Інтэрв’ю тэлеканалу "Расія"

Прэзідэнт Беларусі Аляксандр Лукашэнка 15 жніўня даў інтэрв'ю для тэлепраграмы "Вялікія нядзельныя весткі" на тэлеканале "Расія".

У якасці інтэрв'юера выступіў журналіст і вядучы грамадска-палітычнага ток-шоу "60 мінут", дэпутат Дзяржаўнай думы РФ Яўген Папоў.

Інтэрв'ю з Кіраўніком беларускай дзяржавы доўжылася каля дзвюх гадзін. Аляксандр Лукашэнка падрабязна, шчыра і адкрыта адказаў на пытанні журналіста, якія датычыліся шырокага спектра тэм, у тым ліку беларуска-расійскае супрацоўніцтва, пытанні рэгіянальнага і міжнароднага парадку дня.

Размова ішла, у прыватнасці, аб мерах па забеспячэнні бяспекі Беларусі і Расіі, а таксама ў цэлым Саюзнай дзяржавы, аб сітуацыі ва Украіне і шляхах вырашэння канфлікту, аб рэакцыі на паводзіны заходніх суседзяў і абстаноўцы на граніцы. Абмяркоўваліся таксама асобныя аспекты ўнутранай палітыкі, асабістая роля Прэзідэнта ў развіцці краіны і яго планы на перспектыву.

Сярод гарачых інфармацыйных тэм, па якіх Аляксандр Лукашэнка даў прадметныя падрабязныя адказы, - інцыдэнт з парушэннем украінскімі беспілотнікамі паветранай прасторы Беларусі, "чырвоныя лініі" ў пытаннях бяспекі, падзеі ў Курскай вобласці. Адказваючы на пытанні журналіста, Кіраўнік дзяржавы пракаменціраваў апошнія заявы Польшчы і Украіны.

Аляксандр Лукашэнка таксама выказаўся наконт забароны на ўезд легкавых аўтамабіляў з беларускімі нумарамі ў Літву.

"Вар'яты. Я на вашым месцы многія пытанні адносна Літвы і не каменціраваў бы. Таму што яны не ведаюць самі, што робяць. Гэта вар'яты, самыя сапраўдныя вар'яты. Ну што пра іх гаварыць. Калі б там былі адказныя палітыкі, мы маглі б абмяркоўваць іх палітыку. Але там адказных палітыкаў няма", - заявіў Кіраўнік дзяржавы.

Паводле слоў Аляксандра Лукашэнкі, з эканамічнага пункту гледжання ў гэтым рашэнні літоўскіх улад ёсць нават плюсы. "Дзякуй богу. Нашы перастануць вывозіць (хоць цяпер менш стала) грошы за межы Беларусі і Расіі. Тое ж самае расіяне. Грошы застануцца тут. Гэты так званы эканамічны турызм - гэта вялікія сродкі, якія вывозіліся адсюль", - сказаў ён.

"Давайце адкрыта гаварыць, у Еўрапейскім саюзе (я не гавару пра Літву - там ужо нічога жывога не засталося) усё ж такі яны ж не дурні. Яны да Польшчы, Літвы, Латвіі сцягвалі тавары свае. Расіяне і беларусы патокам туды ездзілі і вялікія грошы, мільярды долараў, вывозілі. Ну цяпер не будуць вывозіць. Калі глядзець з пункту гледжання прагматыкі, эканомікі, - адзначыў Прэзідэнт. - Калі глядзець з пункту гледжання палітыкі, гэта поўнае вар'яцтва. Яны робяць усё тое, што не падабаецца людзям у Літве - грамадзянам Літвы. Што мы пра літоўцаў ні гаварылі б, гэта вельмі працавітыя з савецкіх часоў людзі. Яны параўноўваюць тое, што было ў Савецкім Саюзе, і тое, што цяпер".

Аляксандр Лукашэнка нагадаў, што ў СССР тыя ж Украіна і Літва былі жамчужынамі: "Я гэта добра памятаю. Літва была вельмі развітой краінай. Можам называць прыёмнікі, аўтамабілі і іншае савецкага часу. Яны ж маглі гэта развіць да ўзроўню тых жа мерседэсаў. Цяпер у іх наогул нічога няма. На гэтым месцы руіны. Таму тавары яны не могуць прапанаваць свае. А калі так званыя літоўскія (тавары. - Заўвага) - гэта значыць немцы або яшчэ хтосьці пабудаваў завод".

Такім чынам, адзначыў Прэзідэнт, у тым ліку ў Літве каля граніцы з Беларуссю было адкрыта шмат пунктаў і магазінаў з рознымі еўрапейскімі таварамі. "А мы ад свайго, дакладна шаленства... Разумееш, абавязкова трэба было купіць штосьці імпартнае. Калі не "Гучы" і "Версачэ", то ўсё - ты ўжо ніякі. Я не ведаю, ты якія касцюмы носіш, а я нашу беларускія касцюмы, пашытыя ў нас у атэлье, што і раней шылі", - адзначыў беларускі лідар, звяртаючыся да інтэрв'юера Яўгена Папова.

"Добра шыюць", - заўважыў журналіст.

"Я вам проста раю на гэта шаленства (што датычыцца апошніх рашэнняў Літвы. - Заўвага) не звяртаць увагі. Можа, дзесьці праз коску як прыклад прыводзіць вар'яцтвы гэтага Захаду і Еўрапейскага саюза, і да чаго яны могуць давесці гэтых сваіх сатэлітаў, якія не адыгрывалі і не адыгрываюць у гісторыі сёння ніякай ролі. Я на гэта нават увагі не звяртаю", - дадаў Аляксандр Лукашэнка.

Адно з пытанняў датычылася хамскага адказу з боку ўкраінскага МЗС на заяву МЗС Беларусі наконт парушэння беспілотнікамі паветранай прасторы нашай краіны. Украінскія афіцыйныя асобы адказалі, што ў гэтай тэме няма чаго і абмяркоўваць, гэта не тое, пра што варта задумвацца.

Аляксандр Лукашэнка заўважыў, што такія хамскія паводзіны ідуць яшчэ з часоў студыі "Квартал 95" (кампанія па вытворчасці тэлезабаў, сярод заснавальнікаў якой - Уладзімір Зяленскі). "Сапраўдныя дыпламаты сабе такога не дазволяць, нават калі "няма чаго абмяркоўваць". Гэта па-першае, - сказаў Прэзідэнт. - А па-другое… Дыпламаты пастаянна гавораць тое, што яны не думаюць. Ёсць што абмяркоўваць".

