Нарада аб выніках удзелу беларускіх спартсменаў у XXIV зімовых Алімпійскіх гульнях 2022 года і перспектывах развіцця зімовых відаў спорту

Прэзідэнт Беларусі Аляксандр Лукашэнка 24 сакавіка на нарадзе аб выніках удзелу беларускіх спартсменаў у XXIV зімовых Алімпійскіх гульнях 2022 года і перспектывах развіцця зімовых відаў спорту запатрабаваў адказаць на галоўнае пытанне: які вынік ад укладзеных дзяржавай сродкаў.

"Размова сёння пойдзе аб сітуацыі ў вялікім спорце. У гэтым выпадку я не хацеў бы гаварыць пра ідэалагічны складнік. Гэта вельмі важна, асабліва цяпер. Я проста хацеў бы, як чалавек практычны, пачуць адказ на галоўнае пытанне: мы зрабілі ўсё для таго, каб спартсменам можна было дастойна выступаць, падрыхтавацца. Стварылі ўмовы. І гэта нятанна абышлося нашай дзяржаве. Што ў выніку?" - задаў пытанне Прэзідэнт.

"Падрыхтоўка і ўдзел нашых спартсменаў у розных спаборніцтвах у апошнія гады праходзілі ва ўмовах беспрэцэдэнтнага націску на ўвесь беларускі спорт, Нацыянальны алімпійскі камітэт, спартыўныя арганізацыі, спартсменаў, трэнераў", - пачаў дакладваць Міністр спорту і турызму Сяргей Кавальчук.

Але Прэзідэнт запярэчыў: "Сяргей Міхайлавіч, на любое дзеянне ёсць такое ж процідзеянне. Не трэба гаварыць, на каго хто націскае. Націскаюць усе і націскаюць на ўсіх. Гэта не прычына. А спартсмены і ваенныя на тое і існуюць: як націснуў, так і атрымаў (у адказ. - Заўвага)".

Сяргей Кавальчук адказаў, што беларускі спорт стойка вытрымаў удары, спартсмены і трэнеры стараліся, наколькі гэта было магчыма. "Але, на жаль, не ўсе аказаліся гатовы да гэтага ўздзеяння", - дадаў ён.

"Вы зноў за сваё: націскалі, пераціснулі, гатовы, не гатовы. Скажыце, лыжныя гонкі - хто на вас так націснуў, што вы практычна ні ў адным відзе не ўдзельнічалі? - спытаў Аляксандр Лукашэнка. - Я ўжо не кажу аб медалях. На Расію не менш націскалі, асабліва на лыжнікаў. І вынік? Вам і не снілася так. Вы ніколі ў жыцці такога ўзроўню не дасягняце. Яны заваявалі больш за ўсіх медалёў. Вось вам і націск! А вы?"

Кіраўнік дзяржавы падкрэсліў, што націск - гэта нават да лепшага. "Калі націскаюць, тады ты выступаеш лепш", - перакананы ён.

Міністр спорту і турызму прызнаў, што ў спартсменаў утварыўся доўг перад краінай і людзьмі за гэтыя няўдалыя выступленні на Алімпійскіх гульнях: "Патэнцыял нашых спартсменаў, безумоўна, не рэалізаваны. Маглі значна лепш. Два медаля - не той рэзультат, мы гэта разумеем. Мінімум 5, максімум 10 - гэта тое, на што мы павінны былі разлічваць і якія сабе ставіць мэты".

Паводле яго слоў, пасля Алімпіяды праведзены аналіз вынікаў выступлення, віды спорту падзелены на тры групы. Першая - тыя, хто нават не адабраўся на Алімпійскія гульні (хакей з шайбай, шорт-трэк), другая - тыя, хто выступіў нездавальняюча (лыжныя гонкі, канькабежны спорт, фігурнае катанне, гарналыжны спорт), і трэцяя - тыя, хто выступіў на сваю сілу (фрыстайл і біятлон). Перагледжаны кіруючыя склады ў некаторых федэрацыях, вядзецца работа па пераразмеркаванні папячыцельскіх саветаў, многія федэрацыі ўзначалілі новыя кіраўнікі, але не новыя людзі ў спорце, усе дзяржаўныя фінансавыя патокі ўзяты пад жорсткі кантроль.

