Нарада па асобных пытаннях сацыяльна-эканамічнага развіцця Віцебскай вобласці

Прэзідэнт Беларусі Аляксандр Лукашэнка 3 лютага сабраў нараду па асобных пытаннях сацыяльна-эканамічнага развіцця Віцебскай вобласці.

Сярод удзельнікаў нарады - Прэм'ер-міністр Аляксандр Турчын, старшыні палат парламента Наталля Качанава і Ігар Сергяенка, якія таксама з'яўляюцца кіраўнікамі рабочай групы па кантролі за сацыяльна-эканамічным развіццём Віцебскай вобласці, Кіраўнік Адміністрацыі Прэзідэнта Дзмітрый Крутой, Старшыня КДК Васіль Герасімаў, Генеральны пракурор Дзмітрый Гара, Старшыня Праўлення Нацбанка Раман Галоўчанка, Кіраўнік спраў Прэзідэнта Юрый Назараў. Таксама запрошаны віцэ-прэм'еры, шэраг міністраў, намеснікі старшыні Віцебскага аблвыканкама, кіраўнікі банкаў.

Аляксандр Лукашэнка нагадаў, што ў кастрычніку 2025 года адбылася маштабная нарада па сацыяльна-эканамічным развіцці Віцебшчыны. Ён адзначыў, што сітуацыя ў рэгіёне складваецца горш, чым у іншых рэгіёнах, але і астатнім расслабляцца не трэба. "Тое, што мы бачым у Віцебскай вобласці, характэрна для ўсіх абласцей. Я хачу, каб вы гэта пачулі і давялі да кожнага губернатара", - падкрэсліў беларускі лідар.

Кіраўнік дзяржавы адзначыў, што ў Віцебску на нарадзе строга акрэслілі кола праблем, якія не вырашаліся гадамі, пераходзілі "ў спадчыну" ад аднаго губернатара да другога і ў рэшце рэшт ператварыліся ў сістэмныя. Таксама дамовіліся, што да новага года кіраўніцтва рэгіёна прыме аператыўныя меры па навядзенні парадку.

У студзені бягучага года старшынёй Віцебскага аблвыканкама быў назначаны Аляксандр Рагожнік. "Сёння першая кантрольная кропка, каб ацаніць рэальную сітуацыю і зразумець, ці ёсць станоўчыя зрухі. Губернатар павінен пачынаць са слабых месцаў і прыняцця рашэнняў. Трэба прымаць рашэнні. Калі памыліцеся, паправім", - сказаў Аляксандр Лукашэнка.

"Неабходны пакрокавы антыкрызісны план. Зразумелы, канкрэтны, выканальны", - падкрэсліў беларускі лідар.

"Устараняць усе праблемы давядзецца новаму губернатару з тымі людзьмі, якія ў яго ёсць. Ён пачынае работу фактычна ў ваенна-палявых умовах. Ты і сам па характары як ваенны чалавек. Усе павінны бегчы (у рэалізацыі задач па развіцці рэгіёна. - Заўвага). Будзеце бегчы - буду дапамагаць і падтрымліваць, калі вы гэтага заслугоўваеце. Неабходны рэалістычны план і ваенная дысцыпліна па выкананні гэтых планаў", - падкрэсліў беларускі лідар. 

Аляксандр Лукашэнка, у прыватнасці, згадаў пра інтэграцыйныя структуры ў АПК Віцебскай вобласці, якіх на гэты момант засталося шэсць. "На тры структуры я вам адказных людзей знайшоў. Якія дапамогу акажуць і спытаюць, і запатрабуюць, і мяне праінфармуюць", - сказаў Прэзідэнт. 

Гэтыя тры чалавекі - людзі, якія ўжо рэалізуюць паспяховыя праекты ў АПК, якія ў тым ліку прадстаўляюць прыватны бізнес: генеральны дырэктар агракамбіната "Дзяржынскі" Уладзімір Лук'янаў, бізнесмены Аляксандр Машэнскі і Яўген Баскін. 

"Вось вам, гавару, мужыкі, сыравінныя зоны. Тры з шасці. Ну а на тры (інтэграцыйныя структуры. - Заўвага) самі знойдзеце. Гэта будуць вашы памочнікі. Тэхналагічна, фінансава, арганізацыйна. Але яны будуць вам дапамагаць, рэкамендаваць. А губернатару прымаць рашэнні разам са старшынямі райвыканкамаў. Іх 21. Праз іх і дзейнічайце", - заявіў Прэзідэнт. 

