Рабочая паездка ў Пінскі раён Брэсцкай вобласці

Прэзідэнт Беларусі Аляксандр Лукашэнка 4 кастрычніка зрабіў рабочую паездку ў Пінскі раён Брэсцкай вобласці, дзе наведаў ААТ "Парахонскае".

Адразу пасля прылёту Аляксандр Лукашэнка сказаў пра галоўнае - навошт ён прыехаў у Пінскі раён: "Некалі мы падступаліся да Палесся. І была прынята праграма па адраджэнні Палесся. Як у нас, у чыноўнікаў, бывае: паварушыліся туды-сюды і на гэтым скончылі. Нешта зрабілі, нешта не. Трэба вярнуцца да гэтага пытання. І не распыляць сродкі. Ураду каманду даў, каб мы сканцэнтраваліся на нейкіх буйных праектах і накіроўвалі туды сродкі".

Аляксандр Лукашэнка падкрэсліў, што ў цэлым краіну за пяцігодку трэба прывесці ў поўны парадак, каб пакінуць яе ў належным выглядзе наступнаму пакаленню, дзецям. "А для гэтага неабходна там, дзе патрэбна, парадак навесці", - сказаў Прэзідэнт.

Ён нагадаў і пра іншыя такія рэгіянальныя праграмы. Напрыклад, па паўднёвым усходзе Магілёўскай вобласці, адраджэнні чарнобыльскіх раёнаў, якія на працягу дзесяцігоддзяў вярталі да жыцця. "Сёння бачым, што зрабілі правільна", - адзначыў беларускі лідар.

Паводле яго слоў, за зіму трэба падумаць аб тым, што рабіць у Віцебскай вобласці, і выпрацаваць адпаведныя падыходы.

Што датычыцца Магілёўскай вобласці, то Кіраўнік дзяржавы ўпэўнены, што там для эфектыўнага развіцця ўсё ёсць, акрамя дысцыпліны. "Магілёўскай вобласці патрэбны добры бізун. Там выдатныя землі, ёсць усё. Проста распусціліся", - сказаў ён.

Што датычыцца Палесся, Аляксандр Лукашэнка ўдакладніў, што размова ідзе аб тэрыторыях ад Пінска ў бок Мазыра. І калі ў Мазырскім раёне ёсць сродкі для ўласнага развіцця, існуе магутная вытворчая база, то на іншыя раёны Палесся трэба дадаткова звярнуць увагу.

Узорам таго, як і што трэба рабіць, Прэзідэнт назваў землі ААТ "Парахонскае", дзе дасягнуты высокі ўзровень гаспадарання і развіцця сацыяльнай сферы. "Чыста, прыгожа", - ацаніў Кіраўнік дзяржавы.

Курыраваць гэта пытанне Аляксандр Лукашэнка даручыў упаўнаважанаму прадстаўніку Кіраўніка дзяржавы ў Брэсцкай вобласці Міхаілу Русаму. Дапамагчы ў арганізацыйным плане і парадай можа кіраўнік ААТ "Парахонскае". Зразумела, убаку не застанецца і Урад, кіраўніцтва вобласці.

"Зробіце за пяць гадоў - вы героі. Трэба зрабіць, як у "Парахонскім", - сказаў Прэзідэнт.

"Калі мы Палессе прывядзём у парадак, мы толькі за кошт Палесся накормім усю краіну, - падкрэсліў беларускі лідар. - Палессе кінуць нельга".

Кіраўнік дзяржавы звярнуў увагу, што з-за больш цёплага клімату трэба асвойваць вырошчванне новых, больш паўднёвых культур. Думаць трэба і над укараненнем тэхналогій арашэння зямель.