Міністр падкрэсліў, што спорт у сучасным свеце - гэта вялікая палітыка. І свет мяняецца вельмі хутка. "У такіх умовах - нядобразычлівасці, адкрытых спекуляцый - мы сумесна з нашымі партнёрамі вырашаем пытанне правядзення альтэрнатыўных міжнародных спартыўных мерапрыемстваў", - сказаў Сяргей Кавальчук.

"Улічваючы, што большасць краін-партнёраў уваходзіць у склад СНД, Шанхайскай арганізацыі супрацоўніцтва, мы разам з расійскімі калегамі пачалі прапрацоўку пытанняў прыцягнення да ўдзелу ў гэтых спартыўных мерапрыемствах такіх краін, як Кітай, Індыя, Пакістан, Манголія і іншыя", - прадоўжыў кіраўнік Мінспорту і турызму. Ён лічыць магчымым таксама запрасіць дружалюбныя краіны Паўднёвай Амерыкі. Магчыма таксама правядзенне гульняў краін БРІКС (Бразілія, Расія, Індыя, Кітай і ПАР).

На думку Міністра, правядзенне такіх мерапрыемстваў будзе з'яўляцца не толькі адным са значных рычагоў папулярызацыі здаровага ладу жыцця сярод грамадзян, але і дасць магчымасць эфектыўна выкарыстоўваць і развіваць існуючую спартыўную інфраструктуру, у тым ліку і ў рэгіёнах.

Прыкладам такіх мерапрыемстваў стануць другія гульні краін СНД, якія пройдуць у 2023 годзе ў Беларусі. Як адзначыў Сяргей Кавальчук, ужо гучаць прапановы праводзіць гэта мерапрыемства штогод. У бліжэйшыя дні пройдуць сустрэчы з прадстаўнікамі алімпійскага камітэта Расіі і НАК Беларусі, міністэрстваў спорту абедзвюх краін, спартыўных федэрацый, а потым і калегія для арганізацыі спартыўнай дзейнасці на бліжэйшую перспектыву. "Спорт, на жаль, не дае адразу вынікаў. Гэта праца і цярпенне. Мы бачым слабыя месцы і разумеем, як трэба выбудоўваць падрыхтоўку, дзе трэба яшчэ дапрацаваць", - запэўніў Міністр спорту і турызму.

Прэзідэнт запатрабаваў забяспечыць дынаміку ў развіцці відаў спорту. "Дзе дынаміка станоўчая, дзе прагрэс? Вось што мне патрэбна! - падкрэсліў беларускі лідар пасля даклада Сяргея Кавальчука. - Я як эканаміст разумею: сёння так было, заўтра рухаемся наперад".

Аляксандр Лукашэнка ў сувязі з гэтым канстатаваў, што колькасць медалёў, заваяваных на папярэдніх зімовых Алімпійскіх гульнях, пакуль мае тэндэнцыю да зніжэння. "Вось ваша тэндэнцыя. А вы мне тут расказваеце, што вы нешта прааналізавалі, нешта зрабілі..." - заўважыў ён.

"Мы ўклалі каласальныя грошы. І людзі хочуць бачыць сваіх герояў (перамогі ў спорце. - Заўвага)!" - заявіў Кіраўнік дзяржавы.

Прэзідэнт выказаў шэраг нараканняў па развіцці і дасягненні вынікаў у шэрагу відаў спорту. "Што датычыцца хакея, што тут гаварыць, вы бачыце - гэта ганьба! Было тры каткі крытыя, цяпер іх 44. Што змянілася? Вы сталі наогул дрэнна гуляць у хакей! Нацыянальныя віды спорту - футбол і хакей", - падкрэсліў ён.

Кіраўнік дзяржавы заўважыў, што памятае ўсе папярэднія абяцанні, аднак прагрэсу няма. Напрыклад, чарговы раз заяўляецца, што беларуская каманда ў КХЛ выйшла ў плэй-оф. "У наступным годзе вы зноў выйдзеце ў плэй-оф. Дык мы мільёны туды ўклалі. Дзе рух?" - сказаў Аляксандр Лукашэнка.