Аляксандр Лукашэнка падзяліўся, што нават думаў аб магчымасці ўвядзення асобных падатковых паслабленняў для Віцебскай вобласці. Але гэты варыянт трэба грунтоўна падлічыць. 

"Розныя варыянты трэба думаць. Але пакуль будзем дапамагаць канкрэтна. Вось ён прыйдзе да вас (кіраўнік вобласці ва Урад. - Заўвага) - 200 прафілакторыяў (для цялят. - Заўвага). Цану ты ведаеш. Мінус яшчэ 10%. Таму што лес дадзім і іншае. Пілаваць - няхай на "Віцебскдрэве" пілуюць дошкі. Металічныя слупы вырабім за гэтыя грошы, што дапаможам, аддадзім ім. Яны няхай робяць. Вопыт ёсць. Адзін цялятнік пабудуем. Пакажам 21 старшыні райвыканкамаў і губернатару", - сказаў Кіраўнік дзяржавы.

"Вызначыцеся, хто ў вас там наперадзе будзе ісці, хто зачыстку будзе ажыццяўляць і якая будзе аддача. Падумайце, якую прадукцыю вы будзеце вырабляць", - даў параду беларускі лідар. 

Аляксандр Лукашэнка нагадаў, што некаторыя перспектыўныя праекты ўжо былі прапанаваны Віцебскай вобласці, ёсць адпаведныя планы. У тым ліку ва ўзаемадзеянні з партнёрамі з Кітая і Амана. 

Размова, напрыклад, ідзе аб пашырэнні цяплічнай гаспадаркі, выкарыстоўваючы незадзейнічаныя рэсурсы Лукомскай ДРЭС. "Дамовіліся, што там вакол будуць цяпліцы. Танная электрычнасць. Атрымаем нарэшце таматы, агуркі і іншае, чаго не хапае, каб людзі ў міжсезонне нармальна жылі", - адзначыў Кіраўнік дзяржавы. 

Тое ж самае датычыцца перспектыў вырошчвання ў цяпліцах кветак, якія можна прадаваць не толькі ў Беларусі, як альтэрнатыва імпарту. У цяпліцах вырошчваць можна ўсё, упэўнены Прэзідэнт. 

"Варушыцца трэба! Я ўжо не гавару пра дрэваапрацоўку. Вы ў лесе жывяце. Сёння драўніна патрэбна ўсім", - падкрэсліў Кіраўнік дзяржавы. 

Што датычыцца супрацоўніцтва з Аманам, Аляксандр Лукашэнка нагадаў пра маштабны праект па будаўніцтве цэлюлозна-папяровага камбіната. "Будуйце. Яны забяруць усю прадукцыю, прададуць і вам грошы заплацяць", - сказаў Прэзідэнт.

Кіраўнік дзяржавы адзначыў, што ў вобласці неабходна рэальна ацэньваць свае поспехі і магчымасці і працаваць на вынік: "Калі вы думаеце, што мы і далей будзем цягнуць Віцебскую вобласць, як і некаторыя прадпрыемствы Магілёўскай, Гомельскай вобласці, ды і Мінскай і іншых абласцей, - на плячах цягнуць мы іх не будзем. Хочаце жыць і працаваць - пачынайце ўпірацца".

Аляксандр Лукашэнка таксама заклікаў новага кіраўніка рэгіёна разабрацца з кіраўніцкім апаратам у Віцебскай вобласці, каб там не было ўтрыманцаў. "Я не гавару, што вы "сякеру" павінны ўзяць і сячы. З Месяца вы не возьмеце людзей. Прымусіць там ёсць каго працаваць. Разбярыцеся, з кім вам працаваць", - сказаў ён.

Кіраўнік дзяржавы адзначыў, што за кантроль над сітуацыяй у Віцебскай вобласці адказныя ў тым ліку кіраўнікі палат парламента, вышэйшыя службовыя асобы краіны Наталля Качанава і Ігар Сергяенка. Яны ўзначальваюць адпаведную рабочую групу, а Ігар Сергяенка таксама з'яўляецца ўпаўнаважаным прадстаўніком Кіраўніка дзяржавы ў Віцебскай вобласці.

