня на месцы здарэння ўжо быў намеснік старшыні Брэсцкага аблвыканкама Вадзім Альшэўскі. "Аператыўна ўключыліся ў работу ўсе службы: МНС, энергетыкі, ЖКГ. Да канца дня ўжо было падключана электразабеспячэнне ўсіх дамоў, дзе гэта не ўяўляла сабой пагрозы. Таму што 11 дамоў былі разбураны: дахі, франтоны і нават перакрыцці абваліліся. Мы за бягучы тыдзень, на канец гэтага дня, завяршаем аднаўленне. Дах над галавой у людзей ужо будзе. Дробныя даробкі будуць па гаспадарчых пабудовах", - дадаў Дзмітрый Гарадзецкі.

Аляксандр Лукашэнка ў якасці станоўчага моманту адзначыў тое, як у рэгіёне аператыўна падключыліся да работы з людзьмі пасля ўрагану: "Можа, і не ўсё зроблена, але калі Міхаіл Іванавіч (старшыня Пастаяннай камісіі Савета Рэспублікі Нацыянальнага сходу па заканадаўстве і дзяржаўным будаўніцтве Міхаіл Русы. - Заўвага) і памочнік Вакульчык з'явіліся на экране на наступны дзень там, дзе рамонты ішлі, гэта ўжо людзей абнадзейвае. Тое, чаго не хапала ў іншых абласцях".

У сувязі з гэтым ён даручыў звярнуць асаблівую ўвагу на работу з людзьмі: "Калі б мы, перш за ўсё ў Мінску, тут інфармавалі людзей аб той жудаснай катастрофе, да якой мы прыйшлі ў выніку гэтага ўрагану, менш было б пытанняў у тым ліку і ў сацыяльных сетках. Таму працаваць трэба з людзьмі, трэба своечасова іх інфармаваць. Каб яны разумелі, што мы атрымалі ў выніку гэтага. А калі б прамарудзілі, што маглі б атрымаць. Улічваючы катастрофу, якая магла быць на нашых вядучых прадпрыемствах, перш за ўсё па нафтаперапрацоўцы", - адзначыў Кіраўнік дзяржавы.

Як заявіў Міхаіл Русы, у Брэсцкай вобласці ёсць каманда, якая даволі эфектыўна працуе. Ёсць асобныя вузкія пытанні, над вырашэннем якіх сумесна працуюць. Напрыклад, гэта звязана з аператыўнасцю ўборкі саломы з палёў, каб гэта не стрымлівала хуткую пасяўную кампанію. Прыцягнуты дадаткова аўтамабілі, пагрузчыкі, трактары. "Рашэнні прымаюцца маментальна. Я ім перадаў размову - тое, што вы нам кожны раз 30 гадоў гаварылі. Што кіраўнік павінен прымаць рашэнне, не ўваходзіць у чыёсьці становішча і не красці. Таму ўсе рашэнні Прэзідэнта павінны выконвацца неадкладна, якасна і ў тэрмін. Яны гэта робяць. У Брэсце я вялікіх праблем не бачу. Ёсць рэальныя кропкі росту, людзі ведаюць, што рабіць", - запэўніў упаўнаважаны Кіраўніка дзяржавы.

"Вельмі правільна ўзняў пытанне наконт саломы. Няўжо нельга гэту салому здрабніць, па ржышчы раскідаць, унесці азот і заараць. Угнаенне хоць будзе больш-менш нармальнае. Але самае галоўнае - не прыбяром салому - своечасова не пасеем. Міхаіл Іванавіч правільна сказаў. Звярніце на гэта ўвагу", - падтрымаў Кіраўнік дзяржавы.

Падводзячы вынікі селектарнай нарады, Кіраўнік дзяржавы заявіў: "Праблем вялікіх я не бачу ва ўборцы. Патрэбна проста арганізацыя. Упаўнаважаныя людзі прыедуць на месцы сёння-заўтра. Іх рашэнне - рашэнне канчатковае. Калі трэба нешта вырашыць, яны звяжуцца са мной. Мы на працягу некалькіх гадзін прымем адпаведнае рашэнне".

Ён таксама падкрэсліў важнасць дастойна заплаціць людзям. "Заплаціце людзям. Гэта акупіцца. Акажыце падтрымку людзям, якія сёння стараюцца і добра працуюць", - даручыў Аляксандр Лукашэнка.

