Перагаворы з Прэзідэнтам Рэспублікі Экватарыяльная Гвінея Тэадора Абіянгам Нгемам Мбасога

Перагаворы Прэзідэнта Беларусі Аляксандра Лукашэнкі з Прэзідэнтам Рэспублікі Экватарыяльная Гвінея Тэадора Абіянгам Нгемам Мбасога прайшлі 7 верасня ў Палацы Незалежнасці.

Сустрэча ў палацы пачалася з традыцыйнай для такіх візітаў афіцыйнай цырымоніі з удзелам роты ганаровай варты. Затым адбыліся перагаворы кіраўнікоў дзяржаў у вузкім і пашыраным складах.

"Рады Вас сустрэць у Беларусі. Мы даўно Вас чакалі. Калі ў нас на поўначы гавораць пра Афрыку, - гэта нешта рамантычнае, загадкавае. Кожны ўспрымае гэты кантынент па-рознаму. Але ўсе абсалютна сыходзяцца ў меркаванні, што будучыня нашай планеты ў многім належыць Афрыцы. Я таксама прытрымліваюся такой думкі. Для мяне Афрыка - ужо не загадкавы кантынент. Калі я раней часцей бываў у Паўночнай Афрыцы, то ў апошнія гады мне ўдалося пабываць і ў цэнтры Афрыкі, і на поўдні вашага кантынента. Таму я ўяўляю сабе, што такое Афрыка, і рады тым працэсам, якія праходзяць, якія зведвае Афрыка", - сказаў Аляксандр Лукашэнка, вітаючы Прэзідэнта Гвінеі.

"Афрыка развіваецца, дзяржавы Афрыканскага кантынента набываюць сваю незалежнасць. Словам, Афрыка вызваляецца ад сваёй каланіяльнай спадчыны. Вы павінны ведаць, што мы вельмі прыхільныя да гэтага працэсу і будзем падтрымліваць тыя дзяржавы, якія хочуць здабыць сваю незалежнасць", - запэўніў Кіраўнік дзяржавы.

Аляксандр Лукашэнка, у прыватнасці, адзначыў, што Беларусь - тэхналагічная краіна і гатова дзяліцца гэтымі тэхналогіямі не толькі з Экватарыяльнай Гвінеяй, але і з іншымі дзяржавамі Афрыкі, якія будуць у гэтым зацікаўлены: "Вы нешта ўбачыце ў нас, пазнаёміцеся з нашымі вытворчасцямі. І калі вам нешта спадабаецца, калі мы да нечага здольныя, калі мы, з вашага пункту гледжання, можам дапамагчы вашай дзяржаве і Афрыцы ў цэлым, вы нам скажыце, мы абавязкова зробім".

"Вы павінны ведаць, што вы для нас не чужыя. Для нас - беларусаў, расіян. Таму што ў нас ёсць гісторыя супрацоўніцтва, якая ідзе ў глыбіню развіцця і існавання Савецкага Саюза. Паколькі вы для нас блізкія і не чужыя людзі, мы вас запрашаем у Беларусь і адкрываем перад вамі нашы сэрцы", - падкрэсліў беларускі лідар.

У сваю чаргу Прэзідэнт Рэспублікі Экватарыяльная Гвінея падзякаваў беларускаму боку за цёплы прыём і гасціннасць. Ён таксама выказаў прабачэнні за тое, што быў вымушаны перанесці свой візіт, запланаваны раней, па прычыне змянення свайго рабочага графіка.

"Мой прыезд у Беларусь з'яўляецца сведчаннем маёй перакананасці, што Беларусь і беларускі народ з'яўляюцца для нас братэрскім народам і братэрскай краінай", - сказаў Тэадора Абіянг Нгема Мбасога.

Паводле яго слоў, у час візіту ён плануе абмеркаваць усе пытанні двухбаковага парадку дня і праекты супрацоўніцтва Беларусі і Экватарыяльнай Гвінеі.