"Хадзіце па Віцебскай вобласці, ажыццяўляйце кантроль. Падказвайце губернатару, рэкамендуйце, але не націскайце. Я яму абяцаў: любы націск на яго дрэнны будзе для тых, хто на яго будзе націскаць. Там ёсць сёння губернатар, мы яго туды адправілі, - сказаў Прэзідэнт. - Дзмітрый Мікалаевіч (Кіраўнік Адміністрацыі Прэзідэнта Дзмітрый Крутой. - Заўвага) яго там прадставіў. Ведаю, што там моцнымі апладысментамі праводзілі былога губернатара: "Ах, добры чалавек!"

Аляксандр Лукашэнка адзначыў, што Аляксандр Субоцін, які да нядаўняга часу кіраваў вобласцю, сапраўды цудоўны чалавек, і Кіраўніку дзяржавы было з ім камфортна працаваць, не гаворачы ўжо пра адказных за АПК віцэ-прэм'ера і міністра.

Прэзідэнт звярнуўся да намесніка старшыні Віцебскага аблвыканкама Анжалікі Нікіцінай: "Спадарыня Нікіціна, вам для ведама, каб вы разумелі, што добры чалавек - гэта яшчэ не добры прафесіянал". Далей Кіраўнік дзяржавы агучыў некаторыя лічбы: "Каб вы ведалі, Віцебская вобласць атрымала дзяржаўнай падтрымкі ўсіх форм на 15 млрд бел. руб., пачынаючы ад прамысловасці - "Нафтан", закупка сыравіны, сельская гаспадарка і іншае, іншае. Каб пазбегнуць фінансавага калапсу рэструктурызаваны (гэта значыць, дадзена згода Прэзідэнта на тое, што вы не будзеце плаціць) 2 млрд бел. руб. - адпаведны Указ. І вы тады абяцалі за пяць гадоў па графіках пагасіць гэтыя грошы. Але пагасілі ўсяго 146 млн бел. руб.".

"Вы можаце апладзіраваць колькі хочаце. Але лічбы - жорсткая рэч. Гэта яна (Анжаліка Нікіціна. - Заўвага) перш за ўсё лічыла і ўносіла прапановы разам з Косінцам і Шарснёвым (якія раней таксама ўзначальвалі Віцебскую вобласць. - Заўвага). А потым трапіла ва Урад. А потым вярнулася назад. І я гэта падтрымаў, каб было каму адказваць. Вы, калі ласка, раскажыце новаму губернатару, як усё было. Таму перш чым радавацца, што, вось, Субоцін абараніў вобласць ад Косінца і Шарснёва… Ды гасподзь з вамі! Няма ні Косінца, ні Шарснёва там. І я памятаю, калі Субоцін пры назначэнні крылатую фразу сказаў: "Гэта мой край, мае людзі і справа майго гонару падняць гэту вобласць". І вывесці ледзь ці не ў перадавыя".

Кіраўнік дзяржавы агучыў і шэраг іншых паказчыкаў, якія сведчаць аб наяўнасці праблем у Віцебскай вобласці. Прычым ён падкрэсліў, што ўтойваць гэтыя факты не збіраецца. "Таму што калі я публічна аб гэтым не гавару, вы лічыце... Вы не лічыце - вы ведаеце, што дрэнна. Але чамусьці на месцах думаюць, што добра. Ды не добра", - растлумачыў Прэзідэнт.

Аляксандр Лукашэнка адзначыў, што Урад прывычна супакойвае, што "па асноўных паказчыках Віцебскай вобласці дынаміка пазітыўная". "Інвестыцыі, зарплаты, тавараабарот… А за што вы плаціце? - задаў ён рытарычнае пытанне. - Давайце будзем ацэньваць работу не па справаздачах, а па канкрэтных справах".

Прэзідэнт у прыватнасці звярнуў увагу на вынікі вытворчай праграмы, ад якой непасрэдна залежыць рост усіх паказчыкаў і ўстойлівасць эканомікі: "Па выніку года аб'ёмы вытворчасці зніжаны практычна ва ўсіх галінах прамысловасці - мінус 4%. Па асобных напрамках (нафтаперапрацоўка, машынабудаванне) - амаль на 20%".

