Сустрэча з Міністрам замежных спраў Нікарагуа Дэнісам Манкада Каліндрэсам

Вельмі многае давядзецца зрабіць, каб вывесці адносіны Беларусі і Нікарагуа на самы высокі ўзровень. Аб гэтым Прэзідэнт Беларусі Аляксандр Лукашэнка заявіў 19 мая на сустрэчы з Міністрам замежных спраў Нікарагуа Дэнісам Манкада Каліндрэсам.

"Я, калі думаю пра Нікарагуа, заўсёды думаю аб тым, што гэта такая далёкая і такая блізкая для нас краіна. Калі даваць увогуле ацэнку нашых адносін, павінен сказаць, што ў нас непачаты край работы. Нам вельмі многае давядзецца зрабіць, каб вывесці нашы адносіны на самы высокі ўзровень", - сказаў Кіраўнік дзяржавы.

Аляксандр Лукашэнка падкрэсліў, што прыклады такога супрацоўніцтва Беларусі з краінамі Лацінскай Амерыкі ўжо ёсць: "Вазьміце Кубу, Венесуэлу, іншыя дзяржавы Лацінскай Амерыкі, з якімі мы маем вельмі цесныя не толькі палітычныя, але і гандлёва-эканамічныя адносіны. Думаю, што нам трэба гэта зрабіць з Нікарагуа".

"Для таго каб мець такія добрыя, цесныя адносіны, у нас сёння ёсць усё. І нават легендарны кіраўнік Нікарагуа, якога мы ўсе любім і паважаем у Беларусі. Я папрашу перадаць самыя цёплыя словы Даніэлю Артэгу ад імя беларускага народа, ад мяне асабіста. Мы ўражаны яго палітычнай дзейнасцю", - сказаў Прэзідэнт.

Ён запэўніў, што ўсё, у чым мае патрэбу Нікарагуа, у Беларусі ёсць, і нават з лішкам. "Нам трэба наладзіць нашы адносіны такім чынам, каб стварыць дагаворна-прававую базу пад нашы будучыя адносіны ў эканоміцы. Гэта справа часу. Думаю, калі мы зоймемся гэтай справай, то на працягу года мы не проста створым гэту нарматыўна-прававую базу, але і пачнём глыбокія эканамічныя адносіны паміж нашымі краінамі. Мы да гэтага гатовы", - упэўнены беларускі лідар.

Аляксандр Лукашэнка прапанаваў Міністру паглядзець, што цікавіць яго краіну ў Беларусі, і на аснове гэтага прапанаваць і вызначыць будучыя напрамкі супрацоўніцтва. "Мы для вас абсалютна адкрыты, закрытых тэм няма. Мы прымем гэтыя вашы прапановы", - сказаў Прэзідэнт.

Міністр замежных спраў Нікарагуа ў сваю чаргу перадаў беларускаму лідару вялікае прывітанне ад Прэзідэнта сваёй краіны Даніэля Артэгі.

"Вялікае прывітанне ад камандантэ Даніэля Артэгі, брацкае прывітанне, самыя найлепшыя пажаданні", - сказаў Міністр. Ён таксама перадаў прывітанне і самыя цёплыя пажаданні ад Віцэ-прэзідэнта Расарыі Мурылья.

Міністр падкрэсліў важнасць гэтай сустрэчы: "Вялікі дзякуй, спадар Прэзідэнт, сябар, таварыш, блізкі нам чалавек. Уся наша дэлегацыя вітае Вас з усёй цеплынёй, з усёй добразычлівасцю".