Даклад Надзвычайнага і Паўнамоцнага Пасла Беларусі ў Расіі Дзмітрыя Крутога

Кіраўнік дзяржавы Аляксандр Лукашэнка 22 мая прыняў Надзвычайнага і Паўнамоцнага Пасла Беларусі ў Расіі Дзмітрыя Крутога з комплексным дакладам па пытаннях беларуска-расійскага супрацоўніцтва.

Кіраўнік дзяржавы ў пачатку сустрэчы абазначыў шэраг ключавых пытанняў для абмеркавання. Гэта стан гандлёва-эканамічнага супрацоўніцтва і дынаміка ў гэтым напрамку, развіццё ўзаемадзеяння з рэгіёнамі Расіі, неабходнасць вырашэння тых ці іншых узнікаючых праблемных пытанняў, рэалізацыя саюзных праграм і пытанні лагістыкі для пастаўкі за мяжу айчынных тавараў. Яшчэ адна тэма - маючы адбыцца на гэтым тыдні ў Маскве Еўразійскі эканамічны форум.

"І іншыя больш дробныя пытанні, якія заўсёды ў нас былі. Ведаю, вы іх трымаеце на кантролі. Як яны вырашаюцца? І ў Маскве, і ў Падмаскоўі, і ў цэлым па Расіі", - спытаў Кіраўнік дзяржавы.

"Перш за ўсё - аснова - эканоміка. Як эканамісты мы цудоўна разумеем, што без гэтага ніякіх адносін быць не можа. Я ведаю лічбы, ведаю, што і тавараабарот павялічыўся, і на дадатнае сальда нарэшце мы выйшлі. Гэта значыць, гандаль збалансаваны. Мяне цікавяць дынаміка, тэндэнцыі, - сказаў Аляксандр Лукашэнка. - Вы добра памятаеце, працуючы ў Адміністрацыі (Прэзідэнта Беларусі. - Заўвага), ва Урадзе, якая была сітуацыя ў гандлі з Расіяй. Заўсёды мы натыкаліся на нейкія бар'еры, перашкоды і іншае. У гэтым плане што змянілася? Ясна, што змянілася. Але вам свежым вокам, знаходзячыся ў гэтым "катле", больш бачна. І вы зможаце проста пералічыць тыя напрамкі, якія змяніліся. У лепшы, горшы бок і гэтак далей".

"Мы заўсёды гаварылі, што наш поспех у Расіі - гэта рэгіёны. Я бачу, назіраю - вы шмат бываеце ў рэгіёнах. І гэта правільна. Да нас прыязджаюць губернатары. Мы іх прымаем на самым высокім узроўні. Тут таксама дынаміка якая? Якое стаўленне там, на месцах, да Беларусі, беларускай прадукцыі? Наогул - імідж Беларусі на гэтай вялізнай расійскай прасторы", - абазначыў яшчэ адну тэму для абмеркавання Аляксандр Лукашэнка.

Кіраўнік дзяржавы адзначыў, што ён і Прэзідэнт Расіі Уладзімір Пуцін часта сустракаюцца. "Але гэта не для таго, каб паглядзець адзін на аднаго. Хоць і гэта важна - настрой прэзідэнтаў заўсёды важны. Але, тым не менш, мы стараліся дапамагчы ўрадам развязаць нейкія вузлы, у тым ліку і вам", - сказаў Прэзідэнт.

Ён пацікавіўся, ці ўсё вырашана з беларускага боку, ці ёсць якія-небудзь пытанні да прэзідэнтаў і ўрадаў. "Як мне дакладвае Урад, ну амаль няма ніякіх праблем. Я гэтаму мала веру. Я бачу па сітуацыі, што ўсё ж такі праблемы ёсць, нестыкоўкі нейкія. Часам бюракратызм. Хто ў гэтым вінаваты? Каб вось, сустракаючыся паслязаўтра ў Маскве, мы з Прэзідэнтам Расіі Пуціным маглі абмеркаваць і зняць тыя праблемы, якія ўвогуле не павінны быць у нашых адносінах", - заявіў беларускі лідар.

Яшчэ адзін блок пытанняў на сустрэчы - супрацоўніцтва па рэалізацыі саюзных праграм у розных сферах. "Шмат пра гэта гаворым. Але больш за ўсё мяне цікавяць тут канкрэтныя праграмы. Як мы іх называлі, імпартазамяшчэння і гэтак далей. Памятаеце, да $1,5 млрд Расія гатова была (выдзеліць. - Заўвага). І я ўпэўнены, і цяпер яны не адмаўляюцца, калі недзе недакрэдытавалі да гэтай сумы. Гатовы былі выдзяляць сродкі - крэдытныя рэсурсы для таго, каб замясціць тыя напрамкі, якія агаліліся пасля сыходу амерыканцаў і Захаду ў цэлым, іншых недружалюбных краін з нашых рынкаў. Накшталт мікраэлектронікі", - сказаў Аляксандр Лукашэнка.

Прэзідэнт падкрэсліў, што ні Расію, ні Беларусь Захаду не ўдалося ўдушыць. "Шмат у чым дзякуючы таму, што мы з Расіяй разам узяліся цягнуць гэты воз. Мы выкарыстоўваем расійскія напрамкі па лагістыцы. Гэта іх парты, чыгунка, аўтамабільны транспарт. Тут якія праблемы?" - пацікавіўся Кіраўнік дзяржавы.

"Я ведаю, вы ўнікалі і абавязаны проста кантраляваць нашу партовую гаспадарку, якую мы развіваем у Расіі. Чыгуначны напрамак. Дзе там вузкія месцы? Мы дамаўляліся з Расіяй, што мы расшыем іх. Зразумела, аўтамабільны транспарт. Кабатажныя перавозкі і гэтак далей і да таго падобнае", - сказаў Прэзідэнт.

"Паслязаўтра, як я ўжо гаварыў, у нас форум ЕАЭС (у Маскве 24-25 мая адбудзецца ІІ Еўразійскі эканамічны форум, а таксама пасяджэнне Вышэйшага Еўразійскага эканамічнага савета. - Заўвага). Хацелася б ведаць Ваш пункт гледжання, на што трэба звярнуць асноўную ўвагу на гэтым форуме і перагаворах у рамках ЕАЭС. Вы як прадстаўнік Беларусі ў інтэграцыйных структурах, напэўна, лепш за іншых ведаеце сітуацыю ў гэтым плане", - абазначыў адну з тэм сустрэчы Аляксандр Лукашэнка.

Як адзначыў Дзмітрый Крутой, у бягучым годзе Беларусь захоўвае дадатнае сальда ў гандлі з Расіяй - плюс $896 млн за першы квартал 2023-га. "У мінулым годзе ў нас атрымалася пераламаць тэндэнцыю з адмоўным сальда ў гандлі з Расіяй. Упершыню ў гісторыі мы і па таварах, і па паслугах атрымалі плюс. У першым квартале бягучага года сітуацыю яшчэ больш палепшылі. У нас на сённяшні дзень сумарнае сальда плюс $896 млн", - падкрэсліў пасол.

Паводле яго слоў, значную долю - амаль 60% - у сферы паслуг займаюць транспартныя паслугі. І з-за сітуацыі, якая склалася ў сферы лагістыкі, дадатнае сальда ў абароце з Расіяй у сферы паслуг у гэтым годзе крыху зменшылася. Але ў цэлым паказчыкі застаюцца даволі высокімі.