Як расказаў Кіраўнік дзяржавы, пасля інцыдэнту з беспілотнікамі і заяў, дзеянняў беларускага боку была атрымана рэакцыя ад украінскага боку: "Мы атрымалі сігналы адразу ж ад тых, хто адказна вядзе палітыку, і ад украінскіх ваенных. Яны турбаваліся: а што, а як...".

Прэзідэнт звярнуў увагу, што ўсё гэта адбывалася на фоне дадатковых мер па ахове дзяржграніцы. "Яны ж перакінулі падраздзяленні да нашай граніцы дадаткова, калі ўбачылі, што мы фарміруем адпаведныя падраздзяленні на граніцы. Яны (гэтыя падраздзяленні. - Заўвага) занялі свае пазіцыі (пазіцыі, якія намі былі вызначаны даўно). Я прыхільнік таго, каб мы прадугледжвалі ўсё. Калі раптам момант або час "Ч", кожнае падраздзяленне, рота, батальён павінны выйсці і стаць на сваю пазіцыю", - растлумачыў Аляксандр Лукашэнка.

Паводле яго слоў, у Беларусі вызначаны брыгады, батальённыя тактычныя групы для дзеянняў у раёне беларуска-ўкраінскай дзяржаўнай граніцы. Іх там плануецца больш за 20. "Кожная група ведае, якую мясцовасць яны займаюць, тэрыторыю і гэтак далей. Гэта абавязкова, каб не дапусціць прарыву. Таму мы гэта зрабілі", - удакладніў Прэзідэнт.

"І яны (з украінскага боку. - Заўвага) гэта ўбачылі. Яны пастаянна нам гаварылі, і заходнікі, што ім вайна з Беларуссю не патрэбна. Мы гэта разумеем і гаворым, што мы не збіраемся з вамі ваяваць", - сказаў Кіраўнік дзяржавы. Ён растлумачыў, што адсутнасць ваяўнічых намераў абумоўлена не тым, што на тым баку нехта добры, а тым, што Беларусь і Расія не зацікаўлены павялічваць лінію баявых дзеянняў. "Уся граніца - 1,2 тыс. км. Цяпер фронт, СВА - 1 тыс. км. Мы гатовы 1,2 тыс. км закрыць? Не. І Курск гэта паказаў. Што гэта трэба аб'яўляць мабілізацыю (інакш кажучы, у выпадку такога развіцця падзей спатрэбілася б аб'яўляць мабілізацыю. - Заўвага), чаго хоча Захад ад нас і перш за ўсё ад Расіі, каб знутры ўзбударажыць грамадства. Таму мы да гэтага не гатовы, мы гэтага не хочам", - адзначыў беларускі лідар.

"Мы не хочам эскалацыі, і мы не хочам вайны супраць усяго НАТА. Мы гэтага не хочам, - падкрэсліў Прэзідэнт. - Але калі яны гэта зробяць і на гэта пойдуць, ну што ж... У нас іншага выйсця не будзе. І ніякіх "чырвоных ліній" не будзе. Яна ёсць, гэта лінія, - дзяржаўная граніца. Як толькі наступілі на яе (гавару як пагранічнік), адказ будзе імгненны. Ён падрыхтаваны, загадам у сейфах, як належыць".

"Прамое пытанне, якое вельмі любяць на Захадзе лідарам задаваць: Вы гатовы націснуць "чырвоную кнопку"?" - спытаў журналіст Яўген Папоў.

"Слухай, па-першае, я чуў абмеркаванне гэтых пытанняў. Я пра ядзерную зброю ўжо не гавару, але гэта ты ў мяне спытаў. Як Пуцін гаворыць: "Я не гавару - гэта ты спытаў". Наконт ядзернай зброі: слухай, "чырвоныя кнопкі" ўжо вакол панаціскалі. Па перыметры Беларусі і Расіі панаціскалі ўжо "чырвоныя гэтыя кнопкі". Засталося толькі "самую чырвоную" націснуць. Таму ў маральных адносінах, напэўна, нам з Пуціным, прымаючы такія рашэнні, дык нават ужо неяк і нязручна аб гэтым гаварыць", - заявіў Прэзідэнт.

"Па-другое, калі тут з'явілася тактычная ядзерная зброя, я ім (апанентам за мяжой. - Заўвага) адкрыта сказаў (хоць яны там і гавораць: дурны, прыменіць зброю): "Мы не збіраемся ніякай зброі прымяняць, пакуль вы не наступіце на нашу дзяржаўную граніцу. Яна ж - граніца нашай Саюзнай дзяржавы", - адзначыў беларускі лідар.

Аляксандр Лукашэнка нагадаў, што Расія, згодна з існуючымі дамоўленасцямі, у выпадку агрэсіі ў адносінах да Беларусі ўвядзе ў краіну свае падраздзяленні, каб аказаць ваенную падтрымку.

"Расія, у адпаведнасці з нашым дагаворам, уводзіць свае падраздзяленні (яны вызначаны, якія арміі) у Беларусь. Мы прымаем першы ўдар, а далей у рэзерве нас падстрахоўвае Расія. Гэта агульная - Беларусі і Расіі - вайна супраць гэтых звяроў. І што, мы павінны чакаць, пакуль яны растопчуць нашу краіну, як гэта было з Савецкім Саюзам (размова аб пачатковым этапе Вялікай Айчыннай вайны. - Заўвага)? Не! Таму мы адкажам імгненна і адэкватна", - сказаў Прэзідэнт.

"Калі яны хочуць, каб гэтага не было, давайце сядзем за стол перагавораў і закончым гэту бойку. Яна ні ўкраінскаму народу, ні расіянам, ні беларусам не патрэбна. Яна патрэбна ім. Я не магу прывесці гэтыя факты, яны абсалютна закрытыя, дзе яны адкрыта гавораць - высокапастаўленыя людзі. Даслоўна: "Няхай б'юць адзін аднаго - украінцы, рускія - няхай у гэтым катле ўсе паздыхаюць". Гэта высокапастаўленыя асобы аб гэтым гавораць. Амерыканскага паходжання (крыху прыадкрыю вам). Гэта што, нармальна? Яны хочуць, каб мы адзін аднаго знішчылі", - дадаў Кіраўнік дзяржавы.

Прэзідэнта Беларусі спыталі, як ён ацэньвае цяперашні этап развіцця Саюзнай дзяржавы, наколькі яна моцная і непарушная і што яшчэ трэба зрабіць для большай інтэграцыі.

"Магу сказаць проста: вам у Расіі і нам у Беларусі трэба ісці па слядах двух прэзідэнтаў. Вы бачыце нашы адносіны - абсалютна блізкія. У Прэзідэнта Пуціна ні з кім няма такіх адносін, як з Беларуссю. Гэта зразумела. Тут нічога не трэба прыдумваць, ніякай канспіралогіі. Мы саюзнікі - гэтым усё сказана", - падкрэсліў Аляксандр Лукашэнка.

