Сустрэча з губернатарам Варонежскай вобласці Расіі Аляксандрам Гусевым

Прэзідэнт Беларусі Аляксандр Лукашэнка 28 красавіка сустрэўся з губернатарам Варонежскай вобласці Расіі Аляксандрам Гусевым.

"Ключавым аспектам нашых гандлёва-эканамічных адносін павінна стаць вытворчая кааперацыя. Мы гэту тэму вельмі дэталёва абмеркавалі ў ходзе нядаўняга майго візіту ў Прымор'е, а напярэдадні - з Прэзідэнтам Расіі. Як паказвае практыка, менавіта кааперацыйнае супрацоўніцтва закладвае магутны базіс для доўгатэрміновых адносін і дае добры інтэграцыйны эфект", - сказаў Аляксандр Лукашэнка.

Пры адкрыцці ў Расіі зборачных вытворчасцей Беларусь нацэлена на павелічэнне ступені іх лакалізацыі, што гарантавана забяспечыць стварэнне новых рабочых месцаў у рэгіёне, адзначыў Прэзідэнт.

"Відавочна, што адной з вядучых тэм з'яўляецца супрацоўніцтва ў будаўнічай сферы. Як могуць працаваць беларускія будаўнікі, вам вядома. Вы гэта ўжо ўбачылі. Па цане і якасці, напэўна, беларусам роўных няма. І культура будаўніцтва на адпаведным узроўні", - падкрэсліў Кіраўнік дзяржавы.

Паводле яго слоў, гэтага ўдалося дасягнуць дзякуючы савецкай школе. "Не маё тут набыццё і не міністра цяперашняга, і не ўрада. А менавіта адтуль. І каштоўнасць у тым, што мы не развалілі гэту школу, мы яе захавалі. Больш таго, я ўсё больш пераконваюся, што гэта стала магчымым, таму што мы не развалілі дзяржаўныя будаўнічыя ўстановы. У нас як былі трэсты, так і засталіся. Яны ўзняліся на больш высокі ўзровень, - заявіў Аляксандр Лукашэнка. - Калі прыватная кампанія мае такую ж базу, яна ўдзельнічае ў будаўніцтве, канкурыруе. Мы не ўшчамляем прыватнікаў".

З іншага боку, звярнуў увагу Прэзідэнт, у Беларусі прад'яўляюцца сур'ёзныя патрабаванні да забудоўшчыкаў. Гэта дазваляе пазбягаць жульніцкіх схем і, як вынік, уплывае на кошт жылля. "Крытыкуюць нас, што дыктатура, не рыначная эканоміка... Галоўнае, што ёсць эфект. Таму мы працуем акуратна", - сказаў Кіраўнік дзяржавы.

Ён таксама заўважыў, што ў Беларусі ёсць шмат напрацовак у мадэрнізацыі транспартнай інфраструктуры. Холдынг "Белаўтадар" паспяхова выконвае заказы ў краінах СНД. Пры гэтым Беларусь прапануе комплексны падыход пры рамонце і рэканструкцыі дарог, мастоў і пуцеправодаў.

Аляксандр Лукашэнка падкрэсліў, што беларускія прадпрыемствы гатовы забяспечыць Расію любой тэхнікай, асабліва ва ўмовах сыходу з краіны заходніх кампаній. У свой час Беларусь зрабіла стаўку на ўласныя сілы ў развіцці прамысловасці і, як паказаў час, не прагадала.

"У нас не стаіць так жорстка пытанне па імпартазамяшчэнні, як у Расіі. Гэта таму што вельмі спадзяваліся: немцы добрыя, амерыканцы таксама, у іх усё лепшае. Дык яно ў тры разы было даражэйшае, а цяпер яго няма наогул. Вось да чаго прывяла гэта практыка арыентацыі на партнёраў. Гэта такія партнёры - пакуль на калені не паставяць, будуць даціскаць. Таму мы гатовы з Расіяй у любы час па любых напрамках сёння супрацоўнічаць", - заявіў Прэзідэнт.