Прэзідэнт падкрэсліў асаблівую важнасць выканання ўсіх тэхналагічных працэсаў. "Выкананне тэхналогій - першарадная задача. Гэта датычыцца перш за ўсё ўсходніх абласцей. Ды і ў любой вобласці ёсць гаспадаркі, дзе трэба звярнуць на гэта ўвагу. Тэхналогіі і яшчэ раз тэхналогіі. І дысцыпліна. Больш у гэтым годзе нічога не трэба. Жалезабетонная дысцыпліна і выкананне тэхналогій. Гэта - галоўнае", - заявіў ён.

Кіраўнік дзяржавы растлумачыў, што размова аб ходзе ўборачнай у першую чаргу вядзецца пра збожжа, паколькі важна з улікам умоў надвор'я літаральна "выхапіць" яго з палёў .

"Ну і не трэба забываць, што ў нас ідзе нарыхтоўка травяністых кармоў. Накладкі даволі значныя. І сеяць трэба. Літаральна праз тыдзень трэба пачынаць сеяць азімы рапс і потым азімы ячмень. Таму збожжа трэба ўбраць своечасова", - сказаў Аляксандр Лукашэнка.

Што датычыцца бягучага надвор'я, Кіраўнік дзяржавы канстатаваў, што асобныя "вялікія прагназісты" памыліліся, прадказваючы вясной засушлівае лета. "Я тады яшчэ сказаў, што будзе перыядамі. Так будзе і ў жніўні. Цяпер надыходзіць нейкі прасвет. Я бачу гэта і па спадарожнікавых здымках. З лакальнымі дажджамі, але будзе нармальны перыяд для ўборкі ўраджаю. Будзе больш сухіх і сонечных дзён. Трэба выхопліваць гэты ўраджай", - адзначыў Прэзідэнт.

Ён заклікаў дзейнічаць аператыўна і не чакаць найбольш аптымальнай вільготнасці збожжа, не чакаць яго спеласці на корані, паколькі можна страціць частку ўраджаю. Лепш потым давесці гэта збожжа да неабходнай кандыцыі на сушыльных комплексах.

"Дзякуй богу, у нас вільгаці хапае ў гэтым годзе. Гэта ж араць лягчэй. Вы памятаеце, як мы ў мінулым годзе аралі, - слупом стаяў пыл пасля плугоў. Немагчыма было араць. Сухая глеба была, проста камень. Цяпер добра можна араць. Але своечасова трэба ўбіраць і араць. Трэба культурна", - сказаў Кіраўнік дзяржавы.

У гэтым плане ён звярнуў увагу на існуючую праблему з вымачкамі на палях, што прысутнічае ў тым ліку ў Брэсцкай і Гродзенскай абласцях. "Мы ж дамовіліся, што трэба сёння закупляць трактары на гусенічным хаду з глыбокімі рыхліцелямі, каб гэту падкладку мы маглі разбурыць. Глыбей трэба араць. Можа, мы сапраўды выратуем палі ад гэтых вымачак. А так у нас вымачак столькі, колькі мы кожны год меліяруем зямель. Тут дрэнная работа. Культура земляробства на нізкім узроўні", - заўважыў беларускі лідар.

Яшчэ шэраг канкрэтных даручэнняў датычыцца якаснай уборкі лёну, які для Беларусі - культура палітычная (кветкі лёну адлюстраваны на гербе краіны).

Кіраўнік дзяржавы даў практычную параду арыентавацца на вытворчасць большага аб'ёму бабовых - размова аб складзе травяністых кармоў. Люцэрна, канюшына, трэба таксама высяваць гарох і лубін, арыентуе Аляксандр Лукашэнка. “Трэба вяртацца да таго, што некалі было і мы забылі. Нам трэба ўзмацняць бялковыя культуры, у тым ліку і на кармавыя патрэбы. Люцэрна – трэба цэнтралізавана яе закупляць і пашыраць пасевы. Гэта ўсё акупіцца. А калі цэнтралізавана будзеце закупляць у той жа Расіі ці яшчэ недзе, мы будзем мець нармальную цану на гэта насенне", - сказаў ён.