Да пытання развіцця Палесся Кіраўнік дзяржавы вярнуўся і ў час размовы з жыхарамі аграгарадка Парахонск. "Падбрушша, глыбіннае Палессе, - яго трэба прыводзіць у парадак. Безгаспадарчасці, безадказнасці - усяго хапае, - адзначыў ён. - Мы некалі такую праграму стварылі. Міхаіл Іванавіч кажа, што нямала зрабілі. Я, вядома, вельмі незадаволены тым, што зроблена. Трэба проста вярнуцца да таго, што зроблена. Неабходна прыняць рашэнне, сканцэнтраваць сродкі. І паглядзець, што вы ўкладзяце, а што мы з цэнтра дапаможам. Але Палессе трэба адраджаць, неабходна прыводзіць яго ў парадак. Не трэба распыляць грашовыя сродкі. Трэба рэсурсы канцэнтраваць на асноўных напрамках".

У час наведвання ААТ "Парахонскае" Прэзідэнту далажылі аб вытворчай дзейнасці і перспектывах развіцця гэтага сельгаспрадпрыемства.

Кіраўнік дзяржавы дэталёва цікавіўся рознымі аспектамі і вопытам яе работы. Бягучыя вынікі і арганізацыя справы не выклікаюць нараканняў, а таму размова была больш аб стратэгіі. Для людзей, не ўключаных у сельскую гаспадарку, многія рэчы могуць здацца даволі дробнымі, але з іх у выніку складаецца фінальны рэзультат. 

Напрыклад, падрабязна абмеркавалі тэму нарыхтоўкі і забеспячэння захаванасці кармоў, што дае магчымасць забяспечваць высокаэфектыўную вытворчасць. Ёсць тут яшчэ поле і для работы айчынных канструктараў, каб прасаваныя апараты забяспечвалі неабходную якасць. "Гнілаж" не патрэбны. Патрэбны нармальныя кармы", - сказаў Прэзідэнт.

Аляксандр Лукашэнка падкрэсліў асаблівую ролю каровы, якая ва ўсе часы лічылася карміцелькай. "Карове трэба паставіць помнік. Дзякуючы карове партызаны выжывалі і дзеткі. Пасля вайны дзякуючы карове мы выжылі. І цяпер яна нас корміць. Карова - гэта святое. Для мяне гэта святое", - сказаў беларускі лідар.

Ён расказаў пра карову ў сваёй падсобнай гаспадарцы, якую яму не так даўно падарылі з Брэсцкай вобласці. У яе былі настолькі высокія надоі, што было вырашана нават скарэкціраваць жывёле рацыён, каб знізіць нагрузку.

Адным з напрамкаў работы ААТ "Парахонскае" з'яўляецца насенняводства шматгадовых траў. І гэта таксама важна для забеспячэння кормам жывёлагадоўчага сектара. Аляксандр Лукашэнка, запусціўшы руку ў адзін з мяшкоў з насеннем, сказаў: "Вось золата. Не так проста гэта насенне атрымаць. Гэта - золата". 

Прэзідэнт агледзеў меліярацыйную тэхніку, што выкарыстоўваецца ў ААТ "Парахонскае". Для прадпрыемства гэта, як кажуць, "маст-хэў", паколькі яно першапачаткова стваралася выключна на меліяраваных землях. Цяпер задача - падтрымліваць стан зямель, фактычна штогод "адваёўваючы" іх у прыроды. 

Прэзідэнт таксама азнаёміўся з работай па вытворчасці вітамінна-травяных гранул. Прадпрыемства ў 2021 і 2023 гадах закупіла дзве такія лініі. Сабекошт 1 т гранул выходзіць на 30 працэнтаў танней за збожжа. За ўвесь перыяд вытворчасці травяных гранул рэалізаваны праект акупіўся на 80%. 

Аляксандр Лукашэнка даў станоўчую ацэнку гэтаму падыходу, які можа быць запатрабаваны і ў іншых рэгіёнах. Напрыклад, у Віцебскай вобласці, дзе ўраджаі збожжа невысокія.

