Разгляд кадравых пытанняў

Прэзідэнт Рэспублікі Беларусь Аляксандр Лукашэнка 13 мая разгледзеў кадравыя пытанні.

Кіраўнік дзяржавы назначыў:

Плотнікава Андрэя Уладзіміравіча - суддзёй Эканамічнага Суда Садружнасці Незалежных Дзяржаў.

Прэзідэнт таксама даў згоду на назначэнне: 

Дурнова Вячаслава Віктаравіча - намеснікам старшыні Віцебскага аблвыканкама (пытанні сацыяльнай сферы і ідэалогіі),

Дзенгалёва Генадзя Іванавіча - намеснікам старшыні Магілёўскага аблвыканкама (пытанні будаўніцтва і ЖКГ), 

Грышкевіча Міхаіла Міхайлавіча - старшынёй Пружанскага райвыканкама,

Пачко Аляксандра Мікалаевіча - старшынёй Кобрынскага райвыканкама,

Савіна Аляксандра Іванавіча - старшынёй Лунінецкага райвыканкама,

Карповіча Мікалая Мікалаевіча - старшынёй Барысаўскага райвыканкама,

Сасіновіча Дзмітрыя Мікалаевіча - старшынёй Старадарожскага райвыканкама,

Гогі Уладзіміра Леанідавіча - старшынёй Слуцкага райвыканкама,

Агароднікава Аляксандра Сяргеевіча - першым намеснікам Міністра прамысловасці,

Казлова Аляксея Аляксандравіча - намеснікам Міністра прамысловасці, 

Федчанкі Сяргея Аляксандравіча - першым намеснікам Міністра сельскай гаспадаркі і харчавання,

Шагойкі Вадзіма Віктаравіча - намеснікам Міністра сельскай гаспадаркі і харчавання, 

Емяльянавай Ніны Аляксееўны - намеснікам Міністра антыманапольнага рэгулявання і гандлю, 

Андрэйчыка Алега Яўстаф'евіча - намеснікам Міністра спорту і турызму, 

Івашчанкі Вольгі Георгіеўны - намеснікам начальніка галоўнага ўпраўлення па забеспячэнні дзейнасці камісій Парламенцкага сходу Саюза Беларусі і Расіі,

Гобарава Дзмітрыя Дзмітрыевіча - намеснікам адказнага сакратара - начальнікам Апарату Прадстаўніцтва Парламенцкага сходу Саюза Беларусі і Расіі ў Рэспубліцы Беларусь,

Пеніна Уладзіміра Пятровіча - намеснікам начальніка Апарату Прадстаўніцтва Парламенцкага сходу Саюза Беларусі і Расіі ў Рэспубліцы Беларусь,

Кавалёва Аляксандра Аляксандравіча - старшым афіцэрам - аператарам групы (агульнага аператыўнага планавання) аддзела аператыўнага планавання ўпраўлення планавання прымянення войскаў (Калектыўных сіл) АДКБ цэнтра планавання прымянення і падрыхтоўкі войскаў (Калектыўных сіл) Аб'яднанага штаба АДКБ.

Узгадняючы назначэнне новых кіраўнікоў мясцовай вертыкалі ўлады, Прэзідэнт звярнуў увагу на работу сельскіх саветаў і ролю кіраўніцтва прадпрыемстваў у раёнах.

"Сельскія саветы працуюць вельмі дрэнна. Нам трэба ўзяцца за гэту тэму, прытым грунтоўна. Трэба перадаць Качанавай, каб яна занялася мясцовым так званым самакіраваннем, - сказаў кіраўнік дзяржавы. - Я гэта да таго, што не забывайце, што галоўная апора ў нас - кіраўнікі гаспадарак. Усё сканцэнтравана - матэрыяльныя рэсурсы - у іх руках. І людзі ідуць перш за ўсё да іх".

"Таму трэба на больш высокі ўзровень узнімаць дзейнасць кіраўнікоў прадпрыемстваў. Сельгас-, гандлю, абслугоўвання і прамысловых прадпрыемстваў, калі яны на тэрыторыі раёна ёсць", - дадаў Аляксандр Лукашэнка.

"Адзінае, аб чым папрашу вас, - будзьце больш самастойнымі на месцах. На жаль, я вялікай актыўнасці старшынь райвыканкамаў не бачу. Не ў тым плане, што ў тэлевізары не паказалі, недзе нешта не сказалі. Я якраз маю на ўвазе прыняцце рашэнняў у тым рэгіёне, у якім вы працуеце", - сказаў беларускі лідар.

