Даклад Міністра аховы здароўя Дзмітрыя Піневіча, Генпракурора Андрэя Шведа і Старшыні КДБ Івана Тэртэля

Прэзідэнт Беларусі Аляксандр Лукашэнка 18 красавіка прыняў з дакладам Міністра аховы здароўя Дзмітрыя Піневіча, Генеральнага пракурора Андрэя Шведа і Старшыню Камітэта дзяржаўнай бяспекі Івана Тэртэля.

"Перш за ўсё пытанне ці то філасофскае, ці то ад жыцця: з чаго пачынаюцца войны? Я магу сёння на працягу 5-7 хвілін даказаць, што ў аснове любой вайны ляжыць несправядлівасць, а ў аснове несправядлівасці - карупцыя", - сказаў Аляксандр Лукашэнка.

Прэзідэнт падкрэсліў, што ў Беларусі заўсёды ставілі жорсткія перашкоды супраць распаўсюджвання карупцыйных злачынстваў. "Пры назначэнні за гэтым сталом службовым асобам я заўсёды гавару і ўзнімаю гэта пытанне, і патрабую, каб ні ў якім выпадку, прыйшоўшы на пасаду тую ці іншую, яны не ўвязлі ў карупцыі. Гэта недапушчальна! Тым не менш нават у такой сацыяльнай, важнай сферы, як ахова здароўя, ды і ў іншых сферах, у нас з'яўляюцца фігуранты адпаведных артыкулаў крымінальнага закона аб процідзеянні карупцыі", - заўважыў Кіраўнік дзяржавы.

У прыватнасці, у Прэзідэнта абмеркавалі справу затрыманых па падазрэнні ва ўчыненні шэрага злачынстваў урачоў-артапедаў. "Я вельмі добра ведаю ход гэтай аперацыі: кантраляваў. Гэта не сёння, не ўчора пачалося. Я Міністра аховы здароўя аб гэтым папярэдзіў. Але на сённяшні дзень 35 чалавек (затрыманы. - Заўвага). І ўпэўнены (мяне ніхто не пераканае ў адваротным), што гэта не ўсе тыя, хто павінен там з імі побач сядзець, - адзначыў Аляксандр Лукашэнка. - Не проста падказвалі людзям, якія ляжалі на аперацыйным стале, якія імпартныя артапедычныя запчасткі ім у цела ўставіць, а значны за гэта ад іншаземцаў атрымлівалі хабар. У некаторых па 300 тысяч, па 650 тысяч еўра пры вобысках знайшлі толькі дома".

Кіраўнік дзяржавы расказаў, што на пытанне Міністра аховы здароўя, як будуць разбірацца з затрыманымі, прапанаваў яму схадзіць у следчы ізалятар і пагаварыць з кожным з медыкаў. "Я разумею, што Вы персанальна з кожным правялі работу? Хацелася б сёння ў прысутнасці нашага галоўнага ахоўніка закону Генеральнага пракурора вызначыцца, што мы будзем рабіць з гэтымі людзьмі. Я ведаю Вашы звароты з просьбай узяць іх на парукі. Не дараваць, а ўзяць на парукі пасля таго, як яны кампенсуюць велізарны ўрон дзяржаве. Накіраваць іх, паводле Вашага рашэння, у якую-небудзь структуру для працы. Зразумела, па спецыяльнасці. Сумна, што туды трапіў і "ўрач, які лячыў Прэзідэнта", які не раз і Прэзідэнта абследаваў. Я засмучаны гэтым фактам, але закон ёсць закон - ён адзіны для ўсіх", - падкрэсліў беларускі лідар.

"Першае пытанне: што мы будзем рабіць з гэтай паўсотняй чалавек, якія былі злоўлены на карупцыі, бралі ад жулікаў замежнага разліву і нашых, якія прадстаўлялі тут нямецкія і іншыя кампаніі і якія дзялілі гэтыя грошы, - дадаў Аляксандр Лукашэнка. - Я не дарэмна сказаў, што кантраляваў. Мы даўно выявілі гэты працэс. І я спецслужбам не дазваляў нават дакладваць, не маючы падстаў. Але калі яны збіраюцца ў рэстаране, напіваюцца і прадстаўнік замежнай фірмы раздае ў канвертах хабар (зразумела, пад камеру), і калі мне гэта дакладваюць - якое павінна быць маё рашэнне? Няхай падумаюць, як жыць далей. Сёння паспрабуем прыняць рашэнне па гэтым факце".