Ён таксама папярэдзіў, што ў гэтай сферы ў цяперашніх рэаліях не варта разлічваць, што "мы мільёны долараў будзем увальваць".

Кіраўнік беларускай дэлегацыі на зімовых Алімпійскіх гульнях у Пекіне, дырэктар РЦАП па зімовых відах спорту "Раўбічы" Аляксандр Гагіеў на нарадзе расказаў, што ў час Гульняў атмасфера ў камандах была рабочай, усе былі настроены на максімальны рэзультат. Праўда, задачы былі выкананы не ў поўным аб'ёме: адным камандам з-за праблем з лагістыкай не хапіла часу на вывучэнне спартыўных пляцовак, дзе праходзілі спаборніцтвы, іншыя былі не гатовы да складаных умоў надвор'я, трэцім не хапіла адпачынку перад Алімпіядай. "Але турыстаў на Алімпіядзе не было", - заявіў ён.

На думку старшыні Беларускай федэрацыі біятлона Андрыяна Цыбульскага, яўных пралікаў у падрыхтоўцы да Алімпійскіх гульняў не дапушчана. "Адной з галоўных прычын не поўнасцю рэалізаванага патэнцыялу выступлення нашай каманды лічу адсутнасць дастатковага і, галоўнае, устойлівага вопыту ў пераможных стартах. Усе спартсмены былі цвёрда арыентаваны на барацьбу за максімальны рэзультат, усведамляючы, што могуць змагацца за медалі ў кожнай гонцы. Адсюль залішнія эмоцыі, хваляванне, пазамежавая матывацыя, што часам бывае супраць", - растлумачыў кіраўнік федэрацыі.

Сваё меркаванне ў час нарады агучыў і былы кіраўнік Беларускай федэрацыі біятлона Валерый Вакульчык. Ён расказаў аб моцных і слабых баках каманды, агучыў магчымыя прычыны няўдачнага выступлення на Алімпійскіх гульнях у Пекіне. "Мы стараемся зрабіць максімум, - заявіў ён. - Мы настроены на  тое, каб нашы спартсмены не проста ўдзельнічалі, а перамагалі".

"Вы настроены, але, на жаль, пакуль усё ідзе ўніз", - канстатаваў Аляксандр Лукашэнка.

Галоўны трэнер нацыянальнай каманды Рэспублікі Беларусь па канькабежным спорце Сяргей Мінін далажыў на нарадзе па зімовых відах спорту аб выніках выступлення беларускіх атлетаў на Алімпіядзе, якая прайшла ў Пекіне. За апошнія гады гэты від спорту ў Беларусі зрабіў значны крок наперад, у нацыянальнай камандзе павялічылася колькасць спартсменаў, у першую чаргу дзякуючы з'яўленню ў Мінску сучаснага канькабежнага стадыёна. Ёсць высокія рэзультаты і на міжнародных стартах, аднак на Алімпіядзе заваяваць медалёў не ўдалося.

Беларуская каманда канькабежцаў адна з самых маладых у свеце. "Трэба планамерна рухацца да запаветных медалёў. На Алімпійскіх гульнях усе спартсмены выступілі ў сваю сілу без правалаў", - сказаў Сяргей Мінін.

Прэзідэнт падкрэсліў, што для развіцця канькабежнага спорту ў Беларусі ўжо створаны дастатковыя ўмовы. У першую чаргу неабходна выбудаваць методыкі падрыхтоўкі і адбору перспектыўных спартсменаў на рэгіянальным узроўні, а потым ужо актыўна падключаць іх да трэніровачнага працэсу на развітой сталічнай базе. "Няхай яны бегаюць тут да пасінення ў Мінску. Цудоўны каток! Няхай бегаюць", - сказаў Кіраўнік дзяржавы.

Паводле слоў Сяргея Мініна, канькабежцы былі забяспечаны ўсім неабходным і паказалі даволі высокія рэзультаты нараўне са многімі больш масцітымі і вопытнымі спартсменамі. "Дынаміка ў канькабежным спорце станоўчая. Трэба проста якасна і прафесійна рабіць сваю работу", - адзначыў галоўны трэнер.