Кіраўніку дзяржавы таксама далажылі аб завяршальным перыядзе ўборачнай кампаніі. Валавы збор збожжа чакаецца больш за 10 млн т, выконваюцца пастаўкі ў лік дзяржзаказу.

Агульны намалот кукурузы на зерне чакаецца ў аб'ёме 2 млн т, прычым ужо ў свірнавай вазе. З улікам каласавых збожжавых агульны намалот гарантавана складзе больш за 10 млн т, чаго дастаткова і для насельніцтва, і для патрэб жывёлагадоўлі.

Актыўна ідзе да завяршэння ўборка цукровых буракоў. Ураджайнасць склалася прыкладна на ўзроўні мінулага года. Хоць першапачаткова разлікі на ўраджай былі большыя, але спякота і недахоп вільгаці ўнеслі свае карэктывы. Тым не менш, патрэбнасці вытворцаў цукру гарантавана забяспечаны. Як далажылі кіраўніку дзяржавы, цяпер цукар добра ідзе на экспарт, складваецца нядрэнная кан'юнктура цэн. У тым ліку прадаюць яшчэ і цукар мінулага года.

У сярэдзіне кастрычніка завершыцца ўборка бульбы, якой для краіны нарыхтавана дастаткова, ідуць пастаўкі на экспарт.

Таксама ёсць дастатковыя запасы проса і грэчкі, на 100% выкананы дзяржзаказ па алейным семі рапсу, піваварным ячмені.

У цэлым уборачная па краіне ідзе ў рамках намечаных планаў.

Асаблівую ўвагу Аляксандр Лукашэнка звярнуў на восеньскія палявыя работы, сяўбу азімых, што з'яўляецца залогам будучага ўраджаю. Ён строга папярэдзіў аб адказнасці ў гэтым плане. Завяршыць сяўбу ўсюды плануюць да 15 кастрычніка, што крыху позна. Але сітуацыя па рэгіёнах адрозніваецца. Напрыклад, у Брэсцкай вобласці поўнасцю завяршылі гэтыя работы. Але ёсць пытанні па Віцебскай, Магілёўскай і Гомельскай абласцях.

"А што, у Віцебску можна сеяць пазней, чым у Брэсце? Па ідэі ў вас у канцы верасня ў Віцебску павінна быць скончана. Добра, будзем разбірацца, і прытым прынцыпова. Мне трэба, як павінна быць! Колькі мы будзем "размандыкваць" па гэтых пытаннях? - Мы не пасеялі... А што перашкаджала пасеяць да 1 кастрычніка? Разбірайцеся і з кадрамі таксама. Пара іх на месца ставіць. Не могуць - няхай ідуць", - заявіў беларускі лідар.

У час наведвання сельгаспрадпрыемства Прэзідэнт паабяцаў узмацніць падтрымку будаўніцтва жылля ў вёсцы.

"Мы ўзмоцнім яшчэ падтрымку вёсцы. Па жыллі мы ўзмоцнім, - сказаў Кіраўнік дзяржавы. - Трэба будаваць жыллё там, дзе патрэбна для вытворчасці, дзе ёсць работа чалавеку".

Паводле слоў Прэзідэнта, неабходна будаваць для работнікаў арэнднае жыллё. Гэта нараўне з дастойнай зарплатай прызначана стварыць умовы для прыцягнення спецыялістаў. І распараджацца гэтым жыллём павінен кіраўнік гаспадаркі. "Ты запрашаеш на работу. Дагавор (заключаеш. - Заўвага). Пайшоў - вызваляй жыллё. Мы павінны будаваць арэнднае жыллё", - сказаў ён.

Але такі падыход не адмяняе і магчымасці будаўніцтва асабістага жылля, калі людзі гэтага хочуць. "Чалавек калі будзе будаваць - зямлю будзем даваць, участкі. Гэта трэба заахвочваць, калі чалавек будуе сваё. Але калі не хапае людзей і табе патрэбны людзі, то ты прыцягнуць можаш і за кошт жылля, і зарплаты. Гэта перш за ўсё", - падкрэсліў беларускі лідар.