“Давайце дамовімся, што гэты год для нас пакуль складваецца добра. Гэта нядрэнны год, улічваючы, што мы ў зоне рызыкоўнага земляробства. Чакаць ідэальных гадоў не трэба. Іх не будзе і ніколі не было. То засушыць, то залье. Але ўвогуле год нядрэнны. Вільгаць ніколі не была лішняй для сельскай гаспадаркі ў нас", - адзначыў Аляксандр Лукашэнка.

"Людзей я хачу чарговы раз супакоіць і паабяцаць, што на працягу некалькіх дзён мы вузкія месцы ліквідуем пасля гэтага ўрагану. І яшчэ месяц будзем працаваць. Каб абнавіць недзе, узмацніць работу па энергазабеспячэнні. Мы бачым гэтыя праблемы, урокі атрымалі. На працягу месяца мы скончым усе работы, - заявіў Кіраўнік дзяржавы. - Першачарговыя праведзены ўжо. Трэба прыняць дызель-генератары з вёсак. Але для таго каб іх прыняць, трэба штатна падвесці электраэнергію. Гэта мы за бягучы тыдзень зробім".

"А першачарговыя работы, як дамаўляліся, да 16-га чысла былі зроблены. Тут я ўжо рэагую на розную пісаніну нашых збеглых і іншых: "Вось, Прэзідэнт паабяцаў 16-га чысла, цяпер на 19-га перанёс даручэнне…" Ну, яны дрэнна чуюць, вушы, напэўна, дрэнна прамылі. Да 16-га чысла было даручэнне забяспечыць рух аўтамабільнага, чыгуначнага транспарту і іншае. У нас жа заторы былі такія, што нават паязды хадзілі са спазненнем да 7 гадзін. Вельмі хутка выканалі гэту работу. Нават раней, чым я даручаў", - адзначыў Прэзідэнт.

У той жа час да 19 ліпеня ўсе населеныя пункты забяспечаны электраэнергіяй. "Але ёсць у нас яшчэ 100 з нечым вёсак, дзе працуюць дызель-генератары. Вось іх трэба прыняць, падключыць усе гэтыя вёскі і вырашыць праблемы з домаўладаннямі. Там, дзе, груба кажучы, ад слупа ў хату ідзе провад гэты. Парваны, недзе яшчэ нешта. Трэба вырашыць і гэтыя праблемы", - даручыў Аляксандр Лукашэнка.

"Таму мы вырашым усе пытанні па пераадоленні катастрофы ў сувязі з гэтым шалёным ураганам і зробім адпаведныя высновы па ўсіх напрамках. Работа гэта павінна быць праведзена, і мы таксама чакаем ад вас адпаведнай інфармацыі для прыняцця рашэнняў", - дадаў Прэзідэнт, звяртаючыся да ўдзельнікаў селектарнай нарады.

"Памятайце адно: спакойна ў гэтым годзе не будзе. Не таму, што мы тут у перадвыбарны год штосьці пачынаем. Хоць гэта таксама важна. Мы здаём, як я заўсёды гаварыў, экзамен беларускаму народу. Не амерыканцам, не палякам, не еўрапейцам. Нам напляваць на іх меркаванне, хоць мы іх меркаванне гатовы ўлічваць. Мы для свайго народа працуем. І мы сёння здаём экзамен, - падкрэсліў беларускі лідар. - Хто б там ні быў потым Прэзідэнтам, народ павінен бачыць, што сістэма ўлады, створаная намі, эфектыўна працуе".

"Па вялікім рахунку, я не магу прад'явіць прэтэнзіі, што хтосьці там ухіляецца ад работы, хтосьці дрэнна працуе і гэтак далей. Машына гэта працуе. Але збоі ёсць, ёсць недахопы пэўныя", - канстатаваў Кіраўнік дзяржавы.

Гэтыя недахопы, паводле яго слоў, у тым ліку выявіў ураган, што прайшоў па Беларусі, да аператыўнай рэакцыі на наступствы якога не ўсюды аказаліся гатовы. "Я заўсёды вас прашу, параўноўвайце гэта з ваеннымі дзеяннямі, але, дзякуй богу, без стральбы. Гэта добрая для нас трэніроўка. Таму зробім усе адпаведныя вывады", - сказаў Прэзідэнт.