Удзел у агульным сходзе прадстаўнікоў членаў Беларускага рэспубліканскага саюза спажывецкіх таварыстваў

Белкаапсаюз - гэта ўнікальная структура, і страціць яе нельга. Аб гэтым Прэзідэнт Беларусі Аляксандр Лукашэнка заявіў 16 лютага ў сваім выступленні на агульным сходзе прадстаўнікоў членаў Беларускага рэспубліканскага саюза спажывецкіх таварыстваў.

"Мы сабраліся не для таго, каб у напружанні паслухаць адзін аднаго, але для таго, каб прыняць кардынальныя рашэнні, якія дадуць магчымасць нашай арганізацыі працаваць эфектыўна на карысць нашых людзей", - сказаў у пачатку сваёй прамовы Прэзідэнт.

Кіраўнік дзяржавы адзначыў асаблівую актуальнасць гэтай сустрэчы. "Я анансаваў у канцы мінулага года, што мы сустрэнемся ў такім шырокім фармаце, каб рассячы гордзіеў вузел застарэлых праблем, - сказаў Аляксандр Лукашэнка. - Усе вы ведаеце, у мяне да вашай арганізацыі стаўленне асаблівае. Так склалася гістарычна, што на тэрыторыі Беларусі сяло і спажыўкааперацыя, дапамагаючы адзін аднаму, развіваліся разам амаль 107 гадоў. І сёння вашымі паслугамі ахоплены кожны трэці жыхар краіны. У асноўным сельскі жыхар. І я нездарма паўтараю: калі страцім вёску - страцім краіну. Нашы людзі, якіх мы абслугоўваем у вёсцы, вартыя лепшага".

Аляксандр Лукашэнка канстатаваў, што ў Белкаапсаюза вельмі багатыя працоўныя традыцыі, унікальны вопыт. У тым ліку і ідэалагічна правільны слоган - працаваць на карысць чалавека. "У фарватары Года якасці мы проста не маем маральнага права рабіць нешта спусціўшы рукавы. Трэба ставіць канкрэтныя мэты і дасягаць іх", - падкрэсліў беларускі лідар.

Тым не менш ён нагадаў пра шэраг праблемных пытанняў, якія назбіраліся. У такім жа складзе папярэдняя сустрэча адбылася ў 2021 годзе. Тады разбіралі памылкі, знаёміліся з вопытам перадавікоў, з дапамогай вучоных намячалі рэальную бізнес-мадэль па кожным з напрамкаў працы.

"Прайшло амаль два з паловай гады. І што? На жаль, прэтэнзій да вашага саюза стала нават больш. Стратная дзейнасць, пытанні з боку кантралюючых органаў, скаргі насельніцтва. Таму не крыўдуйце, але размова сёння будзе жорсткая", - сказаў Прэзідэнт. 

Кіраўнік дзяржавы растлумачыў, што ўсё больш жорстка ставіць задачы перад міністэрствамі і патрабуе аддачы ад кадраў, і гэта не выпадкова. Галоўнае, падкрэсліў Аляксандр Лукашэнка, не дапускаць расслаблення, таксама з улікам абстаноўкі вакол краіны.

"Страціць такую унікальную структуру, як Белкаапсаюз, мы не маем права. Мы павінны прымусіць яе працаваць, - падкрэсліў беларускі лідар. - І не трэба чарговы раз расказваць пра складаныя ўмовы. У іх, у гэтых умовах, усе працуюць".

Ён прывёў у прыклад ваеннаслужачых, якія гэтымі днямі правялі на граніцы аперацыю па затрыманні дыверсантаў: "Вы што думаеце, тым хлопцам (лягчэй. - Заўвага)? Ляжаць 10 дзён на граніцы, валяцца ў такіх умовах нашым дзецям лёгка? Нялёгка. Усім цяжка".

"Вы бачыце, што адбываецца навокал. Але, выбачайце мне, вы яшчэ не ўсё ведаеце. Скажу вам асноўнае, не канкрэтызуючы. Хутка мы вам даложым па ўсіх гэтых пытаннях. Сёння ўсе жадаюць на Захадзе, і ў авангардзе нашы беларускія збеглыя (у дачыненні да Беларусі), паражэння Расіі ў вайне з Украінай", - адзначыў Кіраўнік дзяржавы.

Аляксандр Лукашэнка прывёў цытату перагавораў збеглых з некаторымі асобамі на Захадзе: "Польшча мае права на заходнія землі Беларусі. А ў выпадку паражэння Расіі Беларусь будзе прырастаць за кошт заходніх зямель Расіі".

"Чытай: нам прырэжуць нешта са Смаленскай, Бранскай, магчыма, Пскоўскай абласцей. А заходнюю Беларусь мы павінны (да Мінска, як вы ведаеце, мяжа была) аддаць Польшчы. Гэта новыя "дэмакратычныя ўлады вядуць перамовы" на Захадзе, - растлумачыў Кіраўнік дзяржавы. - Хто з вас можа з гэтым пагадзіцца? Магчыма, нехта і можа, але я - ні ў якім выпадку. Мы будзем змагацца да апошняга за нашы землі. Тым больш мы ж нікому праблем не дастаўляем. Мы ж нікому нічога не павінны. Мы не прэтэндуем ні на Вільню, ні на Беласточчыну, ні на расійскія, ні на ўкраінскія землі. Нам дастаткова таго, што гістарычна нам дасталася. Гэта нашы беларускія землі".

Аляксандр Лукашэнка агучыў і яшчэ адзін факт, звязаны з абстаноўкай на ўкраінскім напрамку: "Тое, што мне далажылі раніцай. Толькі сёння затрымалі некалькі дыверсантаў на ўкраінскай граніцы. З дапамогай дронаў па балотах некаторыя з украінскіх грамадзян перапаўзалі на нашу граніцу, перакідвалі ўзрыўчатку для ўчынення дыверсій перш за ўсё на тэрыторыі Расіі і Беларусі. Толькі што скончылася контртэрарыстычная аперацыя, якую вы нават не заўважылі. І добра. Гэта не ваша справа. Вы павінны спакойна працаваць, выконваць сваю работу. Толькі што чэкісцкая ваенная аперацыя завяршылася.Затрыманыя былі ўсе дыверсанты. А сярод іх беларусы".

Паводле слоў Кіраўніка дзяржавы, гэта не адзінкавы факт: "Гэта практычна два-тры разы на тыдзень".