"Сітуацыю вакол краіны ведаеце. Сітуацыю ўнутры краіны не горш за мяне ведаеце, прынамсі, там, дзе вы працуеце, на месцах. Не навічкі. Усе закончылі Акадэмію кіравання (пры Прэзідэнце Рэспублікі Беларусь. - Заўвага), ведалі, куды ішлі, - адзначыў Аляксандр Лукашэнка. - Сказаць, што час няпросты - ён заўсёды ў нас быў няпростым. Сказаць, што гэта час магчымасцей, - я ўжо не адзін раз гаварыў, у кожнага ёсць свае магчымасці".

У якасці асноўных зон адказнасці для кіраўнікоў раёнаў Прэзідэнт акрэсліў аграпрамысловы комплекс і работу з людзьмі: "Усе аграрныя раёны, таму пытанне нумар адзін - сельская гаспадарка і людзі, кадры".

Аляксандр Лукашэнка паставіў задачу перад кіраўнікамі райвыканкамаў рэалізаваць не менш як адзін інвестыцыйны праект у кожным з раёнаў краіны.

"Мы дамовіліся, што на працягу гэтага года кожны са старшынь (райвыканкамаў. - Заўвага) рэалізуе які-небудзь інвестыцыйны праект для таго, каб людзі былі працаўладкаваны. Калі нехта яшчэ не заняўся сельгастэхнікай, займіцеся, зрабіце нармальную сельгастэхніку. Калі нехта не арганізаваў ПМК (перасовачныя механізаваныя брыгады. - Заўвага), арганізуйце. Таму што не можа быць гаспадара ў раёне, які не мае пад рукой 100-120 чалавек будаўнікоў. Увогуле, патрэбны адзін нармальны праект у год. Вялікі, малы, але каб людзі бачылі нейкі рух і атрымалі працоўныя месцы", - падкрэсліў беларускі лідар. 

На асаблівым кантролі ў кіраўнікоў раёнаў павінны знаходзіцца сельскагаспадарчыя прадпрыемствы, якія адстаюць, перакананы Кіраўнік дзяржавы. "Дзве (рэдка тры) гаспадаркі ў раёне цяжкія. Вось за іх вы несяце адказнасць. Вазьміцеся за іх", - паставіў задачу Прэзідэнт. У той жа час стабільна працуючыя, паспяховыя гаспадаркі не маюць патрэбы ў такой пільнай увазе мясцовых улад, лічыць Аляксандр Лукашэнка. Паводле яго слоў, менавіта на прыкладзе такіх сельгаспрадпрыемстваў трэба вучыць маладых спецыялістаў, як працаваць і да чаго імкнуцца. "Адна гаспадарка ў вас павінна быць ідэальнай для таго, каб паказваць маладым спецыялістам, куды мы рухаемся, - сказаў ён. - Вучыць трэба людзей. Але вучыць не на словах, а на справе". 

Акрамя таго, Прэзідэнт звярнуў увагу на падтрыманне парадку ў аграгарадках і вёсках.

"Гомельская, Магілёўская і Віцебская - гэта тры вобласці, у якія мы павінны сур'ёзна ўкласціся. І не толькі фінансава, але перш за ўсё арганізацыйна. Дысцыпліна і яшчэ раз дысцыпліна", - падкрэсліў беларускі лідар.

Ён адзначыў, што намеснікі старшынь аблвыканкамаў не навічкі і яны павінны курыраваць рэалізацыю задумы і праграмы той ці іншай вобласці. "У Віцебскай вобласці шмат работы", - сказаў Аляксандр Лукашэнка.

Нягледзячы на тое што Вячаслаў Дурноў, які ўзгоднены на пасаду намесніка старшыні Віцебскага аблвыканкама, будзе весці сацыяльны блок, Кіраўнік дзяржавы ставіць агульную задачу для ўсяго кіраўніцтва рэгіёна: "Самы галоўны экзамен для вас на сённяшні дзень - гэта тыя інтэграцыйныя структуры (у АПК. - Заўвага), якія мы стваралі. За іх трэба адказваць галавой".

"На Магілёўшчыне шмат работы. Добра, што туды Ісачанка (старшыня Магілёўскага аблвыканкама Анатоль Ісачанка. - Заўвага) рызыкнуў вярнуцца", - прадоўжыў Кіраўнік дзяржавы.