Прэзідэнт таксама заявіў, што ў аснове такога цеснага супрацоўніцтва падабенства двух народаў, якія, паводле яго слоў, практычна неадрозныя адзін ад аднаго.

"Як некаторыя гавораць, мы рускія людзі. Чым мы адрозніваемся - беларусы ад рускіх? Нічым. Я некалі жартоўна гаварыў: беларусы - гэта тыя ж рускія са знакам якасці", - заўважыў Аляксандр Лукашэнка.

Кіраўнік дзяржавы заўважыў, што ў гісторыі ўзаемаадносін Беларусі і Расіі былі розныя часы, у тым ліку і складаныя. "Тады мы непажаданыя былі для Расіі. Не тая палітыка, шапку Манамаха хтосьці хоча схапіць у Крамлі і гэтак далей і да таго падобнае, - сказаў Прэзідэнт. - І таму ішоў такі прэсінг на Беларусь. Але я ўсё роўна разам са сваімі калегамі праводзіў тую палітыку, якая праводзіцца цяпер".

Аляксандр Лукашэнка адзначыў, што бывалі таксама і сур'ёзныя рознагалоссі з Прэзідэнтам Уладзімірам Пуціным. "Я яму гаварыў: "Ведаеш, мы можам сварыцца колькі хочаш, але мы павінны бачыць інтарэсы ўласнага народа, па-першае. Па-другое, настане час, калі будзем стаяць плячо ў плячо і адстрэльвацца ўдвух", - нагадаў Аляксандр Лукашэнка. - Ох, як нас РТР і ўсе каналы (расійскія тэлеканалы. - Заўвага) тады крытыкавалі. Вазьміце гэтыя матэрыялы і паглядзіце. Многія тады былі ўпэўнены, што такія часы, калі давядзецца стаяць плячо ў плячо і адстрэльвацца, ніколі не настануць. А ваенныя вашы гаварылі: "Чаго там Беларусь, падумаеш, 800-1000 км. Ды мы стрэльнем з-пад Масквы праз Беларусь і там паразім любую цэль на Захадзе". Аказалася, гэта не так", - дадаў Прэзідэнт.

"Аказалася, стаім плячо ў плячо", - канстатаваў Кіраўнік дзяржавы. У сувязі з гэтым ён прыгадаў адну з размоў з Уладзімірам Пуціным у перыяд пачатку СВА. "Ён гаворыць: "Я цябе прашу, прыкрый нас з тылу". Я кажу: "З якога тылу?" Гаворыць: "Вось, стык Украіны, Беларусі і Польшчы". Я так падумаў: "Малайчына, адчувае, што гэтыя нягоднікі могуць што хочаш зрабіць". Тады я сказаў, што мы не дазволім рускім у спіну страляць. Мы тады паднялі практычна паўарміі, закрылі той напрамак. Яны зразумелі, што жарты ў гэтым плане кароткія. Таму вось, стаім. Часам спінай, часам адзін на аднаго гледзячы, і змагаемся супраць гэтых цынікаў", - падкрэсліў Прэзідэнт.

Аляксандр Лукашэнка пракаменціраваў нападзенне ўкраінскіх ваенных на Курскую вобласць Расіі. Ён заявіў, што ў ліку ўкраінскіх байцоў, якія ўчынілі гэта нападзенне, не было непрафесіяналаў. "Яны былі сабраны з усёй лініі баявога сутыкнення. Гэта былі ўжо ў асноўным прайшоўшыя па вайне людзі. Астатніх дааснасцілі, наёмнікі, палякі і іншае, - сказаў Прэзідэнт. - Былі сфарміраваны вельмі моцныя сілы, і яны зайшлі... Што такое граніца? Я ж служыў, ведаю, што такое граніца. Гэта хлопцаў некалькі там, ну, у вас узмоцненыя, дапусцім. Яны не маглі стрымаць такія сілы".

"Зразумела, ваенныя і Пуцін самі памруць, але знясуць адтуль украінскіх ваенных. Вось тады паўстае пытанне: навошта туды зайшлі? Для таго каб пахаваць самых такіх падрыхтаваных байцоў? Ужо ж лепшых сабралі. А што будзе на іншых участках фронту? - паставіў пытанне Кіраўнік дзяржавы. - Яны, украінцы, гэта мы дакладна ведаем, калі ідуць на фронт, яны з усімі развітваюцца. Яны разумеюць, што ідуць у адзін бок".

Аляксандр Лукашэнка падкрэсліў, што эскалацыя канфлікту можа закончыцца самым сумным чынам для ўкраінскай дзяржавы. "Калі будзе вось так, як пад Курскам, гэта будзе эскалацыя, якая закончыцца знішчэннем Украіны. Імперыю гэту яшчэ ніхто не перамагаў і не пераможа - Расію. Якое НАТА тут справіцца? У амерыканцаў адна палітыка - Еўропу сутыкнуць з Расіяй. Няхай б'юцца. А яны потым будуць разбірацца на Усходзе з кітайцамі", - сказаў ён.

"Я згодны з Пуціным, калі ён сказаў, што ідзе барацьба на павышэнне ставак. Што яны хочуць, калі раптам будуць перагаворы, выйграць больш моцную пазіцыю. Так і Захад гаворыць, ва Украіне аб гэтым мараць. Але паўстае другое пытанне: у такой сітуацыі і падобных хто з ім будзе весці перагаворы?" - адзначыў Кіраўнік дзяржавы.

"Таму ісці на павышэнне ставак свайго аўтарытэту, больш выгаднае становішча за сталом перагавораў заняць - гэта няправільна, гэта не той выпадак. Гэта класіка, але яна не падыходзіць у гэтай барацьбе з вялізнай імперыяй, якая сапраўды яшчэ не пачала па-сапраўднаму ваяваць. Сапраўды", - дадаў Аляксандр Лукашэнка.

Паводле слоў Кіраўніка дзяржавы, у Курскай вобласці на баку Украіны ваююць здраднікі з Беларусі і Расіі.

"Ва Украіне дзейнічае расійскі добраахвотніцкі корпус, "уласаўцы", я іх называю, і беларускі добраахвотніцкі корпус, - сказаў Прэзідэнт. - Яны сядзяць пад Курскам. Гэта як у Хатыні. Украінцы знішчылі Хатынь у свой час. Вось так і гэтыя здраднікі, яны ўжо там на баку ўкраінцаў ваююць".