Прэзідэнт Гвінеі перакананы, што парадак дня перагавораў павінен уключаць таксама і абмеркаванне актуальнай міжнароднай праблематыкі. "Мы не забываем, што Савецкі Саюз і краіны, якія ў яго ўваходзілі, адыгралі вялікую ролю ў вызваленні Афрыканскага кантынента ад каланіяльнай залежнасці і прадаўжаюць гэта рабіць (садзейнічаючы вызваленню ад неакаланіяльнай залежнасці. - Заўвага)", - падкрэсліў Тэадора Абіянг Нгема Мбасога.

Кіраўнік беларускай дзяржавы па выніках перагавораў у вузкім складзе адзначыў адкрытасць бакоў і гатоўнасць да абмеркавання шырокага спектра пытанняў.

"Відавочна, што Афрыка перажывае своеасаблівы рэнесанс. На нашых вачах яна становіцца ключом да ўстойлівага развіцця планеты ў дваццаць першым стагоддзі", - заявіў беларускі лідар.

Паводле яго слоў, аб гэтым яскрава сведчаць сумесная міратворчая місія лідараў краін Афрыканскага саюза ва Украіну і Расію, актыўная роля Афрыкі ў БРІКС і Руху недалучэння.

"Краіны кантынента рашуча настроены выйсці з-пад дыктату заходніх транснацыянальных карпарацый, якія навязалі ім ролю сыравінных прыдаткаў, выпампоўваючы нафту, золата, газ, асуджаючы народы Афрыкі на ўбогае існаванне і голад", - сказаў Аляксандр Лукашэнка.

"Беларусь у адрозненне ад заходніх "дэмакратызатараў" гатова дапамагчы вам быць гаспадарамі на сваёй зямлі на карысць уласнага народа: стварыць нацыянальную прамысловасць, мадэрнізаваць сельскую гаспадарку, развіваць навуку і тэхналогіі. Працуючы ў рамках Еўразійскага эканамічнага саюза, сумесна з Расіяй і іншымі рэспублікамі былога Савецкага Саюза прапануем вашай краіне доступ да ўнікальных тэхналогій, тавараў і паслуг", - сказаў Кіраўнік беларускай дзяржавы.

Ён адзначыў, што Беларусь тры дзесяцігоддзі жыве пад націскам Захаду і катэгарычна не прымае любыя спробы націску. "Беларусы не толькі не маюць каланіяльных звычак, але і не спрабуюць нікому нічога навязваць. Мінск выступае за справядлівы, шматпалярны свет, і мы ідзём у Афрыку як сябры. Нашы тэхніку, тэхналогіі добра ведаюць на вашым кантыненце, а многія вашы ўрачы і інжынеры вучыліся ў беларускіх ВНУ, таму ў нас не павінна быць асаблівых цяжкасцей у наладжванні дыялогу. Упэўнены, не будзе", - заявіў Аляксандр Лукашэнка.

Кіраўнік дзяржавы падкрэсліў, што незалежнасць і суверэнітэт краіны - гэта перш за ўсё моцная эканоміка, а ў Беларусі ёсць вопыт і напрацоўкі, каб стаць актыўным удзельнікам сацыяльна-эканамічнага росквіту Афрыкі і канчатковага яе вызвалення ад прыгнёту былых метраполій.

Што датычыцца Экватарыяльнай Гвінеі, то Беларусь гатова дапамагчы ў індустрыялізацыі краіны, мадэрнізацыі сельскай гаспадаркі і забеспячэнні харчовай бяспекі, пастаўках шырокага спектра тэхнікі, іншай прамысловай і харчовай прадукцыі.