Прэзідэнт разлічвае, што гэты выпадак стане для Міністэрства аховы здароўя і кіраўніка ведамства сур'ёзнай навукай. "Таму што, ведаеце, цярпець гэта нязносна і за гэта павінен адказваць кіраўнік. Я ўжо пра гэта не раз гаварыў. Таму, Дзмітрый Леанідавіч, я не дарэмна Вам сказаў: ідзіце ў следчы ізалятар і з імі разбірайцеся самі. Якую Вы тут будзеце прапанову ўносіць, мы паглядзім", - сказаў Кіраўнік дзяржавы.

Аляксандр Лукашэнка запатрабаваў наладзіць у сферы аховы здароўя прамыя пастаўкі лякарстваў і медыцынскіх вырабаў і пазбавіцца ад усякага пасрэдніцтва ў гэтай сферы, каб не дапускаць карупцыйных праяў. "Мы павінны трымаць гэтыя пытанні (паставак і выкарыстання лякарстваў і медыцынскіх вырабаў. - Заўвага) пад кантролем. А каб яны былі пад кантролем, я ўжо тысячу разоў гаварыў: убярыце ўсякае пасрэдніцтва. Закупляйце непасрэдна лякарствы і медыцынскія вырабы. Гэта можна рабіць нават у санкцыйны перыяд", - паставіў задачу беларускі лідар.

"Чаму мы ў дастатковай колькасці не праводзілі рэкламную кампанію для людзей, якія сустаў мяняюць або яшчэ нешта, і не завозілі гэтыя няшчасныя імпартныя запчасткі для чалавечага арганізма па лініі дзяржавы?" - задаў слушнае пытанне Аляксандр Лукашэнка.

На яго думку, арганізаваць такія пастаўкі нескладана, затое гэта дасць магчымасць пацыентам па жаданні выбраць імпартныя вырабы і пры гэтым не створыць перадумоў для карупцыі. "Калі нехта хоча, лічыць, што айчыннае - гэта няякаснае, купляйце. Яны ж куплялі, толькі плацілі вельмі дорага, таму што хабары ўваходзілі ў цану гэтага тавару", - адзначыў Кіраўнік дзяржавы.

Прэзідэнту таксама далажылі ў цэлым па сітуацыі ў ахове здароўя. У прыватнасці, размова ішла пра эпідэміялагічную абстаноўку і COVID-19.  "Я бачу, што нашы ўрачы, якія не кралі, а сумленна працуюць і змагаюцца з кавідам, маюць на гэты момант добры вынік, пэўны поспех", - заўважыў Аляксандр Лукашэнка.

Закраналася і пытанне выкарыстання медыцынскага абсталявання, недапушчальнасці прастойвання тэхнікі. "Мне дакладваюць з месцаў, што ў вас не ўся тэхніка працуе медыцынская (КТ і гэтак далей) з прычыны нейкіх няспраўнасцей, а дзе-нідзе прастойвае па два-тры месяцы. Гэта ненармальна", - звярнуў увагу Кіраўнік дзяржавы.

Акрамя таго, Прэзідэнт паставіў задачу дыверсіфікаваць пастаўкі лякарстваў, каб не дапусціць іх недахопу на ўнутраным рынку. "Спасылацца на тое, што нехта нам нечага не дае, нечага не хапае... Ведаеце, у нас медыцынская тэхніка і лякарствы не знаходзяцца пад жорсткімі санкцыямі, - звярнуў увагу Аляксандр Лукашэнка. - Калі вам амерыканцы не прадаюць лякарствы, купіце іх у Індыі, на Кубе. Пытанне толькі ў прадпрымальнасці. Таму спасылкі на тое, што ў нас не хопіць лякарстваў, яшчэ нечага, не прымаюцца".

Кіраўнік дзяржавы даручыў Генеральнаму пракурору Андрэю Шведу ўзяць пытанне па пастаўках лякарстваў і іншых вырабаў на кантроль: "Вы ўмееце гэта рабіць. Вось як з падзяжом жывёлы, так і тут. Трэба браць на кантроль і кантраляваць, каб ва Урадзе не самазаспакоіліся. Я ж іх не падключаю ні да аднаго іншага пытання, акрамя эканомікі. Эканоміка, эканоміка, змагайцеся з санкцыямі - гэта ваша сфера, і дзейнічайце. Прынамсі, міністраў ні ў чым не абмяжоўваю".