Гэтак варта дзейнічаць не толькі ў адносінах да работнікаў АПК, але і іншых галін, не сцягваючы ўсе працоўныя рэсурсы ў гарады на шкоду сельскім тэрыторыям. "Нам трэба ўлічыць жалезабетонна. А так мы ў Мінск збіраем людзей, а потым думаем, а як жа іх заняць, а як школы пабудаваць, а як дзіцячыя сады і пайшло-паехала. Там, дзе нам трэба (варта будаваць. - Заўвага). І па адукацыі, і па жыллі. Усё трэба прыводзіць у адпаведнасць", - адзначыў Прэзідэнт.

У рамках рабочай паездкі ў Брэсцкую вобласць Аляксандр Лукашэнка таксама наведаў Парахонскую сярэднюю школу Пінскага раёна.

Пасля прыбыцця да школы Кіраўнік дзяржавы і службовыя асобы, якія яго суправаджалі, усклалі кветкі да памятнага знака "Смутак і Мужнасць". Ён быў устаноўлены на цэнтральнай плошчы аграгарадка па ініцыятыве мясцовых жыхароў да 70-годдзя Перамогі ў гонар абаронцаў і вызваліцеляў Парахонска. Скульптуру з гранітнага каменю, якая ўяўляе сабой тужлівыя твары маці і салдата, вырабіў пінскі скульптар Сяргей Жылевіч.

Дырэктар Парахонскай сярэдняй школы Мікалай Калесніковіч далажыў Аляксандру Лукашэнку аб арганізацыі вучэбна-выхаваўчага працэсу і рэалізацыі адукацыйнай праграмы прафесійнай падрыхтоўкі кадраў для арганізацый АПК.

Школа была адкрыта ў 1977 годзе. Дзякуючы праграме адраджэння і развіцця вёскі ў 2010 годзе яна набыла сучасны выгляд. Ва ўстанове навучаюцца 356 дзяцей, школа ў поўным аб'ёме ўкамплектавана педагагічнымі кадрамі.

"Скажы мне, калі ласка. Я "балею" ў школе адной праблемай: вось вышэйшая і першая кваліфікацыйная катэгорыя, ёсць другая. Гэта катэгарыйнасць, якая ў нас у школах уведзена, адлюстроўвае рэальную карціну? Гэта значыць нам не трэба нічога перарабляць?" - пацікавіўся Аляксандр Лукашэнка меркаваннем дырэктара школы.

"Я думаю, што не варта", - адказаў Мікалай Калесніковіч.

Кіраўнік дзяржавы прызнаўся, што пакуль не ведае, ці патрэбны тут якія-небудзь пераўтварэнні, таму цікавіцца меркаваннем спецыялістаў. "Нам трэба сур'ёзна падумаць над гэтым пытаннем", - дадаў ён.

Прэзідэнт азнаёміўся з арганізацыяй адукацыйнага працэсу і матэрыяльна-тэхнічнай базай школы, паразмаўляў з педагогамі і навучэнцамі. Ад імя Кіраўніка дзяржавы ўстанове быў перададзены спартыўны інвентар і абсталяванне для гімнастыкі, лёгкай атлетыкі, зімовых відаў спорту, спартыўных і рухомых гульняў.

Каля школы Кіраўніка дзяржавы чакалі мясцовыя жыхары, каб паразмаўляць з Прэзідэнтам і задаць яму свае пытанні.

"Прыехаў, каб душой адпачыць і прыняць сур'ёзнае рашэнне па развіцці нашага Палесся", - так Аляксандр Лукашэнка сказаў пра свой прыезд у аграгарадок Парахонск і аднайменнае сельгаспрадпрыемства.