Роўна год таму - 3 лютага 2025 года - быў спынены "Віцебскдрэў". "Вы пілаваць паваленыя дрэвы, якія валяюцца на ўзлесках, будзеце дзе? Як раней, у 1930-я гады - зверху, знізу чалавек і піламі доўгімі распілоўваць?" - абазначыў пытанне Кіраўнік дзяржавы.

"Да непрыстойных значэнняў - у паўтара раза - абваліўся экспарт тавараў. А гэта значыць, краіна недаатрымала амаль $2 млрд (па статыстыцы - $1,9 млрд). Няма паляпшэнняў у сельскай гаспадарцы - мінус 2,7%. Па краіне ў сельскай гаспадарцы плюс два. Пяць працэнтаў разбежка. І гэта ж у адносінах да мінулага года, які таксама быў правальны. А мінулы год яшчэ да мінулага. І пайшло пад адхон. Вось вашы апладысменты самім сабе!" - пералічыў Аляксандр Лукашэнка яшчэ шэраг негатыўных фактаў у эканоміцы Віцебскай вобласці.

Ён падкрэсліў, што спад адбыўся па асноўных пазіцыях - мясу, малаку, колькасці жывёлы, забяспечанасці кормам.

"На жаль, на фоне такіх сумных вынікаў не бачна ні стараннасці, ні ініцыятывы. Не бачна і перамен да лепшага", - звярнуў увагу беларускі лідар.

Аляксандр Лукашэнка растлумачыў, чаму прыняў рашэнне па назначэнні новага старшыні Віцебскага аблвыканкама. "Развітваючыся з губернатарам пасля нарады (у кастрычніку 2025 года ў Віцебску. - Заўвага), я думаў, што ён заўтра пабяжыць на адну ферму, на другую, на трэцюю. Хоць з людзьмі пагаворыць, азадачыць іх. Нікіціна следам пабяжыць разам з іншымі. А не пабеглі, - сказаў ён. - Яны паслухалі ў Віцебскай вобласці, што гаварыў Прэзідэнт. Мы праманіторылі: "Правільна гаварыў. Усё правільна" (такія водзывы былі ад удзельнікаў нарады. - Заўвага). Разышліся. А некаторыя, паводле аператыўнай інфармацыі (мы ж гэта таксама праманіторылі), гавораць: "Ну нічога, час пройдзе, усё ўляжацца". Спадары, не ўляжацца! Укладвацца няма дзе".

"Разумеючы, што як было, так і будзе ў Віцебскай вобласці, мне давялося замяніць губернатара", - сказаў Кіраўнік дзяржавы.

Гаворачы пра факты падзяжу жывёлы, Прэзідэнт адзначыў: "Чаму я кажу пра падзеж? Гэта ж маральная агіднасць, калі мы не можам абараніць, асабліва ў гэта цяжкае надвор'е, братоў сваіх меншых. Як можна не абараніць кацяня, парася, цяля, собачонку?!"

Аляксандр Лукашэнка нагадаў, што нават у былыя часы, не маючы сучасных магчымасцей, людзі змагаліся за жыццё жывёл, ратуючы іх ад маразоў. Аж да таго, што тых жа нованароджаных парасят свінарка часам несла дадому, каб адагрэць і выратаваць. "Яны разумелі, што гэта не толькі іх жыццё будучае - малако, мяса. Але яны разумелі, што гэта маральна непрымальна. А ў нас што адбываецца?" - адзначыў Прэзідэнт.

Кіраўнік дзяржавы падкрэсліў, што калі няма кароў і цялят, то не будзе ні мяса, ні малака. "Вы павінны памятаць, што адбывалася ў 90-я гады. Таму нельга гэтага дапусціць", - сказаў ён.

Тым не менш, канстатаваў Аляксандр Лукашэнка, праблема падзяжу да гэтага часу не вырашана. І яна ўласціва не толькі Віцебскай вобласці.

"Трэба пачынаць з цялят. Мы зразумелі, што ніякія поліэтыленавыя домікі, асабліва ў гэтыя маразы - мінус 25-30 градусаў у Віцебскай вобласці, на вуліцы, засыпаныя снегам, абледзянелыя цялят не выратуюць. Гэта труна для цялят. Шкада, што гэта не зразумеў міністр сельскай гаспадаркі, які з'яўляецца заатэхнікам. Я яму кожны дзень пра гэта кажу", - сказаў Прэзідэнт.

