Сустрэча з Прэм'ер-міністрам Раманам Галоўчанкам і кіраўнікамі "Беларуськалія" і БКК

Прэзідэнт Беларусі Аляксандр Лукашэнка 31 студзеня прыняў з дакладам Прэм'ер-міністра Рамана Галоўчанку, а таксама кіраўнікоў "Беларуськалія" і БКК.

"Сутнасць нашай сённяшняй размовы - санкцыйная палітыка Захаду. Мінуў пэўны час, і я вас папярэджваў усіх, што пытанні процістаяння вось гэтай усёй санкцыйнай палітыцы - гэта пытанні Урада. Але тым не менш з Прэзідэнта кантроль ніхто не здымаў", - сказаў Кіраўнік дзяржавы.

Ён адзначыў, што адпаведныя пытанні - работы ў санкцыйны перыяд - абмяркоўваліся і ў ходзе справаздачы Старшыні праўлення Нацыянальнага банка Паўла Калаура і памочніка Прэзідэнта Беларусі па пытаннях развіцця фінансава-крэдытнай сістэмы Валерыя Бельскага. "Трэба аддаць належнае, што яны малайцы ў асноўным. Са сваёй работай спраўляюцца. Далей я хацеў бы паслухаць, якая сітуацыя ў сувязі з гэтымі санкцыямі ў асноўных нашых кампаній, якія трапілі пад санкцыі, у тым ліку Беларуская калійная кампанія і "Беларуськалій". І "Белавія" потым. Да гэтага часу націскаюць, цяпер ужо ведаюць, па якой прычыне, пасля справаздачы ICAO. Нафтапрамысловы комплекс наш, нафтахімічны", - сказаў Аляксандр Лукашэнка.

"Трэба, каб спецыялісты, міністры былі гатовы далажыць Прэзідэнту аб рабоце ў гэты санкцыйны няпросты перыяд", - адзначыў Прэзідэнт, звяртаючыся да Рамана Галоўчанкі.

Прэзідэнт канстатаваў, што, гледзячы па мінулым годзе, усё ж такі знойдзены добрыя альтэрнатывы ў многіх прадпрыемстваў. "Нядрэнна і "Беларуськалій" спрацаваў. Але тым не менш трэба глядзець наперад", - сказаў ён.

"Калі, напрыклад, Літва не хоча прапускаць нашы грузы ў порт і ў порце перавальваць, добра, гэта іх права. Калі гэта адбудзецца, Раман Аляксандравіч, значыць, літаральна на працягу некалькіх дзён павінны быць рэалізаваны тыя мерапрыемствы, аб якіх мы дамаўляліся ў адносінах да самой Літвы, - сказаў беларускі лідар. - Я проста хачу, каб літоўцы разумелі. Цяпер вострыя пытанні гэтыя, хапаюцца за ўсё і пачынаюць мяне абвінавачваць. Я яшчэ раз хачу падкрэсліць: мы не ініцыюем ніякіх там працэсаў, якія прывялі б нас у клінч з Літвой, Латвіяй, Польшчай або Украінай. Нам гэта не патрэбна".

"Тым больш, я ж сказаў у пятніцу: мяне мала хвалюе - захаваць твар - не захаваць... Трэба ім захаваць твар - няхай выходзяць і дамаўляюцца. Мы гатовы да таго, каб дамаўляцца. Але калі яны і далей будуць нас прыціскаць, значыць, мы задзейнічаем той план, які ў нас ёсць. Няхай потым не крыўдзяцца. А народ Літвы, Польшчы і іншых дзяржаў павінен разумець, што мы проста адказваем на гэтыя выклікі", - падкрэсліў Кіраўнік дзяржавы.

"Таму я хацеў бы пасля банкаўскай сістэмы, разгледзеўшы, як яны працуюць у гэтых умовах санкцыйных, паслухаць, як працуюць нашы прадпрыемствы ў гэты перыяд, і як мы працуем, каб знайсці іншыя шляхі па пастаўках нашых хімічных, калійных угнаенняў, мінуючы, дапусцім, традыцыйныя парты. Вось сутнасць нашай размовы. А далей я папрашу, каб і "Белавія", і іншыя кампаніі былі гатовы далажыць разам з Урадам, як яны працуюць", - рэзюмаваў Аляксандр Лукашэнка.