Ён таксама аптымістычна глядзіць на перспектывы канькабежцаў на наступнай зімовай Алімпіядзе ў Мілане. І выказаў прапановы па далейшым развіцці інфраструктуры для развіцця канькабежнага спорту, у тым ліку будаўніцтва спартыўных аб'ектаў у рэгіёнах.

У сувязі з гэтым Аляксандр Лукашэнка заўважыў, па такой логіцы ўжо займаліся развіццём хакея - былі пабудаваны дзясяткі лядовых пляцовак, а рэзультаты па-ранейшаму невысокія. Таму ў канькабежным спорце, асабліва ў бягучай сітуацыі, не варта разлічваць на будаўніцтва буйных аб'ектаў у рэгіёнах. Прэзідэнт заклікаў эфектыўна задзейнічаць існуючыя магчымасці, наладзіць трэніровачны працэс так, каб найбольш перспектыўныя спартсмены маглі займацца ў Мінску. "Не разлічвайце, што мы вам у бліжэйшы час пабудуем канькабежны стадыён. Бярыце лыжаролеры і пачынайце працаваць. Павінна быць методыка, фізічная падрыхтоўка", - падкрэсліў беларускі лідар.

Прэзідэнт даручыў правесці маштабную рэвізію беларускага спорту. Ён адзначыў, што ў краіне за спорт адказваюць тры чалавекі: віцэ-прэм'ер, Міністр і Прэзідэнт Нацыянальнага алімпійскага камітэта. Акрамя таго, асаблівыя задачы ў гэтай сферы ўскладзены на члена Савета Рэспублікі Дзмітрыя Баскава. "Ты там будзеш як галоўны кантралёр і будзеш адказваць за спорт. У цябе вялікія паўнамоцтвы і правы", - адзначыў Аляксандр Лукашэнка.

"Збярыцеся, калі вы хочаце працаваць, прарэвізуйце ўсё, не толькі ў зімовых відах спорту, і павыкідвайце гультаёў, - запатрабаваў Прэзідэнт. - Разбярыцеся. Я Алімпіяды чакаць не буду".

Выступленне беларускай каманды на Алімпіядзе ў Пекіне Кіраўнік дзяржавы назваў нікчэмным. "Мы чатыры гады правалілі. Вы з'елі грошы дзяржаўныя проста так. Выснова адна: так больш быць не можа. Задачы я вам паставіў, - падкрэсліў Аляксандр Лукашэнка. - Дзяржаве патрэбны вынік".

"Нам сёння вельмі важна вызначыцца, як развіваць спорт і алімпійскі рух у новых рэаліях - ва ўмовах варожага стаўлення да Беларусі і Расіі з боку розных функцыянераў, у тым ліку Міжнароднага алімпійскага камітэта. Вы гэта цудоўна ведаеце", - сказаў Кіраўнік дзяржавы.

"Але ёсць нам з нашым узроўнем дзе выступаць на міжнародных спаборніцтвах і з кім спаборнічаць", - адзначыў ён.

Аляксандр Лукашэнка заклікаў актыўна звяртацца ў міжнародныя суды па фактах націску на беларускіх спартсменаў і іх адхілення ад спаборніцтваў: "А чаго вы чакаеце? У якія міжнародныя суды вы звярнуліся, каб апратэставаць гэтыя рашэнні? Асабліва паралімпійскі рух. Нашы спартсмены-інваліды перад кім правініліся? Цішыня. А вы павінны гвалтам крычаць, усюды ва ўсе званы біць. У тым ліку ў міжнародных судах".

"Звярніцеся ў міжнародны суд, каб гэта гучала і спартсмены бачылі, што вы гатовы іх абараняць. А вы чакаеце нейкіх указанняў. Няхай гэтыя Бахі (Прэзідэнт МАК Томас Бах. - Заўвага) і іншыя адмазваюцца потым", - сказаў Прэзідэнт.