Аляксандр Лукашэнка канстатаваў, што ў такой абстаноўцы нельга дапускаць самазаспакоенасці. "І нам - і мне як Прэзідэнту, і ўладзе - перш за ўсё вельмі важна падтрымка і маналіт усіх нас і нашага народа. Мы - кіраўнікі. Ад нас усё залежыць. Будзем мы адзіныя і маналітныя - будзе і народ адзіны і маналітны. Тым больш пераважная большасць беларусаў зразумела, што магло быць і чаго нельга дапусціць. Таму я ўвесь час напружваю органы ўлады: не расслабляйцеся - страцім краіну".

"Калі нехта думае, што там будзе лепш, калі нас падзеляць і па частках куды-небудзь прымуць, - памыляецеся. Калі было б так добра ў 20-30-х гадах (мінулага стагоддзя, калі частка Беларусі была ў складзе Польшчы. - Заўвага), мы не змагаліся б за сваю незалежнасць, - сказаў Аляксандр Лукашэнка. - Таму давайце зробім усё для таго, каб на гэтай зямлі быў мір. А ён будзе толькі тады... Як я гавару: дайце мне эканоміку. А вы (Белкаапсаюз. - Заўвага) - велізарная частка нашай эканомікі - 30% насельніцтва вы павінны абслугоўваць. Рабіце вывады. Адсюль жорсткі падыход да многіх пытанняў ад адукацыі, аховы здароўя да гандлю".

Прадаўжаючы тэму гандлю, Кіраўнік дзяржавы акцэнтаваў увагу: "У адрозненне ад прыватнікаў вам аказваецца сур'ёзная падтрымка з бюджэту. А таму дзяржава мае права разлічваць на адпаведную аддачу".

Гаворачы аб праблемных пытаннях у рабоце спажыўкааперацыі, Кіраўнік дзяржавы адрасаваў крытычныя заўвагі не толькі кіраўнікам розных узроўняў да самога Белкаапсаюза, але і органаў улады: "Два гады таму мы дамовіліся аб цесным узаемадзеянні з органамі ўлады. Цяпер я скажу галоўнае: але паўнацэннай падтрымкі як не было, так і няма. Старшыні аблвыканкамаў, Мінскага гарвыканкама, райвыканкамаў па-ранейшаму не бачаць развіццё Белкаапсаюза сярод сваіх першарадных задач. Абыякава глядзяць на праблемы нашай спажыўкааперацыі. Ніводны з пяці заяўленых паказчыкаў не выкананы".

Кіраўнік дзяржавы адзначыў, што калі для эфектыўных дзеянняў мясцовай улады трэба стварыць у Белкаапсаюзе жорсткую вертыкаль і прыняць нейкія рашэнні, то трэба неадкладна ўнесці такія прапановы. "З вёскі краіна пайшла. Мы ўсе сваімі каранямі ідзём у вёску. Дык чаму мы так ставімся да сваіх бацькоў? Мы ж заўтра будзем такімі ж. І да нас так будуць ставіцца", - заўважыў Аляксандр Лукашэнка.

"У 2021 годзе я гаварыў вам, што мясцовая ўлада павінна быць не проста ў курсе існуючых праблем у галіне, а бегчы наперадзе паравоза і аказваць усебаковае садзейнічанне пазітыўным пачынанням і ідэям, кіраваць, накіроўваць і пры неабходнасці - што рабіць? - прымушаць! Так, як бы непапулярна гэта ні гучала. Патрэбны вынік, - сказаў Прэзідэнт. - І яго трэба дасягнуць любымі сродкамі! Калі хтосьці бачыць сябе па-за нашым саюзам, бог з вамі, праблем няма. Вы павінны вызначыцца і не перашкаджаць працаваць тым, хто хоча працаваць".

Кіраўнік дзяржавы прадоўжыў: "І не трэба адгаворак, што спажыўкааперацыя - самастойны суб’ект гаспадарання і "вы да нас не лезьце і не перашкаджайце". Добра, і такое рашэнне будзе прынята. Ніхто вам перашкаджаць не будзе. Але за вынік спытаем. І ў бюджэт не хадзіце за грашамі. З якога гэта часу гандаль (адзін з вашых асноўных напрамкаў), грамадскае харчаванне былі стратнымі?! Работа Белкаапсаюза - гэта не толькі эканамічныя паказчыкі. Гэта пытанне палітычнае".

Аляксандр Лукашэнка падкрэсліў, што Беларусь - дзяржава, дзе абсалютным прыярытэтам з’яўляецца дабрабыт простага чалавека-працаўніка, асабліва вяскоўца. "Таму мы ўсяляк падтрымлівалі і будзем падтрымліваць вёску. Менавіта ў абслугоўванні жыхароў вёсак і маленькіх пасёлкаў заключаецца сацыяльная роля спажывецкай кааперацыі. У тым ліку і па якасці вашай работы людзі ацэньваюць усю вертыкаль улады. І гэта народная ацэнка павінна быць толькі станоўчай", - заявіў Кіраўнік дзяржавы.

Прэзідэнт у сувязі з гэтым выказаў крытычныя заўвагі ў адрас старшынь райвыканкамаў, якія "здаецца, забылі, што на іх ляжыць адказнасць за давераную тэрыторыю, за ўсе справы ў раёне, у тым ліку і за спажывецкую кааперацыю". "Яе работу ў вёсцы не заменяць ніякія прадпрымальнікі", - падкрэсліў беларускі лідар.

"Настаў час выпрацаваць агульнарэспубліканскую канцэпцыю абслугоўвання вясковага насельніцтва. Людзі, якія працуюць на зямлі, не павінны ні ў чым мець патрэбу, - сказаў Прэзідэнт. - Чакаю ад Урада канкрэтных прапаноў па рэгіёнах і населеных пунктах з колькасцю жыхароў да 200 чалавек. Неабходна зацікавіць усіх суб’ектаў гаспадарання ў абслугоўванні вясковага насельніцтва, стварыць стымулюючыя ўмовы. І ў такога гіганта, як Белкаапсаюз, тут будзе асаблівая роля".

Аляксандр Лукашэнка адзначыў, што яму паступаюць розныя прапановы па арганізацыі гандлю ў вёсцы - ад перадачы нерэнтабельных магазінаў прыватнікам, гандлёвым сеткам да навядзення жалезнай дысцыпліны ў сістэме Белкаапсаюза, каб яна існавала і працавала. "Калі ўзварухнуць сістэму, навесці парадак з затратамі, змяніць падыходы да арганізацыі гандлю, удасканаліць механізм кіравання, у нас усё атрымаецца", - сказаў ён.

