Уручэнне дзяржаўных узнагарод суддзям Вярхоўнага Суда

Прэзідэнт Беларусі Аляксандр Лукашэнка ўручыў дзяржаўныя ўзнагароды 12 суддзям Вярхоўнага Суда. Урачыстая цырымонія адбылася 14 красавіка ў Палацы Незалежнасці напярэдадні знамянальнай для ўсёй судовай сістэмы даты - векавога юбілею Вярхоўнага Суда.

Кіраўнік дзяржавы адзначыў, што 100-гадовая гісторыя станаўлення і развіцця вышэйшага судовага органа Беларусі багатая на падзеі: "Яна беражліва захоўвае памяць аб кіраўніках, суддзях Вярхоўнага Суда і многіх іншых яго работніках, якія аддалі ўсе сілы і веды служэнню закону. Некаторыя з іх не толькі вяршылі правасуддзе, але і ў гады Вялікай Айчыннай вайны са зброяй у руках абаранялі сваю Радзіму ад фашысцкай навалы".

"Вопыт, веды, грамадзянская мужнасць і адказнасць вашых папярэднікаў заўсёды дапамагалі нашай краіне правільна выбіраць шлях свайго развіцця", - падкрэсліў Аляксандр Лукашэнка.

Паводле яго слоў, судовая сістэма краіны не раз перажывала змяненні. "Але глабальныя пераўтварэнні ў яе ўмацаванні звязаны з набыццём нашай краінай дзяржаўнага суверэнітэту. Многія з прысутных тут суддзяў былі ўдзельнікамі гэтага працэсу рэфармавання", - сказаў Прэзідэнт.

Судовая галіна ўлады ў яе цяперашнім абліччы сфарміравалася структурна і функцыянальна, канстатаваў Кіраўнік дзяржавы. Створана таксама адзіная сістэма судоў агульнай юрысдыкцыі пад кіраўніцтвам Вярхоўнага Суда. Надзяленне судоў паўнамоцтвамі па судовым адміністраванні і матэрыяльна-тэхнічным забеспячэнні замацавала іх самастойнасць.

Кіраўнік дзяржавы адзначыў, што ў Беларусі, удасканальваючы судовую сістэму, нічога не ламалі - гэта было асноўным прынцыпам. "Мы памятаем, што стаім на плячах гігантаў. І тую спадчыну, якая нам дасталася ад савецкага правасуддзя, тое, што мы, вынаходзячы, атрымлівалі ў першыя гады нашага суверэнітэту і незалежнасці, мы спакойна-спакойна ўдасканальвалі, рэфармуючы нашу судовую сістэму. Гэта не мая заслуга. Гэта заслуга перш за ўсё ваша. Вы заўсёды ініцыявалі перад Прэзідэнтам тыя ці іншыя навацыі, новаўвядзенні, а я ніколі вам не адмаўляў. І такім чынам мы прайшлі тры этапы рэфармавання нашай сістэмы", - сказаў Аляксандр Лукашэнка.

"Пры ўсёй нашай "дыктатуры" з 52 або 54 тысяч сядзельцаў на пачатак майго прэзідэнцтва сёння засталіся 24 тысячы. Вось і ўся дыктатура - скарачэнне ў два разы за той перыяд, які мы з вамі прайшлі. І гэта сведчыць аб тым, што без празмернай гуманізацыі, як гэта прынята ў вас гаварыць, мы зрабілі гуманнай нашу краіну і гуманным - наша правасуддзе", - заявіў беларускі лідар.

Прэзідэнт таксама заўважыў, што пры рэфармаванні судовай сістэмы новаўвядзенні спачатку замацоўваліся і апрабаваліся на ўзроўні нарматыўных прававых актаў. А калі стала зразумела, што ўкаранёныя навацыі зарэкамендавалі сябе са станоўчага боку, было вырашана пайсці на "радыкальнае рэфармаванне нават не судовай сістэмы, а сістэмы ўлады ў Беларусі", нагадаў Кіраўнік дзяржавы. Адпаведныя змяненні былі ўнесены ў Канстытуцыю.

"Сёння Прэзідэнт ужо не мае тых паўнамоцтваў, якія меў да змяненняў у Канстытуцыю. Вы будзеце выбірацца прадстаўнікамі народа на Усебеларускім народным сходзе. І гэта вельмі сур'ёзны крок. Ці перажываю я ў сувязі з гэтым? Так, крыху хвалююча, таму што судовая галіна ўлады ёсць судовая. Але я ўпэўнены, што мы справімся. Мы ўжо не тыя, што былі 20-25 гадоў таму. Мы справімся", - падкрэсліў Аляксандр Лукашэнка.