"Гэта найвышэйшы ўзровень (гаспадарання на зямлі. - Заўвага), сусветны. Такога няма ні ў свеце, ні ў Еўропе, - сказаў Кіраўнік дзяржавы на сустрэчы з мясцовымі жыхарамі. - Вы жывяце ў гэтым райскім кутку. Вам можа пазайздросціць любы гараджанін. І не трэба сваіх дзяцей адпраўляць у нейкія гарады. Там, дзе нарадзіўся, там і згадзіўся. Таму я сапраўды адпачываю душой. Калі ваш кіраўнік (Уладзімір Храленка. - Заўвага), які некалі прыехаў з Расіі, пасяліўся тут і стварыў такую жамчужыну, як "Парахонскае", дапаможа нам ажывіць Палессе, я яму буду ўдзячны".

Аляксандр Лукашэнка адзначыў, што ў суботу, 5 кастрычніка, у Брэсцкай вобласці правядуць свята "Дажынкі" і ён у цэлым хоча праехаць па ўсіх абласцях, каб падзякаваць сялянам. "Таму што вы малайцы. Я не памыліўся, калі гаварыў, што без селяніна, без вёскі няма краіны. І вы кожны год паказваеце, што вы сапраўдныя, моцныя людзі. Вы не падвялі", - падкрэсліў беларускі лідар.

Кіраўніку дзяржавы было зададзена пытанне пра меліярацыю. Адзін з мясцовых жыхароў звярнуў увагу на новую праблему апошніх гадоў - засухі. Для яе вырашэння неабходна ўзвядзенне дадатковых гідразбудаванняў. Ці зможа дзяржава падтрымаць у гэтым плане?

"Так, сапраўды. Я часам дапамагаю ў дэталях. Але ўвогуле патрэбны буйныя праграмы. Прэзідэнт павінен вызначаць буйныя праграмы. У нас калі раней была праблема з пераўвільгатненнем, то цяпер засуха б'е па Беларусі", - сказаў Прэзідэнт.

Аляксандр Лукашэнка расказаў, што ўжо даручаў спецыялістам падумаць, што рабіць у гэтым плане. "Гэта ж нядобра, што Палессе засушыла. У нас Прыпяць - вялікая колькасць вады, а вакол - сушняк. Гэта нядобра", - заўважыў ён.

Кіраўнік дзяржавы адзначыў, што цяпер сам асабіста эксперыментуе з палівальнай устаноўкай. Вынік пакуль добры, нягледзячы на пясчаныя глебы. Гэта значыць патрэбна вільгаць. Таму мы падумаем, як аказаць падтрымку вам і асабліва Гомельскай вобласці", - заявіў беларускі лідар.

Аляксандр Лукашэнка звярнуў увагу, што ў Беларусі шмат паўнаводных рэк, азёр, а вільгаці на палях не хапае. І ў гэтых адносінах трэба падумаць над выкарыстаннем арашальных сістэм. "Аб'ёмы вады вялікія. Вада ў нас вельмі добрая. Гэта ўжо сёння багацце. Не нафта, газ, а менавіта вада. І далей каштоўнасць яе будзе яшчэ большай. Падумаем, паглядзім", - сказаў ён.

Кіраўнік дзяржавы ўпэўнены, што калі на нейкія палі давядзецца падводзіць ваду, то ўраджай гэта ўсё акупіць. Асабліва, напрыклад, у садаводстве.

"Таму будзем паціху дапамагаць, але галоўнае для нас цяпер аднавіць усе меліярацыйныя сістэмы і палі, дзе вы ўжо самі не адновіце - у Беларусі (размова пра краіну ў цэлым. - Заўвага). Вы ж малайцы. У вас атрад меліярацыйны ёсць, тэхніка, вы гледзіце за гэтымі каналамі. А не ўсюды так было. Мы гэта ўсё аднаўляем і наводзім парадак для таго, каб вярнуць да жыцця меліярацыйныя сістэмы", - расказаў Аляксандр Лукашэнка.