Прэзідэнт звярнуў увагу, што работу спажыўкааперацыі ў вёсцы не заменяць ніякія прадпрымальнікі. Напрыклад, недапушчальна, калі ў райцэнтры "на адным пятаку нос у нос труцца адзін аб аднаго" пяць магазінаў, ствараюць канкурэнцыю адзін аднаму, а ў вёску ніхто не едзе. "Або выбіраюць самыя прынадныя маршруты, вакол горада праехацца, зняць вяршкі. Да межаў раёна, дзе 10-20 жыхароў, прыватнік не асабліва рвецца, у лепшым выпадку летам, калі там дачнікі з'ехаліся, - абазначыў праблемныя моманты Аляксандр Лукашэнка. - Давайце дамовімся так: усе рашэнні аб арганізацыі гандлю прымаем зыходзячы з інтарэсаў насельніцтва. І галоўнай фігурай тут будзе старшыня райвыканкама. Хоча прыватнік працаваць на тых жа сацыяльных умовах і ў сумленнай канкурэнцыі - няхай бярэ пад адказнасць усю тэрыторыю, каб людзі нідзе і ні ў чым не мелі патрэбы".

Прэзідэнт прывёў прыклад, што ў Расіі спажывецкую кааперацыю спачатку загубілі, а цяпер абдумаліся і шукаюць магчымасць адрадзіць. "І што ж? Не можа, ды і не хоча там прыватнік вырашыць усе пытанні! Яму нявыгадна, а церпіць наш просты чалавек. Таму я кожны год падтрымліваю Белкаапсаюз і спрабую ўсяляк расшавяліць. Але трэба глядзець і на затраты. Разам з мясцовай уладай падлічыце свае магчымасці, складзіце адпаведны бізнес-план", - даручыў беларускі лідар.

Ён запатрабаваў ад Урада, Камітэта дзяржаўнага кантролю ўзяць на асаблівы кантроль усе рашэнні гэтай сустрэчы.

"На жаль, прадаўжаецца ўстойлівая тэндэнцыя зніжэння ўдзельнай вагі спажыўкааперацыі ў рознічным тавараабароце гандлёвых арганізацый краіны. Так, калі ў 2010 годзе на вашу долю прыпадала больш за 12% агульнага аб'ёму, то ў 2020-м - каля 4%, у 2023-м - недацягваеце да 3%. Пры наяўнасці значнай інфраструктуры недапрацоўваеце ў некаторых райцэнтрах і вялікіх населеных пунктах, адны страты ў вёсцы", - сказаў Аляксандр Лукашэнка.

Прэзідэнт адзначыў, што ў спажывецкай кааперацыі ёсць свая ніша - магазіны крокавай даступнасці і іх не заменіць ні адзін гіпермаркет.

"Зразумела, канкурэнцыя вельмі жорсткая. Але ў барацьбе за пакупніка вас ніхто не стрымлівае. Мінулы раз мы дамаўляліся аптымізаваць сам працэс арганізацыі гандлю - ад закупкі тавару, уваходных цэн, асартыменту, дастаўкі ў гандлёвыя аб'екты да яго выкладкі, рэкламы і да таго падобнае. Гаварылі пра адзінага аператара закупак, развіццё інтэрнэт-гандлю. У выніку нічога дзейснага вы так і не ўкаранілі, - звярнуў увагу Кіраўнік дзяржавы. - Рукі апусцілі. А з нашага боку не было патрабавальнасці".

Але і на такім непрывабным агульным фоне ёсць арганізацыі, якія змаглі дастойна забяспечыць попыт насельніцтва, нарасціць аб'ёмы продажаў. А іх работа выклікае ў людзей толькі станоўчыя водгукі, заявіў Аляксандр Лукашэнка. 

"Стабільна з чыстым прыбыткам апошнія пяць гадоў працуюць Брэст і Гродна. Але я гэта гавару з вялікай апаскай: трэба вельмі сур'ёзна паглядзець, што гэта за прыбытак. Я пакуль не крытыкую, але бяру пад сумненне. Трэба дакладна ведаць. Калі яны сапраўды спрацавалі з прыбыткам, хто перашкаджае іншым? Пры гэтым гродзенцы аднымі з першых завяршылі структурную перабудову, працуюць як адзіная юрыдычная асоба, актыўна ўкараняюць аўтаматызацыю і прынцыпы сеткавага гандлю. І прыклады рэнтабельнай работы мясцовых райпо ёсць ва ўсіх абласцях. Што ж перашкаджае астатнім працаваць так, каб людзі не скардзіліся ў выканкамы і не пачыналі бурныя дэбаты ў сацсетках? Так, аб такіх выпадках мяне вельмі падрабязна інфармуюць", - заўважыў Прэзідэнт.

Ён упэўнены, што пры ўсіх недахопах рэзервы ў спажыўкааперацыі вялізныя. "І там, дзе аб'ектыўна вам неабходна дапамагчы, дзяржава заўсёды падстаўляла і будзе падстаўляць плячо. Але варушыцца трэба і самім", - падкрэсліў беларускі лідар.

Кіраўнік дзяржавы нагадаў, што ў канцы 2023 года ў Мінску адкрыўся Першы нацыянальны гандлёвы дом. Сваю прадукцыю там прадставілі вытворцы з усіх рэгіёнаў. Гандлёвы цэнтр адразу стаў папулярны і ў мінчан, і ў гасцей сталіцы. Штодзень яго наведваюць да 20 тыс. чалавек. "Не дай бог старшыні Мінскага гарвыканкама загубіць і ідэю, і гэты гандлёвы дом. Я бачыў вашы хібы, недахопы, калі адкрывалі яго, - дапрацоўвайце, гэта жыццё. Але людзі туды пайшлі. Яны спадзяюцца на большае", - заўважыў Прэзідэнт.

"А як там прадстаўлены Белкаапсаюз? Ідзіце і паглядзіце: футрам. Развесіць футра і чакаць - самае простае. А дзе вашы аб'екты грамадскага харчавання? Вам там адчынены дзверы. Калі не - скажыце. Усе начальнікі тут, мы паправім. Чаму няма кафэ і прадуктовага магазіна, дзе прадаюцца вашы цудоўныя выпечка, салёныя агуркі, квашаная капуста, дранікі, сала і іншыя скваркі? Ніхто лепш за вас не ўмее гэта ўсё прыгатаваць. Прадукцыя натуральная, якасная, па традыцыйных рэцэптах. Гэта ў Мінску людзі, якія ў асноўным ужо забылі гэта, купяць з задавальненнем. І турысты. А вам дадатковая рэклама. І гэта толькі адзін з прыкладаў таго, як можна аднавіць паўнацэнную прысутнасць кааператыўнага гандлю ў гарадах", - сказаў Аляксандр Лукашэнка.