"Ну, і сітуацыя ў нас няпростая з так званымі санкцыямі і іншым. Настроі людзей. Так, многія абразуміліся пасля 2020 года. Вы гэта бачыце зноў жа не горш за мяне. Але трэба разумець, што дастаткова людзей, якія не проста думаюць інакш (думаць жа не забаронена), а якія чакаюць зручнага моманту", - адзначыў Прэзідэнт.

Паводле яго слоў, гэтых людзей вы павінны бачыць: "Мабілізуйце вакол сябе праваахоўныя органы. Яны павінны дзейнічаць у зададзеным напрамку. Перш за ўсё той напрамак, які выканаўчы камітэт на месцы стварае".

Прэзідэнт арыентаваў кіраўніцтва мясцовай вертыкалі на ініцыятыўнасць у прыняцці тых ці іншых кіраўніцкіх рашэнняў.

"Не глядзіце па баках. У вас ёсць участак. Асабліва старшыні райвыканкамаў. Ён акрэслены строга межамі, дзейнічайце. Не чакайце, што вам нехта зверху нешта скажа. А часта гавару: лепш прыняць рашэнне і памыліцца, чым наогул баяцца прымаць гэтыя рашэнні і не прымаць іх наогул", - падкрэсліў беларускі лідар.

"Памыліўся - неадкладна трэба памылку выправіць", - дадаў Аляксандр Лукашэнка.

Кіраўнік дзяржавы адзначыў пазітыўную дынаміку ў плане дысцыпліны і арганізацыі веснавых палявых работ.

"Яшчэ раз падкрэсліваю: дысцыпліна і яшчэ раз дысцыпліна! Я гляджу: паднаціснулі з восені мінулага года, груба кажучы, гайкі падкруцілі і, нягледзячы на ўмовы надвор'я (усё ж такі, на шчасце, добрыя дажджы праходзяць, але яны стрымліваюць крыху пасяўную кампанію), працуюць як ніколі людзі. А чаму? Арганізацыя. Людзі ўбачылі, што могуць страціць. Там вайна, там рух нейкі на заходніх граніцах і іншае. І людзі зразумелі, што лепш крыху ўпірацца і працаваць, даваць вынік, чым мы атрымаем сур'ёзныя праблемы", - сказаў Аляксандр Лукашэнка.

Паводле яго слоў, гэта сведчыць аб арганізацыі, і Прэзідэнт ставіць задачу гэты ўзровень падтрымліваць. "Будзе арганізацыя і дысцыпліна - мы вырашым усе пытанні. Тым больш аграрны комплекс. Прадукты харчавання патрэбны, без іх нікуды, яны даражэюць пастаянна. Выкарыстоўвайце гэты момант".

У час разгляду кадравых пытанняў Аляксандр Лукашэнка заявіў, што ў аснове ўсёй палітыкі ў Беларусі павінна быць справядлівасць.

"Самае галоўнае - людзі. Я вас вельмі прашу: працуйце з людзьмі. Так, дысцыпліна (важна і патрэбна. - Заўвага). Але ў аснове ўсяго, усёй нашай палітыкі павінна быць справядлівасць", - падкрэсліў Кіраўнік дзяржавы.

"Калі людзі да вас звяртаюцца, значыць, трэба рэагаваць на гэта, - звярнуў увагу беларускі лідар. - Некаму адразу сказаць: "Гэтага мы рабіць не будзем, у цябе трое сыноў, ідзі свой плот рамантуй або пафарбуй сваю хату сам ці самі". Але калі прыходзіць чалавек, якому сапраўды патрэбна дапамога, яму трэба гэту дапамогу аказваць".

Аляксандр Лукашэнка растлумачыў, што размова не ідзе аб тым, каб выконваць любое пажаданне, якое прыйдзе ў галаву таму, хто звярнуўся. Дапамагаць трэба тым, хто сапраўды мае патрэбу ў падтрымцы. Але ў любым выпадку на зварот грамадзян чыноўнікі на месцах павінны даваць выразны, адназначны адказ, падкрэсліў Прэзідэнт. "Заўсёды людзям трэба адразу адказаць, - сказаў ён. - Выразны, дакладны адказ, каб зразумела было і менш звярталася людзей сюды, наверх".

"Але ў аснове павінна быць справядлівасць. Цяпер попыт на справядлівасць. Ды і ўсе мы хочам, каб свет быў больш справядлівым і стаўленне да нас было больш справядлівым. Гэта галоўнае", - падагульніў Кіраўнік дзяржавы.