Прэзідэнт адзначыў, што ёсць яшчэ ў Беларусі і праблема пойменных зямель. Гэта вялікія землі, і ёсць шмат зарослых пустуючых плошчаў. "Хацелася б гэта ўключыць у абарот, каб мы атрымалі большую аддачу", - адзначыў Кіраўнік дзяржавы.

Адказваючы на пытанні мясцовых жыхароў, Прэзідэнт падкрэсліў, што вымушаны ўдзяляць асаблівую ўвагу сітуацыі на граніцы з Украінай, каб не прапусціць нечаканага ўдару, як гэта здарылася з Савецкім Саюзам у пачатку Вялікай Айчыннай вайны. Менавіта таму на паўднёвых рубяжах сканцэнтраваны беларускія ваеннаслужачыя. Гэта - адказ на дзеянні ўкраінскага боку.

"Яны падводзяць войскі - мы падводзім. Каб не было нечаканасцей, як у 1941-м. Я ведаю, што адбывалася тады, таму не трэба паўтараць памылкі. Трэба быць гатовымі. Яны там напружваюцца (войскамі і іншае) - мы ў адказ. Яны нешта там - мы ў адказ. Такім чынам, мы робім усё ў адказ. Мы ніколі не ініцыявалі нейкае процістаянне. Ні ў якім выпадку. Нам гэта не трэба. Што такое вайна? Гэта катастрофа. Я не хачу, каб была вайна, і таму мы робім усё для таго, каб мірна скончылася гэта", - заявіў Аляксандр Лукашэнка.

Прэзідэнт расказаў, што па пэўных каналах кантакты з украінцамі падтрымліваюцца. Абмяркоўваюцца і гуманітарныя пытанні, напрыклад аздараўленне дзяцей, але палітыка для Украіны важней, адзначыў Кіраўнік дзяржавы.

"Мы ні ў якім выпадку не эскаліруем сітуацыю. Нам гэта эскалацыя не патрэбна. Але мы ведаем: калі недзе ў іх сканцэнтраванне ўзброеных сіл (хто ведае, для чаго яны ў кучу збіраюць ваенных і тэхніку зганяюць), як толькі нейкае напружанне з таго боку, я выстаўляю заслон сваімі ваеннаслужачымі, - звярнуў увагу Аляксандр Лукашэнка. - Мы не проста сабралі іх тут, перакрылі граніцу. Гэта само сабой. Калі раптам будзе сур'ёзнае абвастрэнне, кожны камандзір аддзялення, узвода, батальёна павінен ведаць, дзе яго кусок лесу і дарогі, які ён будзе абараняць. Калі праціўнік бачыць, што мы гатовы, дакладна нападаць не будзе".

"Вы не перажывайце, мы не збіраемся ваяваць з украінцамі. І яны не хочуць з намі ваяваць: куды ім яшчэ гэту "абузу". А нам навошта? Там жа нашы людзі жывуць. Мы будзем рабіць усё для таго, каб суіснаваць з Украінай мірна. Калі яны гэтага хочуць. Народ гэтага хоча, але пакуль вярхамі Украіны, як кажуць, кіруюць амерыканцы. І калі нешта трэба вырашыць, Уладзімір Зяленскі адразу ляціць у Вашынгтон", - канстатаваў Прэзідэнт.

"Ён не едзе ў Мінск і Маскву, каб дамовіцца і ў рэшце рэшт скончыць гэту вайну. Ён думае, што амерыканцы адновяць Украіну пасля вайны і яны будуць заможнымі, моцнымі, мудрымі. Ніхто іх аднаўляць не будзе. Улада зменіцца - скажуць: "Валодзя, ты хто такі?" - лічыць Кіраўнік дзяржавы.

Прэзідэнт упэўнены, што новыя амерыканскія ўлады будуць заклапочаны праблемамі ўнутры сваёй краіны і ім будзе не да Украіны.