Прэзідэнт адзначыў, што ўніверсальных магазінаў у краіне дастаткова. Цяпер запатрабаваны гандлёвыя кропкі, якія працуюць па пэўнай асартыментнай канцэпцыі, напрыклад кандытарскія, мясныя, дробнааптовыя.

"Цяпер жа можна не толькі развіваць уласны фірменны гандаль, але і наладзіць узаемадзеянне з беларускімі вытворцамі, стаць своеасаблівым бізнес-хабам для ўсяго беларускага. Вашы пляцоўкі - іх прадукцыя. Вы павінны быць правадніком айчынных тавараў у рэгіёны, асабліва ў глыбінку. Ад гэтага выйграюць усе. Але ўважліва ацаніце перспектывы. Калі гэта апраўдана, пастаўце на маршрут аўтакраму з нармальным графікам работы. Вяскоўцы павінны атрымаць якасную замену стацыянарнаму магазіну", - падкрэсліў Кіраўнік дзяржавы.

У час сходу Аляксандр Лукашэнка расказаў аб выпадку ў Мастоўскім раёне Гродзенскай вобласці, дзе пасля звальнення прадаўца часова была прыпынена работа магазіна.

"Арганізавалі аўтакраму. Але калі? У першай палове дня. І звычайны настаўнік сельскай школы скардзіцца: яму пакінуць дзетак без нагляду, каб купіць прадукты, ці галодным сядзець? Трэба думаць пра людзей, - запатрабаваў Прэзідэнт. - У рэшце рэшт, прааналізуйце магчымасць аптымізацыі маршрутаў з улікам выязнога абслугоўвання сельскага насельніцтва іншымі арганізацыямі".

Кіраўнік дзяржавы нагадаў, што сельскіх жыхароў сёння абслугоўваюць і пошта, і сацабарона, і фельчарска-акушэрскія пункты. "Старшыні райвыканкамаў не працуюць: яны гэта павінны аб'яднаць, выпрацаваць лагістыку. Едзе Белкаапсаюз - можна завезці туды і пошту, і лякарствы падкінуць, і гэтак далей", - прапанаваў Аляксандр Лукашэнка.

Адначасова неабходна ўдасканальваць работу магазінаў на колах, яны павінны быць сучаснымі і зручнымі для пакупнікоў, падкрэсліў Прэзідэнт. "Гэтыя магазіны на колах павінны быць такімі, каб з маршруту яны не маглі з'ехаць - адразу "засвецяцца". Вы гаворыце, нерэнтабельныя гэтыя аўтакрамы. А вы паглядзіце, куды яны ездзяць і што яны робяць, - абазначыў яшчэ адну задачу Кіраўнік дзяржавы. - У нас ёсць айчынныя напрацоўкі, якія, я ўпэўнены, дадуць магчымасць дастойна абнавіць аўтапарк. Улічваючы сацыяльнае значэнне такога фармату, даручаю ўраду, губернатарам прапрацаваць пытанні фінансавага забеспячэння набыцця сучасных абсталяваных аўтамабіляў для гэтых мэт".

Ён таксама даручыў узяць гэтыя пытанні на кантроль і Адміністрацыі Прэзідэнта. Пры гэтым Аляксандр Лукашэнка звярнуў увагу, што Белкаапсаюзу неабходна будзе адрамантаваць і існуючы аўтапарк - не трэба разлічваць выключна на новыя машыны. "Лішніх грошай няма. Нават калі будуць, проста так іх ніхто вам не дасць, - папярэдзіў Прэзідэнт. - Таму разумна падыдзем да гэтага пытання. Але ў бягучым годзе праблему трэба вырашыць".

Асобна Кіраўнік дзяржавы спыніўся на арганізацыі гандлёвага працэсу, выканання норм і правіл: "Наяўнасць тавараў са скончанымі тэрмінамі годнасці - гэта чырвоная лінія. Няма тавару - дрэнна, але пратэрміноўка наогул недапушчальна. Фактаў такіх дастаткова".

Камітэт дзяржаўнага кантролю ў 2023 годзе праверыў больш як 270 гандлёвых аб'ектаў. Парушэнні ўстаноўлены практычна ў кожным з іх. "Вы што, гніллю вырашылі людзей карміць? - абурыўся Аляксандр Лукашэнка. - Мы на гэта адрэагуем адпаведным чынам".

У выніку да адміністрацыйнай і дысцыплінарнай адказнасці прыцягнуты 165 чалавек. Накіравана 107 рэкамендацый па паляпшэнні працы.

"Быў шэраг скаргаў: працаваць няма каму. Ты з прадаўца патрабуеш: звольню і іншае - кажа, звальняйце. Губернатары, запомніце, з сённяшняга дня вы наведзяце парадак так, што ніхто не зможа адкрыць рот і сказаць: "Звальняйце, я сыходжу". Паўтараць больш не буду, вы ведаеце, пра што ідзе размова. Я вам гаварыў навесці парадак у краіне з кадрамі, каб не было гэтых балбатуноў, дармаедаў, гультаёў. Думаю, начальнікі мяне пачулі", - дадаў Прэзідэнт.

Прадаўжаючы размову, Аляксандр Лукашэнка заўважыў, што на сённяшні дзень ва ўсіх кутках краіны працуюць звыш тысячы аб'ектаў грамадскага харчавання Белкаапсаюза.

"Тое, што вы можаце здзівіць сваімі кулінарнымі шэдэўрамі на выстаўках, кірмашах, розных мерапрыемствах, - факт. Неабходна забяспечыць такі ж узровень сэрвісу і ў паўсядзённай вашай працы. Насельніцтва, асабліва моладзь, цяпер актыўна наведвае розныя кафэ, сеткі хуткага харчавання, цікавіцца, каштуе, выбірае, параўноўвае. Чым можаце іх зацікавіць вы? У вас шмат чым можна зацікавіць. А як на справе? Вядома, любоў да прывычных страў мінулых гадоў у людзей будзе заўсёды. Але маладое пакаленне больш запатрабавальнае. Трэба перапрафіляваць дзеючыя, адчыняць канцэптуальна новыя кропкі", - упэўнены Аляксандр Лукашэнка.

Ён лічыць, што спажыўкааперацыі трэба развіваць свае ўласныя брэнды.

"Зрабіце акцэнт на дастаўцы, абедзенных меню, абслугоўванні выязных мерапрыемстваў. Развівайце прыдарожны сэрвіс, з ім неяк зусім заціхлі. Акцэнтую: работа галіны грамадскага харчавання сёння з'яўляецца рэзервам для павелічэння рознічнага тавараабароту. І ў гэтым годзе Белкаапсаюз павінен яе максімальна актывізаваць. Распрацуйце адзіную маркетынгавую канцэпцыю, каб чалавек, які ўбачыў вашу шыльду, дакладна ведаў: будзе па-хатняму натуральна і смачна", - даручыў Прэзідэнт.