Ёсць ва Украіне яшчэ адно фарміраванне з беларускіх "збеглых" - полк імя Кастуся Каліноўскага. "Гэта жулікі такія дробныя, больш палітыкі. Яны не ваякі, - сказаў Аляксандр Лукашэнка. - І больш таго, як мы заўважылі апошнім часам, яны разбягаюцца, таму што ў атамана няма залатога запасу. "Калі так далей будзе, я таксама разбягуся" - як у "Вяселлі ў Малінаўцы" (фраза з фільма. - Заўвага), яны пачалі разбягацца. Хто ў Польшчу, хто ў Чэхію. Там ужо фактычна імя толькі засталося ад гэтага палка".

Кіраўнік дзяржавы адзначыў, што Украіна трымае паблізу граніц з Беларуссю больш за 120 тыс. ваенных. "Бачачы іх агрэсіўную палітыку, мы ўвялі туды і размясцілі ў пэўных кропках - так, як гэта ў выпадку вайны, абароны было б, - нашых ваенных уздоўж усёй граніцы. Больш таго, там працуюць спецслужбы, спецпадраздзяленні - "Альфа", "Алмаз" і іншыя - самыя падрыхтаваныя, яны сваю работу робяць", - расказаў Аляксандр Лукашэнка.

Прэзідэнт нагадаў аб дадатковым абвастрэнні абстаноўкі на граніцы ў канцы чэрвеня - пачатку ліпеня, калі вялася падрыхтоўка да парада ў Мінску на Дзень Незалежнасці. Тады ў Беларусь, у тым ліку з Расіі, перамясцілася нямала лятальных апаратаў і падраздзяленні сухапутных войскаў, якія ўдзельнічалі ў парадзе.

"Зразумела, што яны (ва Украіне. - Заўвага) бачылі перамяшчэнне да нас, амерыканцы ж ім усю інфармацыю даюць. І падумалі, што, як яны сказалі, "Пуцін зноў будзе наступаць з тэрыторыі Беларусі". З-пад Гомеля, як гэта было ў пачатку СВА. І яны да 120 тысяч пачалі перакідваць ваеннаслужачых, - расказаў кіраўнік дзяржавы. - У адказ я вымушаны быў амаль трэць арміі перакінуць дадаткова на ўзмацненне таго, што было".

Аляксандр Лукашэнка расказаў, што потым па канале камунікацыі, які існуе з украінскімі спецслужбамі, удалося абмеркаваць сітуацыю: "Мы запыталі: "Вы навошта гэта робіце?" Яны нам адкрыта сказалі: "Вы збіраецеся з расіянамі нас атакаваць з-пад Гомеля". Але ў нас мэты такой не было. Яны гэтыя дадатковыя сілы, якія былі звыш 120 тысяч, адвялі. І мы тыя, якія дадатковыя ўводзілі, таксама адвялі".

"А тыя падраздзяленні, якія два з палавінай гады там былі ўведзены, яны і тады, і цяпер. І з іх боку, і з нашага боку прысутнічаюць. Гэта да смерці падобна, каб мы свае войскі з граніцы з Украінай убралі. Вайна ідзе", - заўважыў Прэзідэнт наконт некаторых размоў вакол "адводу" войскаў.

Больш таго, ужо ў жніўні Беларусь была вымушана рэагаваць на парушэнне сваёй паветранай прасторы ўкраінскімі ўдарнымі беспілотнікамі. "Чаму мы жорстка адрэагавалі на гэта? Таму што ўжо надакучыла. Яны пастаянна парушаюць усходнюю частку нашай граніцы, калі ляцяць у Піцер, туды далей. Некаторыя беспілотнікі, сабраныя ва Украіне, лятаюць 3-5 тыс. кіламетраў, даляталі ж да Татарстана. Яны чаплялі нашую граніцу. Мы іх папярэджвалі. Вядома, наша ППА гэта бачыць і адразу інфармацыю перадае расійскім проціпаветраным сілам".

Аляксандр Лукашэнка падкрэсліў, што быў вымушаны рэагаваць па ўсіх напрамках, калі беспілотнікі ўжо фактычна ўварваліся на беларускую тэрыторыю.

"У тым ліку разгарнуўшы Узброеныя Сілы і зноў тыя ж войскі, якія мы адвялі. Лічыце, трэць арміі мы ўвялі (на тэрыторыі паблізу паўднёвай граніцы. - Заўвага) і нават на захадзе мы правялі мабілізацыю і перакінулі на поўдзень, на палігон рыхтаваць нашы часці. Гэта было планавае мерапрыемства. Там таксама некалькі тысяч хлопцаў рыхтуюцца - заходняга, паўночна-заходняга напрамку. Адтуль мы перакінулі", - расказаў Прэзідэнт.

"Беларуска-ўкраінская граніца замініравана так, як ніколі. Войнаў такіх не было, каб было такое мініраванне. Яны (украінцы. - Заўвага) самі, вось як нядаўна мне далажылі, узрываюцца на сваіх мінах. Таму што часам па п'яні мініруюць без наяўнасці карт, мінных палёў, у парушэнне ўсіх норм і правіл, - заявіў Кіраўнік дзяржавы. - Там прайсці граніцу цяпер - ну, з вельмі вялікімі стратамі".

Аляксандр Лукашэнка бачыць небяспеку трэцяй сусветнай вайны ў выпадку ўводу войскаў НАТА ва Украіну.

"Магчымасць "пакласці" Расію. Украіна гэтага не зробіць. А хто? Захад. НАТА. Мы павінны гэта бачыць, мы гэта бачым з Прэзідэнтам Пуціным, што ў гэта могуць ужо адкрыта ўключыцца (вось проста нават не хаваючы гэта) натаўскія войскі. Вось непасрэдна злучэннямі ўвойдуць, - сказаў Кіраўнік дзяржавы. - Цяпер яны зброю туды пастаўляюць, наёмнікаў, былых ваенных ужо, каб яны ляталі на F-16 там і гэтак далей. Гэта ўжо ёсць. А вось аперацыі спланаваць і рукамі натаўцаў ажыццявіць з тэрыторыі Украіны... А лепш яшчэ, чаго яны хочуць, з боку гэтых агідных палякаў, кіраўнікоў Польшчы, захапіць Беларусь, і гэту лінію амаль да Ленінграда выцягнуць, як некалі было. Гэта іх мара".

"І ў гэтым выпадку, вядома, нам амаль немагчыма было б у такой сітуацыі абараняцца. Гэта мабілізацыя і сапраўдная вайна павінна была б быць", - дадаў Аляксандр Лукашэнка.

"Калі яны ўвядуць войскі НАТА, гэта трэцяя сусветная вайна. Таму што потым будзе прыменена і тактычная, і стратэгічная ядзерная зброя, і адказ будзе імгненны і жудасны. Яны ж гэта таксама разумеюць, і мы гэта разумеем. Таму трэба сесці за стол перагавораў", - заявіў Кіраўнік беларускай дзяржавы.