"Таму кіраўніцтву Украіны трэба ўзяць галаву ў рукі і зразумець, што ім перш за ўсё трэба будзе аднаўляць краіну. З дапамогай блізкіх ім людзей, перш за ўсё беларусаў", - падкрэсліў Аляксандр Лукашэнка.

Кіраўнік дзяржавы звярнуў увагу, што свае інтарэсы ва Украіне ёсць і ў Польшчы. І стаўленне польскіх эліт да Украіны адпаведнае. Галоўным каменем спатыкнення паміж краінамі цяпер з'яўляецца так званая Валынская разня - масавае знішчэнне Украінскай паўстанцкай арміяй польскага насельніцтва ў гады Вялікай Айчыннай вайны.

"У гады вайны чаго ні было... Украінцы ў нас Хатынь спальвалі. Што яны чынілі на Прыпяці, кіруемые фашыстамі, - гэта кашмар. Дык што, мы будзем тым часам жыць усё жыццё, да смерці?" - задаў рытарычнае пытанне Прэзідэнт.

Паводле яго слоў, у аснове прэтэнзій з боку Польшчы ляжыць жаданне прыхапіць заходнюю частку Украіны. "Як заходнюю Беларусь, так і заходнюю Украіну. І там панаваць. Для нас гэта непрымальна. Калі толькі палякі ўлезуць ва Украіну і паспрабуюць захад адцяць, мы будзем украінцаў падтрымліваць. Таму што мы разумеем, што наступныя будзем мы", - заявіў беларускі лідар.

Напярэдадні візіту Прэзідэнта ў Пінскі раён у СМІ з'явілася інфармацыя, што адначасова з верталётам Кіраўніка дзяржавы ў паветранай прасторы Беларусі былі заўважаны два беспілотнікі. У сувязі з гэтым у Кіраўніка дзяржавы спыталі, ці магло гэта паведамленне быць наўмыснай спробай стварыць напружанне, настроіць беларусаў супраць расіян ці ўкраінцаў і што сам Прэзідэнт думае наконт гэтай сітуацыі?

"Каб адмесці ўсялякія інсінуацыі наконт майго верталёта, дронаў і іншага: гэта не мае праблемы, гэта праблемы Службы бяспекі. Няхай яны глядзяць, дзе дроны лятаюць і куды верталёту Прэзідэнта ляцець. Я сапраўды да гэтага так стаўлюся", - падкрэсліў Аляксандр Лукашэнка.

Паводле слоў Кіраўніка дзяржавы, калі раніцай, перад вылетам у Пінскі раён, яму сталі дакладваць аб сітуацыі і надвор'і, ён запатрабаваў абмяркоўваць гэтыя пытанні непасрэдна з пілотамі і разам з імі прымаць рашэнне. У выніку было вырашана адкласці вылет на гадзіну ў сувязі з неспрыяльнымі ўмовамі надвор'я.

"Гляджу, ляцелі яны вельмі нізка, незвычайна нізка. Напэўна, каб электроннымі сродкамі з Украіны было не відаць. Вядома, яны верталёт бачаць: ён жа вялікі, гэта не беспілотнік. Нармальна прыляцелі. Таму я тут асабліва не перажываю, як у народзе кажуць, наконт гэтага. І потым, ведаеце: збіць верталёт Прэзідэнта - гэта вайна, якая ўкраінцам не патрэбна. Таму я не думаю, што ва Украіне тыя, хто прымае рашэнні, заклапочаны гэтай праблемай. Хоць, вядома, што тут гаварыць, гэта непрыемна", - прызнаўся Прэзідэнт. 