"Дзяржава ўдзяляе сур'ёзную ўвагу судовай сістэме, зацікаўлена ў яе пастаянным развіцці, адзначае ўсе дасягненні і поспехі судзейскага корпуса, - падкрэсліў Прэзідэнт. - Узнагароджанне шэрага суддзяў высокімі дзяржаўнымі ўзнагародамі з'яўляецца не толькі асаблівай прыкметай і павагай асабістых заслуг. Гэта ацэнка дзейнасці вашай прафесійнай супольнасці".

"Падзеі апошніх гадоў сталі яшчэ адным сур'ёзным выпрабаваннем на стойкасць і трываласць усёй судовай сістэмы. Беларускія суды ўпершыню ў сучаснай гісторыі сутыкнуліся з беспрэцэдэнтным інфармацыйным і псіхалагічным націскам. І гэты націск нікуды не дзеўся, ён прадаўжаецца да гэтага часу, - сказаў Кіраўнік дзяржавы. - Галоўнай мэтай усяго гэтага было дэстабілізаваць работу судоў, унесці дысбаланс у з'яднанасць судзейскага корпуса".

Аляксандр Лукашэнка падкрэсліў, што суддзі, якія прысутнічаюць на цырымоніі, дастойна вытрымалі гэтыя выпрабаванні, засталіся вернымі закону і прафесіі. "Я ад усёй душы хачу падзякаваць усім вам і ў вашай асобе ўсім суддзям Беларусі за тыя патрыятызм, стойкасць і вытрымку, якія вы праявілі", - адзначыў Прэзідэнт.

Заслужаныя ўзнагароды Кіраўнік дзяржавы ўручыў сёння адным з лепшых суддзяў Вярхоўнага Суда - тым, хто садзейнічаў умацаванню судовай сістэмы, дзякуючы каму беларускае правасуддзе прадаўжае дынамічна развівацца.

Прэзідэнт уручыў суддзям Таццяне Праташчык, Валянціне Крывой, Ганне Сакалоўскай, Ірыне Тылец, Іне Цысік і Аляксею Цяцюхіну медаль "За працоўныя заслугі", Пятру Лістраценку, Аляксею Рыбакову і Андрэю Яфрэмаву - "За бездакорную службу" ІІІ ступені. Званне заслужанага юрыста Беларусі прысвоена суддзі Вярхоўнага Суда Валянціне Кулік. Суддзям Андрэю Алешчанку і Фёдару Чубкаўцу ўручана Падзяка Прэзідэнта Беларусі.

"Я абсалютна ўпэўнены, што і ў далейшым вы будзеце абараняць сваю краіну, сваю Радзіму, - падкрэсліў Аляксандр Лукашэнка. - Ад усёй душы жадаю вам здароўя, міру, дабрабыту, далейшых поспехаў у вашай няпростай прафесійнай дзейнасці".

У слове ў адказ Валянціна Кулік сказала, што лічыць прысвоенае званне заслужанага юрыста вышэйшай узнагародай у сваёй прафесіі. "Я вельмі ўдзячная за тое, што мая праца, прафесійная дзейнасць, служэнне правасуддзю так высока ацэнены дзяржавай. Я лічу, што для чалавека вельмі важна выбраць свой жыццёвы шлях і прафесію. Я шчаслівая, што ў сваім выбары не памылілася. Я люблю справу, якой служу, і вельмі ўдзячная, што на маім жыццёвым шляху сустракаліся цудоўныя людзі, юрысты, суддзі, якія вучылі мяне служыць закону, сваёй краіне і людзям, вучылі мяне разумець дух і літару закону, вучылі шукаць ісціну і адчуваць справядлівасць. А галоўнае, яны вучылі мяне любіць сваю справу, краіну і людзей. Гэта не проста высокія словы, паколькі без гэтага пачуцця, я лічу, няма сапраўднага суддзі". Судзейскія абыякавасць, памылкі або непрафесіяналізм вельмі дорага каштуюць грамадству ў цэлым і канкрэтным людзям у прыватнасці, звярнула ўвагу Валянціна Кулік.