Кіраўнік дзяржавы на агульным сходзе агучыў патрабаванне да спажыўкааперацыі пашыраць сетку прыёмных пунктаў сельгаспрадукцыі ў насельніцтва.

Аляксандр Лукашэнка адзначыў, што нарыхтоўчая дзейнасць - гэта традыцыйная функцыя спажыўкааперацыі. Работа па закупцы лішкаў сельскагаспадарчай прадукцыі, вырашчанай у асабістых падсобных і фермерскіх гаспадарках, ідзе круглы год. У сезон дабаўляюцца дары лесу.

"Мяркуючы па статыстыцы, вамі з зайздросным пастаянствам забяспечваецца штогадовы прырост нарыхтоўчага абароту. Але трэба прызнаць, што тэмпы росту яўна недастатковыя, яны проста чарапашыя. Неабходна пашыраць сетку прыёмных пунктаў, таму што ініцыятыву перахопліваюць іншыя, у тым ліку прыватнікі. Але там, дзе гэта выгадна. А вы страчваеце, - звярнуў увагу Кіраўнік дзяржавы. - Вы па-ранейшаму сцвярджаеце, што нарыхтоўчая дзейнасць - не бізнес-праект, а сацыяльны напрамак. Прыватніку чамусьці выгадна, кааператарам - не. Такога не бывае. Калі прыбыткова прыватніку, то вам - удвая. Паколькі гэта сыравіна для вашых жа прадпрыемстваў".

Прэзідэнт падкрэсліў, што задачу выйсці на 90% перапрацоўкі ва ўласнай сістэме закупак да 2025 года з Белкаапсаюза ніхто не здымаў.

"Перапрацоўка - гэта не толькі рэзерв нарошчвання аб’ёмаў дзейнасці, але і разам з грамадскім харчаваннем дадатковы механізм кампенсацыі нізкаэфектыўнага гандлю ў вёсцы. У вас дастаткова канкурэнтных пераваг", - сказаў Аляксандр Лукашэнка.

Паводле яго слоў, вытворчасць прадуктаў харчавання для спажыўкааперацыі мае некалькі стратэгічных пасылаў: "Гэта натуральнасць, пашырэнне асартыменту і рост прадукцыйнасці. Хлеб, кандытарскія вырабы, мяса, каўбаса, традыцыйныя саленні, замарожаныя грыбы - многае з таго, што вы вырабляеце, заўсёды карыстаецца попытам. Пашырайце свой асартымент".

Кіраўнік дзяржавы расказаў, як у 2021 годзе наведаў невялікую хлебапякарню ў Свіслачы. Прэзідэнт тады пакаштаваў мясцовы хлеб і быў уражаны яго смакам. Пасля наведвання Аляксандрам Лукашэнкам пякарні людзі назвалі пляцёнку "Бацькава булка". У горадзе нават пачалі праводзіць аднайменны каравай-фэст.

У той жа час Кіраўнік дзяржавы звярнуў увагу на скаргі, якія паступаюць ад людзей на якасць хлебапякарнай прадукцыі ў іншых гарадах, у прыватнасці ў Рагачове. Ён даручыў разабрацца ў гэтым пытанні і прыняць неабходныя меры. "Зрабіце, каб у вялікім горадзе Рагачове людзі мелі свой хлеб! - запатрабаваў Прэзідэнт. - Абслугоўвайце як належыць людзей".

"Вам мая парада: пачніце з дысцыпліны і парадку, структуруйце сваю арганізацыю. З сябе пачніце. Калі трэба нечым дапамагчы, я абавязкова дапамагу. Але толькі дзейнічайце. Разам з органамі ўлады. Віцэ-прэм'ер Заяц будзе кантраляваць, мы будзем дапамагаць. Цяпер Прэм'ер-міністр да гэтага асабіста падключыцца. Так яму і перадайце. За вёску вы галавой адказваеце. Мы з вамі ўсе вясковыя людзі. Яшчэ раз паўтараю: адтуль пайшла наша краіна - мы павінны іх падтрымаць. Мы вас прымусім працаваць. Разумейце мяне, як хочаце. Вы можаце. Калі б вы не маглі, я сёння прыйшоў бы і пачаў з галоўнага: як будзем развальваць Белкаапсаюз і на гэтым месцы фарміраваць новы гандаль. Але я яшчэ спадзяюся на вас", - заявіў беларускі лідар.

На сходзе Аляксандр Лукашэнка таксама закрануў пытанні імпартазамяшчэння: "Каб не даводзілася Беларусі закупляць за валюту кансерваваны гарошак, кукурузу, дзіцячае харчаванне, кетчупы і да таго падобнае".

Два гады таму Кіраўнік дзяржавы ўжо звяртаў увагу спажыўкааперацыі на тое, што айчынны рынак запоўнены толькі напалову беларускімі плодаагародніннымі кансервамі, крыху больш як на 60% - сокамі і марынаванай агароднінай.

"Я прапаноўваў Белкаапсаюзу паднапружыцца і заняць гэтыя нішы. Дамаўляйцеся, высаджвайце сады, калі іх мала. Цяпліцы будуйце, забірайце адтуль тавар, вырабляеце гатовую прадукцыю ад гарошку да агуркоў і таматаў. Сёння мы бачым паводле даных статыстыкі: доля айчыннай прадукцыі ў рознічным продажы за мінулы год падрасла толькі па соках і плодаагароднінных кансервах, ды і тое менш як на 10%. Але ж гэта зусім мала, недастаткова. Зразумейце нарэшце: чым больш будзе на нашым рынку беларускага, натуральнага і якаснага, тым лепш будзе для ўсіх. Ды і свае вытворчыя магутнасці загрузіце. Пакуль, мяркуючы па прадстаўленых дакументах, яны задзейнічаны далёка не поўнасцю", - адзначыў Прэзідэнт.

"Значыць, трэба больш актыўна рэкламаваць сябе, свае магчымасці, знаходзіць тых, хто гатовы размяшчаць на вашых заводах свае заказы. Яшчэ раз паўтаруся: на выстаўках вока радуецца, а на магазіны скаргі паступаюць. Так не пойдзе", - падкрэсліў Кіраўнік дзяржавы.