Ён таксама звярнуў увагу на той унутраны настрой, з якім спартсмены выступаюць на міжнародных стартах. А трэба змагацца за краіну, каб прысутнічаў добры спаборніцкі дух, упэўнены Прэзідэнт.

"Няма, як вы самі гаворыце, гэтага бляску ў вачах, няма волі да перамогі. Дык вы працуйце са спартсменамі", - сказаў Кіраўнік дзяржавы.

"А скардзіцца сёння, што нас там прыціснулі... Дык гэта шанц для вас. Так, як у эканоміцы: "Санкцыі, санкцыі!" Шанц. Гэта магчымасць для нашай эканомікі, - сказаў Прэзідэнт. - Гэтак жа і ў вас. Гэта ж шанц. Калі на цябе націскаюць, ты павінен супраціўляцца. Калі не супраціўляешся, то няма чаго ў спорт ісці".

"Цяпер трэба працаваць над тым, дзе нашы спартсмены будуць спаборнічаць і што яны ад гэтага будуць мець. Але не арыентуйце іх на мільённыя заработныя платы. Іх не будзе. І дзякуй богу. Усе павінны разумець, што грошы павінны быць зароблены. Будзе вынік - будзем плаціць. Але, яшчэ раз паўтараю, кожны спартсмен павінен быць патрыётам", - падкрэсліў беларускі лідар.

"Давайце, мужыкі, закасвайце рукавы і пачынайце працаваць! Вось увесь вынік", - сказаў Кіраўнік дзяржавы.

"Вы ведаеце, што рабіць. Пачынайце рабіць. У адваротным выпадку вы працаваць не будзеце. Усё я вам сказаў. Хочаце працаваць - працуйце. За мной не заржавее. Будзе вынік - вы будзеце заўсёды ў пашане, павазе. І ў матэрыяльных адносінах. Мы ў любых складаных сітуацыях знойдзем сродкі, каб падтрымаць і трэнера, і спартсмена. Калі вы хочаце", - адзначыў беларускі лідар.

Аляксандр Лукашэнка таксама звярнуў увагу на вельмі напружаную сітуацыю ў Еўропе: "Запалка - і ўсё ўспыхне. Таму нам трэба ў гэтай сітуацыі кожнаму на сваім месцы сабрацца і выдаць вынік".

Кіраўнік дзяржавы выказаўся аб прадстаўніках Украіны, якія шпіёнілі ў Беларусі, карыстаючыся дыпламатычным прыкрыццём. "Іх вунь хапае. Ад міжнародных гэтых шпіёнаў... Цэлая кодла, нават у нашай Украіне там. Мы ж іх бачылі - 12 чалавек. Ездзіце, глядзіце. Не, трэба было шпіёніць, яшчэ і паскудзіць у Беларусі. Ну вось цяпер выкінулі. Ведаеце - украінскіх гэтых прадстаўнікоў, якія сядзелі пад дыпламатычным прыкрыццём", - сказаў беларускі лідар.

Прэзідэнт таксама пракаменціраваў прапанову Польшчы па накіраванні ва Украіну заходняга міратворчага кантынгенту. "Вы ж бачыце, ачумелыя гэтыя палякі, яны прапануюць ужо (гэтага запрасілі з-за акіяна і яму пачынаюць пхаць (размова пра Прэзідэнта ЗША Джо Байдэна. - Заўвага БЕЛТА)): давайце створым міратворчыя сілы тысяч 100 і ўвядзём праз Львоў на Украіну. Вы разумееце, што гэта трэцяя сусветная вайна, - заявіў Кіраўнік дзяржавы. - І вы што, думаеце, мы ў баку застанёмся белымі і пушыстымі?"

"Нас проста ботам растопчуць з вашым такім характарам, мы нават не паспеем піскнуць. Ці вы думаеце, я зноў буду з аўтаматам наперадзе бегаць? Не, хлопцы. Хочаце мець краіну - за яе трэба чапляцца зубамі і трымацца. Лепш без аўтамата. Таму сітуацыя вельмі сур'ёзная, вельмі напружаная. І мы гэта павінны бачыць і разумець", - рэзюмаваў Аляксандр Лукашэнка.