Наведванне агракамбіната "Юбілейны" ў Аршанскім раёне Віцебскай вобласці

Прэзідэнт Беларусі Аляксандр Лукашэнка 11 жніўня наведаў агракамбінат "Юбілейны" ў Аршанскім раёне Віцебскай вобласці.

Кіраўнік дзяржавы вывучыў, як ідуць справы ў гаспадарцы, якія перспектывы развіцця, а таксама як выкананы даручэнні, дадзеныя ў ходзе папярэдніх візітаў. Гаварылі пра структуру агракамбіната, як развіваецца сацыяльная сфера, жыллёвае будаўніцтва. Цэнтральнае месца "Юбілейнага" - аграгарадок Бабінічы, дзе створаны ўсе ўмовы для жыцця, уключаючы добрую школу, дзіцячы сад, спартыўныя збудаванні.

"З гэтай мэтай аграгарадкі і ствараліся", - заўважыў Аляксандр Лукашэнка. Ён падкрэсліў, што важна, дзе ёсць неабходнасць, адрамантаваць дарогі да аграгарадкоў, каб была нармальная лагістыка.

"Калі ёсць газ, выгоды ўсе, шыкарная прырода - чаго не ісці (працаваць у гаспадарку. - Заўвага)?" - адзначыў Кіраўнік дзяржавы.

"Шыкоўная прырода. Плюс садзік, школа добрая, спартыўныя збудаванні адрамантавалі", - пацвердзіў дырэктар агракамбіната "Юбілейны" Аляксандр Фірсін.

Кіраўнік дзяржавы не ўпершыню прыехаў на гэты агракамбінат. Так, у чэрвені 2022 года Аляксандр Лукашэнка азнаёміўся ў гаспадарцы з работай малочнатаварнага комплексу "Купалінка" і наведаў машынны двор. Тады абмеркавалі шэраг практычных пытанняў, уключаючы пакрыццё пляцоўкі, пошук аптымальнага рашэння для ацяплення майстэрняў у зімовы перыяд, каб было не толькі эфектыўна, але і незатратна. А ў ліпені мінулага года на рабатызаваным МТК "Паўлінка" размова ішла аб будаўніцтве тэхналагічных комплексаў.

На гэты раз Аляксандр Лукашэнка ў першую чаргу прыехаў на цэнтральны машынны двор. Пытанне захаванасці і належнага ўтрымання тэхнікі - адно з першарадных у аграрнай галіне.

Як далажыў Прэзідэнту Аляксандр Фірсін, была праведзена газіфікацыя машыннага двара, устанавілі інфрачырвоныя выпраменьвальнікі, зрабілі душавыя. Гэта значыць створаны камфортныя ўмовы для работы людзей і рамонту тэхнікі.

"Слухай, гэта ж палац", - ацаніў вынікі Прэзідэнт.

Падобны падыход выкарыстоўваўся і пры навядзенні парадку на іншым, менш буйным машынным двары гаспадаркі. Да пытання падышлі не толькі з пункту гледжання эфектыўнасці, але і разумнай эканоміі.

"Мы самі цяпер аднаўляем рамонт аўтамабіляў. Там дыягностыка ўся. Вось злева дзверы - там будзе сучасная камера для афарбоўкі, - правёў экскурсію кіраўнік гаспадаркі. - У гэтых будынках - захоўванне камбайнаў, усёй імпартнай тэхнікі. На зіму ўсё туды закрываецца".

"Усё пад дахам", - станоўча адзначыў Кіраўнік дзяржавы.

Дырэктар агракамбіната прадоўжыў паказваць і расказваць, як шмат змянілася з часу папярэдняга прыезду Кіраўніка дзяржавы: "Тут склад. Унутры яшчэ трэба працаваць па касметыцы. Але парадак ідэальны і маленькая рамонтная майстэрня для электрыкі. Там у нас токар".

"Зразумела, для рамонту майстэрні адпаведныя. Па-гаспадарску. Усё асветлена", - адрэагаваў Прэзідэнт.

Аляксандр Фірсін расказаў, што цяпер на машынным двары ідуць планавыя рамонты кормаўборачнай тэхнікі.