Гаворачы аб развіцці зверагадоўлі, Прэзідэнт адзначыў, што гаспадаркі гэтай галіны вырабляюць амаль 90% рэспубліканскіх аб'ёмаў клетачнай пушніны. "Перспектыўны напрамак, хоць і складаны, схільны да знешніх рызык", - канстатаваў Аляксандр Лукашэнка. Ён звярнуў увагу, што ў Еўропе гэту галіну пачалі знішчаць, таму адкрываецца месца на рынку. "Ну ўхапіцеся вы за гэта", - прапанаваў Аляксандр Лукашэнка.

"Дзяржава ў няпросты перыяд аказала вам вельмі сур’ёзную падтрымку. Далей самі", - арыентаваў Прэзідэнт. Але для далейшага развіцця трэба перш за ўсё сумленна адказаць на пытанні аб якасці айчыннага футра і наяўнасці наладжанай сістэмы яго апрацоўкі, пашыву гатовых вырабаў. Бо цяпер большая частка вырабленых шкур прадаецца як сыравіна.

За 2023 год экспарт пушніна-футравай сыравіны склаў амаль 520,5 тыс. штук (98,8% да ўзроўню 2022 года) на $13 млн, дубленых і вырабленых футравых шкур - 121 тыс. штук (47%) на $2 млн.

"Далей лічбы проста дзіўныя. За 2022 год экспарт склаў аж 23 футравыя шубы, а за 2023 год - ні адной, - сказаў Аляксандр Лукашэнка. - Пры гэтым у 2022 годзе з-за мяжы Беларусь завезла футравых вырабаў на $2,3 млн, а ў 2023-м больш як на $2 млн. Як жа так?"

"Хіба так цяжка пашыць шубы, шапкі і што там яшчэ трэба ў халоднае надвор’е? Можа, і цяжка, але мы ўмеем гэта рабіць", - заўважыў Прэзідэнт. 

Аляксандр Лукашэнка запатрабаваў захавання вельмі строгай тэхналагічнай і вытворчай дысцыпліны ва ўсім: ад захаванасці пагалоўя да рэалізацыі гатовых вырабаў, а таксама аплаты за іх.

У сваім выступленні на агульным сходзе Белкаапсаюза Прэзідэнт абазначыў праблемы ў эканамічнай дзейнасці гэтай структуры і запатрабаваў у самыя кароткія тэрміны мабілізавацца для іх вырашэння.

Работу Белкаапсаюза па развіцці экспарту Кіраўнік дзяржавы ацаніў коратка: "Недапрацоўваеце".

За мінулы год Беларусь зарабіла на знешніх рынках амаль $50 млрд. Аднак уклад арганізацый спажыўкааперацыі ў агульнарэспубліканскі аб'ём экспарту - на ўзроўні арыфметычнай хібнасці, сотыя долі працэнта.

У 2022 годзе арганізацыі Белкаапсаюза экспартавалі тавараў крыху больш, чым на $41 млн. Гэта на 13% менш, чым у 2020 годзе.

"У 2023 годзе, на жаль, негатыўныя тэндэнцыі ўзмацніліся", - заўважыў Аляксандр Лукашэнка. За гэты перыяд экспарт тавараў склаў $33 млн, скараціўшыся амаль на 20% у параўнанні з 2022-м.

Пры гэтым таварнай дыверсіфікацыі не адбываецца, канстатаваў Прэзідэнт. Аснову, як і раней, складаюць два тавары нізкай ступені перапрацоўкі: ялавічына (41,5% вартаснага аб'ёму экспарту) і пушніна-футравая сыравіна (40%). Пастаўкі ідуць пераважна ў Расію.

"Так, Расія - наш асноўны гандлёвы партнёр. Але нарошчванне эканамічнага супрацоўніцтва з іншымі краінамі (Кітаем, дзяржавамі далёкай дугі) не менш важна, - падкрэсліў Кіраўнік дзяржавы. - Нельга яйкі класці ў адзін кошык. Задача наконт росту аб'ёмаў экспарту і павелічэння валютных паступленняў стаіць перад усімі. І вы не выключэнне".

Для далейшага развіцця і эфектыўнай работы Белкаапсаюза, падкрэсліў Прэзідэнт, важна падбіраць і ўтрымлівааць кадры, што непарыўна звязана з забеспячэннем дастойнага ўзроўню заработнай платы.

"Патрэбна абнаўленне, прыток моладзі. А чым яе зацікавіць? Каб утрымаць у сваіх радах дастойных спецыялістаў і прыцягнуць новых, патрэбна дастойная аплата працы. І яе можна знайсці, калі вы сістэматызуецеся, калі вы пакінеце на рабочых месцах тых, хто сёння можа (працаваць . - Заўвага) і працуе", - сказаў Аляксандр Лукашэнка.

Пры гэтым ён падкрэсліў, што моладзь трэба прывучаць да працы, а не падносіць ім адразу ўсё гатовае - жыллё, высокую зарплату і гэтак далей. "І дысцыпліна. Кадравая палітыка - гэта дысцыпліна", - дадаў ён.

Вяртаючыся да тэмы заработнай платы, Прэзідэнт заўважыў, што нягледзячы на адсутнасць у Белкаапсаюзе пратэрмінаванай запазычанасці па выплаце зарплаты, яе ўзровень застаецца адным з самых нізкіх у краіне. За 2023 год сярэднямесячная зарплата склала крыху больш за Br1 тыс., што ніжэй за агульнарэспубліканскі паказчык амаль удвая.

"Кіраўнікі раённага звяна павінны выйсці з кабінета, паехаць па сваіх магазінах і цэхах, нарэшце, зразумець, чаму па вашай арганізацыі мінімальныя зарплаты. На паперы ўсё проста – няма нагрузкі. А што вы зрабілі, каб нагрузка была? Каб быў шырокі асартымент тавараў? Гэта датычыцца радавых супрацоўнікаў", - заўважыў Кіраўнік дзяржавы.

"Кіраўніка любога ўзроўню правяраць адразу ў баявых умовах: узялі на пасаду, нарэзалі задачы. Не выканана - значыць, не справіўся, - звярнуў увагу Аляксандр Лукашэнка. - Да трох лічыць ніхто не будзе". Асабліва гэта актуальна ў цяперашняй няпростай сітуацыі і напярэдадні электаральных кампаній. "Краіну не павінны страціць", - падкрэсліў Прэзідэнт.

Фінансавы стан Белкаапсаюза, паводле слоў Прэзідэнта, выклікае асаблівую заклапочанасць: "Стратнасць работы, высокая даўгавая нагрузка прывялі да адсутнасці ўласных абаротных сродкаў у арганізацыях спажыўкааперацыі. Прычым сітуацыя з кожным годам толькі пагаршаецца".