Гаворачы аб уварванні УСУ ў Курскую вобласць Расіі, Прэзідэнт канстатаваў, што гэта вядзе да эскалацыі канфлікту. "Небяспека заключаецца ў тым, што вось гэта падобная эскалацыя з боку Украіны - спроба штурхнуць Расію на асіметрычныя дзеянні. Ну, дапусцім, прымяненне ядзернай зброі. Ведаю дакладна, што ва Украіне былі б вельмі рады, калі б Расія прымяніла або мы там тактычную ядзерную зброю. Гэта было б шчасце, - сказаў Аляксандр Лукашэнка. - Вось тады, напэўна, у нас наўрад ці саюзнікі засталіся б. Наогул ніякіх нават спачуваючых краін не засталося б. Таму што яны паглыблены ў тое, што адбываецца".

"Па-другое, гэта ж ядзерная зброя. У нас жа ўжо сфарміраваны пэўны вобраз негатыўны да гэтай ядзернай зброі. Вось яны хочуць падштурхнуць", - дадаў беларускі лідар.

Кіраўнік дзяржавы ў інтэрв'ю чарговы раз заклікаў да перагавораў па дасягненні ўрэгулявання канфлікту ва Украіне. "Давайце сядзем за стол перагавораў і закончым гэту бойку. Яна ні ўкраінскаму народу, ні расіянам, ні беларусам не патрэбна. Яна патрэбна ім (апанентам за мяжой. - Заўвага). Я не магу прывесці гэтыя факты, яны абсалютна закрытыя, дзе яны адкрыта гавораць - высокапастаўленыя людзі. Даслоўна: "Няхай б'юць адзін аднаго - украінцы, рускія - няхай у гэтым катле ўсе падохнуць", - расказаў Прэзідэнт.

"Нам трэба апрытомнець і зразумець, што Валодзя Зяленскі (ён сёння сядзіць у бункеры ў Кіеве там і гэтак далей) заўтра дзе будзе сядзець? У Вялікабрытаніі. Вы (у Расіі. - Заўвага) гаворыце часам пра нацыкаў. Няма там ужо гэтых нацыкаў. Дэнацыфікавана Украіна. Але ёсць некалькі шалёных нацыкаў, якія там засталіся, але яны ўжо не ў трэндзе. Сёння больш як пад 70% ненавідзяць Зяленскага, таму што ён абяцаў адно, а робіць іншае, і гінуць людзі".

Прэзідэнт Беларусі Аляксандр Лукашэнка ў інтэрв'ю тэлеканалу "Расія" расказаў пра вялікія патокі ўхілістаў з Украіны, якія бягуць ад вайны, паведамляе БЕЛТА.

"Супраць такой імперыі (маецца на ўвазе Расія. - Заўвага) ваяваць Украіне, дзе людзі бягуць ад вайны... Хоць, як яны кажуць, у іх айчынная вайна. Але калі айчынная, чаго бегчы ад гэтай вайны? Вы ваюйце. Мы ж перажылі разам Айчынную вайну - тады ніхто не бег", - адзначыў Кіраўнік дзяржавы.

Аляксандр Лукашэнка звярнуў увагу, што цяпер у Польшчы і іншых дружалюбных для Украіны краінах пачалі адлоўліваць грамадзян гэтай краіны, каб адправіць на фронт. "Яны куды пабеглі? У Расію ж не могуць, таму што фронт. Яны да нас пачалі бегчы", - расказаў Прэзідэнт.

"Ухілянты?" - удакладніў інтэрв'юер.

"Так, ухілянты. Бягуць да нас, цераз нас і гэтак далей, вялікімі патокамі. Хтосьці хоча пасяліцца тут з дзецьмі - мы грамадзянства даём. Шкада ж людзей. У большасці сваёй яны бягуць на Захад, у Польшчу", - дадаў Аляксандр Лукашэнка.

Адказваючы на ўдакладняючае пытанне, ці маюцца на ўвазе мужчыны прызыўнога ўзросту, якія пераходзяць граніцы, Прэзідэнт сказаў: "Так, гэта пад 98%. Гэта мужыкі, якія бягуць ад вайны і не хочуць ваяваць".

"Ну, як з імперыяй можна ваяваць, калі ў цябе няма кім ваяваць? Мы бачым, што адбываецца на тэатры ваенных дзеянняў і тое, што адбываецца ва Украіне. Зразумела, не ўсё, вядома, так гэта, як у вас нават у "60 мінутах" (сацыяльна-палітычная перадача на тэлеканале "Расія". - Заўвага) вы гаворыце. Не ўсё гэта так. Ёсць людзі матываваныя", - канстатаваў Аляксандр Лукашэнка.

Кіраўніку дзяржавы было зададзена пытанне аб забеспячэнні ваеннай бяспекі на заходніх рубяжах на фоне ўзмацнення ваеннай прысутнасці ў паўднёвай частцы краіны паблізу граніц з Украінай. "У вас 10 тактычных батальённых груп НАТА на заходняй граніцы стаіць, якія таксама невядома, якія планы маюць", - адзначыў інтэрв'юер.

"Мы іх чакаем. Там нам будзе прасцей. Там выбудаваны абарончыя рубяжы ад Брэста да Гродна і вышэй туды. Практычна літоўская і польская граніцы перакрыты на выгадных для нас умовах. Мы ж таксама вучымся на гэтай украінска-расійскай спецыяльнай ваеннай аперацыі. Мы бачым, дзе трэба размясціць (войскі і абарончыя рубяжы. - Заўвага), - сказаў Аляксандр Лукашэнка. - Не буду называць колькі іх штук, але будзе дастаткова для таго, каб закрыць усю граніцу. Не "Лінія Сталіна" (сістэма ўмацаваных раёнаў уздоўж старой заходняй граніцы СССР да 1939 года. - Заўвага), а сучасныя абарончыя пункты, дзе трэніруюцца нашы хлопцы. Кожны ваеннаслужачы, калі мы яго прызываем па мабілізацыі, павінен ведаць, куды ён павінен прыйсці і ў якім напрамку страляць".

Аляксандр Лукашэнка нагадаў, што наведваў адны з такіх рубяжоў і асабіста азнаёміўся з абстаноўкай. "Прастрэльваецца ўсё вакол. Гэта ў раёне Брэста. І Брэст відаць. Там падысці, прарваць граніцу можна, але ты далей не прасунешся. Ты поўнасцю як на далоні. На ўзвышшы стаяць гэтыя пункты, і там праходзяць трэніроўкі. Таму мы там націск і абарону нашу не аслабляем", - звярнуў увагу ён.