"Ну палац, што там гаварыць, - палац", - яшчэ раз ацаніў вынік Кіраўнік дзяржавы.

Ён падкрэсліў, што гэты вопыт трэба выкарыстоўваць і ў іншых гаспадарках. "У яго гэта асноўны машынны двор і яшчэ два маленькія ў былых гаспадарках. Ён іх не разваліў, абгарадзіў, прывёў у парадак. Там і тэхніка можа захоўвацца нейкая. І рамонты нейкія другарадныя, дробныя, бягучыя. А асноўныя мерапрыемствы з тэхнікай ён тут праводзіць (на цэнтральным машынным двары. - Заўвага), - зрабіў выснову беларускі лідар. - Разумна трэба падысці, вось як у яго. Ён паступова ствараў сваю гаспадарку. Далучаючы нешта, дадаваў. І добры вынік. Але, самае галоўнае, ёсць дзе вучыцца. Таму ўзяў сваіх дырэктараў, прывёз сюды і вучы іх, каб яны ўбачылі, як трэба. І дапамагаць трэба ў асноўным - машынны двор, збожжаток, комплексы. Без гэтага толку не будзе. Гэта асноўная база".

Аляксандр Лукашэнка таксама азнаёміўся з ходам уборачнай кампаніі, вынікамі і перспектывамі работы гаспадаркі.

"Сёння ў нас убіраецца пшаніца. На жаль, надвор'е напружвае крыху", - пачаў даклад на гэту тэму дырэктар агракамбіната Аляксандр Фірсін. "Надвор'е ідэальнае", - з ходу запярэчыў Кіраўнік дзяржавы.

"Мы не скардзімся. 55% (плошчаў. - Заўвага) мы ўбралі. 58,6 ц/га - сярэдняя ўраджайнасць. Пшаніцы даюць сёння па 72-75 ц/га. Азімы ячмень мы ўбралі - 48 ц/га дал. Ячмень яравы недзе таксама 48-50 ц/га дал. Трыцікале - каля 60. Думаю, мы амаль 38 тыс. т збожжа ў гэтым годзе атрымаем", - расказаў дырэктар.

Аляксандр Лукашэнка пацікавіўся, ці дастаткова гэтага для пагалоўя ў жывёлагадоўлі. "Я ўжо думаю, як прадаваць", - адказаў Аляксандр Фірсін.

Абмяркоўвалі таксама пытанні перапрацоўкі рапсу - рабіць гэта сіламі гаспадаркі або аддаваць. "Ты сам ціснеш яго ці аддаеш?" - спытаў Прэзідэнт. "Аддаю", - адказаў дырэктар. "Але выгадна табе прадаваць?" - удакладніў Кіраўнік дзяржавы. "Пакуль выгадна прадаваць і не займацца перапрацоўкай. Дзяржзаказ - 1 тыс. т - мы ўжо выканалі. Засталося, што сабе пакласці на кармы", - далажыў Аляксандр Фірсін.

Ён расказаў, што ў гаспадарцы пагалоўе буйной рагатай жывёлы складае 5 тыс., растуць надоі: "Думаю, у гэтым годзе мы на 10 тыс. кг на карову выйдзем. Недзе 40 тыс. т малака мы прададзім за год".

Добра складваецца ў гаспадарцы ў бягучым годзе і сітуацыя па кармах. "Мы і хутчэй пачалі б уборку збожжа. Але давялося ўбіраць сеяныя травы. Яны якраз падышлі", - расказаў кіраўнік гаспадаркі.

Увесь корм стараюцца нарыхтоўваць на захоўванне па тэхналогіі, але бывае, што лішкі закладваюць у курганы.

"Лепш усё ж такі траншэі пабудаваць", - даў параду Аляксандр Лукашэнка. "Траншэі будуюцца. У гэтым годзе, шчыра кажучы, я не разлічваў на такія травы. Люцэрна - ужо трэці ўкос. Думаю, і чацвёрты будзе", - растлумачыў Аляксандр Фірсін.