"Ведаеце, хачу папярэдзіць, каб у вашай далейшай рабоце не было ніякага ашуканства, інакш крыўдуйце самі на сябе", - папярэдзіў Кіраўнік дзяржавы і растлумачыў на канкрэтным прыкладзе.

Па выніках 2023 года чысты прыбытак Белкаапсаюза па бухгалтарскіх дакументах склаў Br800 тыс. "Нядрэнна? Можа быць, для Белкаапсаюза. Але толькі на першы погляд. Калі ўважліва вывучыць дакументы, становіцца зразумела: уся справа ў тым, што для такога прыемнага бухгалтарскага балансу вы сабе ў плюс запісалі атрыманне прадпрыемствам "Белкаапфутра" датацый з бюджэту на набыццё пушных звяроў і перадачу вашых накопленых даўгоў Агенцтву па кіраванні актывамі, - растлумачыў Аляксандр Лукашэнка. - А па факце, за студзень-лістапад 2023 года атрымана чыстая страта ў памеры Br6,6 млн, што амаль у 2 разы больш, чым за аналагічны перыяд 2022 года. Вось ваша эканоміка".

Пры гэтым, паводле даных Прэзідэнта, завінавачанасць па крэдытах і пазыках за 2023 год павялічылася больш як на 3% і склала на пачатак студзеня 2024 года амаль Br417 млн. Пратэрмінаваныя даўгі перад банкамі выраслі больш як у 2 разы і склалі амаль Br43 млн.

"Крэдыты трэба вяртаць. Таму крытэрый ацэнкі вашай работы адзін - рост прыбытку, з нашай або без нашай дапамогі, - падкрэсліў Кіраўнік дзяржавы. - А пакуль, калі меркаваць па сапраўдных, а не намаляваных выніках, належных высноў з нашай мінулай размовы зроблена не было. І ніякага фінансавага запасу трываласці ў вас па-ранейшаму няма. І гэта толькі самыя асноўныя задачы".

Прэзідэнт даручыў кіраўніцтву Белкаапсаюза разам з Урадам, губернатарамі, мэрам Мінска мабілізавацца ў самы кароткі тэрмін і навесці жалезны парадак у кожным напрамку дзейнасці.

"Усе праблемы знаходзяцца ў плоскасці эфектыўнасці кіраўніцкіх працэсаў. Рэзерваў дастаткова - ад кіравання ўласнасцю, рацыянальнага выкарыстання матэрыяльна-тэхнічнай базы да аўтаматызацыі, глыбокага аналізу і ўнутрыведамаснага кантролю. Няма і быць не можа другарадных пытанняў, калі працуеце са стратамі", - звярнуў увагу Аляксандр Лукашэнка. Каб наладзіць больш эфектыўную работу, у тым ліку ў аддаленых малых населеных пунктах, Прэзідэнт даручыў да гэтага віду дзейнасці прыцягнуць буйныя гандлёвыя сеткі. "Мабілізуйце іх у вёску, каб яны дапамаглі Белкаапсаюзу, - сказаў ён. - Няхай ідуць у глыбінку. І не самі, а ім (арганізацыям Белкаапсаюза. - Заўвага) дапамогуць".

Аляксандр Лукашэнка нагадаў, што ёсць зацверджаная праграма развіцця спажывецкай кааперацыі, якую, дарэчы, трэба дапрацаваць пасля цяперашняга сходу. "Усе кадры проста павінны мабілізавацца для дасягнення пастаўленых праграмай мэт", - падкрэсліў Кіраўнік дзяржавы.

Акрамя таго, Прэзідэнт нагадаў аб выданні ў лютым Указа № 42, накіраванага на развіццё вёскі і стварэнне максімальна камфортных умоў для людзей, якія там жывуць. Пры падрыхтоўцы дакумента ўлічвалася асноўнае: інфраструктура гандлю, грамадскага харчавання, бытавога абслугоўвання.

Для індывідуальных прадпрымальнікаў і суб'ектаў гаспадарання, якія займаюцца гэтымі напрамкамі, у тым ліку і для арганізацый Белкаапсаюза, згодна з указам, да канца 2028 года будуць дзейнічаць спецыяльныя паніжаныя тарыфы на электраэнергію і значныя падатковыя льготы, аж да вызвалення ад некаторых відаў падаткаў.

Правам вызначаць пералікі населеных пунктаў, дзе будуць прадастаўляцца прэферэнцыі, надзелены абласныя Саветы дэпутатаў. "Як бачыце, гэта важкая дзяржаўная падтрымка", - звярнуў увагу Аляксандр Лукашэнка.

"Белкаапсаюз мае магутны патэнцыял і ўсе рэсурсы - матэрыяльна-тэхнічную базу, людзей і тэхналогіі", - заявіў Кіраўнік дзяржавы. Для новага старшыні праўлення Белкаапсаюза, выбранага сёння, Прэзідэнт абазначыў першачарговую задачу - навесці парадак з улікам выпрацаваных на гэтай сустрэчы рашэнняў. Кантроль за КДК, Урадам і губернатарамі.

"Упэўнены, што з гэтага дня да дэвізу новай работы кааператараў, акрамя пасылу аб дабрабыце чалавека, павінна дабавіцца простая фраза: "якасць важней за ўсё". Гэта тое, за што нашы добрыя простыя вяскоўцы заўсёды дзякуюць і гандлю, і ахове здароўя, і адукацыі, - падкрэсліў Кіраўнік дзяржавы. - Тое, што я сказаў, - лічыце маім наказам".

Аляксандр Лукашэнка даручыў пераўтварыць прынятую ва Урадзе праграму развіцця Белкаапсаюза на 2024-2025 гады ў канкрэтную дарожную карту.

"Новаму кіраўніцтву Белкаапсаюза, усім вам трэба ўзяць гэту праграму і прывесці яе ў сапраўдны план дзеянняў. Трэба яе пералапаціць, каб яна не засталася проста пажаданнем, канцэптуальным нейкім дакументам. Патрэбны дакумент прамога дзеяння. Калі гэта грошы - вось туды, такія грошы, - сказаў Кіраўнік дзяржавы. - Павінна быць канкрэтная дарожная карта без балбатні. З улікам сённяшняга абмеркавання гэта трэба зрабіць. У адваротным выпадку страцім людзей".

Аб далейшых шляхах развіцця Белкаапсаюза на мерапрыемстве падрабязна далажыў віцэ-прэм’ер Леанід Заяц, аб праблемных аспектах і выяўленых недахопах гучала ў дакладах Старшыні Нацыянальнага статыстычнага камітэта Іны Мядзведзевай і Старшыні КДК Васіля Герасімава.