На нарадзе зайшла размова аб прапанове па чарговай рэструктурызацыі даўгоў у АПК Віцебскай вобласці. Напярэдадні нарады Кіраўніку дзяржавы прадставілі адпаведны праект Указа.

"Дапаможам пад канкрэтны вынік. Без усялякіх указаў. Грошы трэба аддаваць трыма пальцамі тым, хто верне заўтра. А ў вас прадаўжаецца старая практыка. Таму ніякіх указаў не будзе. Аб рэструктурызацыі, яшчэ нечым і гэтак далей. Будзе капейка трыма пальцамі. Ніякіх адтэрміновак, растэрміновак не будзе. Па даўгах трэба плаціць. І няхай Нікіціна (намеснік старшыні Віцебскага аблвыканкама Анжаліка Нікіціна. - Заўвага) разлічыць і пакладзе на стол, як яна будзе плаціць тое, што абяцала пры Шарснёве (Мікалаю Шарснёве, які кіраваў вобласцю са снежня 2014 па снежань 2021 года. - Заўвага)", - заявіў Прэзідэнт.

Аляксандр Лукашэнка падкрэсліў, што праект Указа ў яго цяперашнім выглядзе "ні к чорту не прыдатны". "Рэструктурызацыя, адтэрміноўка даўгоў - гэта грошы. У каго возьмеце? - паставіў ён пытанне. - Таму я даю вам дакладны адказ наконт праекта Указа, які вы мне к ночы даслалі. Думалі, што я не прачытаю. Так падмахну. Хоць гэта справа Урада. Прэзідэнт рашэнне прыняў і сваё сказаў. Ніякіх указаў не будзе. Пад канкрэтны цялятнік, пад канкрэтны комплекс, дзе вы будзеце даіць кароў, - мы дапаможам. Разумеючы, што самі яны гэта не зробяць. Але галавой будзеце за ўсё адказваць". 

Прэзідэнт растлумачыў на канкрэтным прыкладзе, як і што трэба прапісаць у дакуменце, калі ён неабходны: "Мы зразумелі, што патрэбны цялятнікі. Як вы іх называеце, павільёны для цялят. Дык вось, ва Указе, калі ён патрэбны сёння, павінна быць дакладна прапісана, што мы новаму губернатару дапаможам пабудаваць гэтыя павільёны. Чаму? Яны самі не справяцца з гэтым. А калі і справяцца, то ім трэба для гэтага 7-10 гадоў. Таму павінна быць у яго на стале праграма, якая будзе зацверджана ва Урадзе, калі грошы патрэбны з рэспубліканскага бюджэту. 

"Таму вы мне прапануеце апошні раз - эканаміст Крутой і эканаміст Турчын (Кіраўнік Адміністрацыі Прэзідэнта Дзмітрый Крутой і Прэм'ер-міністр Беларусі Аляксандр Турчын. - Заўвага) - прыняць рашэнне, як я сказаў, па даўгах і рэструктурызацыі. Я вам даў адказ. Не будзе гэтага. Ніякай рэструктурызацыі", - падкрэсліў беларускі лідар. 

"Што рабіць з даўгамі - мне прапануйце. Але максімум з канца гэтага года або з 1 студзеня 2027 года павінны плаціць. Спачатку з даўгамі разлічвайцеся, а потым думайце, як будзеце жыць. Хачу нагадаць прысутным: гэта ўжо трэці падыход з вашымі хацелкамі і прапановамі. Але старая каляіна! Не будзе", - адзначыў Аляксандр Лукашэнка.

Кіраўнік дзяржавы даў параду, з чаго пачынаць работу па паляпшэнні сітуацыі ў праблемных гаспадарках.

"Людзей не хапае, людзі дрэнныя. П'юць (пералічыў Аляксандр Лукашэнка традыцыйныя кадравыя нараканні з боку некаторых кіраўнікоў. - Заўвага). Так, п'юць. А калі вы ім зарплату не плаціце? Яны ў пенсіянераў там гэты цукар купляюць, самагон робяць і напіваюцца, - канстатаваў Кіраўнік дзяржавы. - А дзе кіраўнік гаспадаркі? Я вам тысячу разоў гаварыў, што ў мяне быў вопыт работы ў такой гаспадарцы. І для таго, каб "такія-сякія людзі" за табой ішлі, ты павінен ісці наперадзе. І ты павінен рабіць тое, што павінен рабіць кожны чалавек. Калі гэтага не будзе, выніку не будзе".