Вяртаючыся да тэмы жывёлагадоўлі, абмеркавалі тэму развіцця сучасных малочнатаварных комплексаў, аднаўлення пагалоўя - з чаго будаваць памяшканні, як вырашаць некаторыя тэхналагічныя і іншыя пытанні. "Хоць з золата будуй", - адзначае Аляксандр Лукашэнка, падкрэсліваючы, што галоўнае - эфектыўнасць і канчатковы фінансавы вынік.

"Мы тут будзем вырошчваць цялушак для аднаўлення. Мяркуем, што тут будзе каля 2300 галоў. Думаю, што 600 галоў цялушак у год мы можам прадаваць", - расказаў аб канкрэтных планах дырэктар гаспадаркі.

Аляксандр Лукашэнка спытаў у цэлым, ці не баяцца ў "Юбілейным" утрымліваць буйныя комплексы з вялікай колькасцю галоў. Размова перш за ўсё аб санітарных умовах і рызыцы распаўсюджвання хвароб, што немінуча можа прывесці да падзяжу.

Але Аляксандр Фірсін запэўніў, што ў гэтым пытанні ўсё строга: "Усё загароджана. Жорсткі санпрапускнік. Сёння ў нас адзенне тры разы сціраецца. Свая пральня". Гэта значыць сакрэт, як гаворыць Прэзідэнт, у тэхналогіі і дысцыпліне.

Аляксандр Лукашэнка лічыць неабходным больш уважліва падыходзіць да работы з кіраўнікамі сельгаспрадпрыемстваў у плане павышэння іх кваліфікацыі і распаўсюджвання перадавога вопыту.

"Я гэта ўжо ўчора заўважыў па "Купалаўскім" (аграхолдынг "Купалаўскае" ў Шклоўскім раёне. - Заўвага). Мы залішне часам мяняем кіраўнікоў, не працуючы з імі. Гляджу, нармальныя людзі. Правільна разважаюць, разумеюць. Але адчуваецца, што ўвагі да іх няма такой, як было раней. Раней таксама доўга не размаўлялі, але неяк па-чалавечы да іх ставіліся", - звярнуў увагу Кіраўнік дзяржавы.

"А чаго не вучыцца ў "Юбілейным", "Вусці" (сельгаспрадпрыемства ў Аршанскім раёне, якое спецыялізуецца на вырошчванні лёну. - Заўвага) па нейкіх пытаннях - па лёне? Чаго не вучыцца? Але гэта павінен і сам кіраўнік імкнуцца да гэтага", - дадаў Аляксандр Лукашэнка.

Падобны вопыт можна пераймаць нават у дэталях. Напрыклад, у час наведвання гаспадаркі Аляксандр Лукашэнка звярнуў увагу на ўключэнне ў сельгасабарот былых прысядзібных участкаў, якія раней служылі дадатковымі сялянскімі надзеламі, а цяпер не запатрабаваныя людзьмі.

"Глядзі, каб у цябе не было неўзараных прысядзібных участкаў былых, дзе раней людзі жылі. Каб усё было ўзарана", - акцэнтаваў увагу Кіраўнік дзяржавы.

Дырэктар агракамбіната Аляксандр Фірсін запэўніў, што ў гэтым плане вядзецца максімальная работа. Пытанні вырашаюць ва ўзаемадзеянні з сельсаветамі. Калі нехта апрацоўвае ўчастак зямлі, але вакол яго пустуючыя землі ўжо, то ўчастак прапануюць перанесці ў больш зручнае месца, забяспечыўшы усё неабходнае для яго распрацоўкі. "Адзін агарод стаіць. Вакол незразумела што рабіць. Мы бясплатна даём чалавеку трактар, дыскуем, аром. І гной можам нават даць бясплатна. І перанеслі яго. І так максімальна сёння ідзём", - расказаў кіраўнік гаспадаркі.

"Гэта правільна", - адрэагаваў Прэзідэнт.

Аляксандр Лукашэнка нагадаў аб практыцы шэфства над сельгаспрадпрыемствамі.

Гэта тэма абмяркоўвалася і ў пятніцу, 9 жніўня, на нарадзе ў Шклове, дзе разглядаліся пытанні эфектыўнага развіцця сельгасвытворчасці ў валаўтваральных Шклоўскім і Аршанскім раёнах.