Прэзідэнт Беларусі таксама падкрэсліў, што разам з расійскім калегам Уладзімірам Пуціным яны ўжо не першы год плануюць абарону заходняга напрамку. "У нас абарончыя планы існуюць, а калі трэба, мы іх перавядзём і ў наступальныя. Таму яны няхай там не шалеюць і не радуюцца, што, ведаеце, "мы валяемся з Пуціным на падлозе, а яны каленам сталі нам на грудзі і душаць нас". Нічога падобнага, - заявіў беларускі лідар. - Мы бачым, адкуль можа быць нанесены самы сур'ёзны ўдар па нашым саюзе і па нашай сумеснай групоўцы. Таму на захадзе мы нічога не аслабляем. Больш таго, армію сваю ўзмацнілі сур'ёзнай зброяй. Вы ведаеце яе - расійскай. І звычайнай, і тактычнай ядзернай зброяй".

Напрыклад, на парадзе ў гонар Дня Незалежнасці былі паказаны ракетныя комплексы "Іскандэр", якія падрыхтаваны для нанясення ўдараў тактычнай ядзернай зброяй.

Аляксандр Лукашэнка падтрымлівае пазіцыю свайго расійскага калегі Уладзіміра Пуціна аб тым, што мірныя перагаворы па ўрэгуляванні канфлікту ва Украіне неабходна аднавіць са Стамбульскіх пагадненняў, якія былі выпрацаваны бакамі яшчэ вясной 2022 года.

"Трэба сесці за стол перагавораў. Ты можаш спытаць: а што, а як? Пуцін, вось я яго наогул безагаворачна (мы спрачаемся па многіх пытаннях) падтрымліваю. Калі сесці за стол перагавораў, адразу пытанне кітайцы, бразільцы і іншыя задаюць: "Ну селі за стол перагавораў, з чаго пачаць?" І ён правільна, ад зямлі, разумна прапанаваў: "Давайце пачнём, на чым закончылі ў Стамбуле". Давайце разгарнём сшытак гэты, дзе падпісаліся, парафіравалі фактычна перагаворшчыкі. Мне Пуцін яго (гэты выпрацаваны дакумент. - Заўвага) пераслаў адразу. Давайце адсюль пачнём", - сказаў беларускі лідар.

"Так, на зямлі сітуацыя змянілася, яшчэ змянілася сітуацыя, але з гэтага ж можна пачаць. І пачаць абмяркоўваць: так, Расія - гэта тэрыторыя ўжо ў Расіі канстытуцыйная… Трэба сесці за стол перагавораў і абмяркоўваць пытанне. І такая магчымасць ёсць", - дадаў Кіраўнік дзяржавы.

Аляксандр Лукашэнка ў час інтэрв'ю адказаў на пытанне аб легітымнасці Уладзіміра Зяленскага на пасадзе Прэзідэнта Украіны цяпер.

"Ведаеце, можна гаварыць аб тым, што ён нелегітымны. Дэ-юрэ", - сказаў Кіраўнік дзяржавы. У Расіі лічаць тэрмін паўнамоцтваў Уладзіміра Зяленскага на пасадзе Прэзідэнта скончаным, спасылаючыся на Канстытуцыю гэтай краіны. "Дэ-юрэ да яго ёсць пытанні аб легітымнасці", - згодны Аляксандр Лукашэнка.

У той жа час ён канстатаваў, што дэ-факта Уладзімір Зяленскі прымае рашэнні ў якасці Кіраўніка дзяржавы, і гэтыя рашэнні выконваюцца. "Вось ён прыняў рашэнне - гэта вар'яцтва ў напрамку Курска ажыццявіць, і армія выконвае. Іншыя рашэнні ён прымае (вы ведаеце пра іх, я ведаю) - яны выконваюцца", - сказаў Прэзідэнт.

Завяршаючы размову на тэму легітымнасці ўкраінскай улады, Аляксандр Лукашэнка заявіў, што з юрыдычнага пункту гледжання там "няма з кім размаўляць", але фактычна людзі, якія кіравалі краінай, прадаўжаюць гэта рабіць і дагэтуль, тлумачачы гэта тым, што цяпер ідзе вайна. Якраз яны рэальна прымаюць рашэнні.

Прэзідэнт Беларусі адказаў на папрокі аб дапамозе Расіі: "Нас і Захад, і ўкраінцы папракаюць: "Вы дапамагаеце Расіі". Я ўкраінцам гавару: "А вам амаль 60 краін дапамагаюць самых развітых. А гэта (размова аб Расіі. - Заўвага) - наш саюзнік. Мы і юрыдычна, і фактычна, і ментальна (блізкія краіны і саюзнікі з Расіяй. - Заўвага). Я ўкраінцам гэта адкрыта гавару і заяўляю гэта".

"Чаму мы ім не павінны дапамагаць? Таму я гэта не скрываю. Што мне скрываць? Так, многае наша супрацоўніцтва большай часткай скрыта. Вайна ідзе, таму ніхто не раскрывае пэўныя рэчы", - растлумачыў Прэзідэнт.

Кіраўніку дзяржавы было зададзена пытанне адносна нядаўняй заявы кіраўніка МУС Польшчы Томаша Семаняка аб наяўнасці асновы для дамоўленасцей з Мінскам па шэрагу складаных пытанняў, ад вырашэння якіх залежыць адкрыццё раней закрытых пагранічных пераходаў.

"Ну, наконт асновы я хацеў бы ведаць, што гэта за аснова. Вельмі добрая заява. Яны не павінны ні з Расіяй, ні з Беларуссю ваяваць. Яны павінны ўстанаўліваць і весці эканамічнае супрацоўніцтва, адысці ад мілітарызацыі, якую яны ажыццяўляюць за кошт амерыканцаў, - сказаў Кіраўнік дзяржавы. - Палякі не дурні. Яны ж разам з намі жылі ў сацыялістычным лагеры, і ў іх вось гэты ген вельмі глыбока сядзіць. Яны не дурні. Тое, што рабіў раней Дуда (Прэзідэнт Польшчы Анджэй Дуда. - Заўвага), а цяпер Туск (Прэм'ер-міністр Польшчы Дональд Туск. - Заўвага) разам з Дудам, гэта большасць насельніцтва Польшчы не прымае. Таму іх унутраная сітуацыя падштурхоўвае да выбудоўвання гэтых адносін. Але я гэтай асновы, на жаль, не бачу".

Што датычыцца закрыцця пагранічных пунктаў пропуску, Аляксандр Лукашэнка падкрэсліў, што беларускаму боку "ад гэтага ні горача ні холадна".

"Ні Расіі, ні нам. Супраць нас яны ўвялі санкцыі - Еўрасаюз і Амерыка. Мы туды не ездзім, у сэнсе, нічога не возім. Што яны размахваюць гэтым "белым сцягам", які не мае нічога агульнага з той палітыкай, якая была б у нашых інтарэсах? Мы з імі не гандлюем. Закрылі? Закрывайце", - сказаў Прэзідэнт Беларусі.

