Сустрэча з кіраўнікамі вышэйшых судоў замежных дзяржаў

Само жыццё пацвярджае абгрунтаванасць імкненняў народаў былых савецкіх рэспублік да больш цеснага ўзаемадзеяння. Аб гэтым Прэзідэнт Беларусі Аляксандр Лукашэнка заявіў 14 красавіка на сустрэчы з кіраўнікамі вышэйшых судоў замежных дзяржаў. 

Замежныя дэлегацыі прыехалі ў Мінск у сувязі са святкаваннем 100-годдзя Вярхоўнага Суда Беларусі. У іх ліку - прадстаўнікі Расіі, Азербайджана, Таджыкістана, Казахстана, Узбекістана, Кыргызстана. "Мне пашчасціла: выпала добрая нагода сустрэцца з лепшымі людзьмі ў сферы юрыспрудэнцыі. Ведаю, што ў кіраўніцтва вярхоўных судоў дрэнных не назначаюць, - прывітаў Кіраўнік дзяржавы кіраўнікоў судовых органаў. - Вельмі рады, што вы ўдзялілі гэтай падзеі ўвагу. Мы гэта вельмі высока цэнім".

"Нашы краіны цесна супрацоўнічаюць у розных сферах дзейнасці, у тым ліку ў рамках міжнародных абавязацельстваў па лініі Садружнасці Незалежных Дзяржаў, Саюзнай дзяржавы, Еўразійскага эканамічнага саюза. Мы актыўна развіваем сваю прысутнасць на пляцоўках Шанхайскай арганізацыі супрацоўніцтва. Само жыццё пацвярджае абгрунтаванасць імкненняў народаў былых савецкіх рэспублік да больш цеснага ўзаемадзеяння. Асабліва гэта актуальна ў наш вельмі няпросты час", - адзначыў Аляксандр Лукашэнка.

Прэзідэнт падкрэсліў, што постсавецкія краіны адзіныя ў жаданні забяспечыць у сваіх дзяржавах законнасць і парадак, абараніць інтарэсы грамадзян.

"Лічу, што гэты ваш візіт у Мінск паслужыць далейшаму развіццю прафесійнага супрацоўніцтва (свята святам, але нашы абавязкі з нас ніхто не здымаў). Многія пераўтварэнні ў сферы судовай дзейнасці мы можам праводзіць сінхронна і ўзгоднена. Наша краіна заўсёды адкрыта для дыялогу. Мы вельмі сур'ёзна "падглядаем" за вамі, за вашымі новаўвядзеннямі. І, робячы пэўныя крокі ў рэфармаванні нашай судовай сістэмы, мы глядзім, каб не забегчы наперад і не адысці ў бок ад вас. Калі неабходна нешта зрабіць на дзяржаўным і міждзяржаўным узроўні для вас, мы гатовы падтрымаць і рэалізаваць усе вашы канструктыўныя прапановы", - заявіў беларускі лідар.

Аляксандр Лукашэнка нагадаў, што краіны ўжо зрабілі правільны крок ва ўмацаванні ўзаемадзеяння. Па ініцыятыве Вярхоўнага Суда Беларусі створаны Савет старшынь вярхоўных судоў дзяржаў СНД. Прэзідэнт упэўнены, што гэта дасць магчымасць скаардынаваць падыходы ў сферы правасуддзя.

"Асаблівую цікавасць уяўляе абмен вопытам у галіне судовага будаўніцтва. Пасля распаду некалі адзінай судовай сістэмы новым суверэнным дзяржавам давялося ствараць уласныя нацыянальныя мадэлі судаводства. Як вы ведаеце, Беларусь пайшла па шляху паслядоўнага ўдасканалення структуры судовай улады. Мы адмовіліся ад спроб нешта ламаць, крышыць. Мы разумеем, што стаім на плячах гігантаў: да нас вельмі шмат зроблена ў судовым будаўніцтве. Мы гэтым шляхам ішлі, удасканальваючы", - сказаў Кіраўнік дзяржавы. 

Паводле слоў Аляксандра Лукашэнкі, пры рэфармаванні судовай сістэмы ў Беларусі ўсе рашэнні прымаліся абдумана і без татальнага пераймання непатрэбнага замежнага вопыту. "Мы правялі некалькі этапаў судова-прававой рэформы. Судовыя пераўтварэнні знайшлі сваё адлюстраванне (пасля пэўных выпрабаванняў, якія мы праводзілі на заканатворчым узроўні) у нашай Канстытуцыі. Ведаем, што ў вас праходзяць працэсы судовага рэфармавання. Нам цікавы вашы дасягненні, і гатовы падзяліцца сваім вопытам. Пастаянна ўдасканальваючы судовую сістэму, удзяляючы вялікую ўвагу будаўніцтву, мы спачатку апрабавалі ўсё на ўзроўні законаў і падзаконных актаў. А потым, калі пераканаліся ў тым, што гэта "кладзецца на нашу грэшную зямлю", мы замацавалі гэтыя напрамкі ў нашай Канстытуцыі", - дадаў Прэзідэнт.

Старшыня Вярхоўнага Суда Беларусі Валянцін Сукала ў сваю чаргу адзначыў, што створаны па ініцыятыве беларускага боку Савет старшынь вярхоўных судоў краін СНД пачаў сваю работу ў канцы 2022 года. "Сёння, калі дэвальвуюцца многія нормы міжнароднага права, калі ламаюцца і знішчаюцца міжнародныя прававыя інстытуты, наша ўзаемадзеянне ў рамках такогай савета ўяўляецца вельмі і вельмі актуальным. Асноўныя тэмы ўзаемадзеяння - стан нашых судовых сістэм, шляхі і напрамкі іх далейшага развіцця", - падкрэсліў ён.

Валянцін Сукала канстатаваў, што вопыт Беларусі і яе нацыянальная мадэль правасуддзя маюць свае асаблівасці і могуць уяўляць інтарэс для замежных партнёраў. Старшыня Вярхоўнага Суда расказаў, што ў краіне завершаны ўжо трэці этап судова-прававой рэформы. З 2014 года ў Беларусі функцыянуе адзіная сістэма судоў агульнай юрысдыкцыі на чале з адным вышэйшым судовым органам - Вярхоўным Судом. Сістэма судоў агульнай юрысдыкцыі з'яўляецца трохзвенавой і складаецца са 157 судоў, у тым ліку Вярхоўнага Суда, абласных і Мінскага гарадскога суда, эканамічных судоў абласцей і Мінска, 142 раённых і гарадскіх судоў.