"Кажуць, што Вярхоўны Суд - гэта група юрыстаў, якія выпраўляюць памылкі іншых судоў і ўвекавечваюць свае ўласныя. Я хачу сказаць Вам, Аляксандр Рыгоравіч, што мы, уся каманда Вярхоўнага Суда, пастараемся не дапускаць такіх памылак, а галоўнае - як і раней, служыць людзям і сваёй краіне", - запэўніла яна.

У сваю чаргу Старшыня Вярхоўнага Суда Валянцін Сукала падкрэсліў, што ўсе суддзі краіны вельмі ўдзячныя за тую ўвагу, якую Прэзідэнт пастаянна ўдзяляе судовай сістэме.

"Ваша стаўленне - яно па-дзяржаўнаму строгае і патрабавальнае, але яно і ўважлівае, чулае і, магчыма, па-бацькоўску клапатлівае", - сказаў кіраўнік суда. Паводле яго слоў, многія замежныя калегі, якія наведвалі Вярхоўны Суд, знаёміліся з яго работай, па-добраму зайздросцяць, бо размешчаны ў Мінску Палац правасуддзя лічыцца адным з лепшых у Еўропе. "Яны зайздросцяць той увазе, стаўленню, якія Вы, як Кіраўнік дзяржавы, удзяляеце нам", - сказаў Старшыня ВС.

"У самыя складаныя, цяжкія, пераломныя моманты станаўлення беларускага правасуддзя, суддзі звярталіся да Вас і заўсёды атрымлівалі добрую параду, падтрымку, разуменне, а, калі трэба, то і абарону, - звярнуўся да Прэзідэнта Валянцін Сукала. - І кожны новы этап судовага будаўніцтва сёння канцэптуальна абмяркоўваецца Вамі з удзелам судзейскай супольнасці, да погляду якой Вы заўсёды прыслухоўваецеся. Таму ў нашай краіне і створана такая сучасная, вельмі ўстойлівая, зразумелая судовая сістэма, здольная вытрымаць усе сучасныя выклікі, пагрозы, якая забяспечвае судовую абарону правоў нашых грамадзян і дастойны ўзровень грамадскага правапарадку".

Старшыня ВС запэўніў, што ўвесь судзейскі корпус правільна разумее задачы, якія стаяць перад ім, усведамляе ўзровень сваёй адказнасці і гатовы зрабіць усё, каб у далейшым забяспечыць правапарадак, законнасць, справядлівасць у краіне. З нагоды юбілейнай даты Валянцін Сукала перадаў у падарунак Кіраўніку дзяржавы эксклюзіўны экзэмпляр спецыяльнага выдання, прысвечанага гісторыі беларускага правасуддзя.

На заканчэнне цырымоніі Аляксандр Лукашэнка падкрэсліў значную ролю судовага корпуса ў захаванні краіны ў час падзей 2020 года.

Прэзідэнт звярнуў увагу на крылатыя словы, выказаныя адной з удзельніц мерапрыемства: "Не дай Бог нам увекавечыць свае памылкі".

"Яшчэ раз хачу падзякаваць вам за тое, што вы зрабілі, і тое, што робіце для краіны, - адзначыў Аляксандр Лукашэнка. - У 2020 годзе па-рознаму ўспрымалі тыя падзеі. Я зыходзіў з таго, што пройдзе нейкі час і, ацэньваючы, пераацэньваючы тыя падзеі, мы пераканаемся, што мы зрабілі правільна. Памятайце: вы абаранялі сваю краіну. І мы з вамі выратавалі тую краіну".

Асаблівую ролю, паводле слоў Прэзідэнта, у захаванні краіны адыгралі суддзі. "У маёй памяці не засталося ніводнага выпадку, дзе судовая сістэма рухнула б, дзе яна падвяла б краіну, дзе яна не стала б у шэраг з тымі, хто змагаўся за існаванне нашай Беларусі. Калі б мы тады пахіснуліся, у нас сёння было б горш, чым ва Украіне. Таму памятайце гэта", - сказаў беларускі лідар.

"Ведайце, што вы зрабілі вялікую справу, - падкрэсліў Кіраўнік дзяржавы. - Калі пасля гэтага нічога ўжо не зробіце (у вас яшчэ вялікі шлях наперадзе), але калі б нават нічога вы не зрабілі, вы ўжо для краіны зрабілі вельмі шмат. Вялікі вам дзякуй за ўсё гэта. Нам не сорамна будзе глядзець людзям у вочы і сваім дзецям. Дзякую вам".