Беларускія прадпрыемствы гатовы пастаўляць у Варонежскую вобласць і ўсе віды тэхнікі: пасажырскай, камунальнай, сельскагаспадарчай. Яшчэ адным напрамкам супрацоўніцтва можа стаць узаемадзеянне ў сферы сельскай гаспадаркі. Акрамя традыцыйных прамых паставак высакаякасных прадуктаў харчавання ў Варонежскую вобласць Беларусь таксама гатова падзяліцца вопытам будаўніцтва аграгарадкоў і вытворчых холдынгаў, тэхналогіямі ў жывёлагадоўлі, племянной справе, насенняводстве, адзначыў Аляксандр Лукашэнка.

"Жыллёва-камунальная гаспадарка - гэта і водаачыстка, і водаадвядзенне. Ад каналізацыі да ліфтаў. Калі наш вопыт вам спатрэбіцца, калі ласка, вывучайце. Мы гатовы падключацца", - падкрэсліў беларускі лідар.

Кіраўнік дзяржавы адзначыў, што з боку расійскіх рэгіёнаў бачыць вельмі вялікую зацікаўленасць у развіцці супрацоўніцтва з Беларуссю.

"Дзякуючы вам мы маем такое супрацоўніцтва і спрабуем выбудаваць адзіную Саюзную дзяржаву на новых прынцыпах, каб ніхто не быў у крыўдзе, каб развіваліся суверэнныя незалежныя дзяржавы - Беларусь і Расія. Да такога саюза, упэўнены, будуць падключацца і іншыя рэспублікі былога Савецкага Саюза", - сказаў Аляксандр Лукашэнка.

Кіраўнік Варонежскай вобласці ў першую чаргу падзякаваў за запрашэнне наведаць Беларусь і цёплы прыём, насычаную дзелавую праграму.

Дэлегацыя рэгіёна, напрыклад, ужо наведала МАЗ і "Белкамунмаш". "Ёсць узаемны інтарэс", - канстатаваў Аляксандр Гусеў. Ён расказаў, што ў Варонежскай вобласці рэалізуецца стратэгія развіцця транспартнай інфраструктуры вобласці, і прадукцыя, якая вырабляецца ў Беларусі, будзе карысная: "Думаю, мы прыйдзем да таго, што заключым дагаворы і будзем купляць. Гэта датычыцца перш за ўсё электратранспарту як асновы пасажырскага транспарту для Варонежа".

Пабывала расійская дэлегацыя таксама ў РНПЦ анкалогіі і медыцынскай радыялогіі імя М.М.Аляксандрава. У Варонежскай вобласці, паводле слоў губернатара, цяпер выбудоўваюць комплексную сістэму аказання дапамогі анкахворым, узводзіцца вялікі хірургічны комплекс, а затым будзе пабудаваны тэрапеўтычны. "Вядома, той вопыт, які назапашаны ў цэнтры (у беларускім РНПЦ анкалогіі і медрадыялогіі. - Заўвага) для нас вельмі актуальны. Мы дамовіліся, што нашы медыкі вялікай групай прыедуць, сустрэнуцца, нешта будуць пераймаць. Мы ўчора таксама паглядзелі, што можна было і закупляць абсталяванне, якое вырабляецца на тэрыторыі Беларусі. Яно якаснае, адпавядае чаканням, патрабаванням, якія ёсць у нашай медыцынскай супольнасці", - адзначыў Аляксандр Гусеў.

Адбыліся, паводле яго слоў, і перагаворы ў гандлёва-прамысловай палаце, якія таксама павінны даць свой вынік, у тым ліку пазітыўна паўплываць на тавараабарот.

Гандлёва-эканамічнае супрацоўніцтва, на думку губернатара, развіваецца дынамічна. Паводле даных за 2021 год, узаемны тавараабарот склаў звыш $348 млн,  што на 30 працэнтаў больш, чым у 2020-м, - гэта самы высокі паказчык з 2018 года. "Але я не думаю, што нас павінна задавольваць абсалютная велічыня, - сказаў Аляксандр Гусеў. - Разлічваем, што гандлёва-эканамічны абарот будзе, безумоўна, расці. У гэтым годзе планавалі рост да 10%, але з улікам санкцыйных абставін, якія ўзніклі, думаю, у нас ёсць значна больш сур'ёзныя магчымасці і перспектывы".