Леанід Заяц закрануў існуючыя праблемы і бачанне далейшых шляхоў развіцця спажывецкай кааперацыі ў краіне. Віцэ-прэм'ер лічыць, што Белкаапсаюз - важны партнёр дзяржавы, і таму прынята перспектыўная праграма развіцця гэтай структуры. Паводле яго слоў, прыняты шэраг рашэнняў па перафармаціраванні дзейнасці спажывецкай кааперацыі для паляпшэння абслугоўвання насельніцтва краіны, асноўную частку якога ў рабоце Белкаапсаюза складае сельскае насельніцтва.

Як адзначыў Леанід Заяц, нягледзячы на існуючыя праблемы ў рабоце, за 2023 год прадпрыемствы Белкаапсаюза забяспечылі бясстратную работу. І хоць прыбытак пакуль невялікі, у цэлым віцэ-прэм'ер лічыць важнай пазітыўную тэндэнцыю.

Ён падрабязна закрануў фінансава-эканамічную дзейнасць і праблемы ў дзейнасці спажыўкааперацыі. У прыватнасці, сказаў аб важнасці прынцыпова новых падыходаў і аптымізацыі работы гэтай структуры, забеспячэнні росту прадукцыйнасці працы і павышэнні зарплаты за кошт добрай работы.

Віцэ-прэм'ер таксама звярнуў увагу на неабходнасць павышэння канкурэнтаздольнасці магазінаў Белкаапсаюза, пашырэння практыкі дыстанцыйнага гандлю, а таксама ўніфікацыі працэсаў закупкі сыравіны і ў цэлым пашырэння асартыменту прадукцыі. Акрамя таго, Леанід Заяц заявіў, што работа раней закрытых магазінаў будзе адноўлена. Ён таксама адзначыў важнасць паляпшэння работы аўтамагазінаў, у тым ліку абнаўлення аўтапаркаў.

Аляксандр Лукашэнка дэталёва цікавіўся праблемамі работы прадпрыемстваў спажыўкааперацыі і чаго не хапае ў дзейнасці Белкаапсаюза для паляпшэння вынікаў у гэтай сістэме.

Кіраўнік дзяржавы звярнуў увагу, што неабходны перш за ўсё арганізаванасць і дысцыпліна. Паводле яго слоў, ёсць арганізацыйныя пытанні, якія вырашаюцца ў тым ліку на ўзроўні аблвыканкамаў, райвыканкамаў. "Хто сёння са старшынь райвыканкамаў (я пра губернатараў не гавару) або кіраўнікоў гаспадарак аказвае падтрымку спажывецкай кааперацыі?" - задаў рытарычнае пытанне Аляксандр Лукашэнка.

Закранаючы ўзнятую тэму ўстарэлага аўтамабільнага парка і эфектыўнасць работы аўтапарка ў цэлым, Прэзідэнт даручыў усё дакладна прааналізаваць і разабрацца з гэтымі пытаннямі. "Тыя аўтамабілі, што аб'ектыўна выпрацавалі свой рэсурс, мы паступова будзем мяняць. Трэба стварыць спецыфічны аўтамабіль", - адзначыў Кіраўнік дзяржавы. Пры гэтым Аляксандр Лукашэнка звярнуў увагу на эфектыўнае і менавіта мэтавае выкарыстанне аўтамабільнай тэхнікі.

Акрамя таго, Прэзідэнт закрануў тэму пераўтварэнняў у сістэме спажыўкааперацыі, адзначыўшы, што яны павінны быць прадуманымі, абгрунтаванымі і з дакладным разуменнем рэзультатыўнасці і эфектыўнасці ўносімых змяненняў.

У дакладзе кіраўніка КДК гаварылася аб тым, што ёсць факты невыканання патрабаванняў аб недапушчальнасці гандлю сыравінай замест прадукцыі з высокай дабаўленай вартасцю. "Губернатары, вазьміце гэта на кантроль. Вам жа гэта было даручана - не выпускаць сыравіну за межы. З высокай дабаўленай вартасцю трэба выпрацоўваць прадукт. Сёння вялікая патрэбнасць у нашай прадукцыі, мы ўсё можам прадаць. Навошта вы возіце (на экспарт. - Заўвага) тушы, паўтушы?" - адрэагаваў на гэта Прэзідэнт.

"Пры падрыхтоўцы гэтай нарады мною было прынята рашэнне аб тым, каб і я, і мае калегі, якія тут выступілі, далажылі вам аб сітуацыі. Мы гэта зрабілі", - адзначыў на заканчэнне Кіраўнік дзяржавы.

Ён таксама заявіў, што кадравая палітыка, патрабавальнасць з яго боку будзе толькі ўзмацняцца, і гэта датычыцца ўсёй вертыкалі.

Што датычыцца работы спажыўкааперацыі, нягледзячы на існуючыя праблемы, Аляксандр Лукашэнка не схільны драматызаваць сітуацыю. "Я не гавару, што ўсё, катастрофа. Не. Але тое, што ёсць, гэта не для нас. Трэба, каб было лепш, калі мы хочам развівацца і ісці наперадзе іншых. Трэба больш якасна. Трэба зрабіць так, каб людзі не крыўдзіліся", - падкрэсліў беларускі лідар.

Кіраўнік дзяржавы нагадаў свой тэзіс аб змене пакаленняў, і тут важна думаць аб тым, што застанецца цяперашняй моладзі: "Мы заўтра будзем звычайнымі людзьмі. Маладосць - гэта такая штука, якая вельмі хутка мінае. Вы з гэтага павінны зыходзіць. І да людзей па-чалавечы стаўцеся".

Аляксандр Лукашэнка засяродзіў увагу і на праблеме крыміналу, папярэдзіўшы і заклікаўшы службовых асоб не дапускаць такіх фактаў. "Вось гэты хабар і іншае. Колькі разоў паўтараю начальнікам: гэта не можа быць тайнай! Калі ты сотню тысяч долараў узяў хабар, то ты вырашыў пытанне на мільёны. І гэта лягло на вашы затраты. Не рабіце гэтага!" - сказаў Кіраўнік дзяржавы.

Завяршаючы сустрэчу, Аляксандр Лукашэнка падкрэсліў, што Белкаапсаюз, нягледзячы на грамадскі характар, на самай справе з’яўляецца больш чым дзяржаўнай арганізацыяй.

"Белкаапсаюз - гэта самая дзяржаўная арганізацыя. Самая-самая дзяржаўная! Не забывайце гэтага, дапамагайце і кантралюйце. Гэта вельмі дзяржаўная грамадская арганізацыя", - рэзюмаваў беларускі лідар.