Гаворачы аб прымяненні беспілотнікаў, Аляксандр Лукашэнка адзначыў, што гэта ўзбраенне - ужо не навінка. Аднак так масава ў якасці асноўных сродкаў паражэння дроны яшчэ не прымяняліся. І Украіна, і Расія цяпер закупляюць вялікую колькасць БПЛА, аднак не менш важнае пытанне - навучыцца кіраваць імі. Таму даволі часта ў нявопытных руках і пасля ўздзеяння сродкаў радыёэлектроннай барацьбы беспілотнікі страчваюць арыенцір. Такім чынам, паводле слоў Кіраўніка дзяржавы, яны і заляталі ў Беларусь.

"Некалькі выпадкаў такіх было і з боку Расіі, і з боку Украіны, - канстатаваў Аляксандр Лукашэнка. - Шмат мы збіваем. Мы не глядзім, гэта расійскія ці ўкраінскія".

У Беларусі сталі вырашаць гэтыя пытанні на ўзроўні спецыялістаў, не выносячы ў публічнае поле. Такія дамоўленасці былі дасягнуты і з абодвума бакамі.

"Вось учора... Я нават здзівіўся, калі атрымаў інфармацыю. Гэта нашы збеглыя з-за мяжы пачалі падкідваць: насустрач прэзідэнцкаму борту вылецелі беспілотнікі. Думаю, што гэта правакацыя. Трэба разумець, што мы знаходзімся на фронце: зусім побач, вось за агароджай ідзе вайна. Таму мая галоўная задача - не дапусціць уцягвання ў гэту бойку, у гэту вайну Беларусі, - заявіў беларускі лідар. - Таму мы на гэта рэагуем як спецыялісты, рэагуем моўчкі, але даём зразумець, што ў выпадку, калі не дай бог што, давядзецца адказваць. Адказаць ёсць чым".

"Хоць усе добра разумеюць, што мы на баку Расіі. Наколькі гэта магчыма, не ваюючы, мы дапамагаем Расіі і будзем дапамагаць. Гэта наш саюзнік", - падкрэсліў Аляксандр Лукашэнка.

Прэзідэнт расказаў, што як гісторык ён даўно заўважыў: гісторыя цыклічная і ўсе падзеі ў свеце паўтараюцца, прычым развіваюцца яны па спіралі. Вось і цяпер Захад зноў спрабуе забяспечыць сваю будучыню за чужы кошт, а самай вялікай крыніцай рэсурсаў з'яўляецца Расія.

"А мы - на шляху, - заўважыў Кіраўнік дзяржавы. - Яны хочуць гэтага. А як? Перш за ўсё трэба залезці ў галаву чалавеку - нам - і перафармаціраваць. Нам жа ў галаву ўжо не залезеш, а моладзі прасцей. Таму яны (на Захадзе. - Заўвага) хочуць, каб мы забылі гісторыю. А ў нас гераічная гісторыя. Мы павінны не проста яе памятаць. Мы ганарыцца гэтай гісторыяй павінны. Што мы і робім".

Паводле слоў Прэзідэнта, пачынаецца ўсё з простага - спачатку неабходна сфарміраваць у чалавека спажывецкія паводзіны, а затым перапісаць гісторыю. "Гэта значыць, нас хочуць перакадзіраваць, перафармаціраваць. Нас хочуць зрабіць іншымі - Іванамі без роду і племені. Гэта крокі да галоўнай мэты: нас зноў хочуць пакарыць, паставіць на калені. Нас зноў хочуць прымусіць рабіць тое, што ім трэба, каб жыць за наш кошт", - падкрэсліў Аляксандр Лукашэнка.

На завяршэнне сустрэчы жыхары аграгарадка падарылі Кіраўніку дзяржавы карціну пінскіх майстроў. На ёй адлюстравана сялянка-малочніца, якая накіроўваецца да кароў, што пасвяцца ля дрэў. Вобраз каровы-карміцелькі трывала замацаваўся ў культуры і фальклорнай традыцыі палешукоў. Пано выканана ў тэхніцы "бацік" з выкарыстаннем прыёму шматслаёвасці.