Ён нагадаў, што Еўрасаюз і Польшча ў тым ліку перасталі супрацоўнічаць з Беларуссю па пагранічнай тэматыцы. "Увялі санкцыі, перасталі супрацоўнічаць з намі па граніцах. Мы сказалі: дзякуй, няма дагавора аб рэадмісіі, мы яго разарвалі (у кастрычніку 2021 года ў Беларусі быў прыняты закон аб прыпыненні дзеяння пагаднення з ЕС аб рэадмісіі асоб, якія знаходзяцца без дазволу. - Заўвага). Яны перасталі будаваць гэтыя цэнтры (часовага размяшчэння мігрантаў на тэрыторыі Беларусі. - Заўвага), мы ім сказалі: мы накопліваць у сябе мігрантаў не будзем. І яны патокам пайшлі туды. І для іх гэта, для ўсяго Еўрасаюза, катастрофа. У чым я не маю рацыі?" - сказаў у інтэрв'ю Аляксандр Лукашэнка.

"Другая катастрофа для іх была, калі мы дамовіліся з Уладзімірам Уладзіміравічам (Пуціным. - Заўвага), каб ён перакінуў сюды тактычную ядзерную зброю", - дадаў беларускі лідар.

У час размовы з журналістам размова зайшла пра нядаўняе рашэнне бундэсвера ўключыць афіцэраў, якія служылі ў вермахце, у спіс прыкладаў для цяперашніх ваенных Германіі. "Яны там вывалілі аж на ўзроўні бундэсвера некаторыя рэчы. Страшна чытаць", - сказаў Прэзідэнт.

Аляксандр Лукашэнка звярнуў увагу, што для любой дзяржавы характэрна наяўнасць ідэалогіі. Вось толькі на Захадзе, паводле яго слоў, не знайшлося нічога лепшага, чым нацызм, у той час як у Беларусі і Расіі абапіраюцца на свае традыцыі і слаўнае мінулае.

"Яны вырашылі вярнуцца да нацысцкай ідэалогіі. А нам не трэба нікуды вяртацца. Наша сёння ідэалогія... Яна заснавана на векавым падмурку, - падкрэсліў Прэзідэнт. - Ні Пуцін, ні я, мы нічога не прыдумалі, калі гаворым аб традыцыйных каштоўнасцях. Гэта было заўсёды".

"Таму нам не трэба на іх глядзець і баяцца, - прадоўжыў Кіраўнік дзяржавы. - У іх трэба браць лепшае, тое, што нам выгадна. Я раю на гэта шаленства проста не звяртаць увагі. Можна недзе праз коску, як прыклад прыводзіць вар'яцтвы гэтага Захаду і Еўрапейскага саюза і тое, да чаго яны могуць давесці сваіх сатэлітаў, якія не адыгрывалі ў гісторыі і не адыгрываюць сёння ніякай ролі".

Аляксандр Лукашэнка расказаў падрабязнасці размовы з Прэзідэнтам Расіі Уладзімірам Пуціным аб маштабным абмене асуджанымі, у выніку якога на радзіму былі вернуты з краін Захаду многія расійскія грамадзяне.

Прэзідэнт звярнуў увагу, што на любога чалавека аказвае ўплыў яго мінулае, у тым ліку прафесійная дзейнасць, якой было прысвечана шмат гадоў. І ў гэтым плане Уладзімір Пуцін не выключэнне.

"Ён, напрыклад, служыў у разведцы. Ну хіба ён мог кінуць людзей, якія служаць на тых жа пасадах?.. Ён хіба мог іх кінуць? Не. Таму мы іх і выцягвалі з-за граніцы, - сказаў Аляксандр Лукашэнка. - Інакш кажучы вось, як мінулае ўплывае на чалавека".

Кіраўнік дзяржавы расказаў, што не раз гаварыў на гэту тэму з расійскім калегам, які тлумачыў свае дзеянні наступным чынам: "Як кінуць гэтых людзей? Гэта ж нашы хлопцы, яны ж - у імя Расіі", - перадаў Прэзідэнт словы Пуціна.

Кіраўнік дзяржавы ў час інтэрв'ю тэлеканалу "Расія" паразважаў аб тым, ці ёсць месца шчырасці ў сучаснай палітыцы.

"Трэба мець на ўвазе: палітыкі вельмі рэдка гавораць тое, што думаюць", - сказаў Кіраўнік дзяржавы ў размове з журналістам, а той пацікавіўся, наколькі такая мадэль паводзін уласціва самому Аляксандру Лукашэнку. На гэта Прэзідэнт заўважыў, што лічыць за лепшае заставацца шчырым заўсёды, у тым ліку і ў палітыцы, за што яго часам нават папракаюць. Хаця бывае, што не пра ўсё можна сказаць публічна, а іншым разам хочацца выдаць жаданае за рэчаіснае.

"Але хлусіць - ні ў якім разе. Таму што, калі ты сёння збрахаў (схлусіў. - Заўвага), як у Беларусі кажуць, заўтра, паслязаўтра, потым той жа журналіст Папоў прыедзе: а вы ўчора вось гэта гаварылі, а сёння гэта. І што потым? - рытарычна спытаў Прэзідэнт. - Таму трэба быць вельмі асцярожным тут. Лепш прамаўчаць".

Журналіст у размове прывёў цытату Кіраўніка дзяржавы, агучаную ў час нядаўняй размовы з жыхарамі аграгарадка Гарадзішча Шклоўскага раёна. Тады адна з удзельніц сустрэчы звярнулася да Аляксандра Лукашэнкі з просьбай балаціравацца на наступны тэрмін, на што Прэзідэнт адказаў: "Я публічна пачынаю ўжо гаварыць усім вам. Вы павінны прывыкаць да таго (я вас збалаваў крыху), што Прэзідэнт будзе іншы. Не, я не гавару: заўтра я вас кіну, паслязаўтра і іншае... Ну, усякае ж у жыцці бывае. Вы павінны прывыкаць да таго, што я не вечны, як і ўсе".

Кіраўніка дзяржавы папрасілі растлумачыць, што азначалі тыя словы. Аляксандр Лукашэнка адзначыў, што сказанае ім трэба разглядаць не ў кантэксце агульных разваг аб чалавечым жыцці, а з пункту гледжання работы на прэзідэнцкай пасадзе канкрэтнага чалавека: "Некаторыя гэтага не разумеюць, не ведаючы ўвогуле сутнасці прэзідэнцкай работы і сітуацыі. Лічаць так: "30 гадоў - гэта шмат, адзінкі людзей, якія працуюць 30 гадоў прэзідэнтам". Пытанне ж не ў гэтым. Пытанне ў тым, добра гэта ці дрэнна. Гэта добра, што канкрэтны чалавек працуе 25 або 30 гадоў? І вось людзі: "Так, трэба (каб Аляксандр Лукашэнка балаціраваўся на наступны тэрмін. - Заўвага), абстаноўка такая, не падвёў, не падмануў, краіну абараняе". Такія наратывы. І вось такое было выступленне".