"Мы таксама маем добрыя кампетэнцыі ва ўзвядзенні сучасных мясамалочных і іншых перапрацоўчых комплексаў, разведцы і здабычы карысных выкапняў, рэалізацыі сумесных інфраструктурных праектаў. Шмат магчымасцей для супрацоўніцтва нам прадастаўляе гуманітарная сфера - навука, культура, адукацыя, турызм. Медыцынскую дапамогу самага высокага ўзроўню вашым грамадзянам могуць аказаць беларускія арганізацыі аховы здароўя. Мы можам дапамагчы вам і кадрамі ўрачоў, каб абучыць вашых грамадзян у галіне аховы здароўя, адукацыі, іншых гуманітарных напрамкаў. Нашы дасягненні ў галіне аховы здароўя вам вядомыя", - пералічыў Кіраўнік дзяржавы перспектыўныя напрамкі супрацоўніцтва.

Аляксандр Лукашэнка адзначыў, што сумесная работа дзелавых колаў і нацыянальных гандлёва-прамысловых палат павінна стаць ключавым звяном у працэсе выбудоўвання і фарміравання новых устойлівых бізнес-сувязей.

"Важным крокам для развіцця ўсебаковага супрацоўніцтва па выніках Вашага візіту будзе стварэнне Сумеснай камісіі. Прапаную даручыць міністрам замежных спраў як сустаршыням Сумеснай камісіі правесці яе першае пасяджэнне ў самыя кароткія тэрміны і вызначыць канкрэтныя планы і праекты, у тым ліку абапіраючыся на нашы дамоўленасці, - сказаў Прэзідэнт. - Мы адкрыты для дыялогу па ўсіх пытаннях, якія вас цікавяць, гатовы да прадметнага абмеркавання любых напрамкаў узаемадзеяння і напаўнення іх рэальным практычным зместам".

Па выніках перагавораў з Прэзідэнтам Экватарыяльнай Гвінеі Тэадора Абіянгам Нгемам Мбасога Аляксандр Лукашэнка заявіў: "Вітаем мірныя ініцыятывы кіраўнікоў афрыканскіх дзяржаў па ўрэгуляванні ўкраінскага крызісу. Салідарны з тым, што неабходна як мага хутчэй спыніць гібель і пакуты людзей".

"Разлічваем, што сумеснымі намаганнямі мы дасягнём няўхільнага росту тавараабароту паміж нашымі краінамі. Мы будзем імкнуцца ў 2030 годзе перасягнуць $100 млн (аб'ёму тавараабароту. - Заўвага)", - сказаў Кіраўнік беларускай дзяржавы.

Аляксандр Лукашэнка адзначыў, што першы візіт на вышэйшым узроўні дэманструе сумесную зацікаўленасць у актывізацыі і паглыбленні супрацоўніцтва паміж дзвюма краінамі: "Адкрытая, дружалюбная, канструктыўная размова паказала, што нашы ацэнкі сітуацыі ў рэгіёне і свеце цалкам супадаюць".

"Для Беларусі і Экватарыяльнай Гвінеі шматпалярны справядлівы свет, дзе любыя пытанні будуць вырашацца за сталом перагавораў у сумленным, паважлівым і раўнапраўным дыялогу, не мае альтэрнатыў. Нягледзячы на націск і супраціўленне шэрага буйных сусветных ігракоў, голас Афрыкі на карысць непазбежнасці такога светаўладкавання чуваць усё гучней і выразней, - сказаў Прэзідэнт. - Мы бачым, што дзяржавы Афрыканскага кантынента ўсё больш рашуча праводзяць самастойную, суверэнную, міралюбівую палітыку, не аглядваючыся на краіны так званага залатога мільярда".

Мінск паслядоўна на працягу многіх гадоў усямерна падтрымлівае гэта імкненне, адзначыў Кіраўнік дзяржавы. Візіты ў Зімбабвэ, кантакты на вышэйшым узроўні з Егіптам, планы па рабоце з Кеніяй, Мазамбікам, Нігерыяй, Угандай, ПАР і шэрагам іншых дзяржаў - пацвярджэнне таго.

"Мы маем намер і далей развіваць сувязі з краінамі Афрыканскага кантынента", - заявіў Аляксандр Лукашэнка.

