Сустрэча са Старшынёй Выканаўчага камітэта - выканаўчым сакратаром СНД Сяргеем Лебедзевым

Прэзідэнт Беларусі Аляксандр Лукашэнка 27 мая сустрэўся са Старшынёй Выканаўчага камітэта - выканаўчым сакратаром СНД Сяргеем Лебедзевым.

"Мы напярэдадні важных мерапрыемстваў у рамках Садружнасці Незалежных Дзяржаў. З улікам таго, што Беларусь у гэтым годзе старшынствуе ў Садружнасці", - адзначыў Прэзідэнт Беларусі, пачынаючы размову.

"Паспяхова старшынствуе", - заўважыў Сяргей Лебедзеў.

Аляксандр Лукашэнка падзякаваў за такую ацэнку. "Хоць работы яшчэ шмат. І, напэўна, канчатковую ацэнку вы нам выставіце і кіраўнікі дзяржаў у кастрычніку (калі запланаваны саміт Садружнасці. - Заўвага)", - адзначыў ён.

Прэзідэнт Беларусі на сустрэчы выказаў пазіцыю, што з улікам назапашанага вопыту ў СНД трэба падумаць, як далей развіваць арганізацыю. "Нам трэба неяк падумаць аб тым, з улікам вопыту, чым у рэшце рэшт будзе займацца СНД, паставіць сабе больш сур'ёзныя задачы і, калі так можна сказаць, ажыццявіць нейкі прарыў у гэтай арганізацыі", - заявіў Кіраўнік дзяржавы.

Аляксандр Лукашэнка адзначыў, што цяпер СНД у асноўным з'яўляецца своеасаблівай дыскусійнай пляцоўкай, дзе ў тым ліку абмяркоўваюцца сур'ёзныя і важныя пытанні. "Але трэба нейкай канкрэтыкай, як мне здаецца, напоўніць нашу гэту арганізацыю. Адкрыта пагаварыць з кіраўнікамі дзяржаў, ці гатовы яны рухацца ў напрамку іншых, больш цесных аб'яднанняў. Дапусцім, у эканоміцы - ЕАЭС, у ваенна-палітычнай сферы - АДКБ. Нешта ў гэтым плане. Калі б вы прапрацавалі гэта пытанне і маглі ўнесці прапанову, я быў бы вашым добрым лабістам, нашага Выканкама, каб прапанаваць кіраўнікам дзяржаў пагаварыць у рамках гэтага саміту з мэтай надання большай дынамікі і большага аўтарытэту і вагі нашай арганізацыі", - сказаў Прэзідэнт Беларусі.

"Чаму я гавару аб гэтым, таму што падзеі апошніх дзён, тыдняў, месяцаў яскрава сведчаць аб тым, што нам трэба быць бліжэй. Я не хачу, каб зразумелі тут некаторыя, што я краіны СНД спрабую падцягнуць да праблем Беларусі, якія звязаны і з апошнімі інцыдэнтамі і гэтак далей. Не, справа не ў гэтым. Нам трэба думаць пра будучыню больш сур'ёзна. А гэтыя інцыдэнты - яны былі, ёсць і будуць. Спакойнага жыцця нам ніхто не гарантуе. А вось бліжэй быць, пакуль яшчэ мы размаўляем на адной мове, цяперашняе пакаленне палітыкаў, нам трэба папрацаваць, і вельмі сур'ёзна", - падкрэсліў беларускі лідар.

Было адзначана, што саміт СНД у Мінску на ўзроўні кіраўнікоў дзяржаў плануецца правесці 15 кастрычніка бягучага года. Аляксандр Лукашэнка расказаў, што магчымасць вочнай сустрэчы ў Мінску абмяркоўвалася нядаўна і на пасяджэнні Вышэйшага Еўразійскага эканамічнага савета, якое прайшло ў фармаце відэаканферэнцыі. "Мы планавалі, што напярэдадні правядзём пасяджэнне ЕАЭС - прэзідэнты сустрэнуцца, абмяркуюць пэўныя пытанні, якія ёсць, якія трэба будзе абмяркоўваць. І на наступны дзень, як планавалася, мы сустрэнемся ў рамках СНД, - сказаў Кіраўнік дзяржавы. - Я гатовы да таго, каб разам з вамі сур'ёзна сустрэць тут кіраўнікоў дзяржаў у вочным рэжыме і прадставіць сур'ёзныя тэмы для размовы".

Сяргей Лебедзеў пацвердзіў: Беларусь вельмі актыўна ўступіла ў сваё старшынства ў бягучым годзе.

"Мы дабавім! Актыўнасці дабавім", - запэўніў Аляксандр Лукашэнка.

Выканаўчы сакратар СНД адзначыў, што пад старшынствам Беларусі прайшоў ужо шэраг мерапрыемстваў, і не толькі ў відэафармаце. Раней вочна было праведзена пасяджэнне Савета міністраў замежных спраў, а 28 мая ў Мінску таксама ў вочным фармаце сустрэнуцца кіраўнікі ўрадаў. "Гэта вельмі добра. Мы пастаянна адчуваем увагу кіраўніцтва Беларусі. Бачым, што і вы сочыце за ходам старшынства, рэалізацый усіх мерапрыемстваў, якія запланаваны. А запланавана вельмі шмат. І на тэрыторыі Беларусі, і за яе межамі", - сказаў Сяргей Лебедзеў.

Ён адзначыў, што ў гэтым годзе СНД адзначае сваё 30-годдзе. "І тут вы абсалютна маеце рацыю, што нам трэба не толькі азірнуцца назад, але і паглядзець наперад, як ісці далей. Хачу адразу сказаць, што мы даўно ўжо думаем, і не толькі думаем - працуем над тым, каб зрабіць дзейнасць СНД больш эфектыўнай. На гэта накіраваны нашы сумесныя дзеянні з ЕАЭС", - заявіў выканаўчы сакратар СНД.