"Гэта ваша (кіраўніцтва вобласці. - Заўвага) справа, як там арганізоўваць усё", - падкрэсліў Прэзідэнт.

Нагадаў Аляксандр Лукашэнка і пра пасяўную кампанію, актыўная фаза якой пачнецца ўжо праз два месяцы. Аднак, заўважыў ён, у цэлым па краіне пакуль ёсць некаторае адставанне з назапашваннем угнаенняў. "Ну, гэта ваша справа, як вы там будзеце выходзіць з гэтага. Думайце, як будзем сеяць праз два месяцы. А Горлаў (Міністр сельскай гаспадаркі і харчавання Юрый Горлаў. - Заўвага) сказаў, што вясна будзе ранняя", - заўважыў Кіраўнік дзяржавы.

У час нарады Аляксандр Лукашэнка растлумачыў, чаму нядаўняя раптоўная праверка гатоўнасці Узброеных Сіл была аб'яўлена без папярэдняга інфармавання Генштаба і Міністра абароны.

Аляксандр Лукашэнка адзначыў, што пасля аб'яўлення праверкі Узброеных Сіл сталі з'яўляцца ўкіды ад "збеглых": "Ах, не давярае Міністру абароны, не давярае Генштабу". 

"Я ўсім давяраю. Але гэта - раптоўная праверка, якую праводзіць Галоўнакамандуючы. І я хачу паглядзець, як у гэтай раптоўнай праверцы будуць дзейнічаць Генштаб і Мінабароны", - звярнуў увагу Прэзідэнт. У гэтым і ёсць істотнае адрозненне раптоўнай праверкі ад любых іншых, якія таксама праводзяцца ва УС. 

Кіраўнік дзяржавы падкрэсліў, што раней не раз папярэджваў ваенных, што яны заўсёды павінны быць гатовы да любога развіцця падзей, у тым ліку і да дзеянняў на выпадак пачатку вайны. І Прэзідэнту дакладвалася аб адпаведнай боегатоўнасці. Яе і вырашана было праверыць. 

Прытрымліваючыся прынцыпу раптоўнасці, Прэзідэнт падпісаў распараджэнне пад грыфам "сакрэтна", у якім пазначана задума маючай адбыцца праверкі. Дзяржсакратар Савета Бяспекі Аляксандр Вальфовіч атрымаў закрыты пакет з дакументам, пасля чаго выехаў у вызначаную Кіраўніком дзяржавы воінскую часць. "Распараджэнне Прэзідэнта - у канверт, вось туды едзьце, - расказаў Аляксандр Лукашэнка аб паслядоўнасці дзеянняў і размове з Аляксандрам Вальфовічам. - Я на прамой сувязі. Ніякага Міністэрства абароны, нікога не інфармуй". Па даручэнні Прэзідэнта да правядзення праверкі таксама быў далучаны Старшыня КДК Васіль Герасімаў. 

"Вось чаму міма Генштаба і Міністра абароны. Але Міністр абароны адразу ж быў праінфармаваны па змесце майго распараджэння", - сказаў Аляксандр Лукашэнка. 

"Што я няправільна зрабіў? А калі вайна? Што будзем рабіць? Я павінен быць перакананы, што нашы ваенныя не дарэмна ядуць хлеб", - падкрэсліў Прэзідэнт. 

Гаворачы аб папярэдняй ацэнцы праведзенай раптоўнай праверкі, Кіраўнік дзяржавы адзначыў: "Быццам, нядрэнна". Але канчатковыя вынікі, паводле яго слоў, будуць падведзены пазней. 

Нават у складаных умовах надвор'я вынікі праверкі нядрэнныя, добра паказалі сябе і тэхніка, і людзі. "Менш працэнта тэхнікі выйшла са строю. Цярпіма. Хоць і гэтага быць не павінна", - заўважыў Аляксандр Лукашэнка. 