Кіраўнік дзяржавы падкрэсліў, што цікавасць Беларусі і Экватарыяльнай Гвінеі адна да адной велізарная. "Бягучая сітуацыя ў свеце падштурхоўвае да больш актыўнага ўзаемадзеяння. Я ўжо сказаў свайму калегу і сябру аб тым, што Экватарыяльную Гвінею, параўнальна невялікую дзяржаву, але вельмі багатую на рэсурсы, ніхто ў спакоі не пакіне. Прэзідэнт са мной пагадзіўся", - сказаў ён.

Беларускі лідар у сувязі з гэтым падкрэсліў, што ў сучасным свеце трэба быць моцным, каб здолець захаваць краіну і абараніць яе інтарэсы.

Аляксандр Лукашэнка перакананы, што праз кароткі час бакі заключаць новыя кантракты і пакладуць у скарбонку адносін мільёны долараў.

"Упэўнены, што пры Вашай асабістай падтрымцы Беларусь і Экватарыяльная Гвінея ўжо ў бліжэйшы час рушаць наперад у пытаннях паставак тэхнікі, мадэрнізацыі сельскай гаспадаркі, забеспячэння харчовай бяспекі. Мы гатовы ў гэтым плане працаваць разам з вамі. Больш таго, мы не толькі прапануем вам свае тавары і гатовы купляць у вас вашы тавары. Нам трэба кааперавацца, у вашай і нашай краіне ствараць сумесныя прадпрыемствы, якія будуць вырабляць гэтыя тавары. Трэба ісці глыбей. Мы гатовы да гэтага. Мы гатовы падрыхтаваць вашых спецыялістаў, якія будуць працаваць на прадпрыемствах з перадавымі тэхналогіямі у Экватарыяльнай Гвінеі", - звярнуўся кіраўнік дзяржавы да Прэзідэнта Экватарыяльнай Гвінеі.

Плануецца таксама пашырыць партнёрства ў нафтахімічным сектары і здабыўной прамысловасці, у адукацыі і падрыхтоўцы кадраў, медыцыне, развіцці чалавечых сувязей.

Аляксандр Лукашэнка падзякаваў калегу за сапраўды дружалюбны і канструктыўны падыход да развіцця супрацоўніцтва: "Перакананы, што Вы па заслугах ацэніце беларускую сардэчнасць і гасціннасць і станеце яшчэ большым сябрам Беларусі. Наперадзе ў нас шмат работы, якая, я ўпэўнены, вельмі хутка дасць свой плён на карысць народаў нашых краін".

Па выніках перагавораў прэзідэнтаў Беларусі і Экватарыяльнай Гвінеі Аляксандра Лукашэнкі і Тэадора Абіянга Нгемы Мбасога падпісаны шэраг міжнародных дакументаў.

Сярод іх - міжурадавыя рамачнае пагадненне аб эканамічным, гандлёвым, культурным, навуковым і тэхнічным супрацоўніцтве, пагадненне аб бязвізавых паездках для ўладальнікаў дыпламатычных і службовых пашпартоў. Падпісаны таксама пагадненні аб супрацоўніцтве ў сферы аховы здароўя і ў галіне адукацыі, мемарандум аб узаемаразуменні паміж профільнымі ведамствамі дзвюх краін па пытаннях супрацоўніцтва ў галіне сельскай гаспадаркі.

Акрамя таго, пагадненне заключылі Міністэрства культуры Беларусі і Міністэрства культуры, рамёстваў і турызму Экватарыяльнай Гвінеі.

"Сёння зроблены добры зачын на будучае, - ацаніў праведзеную работу Кіраўнік беларускай дзяржавы. - Мы вызначылі перспектыўныя сферы і напрамкі развіцця партнёрства. Узгаднілі практычныя крокі па рэалізацыі дасягнутых дамоўленасцей, дамовіліся аб абменах візітамі, абазначылі асновы дагаворна-прававой базы, стварылі сумесную камісію па эканамічным супрацоўніцтве".

Аляксандр Лукашэнка звярнуўся да ўдзельнікаў цырымоніі падпісання, каб яны не зацягвалі з рэалізацыяй дасягнутых дамоўленасцей.