Паводле слоў Прэзідэнта, людзі ў Беларусі прывыклі, што менавіта ён знаходзіцца на гэтай пасадзе, але ж так будзе не заўсёды. "Трэба разумець, што прыйдзе іншы чалавек - гэта непазбежна. І я гэта меў на ўвазе - што прыйдзе іншы чалавек і вы павінны да гэтага быць гатовы. Я рыхтую да гэтага людзей, я не хачу, каб было нейкае расчараванне або правал" , - сказаў Аляксандр Лукашэнка.

Кіраўнік дзяржавы падкрэсліў, што будучыя змяненні абавязкова павінны адбывацца без якіх-небудзь кардынальных узрушэнняў, таму ў Беларусі для гэтага рыхтуюць адпаведную глебу, у тым ліку не так даўно прынялі абноўленую Канстытуцыю.

"Мы не хочам перамен, каб гэта была рэвалюцыя нейкая. Я прыхільнік не рэвалюцыйных, а эвалюцыйных перамен, - заявіў Аляксандр Лукашэнка. - І мы за гэтыя гады зрабілі вельмі шмат, каб выбудаваць тое, што вы бачыце. Камусьці падабаецца, не падабаецца, але людзі, увогуле, камфортна сябе адчуваюць".

"Мы за эвалюцыйнае развіццё на аснове таго, чаго мы дасягнулі, - прадоўжыў Прэзідэнт. - Мы ніколі не адмаўлялі дасягненні савецкага перыяду. Ніколі. І на той базе, як прыклад і доказ таго, мы будавалі нашу эканоміку і наша грамадства, пра нас часта гаварылі: "Вось, Беларусь - гэта асколак савецкага часу". Не, гэта ўжо даўно не асколак савецкага часу. Але тое, што мы на аснове савецкага вопыту, дасягненняў савецкага перыяду пабудавалі, - гэта праўда".

Кіраўнік дзяржавы звярнуў увагу, што на любога, хто становіцца Прэзідэнтам, уплывае яго папярэдняя прафесійная дзейнасць: "Мінулае нікуды не дзенеш, яно на цябе ўплывае". Праўда, бываюць у гісторыі выпадкі, калі кіраўнікі спрабуюць адхрысціцца ад свайго мінулага, кардынальна змяніць свае погляды. "Былі і польскія кіраўнікі, якія працавалі амаль у спецслужбах або агентамі былі. У Польшчы і Чэхіі мы ведаем такіх "вялікіх" дзеячаў - ад гэтага (свайго мінулага. - Заўвага) адмовіліся. Ведаем мы і на нашай постсавецкай прасторы такіх людзей, якія з цягам часу адмаўляліся ад свайго мінулага. Мяне Бог ахоўваў ад гэтага", - сказаў Аляксандр Лукашэнка.

"Я часам аглядаюся назад, на пражытае, на тое, што рабіў публічна ўжо, нават калі быў дэпутатам. Я аглядаюся на мінулае, і мне не сорамна. Я нідзе не гаварыў адно, а цяпер - іншае, - заявіў Прэзідэнт. - Таму што я як гісторык разумеў гэта і ацэньваў усю палітыку як трэба, па пэўных крытэрыях. І я сёння чысты". Напрыклад, што датычыцца Савецкага Саюза, Аляксандр Лукашэнка заўсёды быў перакананы ў памылковасці рашэння разваліць гэту краіну. Ён галасаваў супраць гэтага рашэння, калі яшчэ быў парламентарыем, і з трыбуны Вярхоўнага Савета заклікаў калег не рабіць паспешных крокаў, якія могуць прывесці да непапраўнага. "Выступаючы, гаварыў: "Што вы робіце?" Я ад жыцця іх прасіў: "Не спяшайцеся, давайце дзень-два пачакаем", - нагадаў падзеі таго часу Кіраўнік дзяржавы, адзначыўшы, што яго ў гэтым плане няма ў чым папракнуць

Гаворачы пра свае ўзаемаадносіны з сынам, Прэзідэнт заўважыў, што Мікалай цікавіцца многімі працэсамі, падзеямі, што адбываюцца як у Беларусі, так і ў свеце, выказвае свой пункт гледжання, а часам - і крытычныя заўвагі.

"Ён у мяне такі "апазіцыйны" да мяне. У такім добрым сэнсе ён можа мяне пакрытыкаваць, - расказаў Аляксандр Лукашэнка. - Але гэта ў альтэрнатыву заўсёды. Не апазіцыйна, а ў альтэрнатыву нешта выкажа".

Размова зайшла таксама пра падзеі 2020 года і знакамітыя кадры, калі Прэзідэнт з'явіўся з аўтаматам каля Палаца Незалежнасці і побач з ім знаходзіўся малодшы сын.

"Ён, калі ўбачыў, што я бронекамізэльку сваю надзеў (і ў яго, і ў мяне свая зброя, бронекамізэлькі) і ў верталёт, ён на сябе накінуў... Маці там яго якраз была дома - завыла. Я ўжо выходзіў, чую, ёй гаворыць: "Я не хачу тут крануцца з розуму, пакуль ён будзе там". Вось яго фраза была, - расказаў Кіраўнік дзяржавы. - Ты, гавару, дома застанешся, не трэба нікуды. "Не, я пайду з табой. Я не забіваць еду, я іду абараняць свайго бацьку". Вось яго былі словы. Што тут скажаш пасля гэтага? Мы селі з ім у верталёт і паляцелі".

"Ён чалавек мужны. Я гэтаму рады. І сваю краіну ён будзе абараняць належным чынам", - сказаў Аляксандр Лукашэнка пра Мікалая.

Цяпер малодшы сын Кіраўніка дзяржавы вучыцца ў Пекінскім універсітэце і ў Беларускім дзяржаўным універсітэце па сумеснай праграме. Ён вывучае біятэхналогіі і пасля завяршэння атрымае два дыпломы.

"Я хачу, каб у гэтага здольнага чалавека, які музыкант добры, спартсмен і гэтак далей, я хачу, каб у яго была мірная будучыня. Як і ўсім беларусам, расіянам, усім добрым людзям вакол. Я хачу, каб быў толькі мір. А далей давайце паспаборнічаем, хто каго", - сказаў Прэзідэнт.