Важным этапам для ваеннаслужачых у час праверкі стаў марш-кідок на 5 км, з якім яны справіліся. Зрэшты, як заўважыў Прэзідэнт, праводзілі яны яго не з поўнай выкладкай. Аляксандр Лукашэнка нагадаў, што ў час яго службы ў пагранвойсках байцы, і ён у тым ліку, рабілі марш-кідкі на 15 км і ў поўнай выкладцы. Кіраўнік дзяржавы падкрэсліў, што менавіта добрая фізічная і агнявая падрыхтоўка ваенных адыгрываюць ключавую ролю ў сучасных умовах вядзення баявых дзеянняў. "Калі бяжыць добра, страляць умее - будзе жыць. Элементарна. Вось я і правёў гэту праверку, - сказаў Прэзідэнт. - Беглі, "паміралі", неслі на плячах... Ноччу стралялі, днём стралялі. Холадна было. А што? Нехта будзе чакаць, пакуль цёпла будзе. Гэта ж вайна (паводле задумы праверкі. - Заўвага)".

"Афіцэры сябе лепш паказалі, чым салдаты. Гэта паводле папярэдніх даных", - дадаў ён. 

Прэзідэнт заўважыў, што Міністэрства абароны ў рамках сваіх паўнамоцтваў таксама праводзіць розныя праверкі. І адна з іх - праверка баявой гатоўнасці злучэнняў і воінскіх часцей - была аб'яўлена ў перыяд правядзення раптоўнай праверкі ад Галоўнакамандуючага. "У іх свая праграма нечаканай праверкі, яна цяпер ідзе. Я назіраю. Міністр абароны нечакана прыехаў, паднімае (па загаду розныя часці і падраздзяленні. - Заўвага)", - сказаў Аляксандр Лукашэнка.

У час нарады Прэзідэнт даручыў скарэкціраваць рэжым асвятлення на вуліцах.

Кіраўнік дзяржавы абазначыў гэта пытанне ў якасці прыкладу гаспадарскага падыходу, які павінен быць не толькі на вытворчасці або ў сферы АПК, але і ў іншых сферах. Гэта датычыцца і падыходаў да вулічнага асвятлення. Прэзідэнт звярнуў увагу, што цяпер раніцай яно адключаецца вельмі позна, а ўключаецца вельмі рана, калі на вуліцы і так даволі светла.

"Выеду ў Астрашыцкім Гарадку, напрыклад, і ў іншых вёсках. Учора ў шэсць гадзін вечара ўся Мінская вобласць свеціцца. Гараць агні. І гэта характэрна для ўсіх. Наракайце самі на сябе. Будзеце плаціць мінімум са сваёй кішэні. Усе на вуліцах ліхтары ўключаны, усё ззяе. Мінская вобласць і туды далей - усё гарыць. У шэсць гадзін вечара. Навошта? Ужо ў паўвосьмага можна адключыць раніцай святло на вуліцы, асабліва цяпер, калі святла шмат. Не - усе ліхтары гараць", - сказаў Кіраўнік дзяржавы.

Аляксандр Лукашэнка расказаў, што даручыў разабрацца з гэтым пытаннем. Як яму далажылі, нібы некарэктна працуюць фотаэлементы. "Глупства поўнае. Адрэгулюйце гэтыя фотаэлементы, каб электрычнасць аўтаматычна са штучным вашым інтэлектам адключалася ў 7 гадзін раніцы. І загаралася святло не ў шэсць гадзін вечара, а ў восем. Палічыце - 4-5 гадзін (лішніх. - Заўвага) гарыць уся краіна, свеціцца. Колькі мы трацім грошай! Вось вашы падыходы", - заявіў беларускі лідар.

"Вы ашалелі. Вы роўна краіну хочаце прывесці да вайны. Ну дык майце на ўвазе, што нам жа наперадзе давядзецца ісці. Вам у штурмавых атрадах давядзецца", - дадаў Аляксандр Лукашэнка.

Па выніках нарады было прынята рашэнне, што Указ у тым выглядзе, у якім ён прапаноўваўся Прэзідэнту, падпісаны не будзе. Неабходна падрыхтаваць новы дакумент - значна больш жорсткі, дакладны і канкрэтны, дзе будуць максімальна скарочаны тэрміны выканання задач і канкрэтызаваны адказныя за вынік. Пасля таго, як у такім выглядзе праект дакумента будзе прапанаваны Кіраўніку дзяржавы, Аляксандр Лукашэнка яго разгледзіць і прыме рашэнне.