"Мы гаварылі пра шэфства. Мне здаецца, што ў Балбасаве наш гэты завод недазагружаны (Аршанскі авіярамонтны завод. - Заўвага). Усё ж такі там і людзей дастатковая колькасць. Трэба замацаваць у якасці шэфа гэты завод".

Размова аб шэфстве ў прыватнасці вялася вакол работы дзвюх гаспадарак Аршанскага раёна - "Зубрэвічы-Агра" і "Межава-Агра". "Гэта кавалак добры. Дай бог, каб ён выцягнуў іх", - сказаў Прэзідэнт.

Аляксандр Лукашэнка падкрэсліў, што шэфская дапамога - гэта не абавязкова выдзяленне нейкіх фінансавых сродкаў: "Грошай яны яму не дадуць, ну і не трэба. Але адрамантаваць на той базе можна любую тэхніку. І яны дапамогуць адрамантаваць. Гэта вялікая справа - аднавіць і адрамантаваць тэхніку".

У гэтым плане, адзначыў Прэзідэнт, трэба пераймаць і вопыт "Юбілейнага" - як там арганізавана работа на машынных дварах з пункту гледжання працэсу і навядзення парадку.

"Шэф павінен быць моцны. Гэта да месца - Балбасава. Зубрэвічы ж недалёка. Там ёсць над чым працаваць. Завод дапаможа людзьмі. На ўборку - механізатарамі. Напэўна там людзі ёсць. Хаця б 2-3 чалавекі. Усё ж такі гэта рабочы клас. Ну і нагрузка будзе для завода. Мне прасцей падтрымаць недзе завод. А завод уключыцца ў гэта. Каб ты строга даручыў, што трэба дапамагаць як шэф", - сказаў Прэзідэнт, звяртаючыся да старшыні Аршанскага райвыканкама Ігара Мароза.

У сваю чаргу кіраўнік раёна адзначыў, што ў цэлым шэфская дапамога ў рэгіёне пастаўлена на належным узроўні. Нават у паспяховага агракамбіната "Юбілейны" ёсць тры шэфы.

"У цябе яшчэ шэфы ёсць? - са здзіўленнем звярнуўся Прэзідэнт да дырэктара агракамбіната Аляксандра Фірсіна. - Ды яго ўжо адчэпліваць трэба ад шэфаў".

Кіраўнік дзяржавы даручыў яшчэ раз вывучыць гэта пытанне ў раёне: "Гэта твая справа (старшыні райвыканкама. - Заўвага). Ты паглядзі. Заводы трэба дагрузіць. Табе будзе лягчэй працаваць з гэтымі прадпрыемствамі. Нават калі яны бедныя - гэты інструментальны, - але людзі ж там ёсць". Аляксандр Лукашэнка ўпэўнены, што можна знайсці талковых людзей, механізатараў, каб яны перыядычна дапамагалі на ўборцы ці яшчэ ў нечым.

"Дагавор заключылі і працавалі. Камбайн гэты падрыхтавалі да ўборкі і іншае", - прывёў ён прыклад.

Папярэднія два дні работы Прэзідэнта ў Шклоўскім раёне таксама былі прысвечаны сельскагаспадарчай тэматыцы. Спачатку на нарадзе ў Шклове абмеркавалі шляхі эфектыўнага развіцця сельгасвытворчасці на прыкладзе двух валаўтваральных раёнаў - Шклоўскага і Аршанскага. На наступны дзень Кіраўнік дзяржавы сабраў асобную нараду ў аграгарадку Гарадзішча Шклоўскага раёна, каб дэталёва разгледзець мэтазгоднасць стварэння буйной інтэграцыйнай структуры з удзелам аграхолдынга "Купалаўскае". Адабрэнне атрымана. Але галоўнае, на што нацэльвае Аляксандр Лукашэнка, - гэта эфектыўная работа, навядзенне належнага парадку на ўжо існуючых магутнасцях і тэрыторыях, падтрыманне выканальніцкай і тэхналагічнай дысцыпліны.