Даклад старшыні канцэрна "Белдзяржхарчпрам" Анатоля Бубена і Намесніка Прэм'ер-міністра Аляксандра Субоціна

Прэзідэнт Беларусі Аляксандр Лукашэнка 26 жніўня прыняў з дакладам старшыню канцэрна "Белдзяржхарчпрам" Анатоля Бубена і Намесніка Прэм'ер-міністра Аляксандра Субоціна.

"Час настаў абмеркаваць сітуацыю ў "Белдзяржхарчпраме" - нашым канцэрне. Чытай: Міністэрства харчовай прамысловасці - так раней называлі мы гэта аб'яднанне", - сказаў беларускі лідар.

Ён адзначыў, што канцэрн хоць і параўнальна невялікі (у яго структуру ўваходзяць больш за 40 прадпрыемстваў з колькасцю работнікаў амаль 20 тыс. чалавек), але вельмі важны. Удзельная вага "Белдзяржхарчпрама" ў агульнай суме выплачаных плацяжоў у бюджэт у цэлым па краіне складае каля 7 працэнтаў. "Вядома, гэта не Міністэрства сельскай гаспадаркі або прамысловасці, але трэба разумець, што гэта прыкладна 100 тыс. чалавек, калі з сем'ямі ўзяць, якія жывуць дзякуючы гэтаму канцэрну. І ўдзельнай вагі ў бюджэце, і працуючых людзей у вас нямала. Гэта сведчыць аб важнасці гэтага напрамку эканомікі", - сказаў Аляксандр Лукашэнка.

"Але я сёння не хацеў бы слухаць справаздачу. Проста асобныя пазіцыі - што добра, што дрэнна. Ёсць і недахопы, ёсць і станоўчыя факты. Мяне цікавіць перш за ўсё вырабляемая прадукцыя і, самае галоўнае, экспарт, за што адказвае віцэ-прэм'ер. Ён нясе адказнасць, каардынуе гэту работу", - падкрэсліў беларускі лідар.

Прэзідэнт адзначыў, што раней асобныя прадпрыемствы, падведамныя "Белдзяржхарчпраму", былі перададзены ў кіраванне на мясцовы ўзровень. "Я так разумею, што гэтыя прадпрыемствы ў асноўным засталіся дзяржаўнымі. Мяне заўсёды насцярожвала пытанне пры перадачы зверху ўніз прадпрыемстваў, каб гэта не было прычынай і жаданнем іх прыватызаваць акуратненька міма Прэзідэнта і рэспубліканскіх органаў улады. Хацелася б, каб мяне таксама інфармавалі наконт гэтага: так гэта, ёсць такія факты ці не?" - абазначыў пытанне Кіраўнік дзяржавы.

Ён таксама звярнуў увагу на тое, што ў структуры канцэрна знаходзяцца вытворцы цукру - чатыры працуючыя ў краіне заводы. "Мы ведаем, што ў мінулым годзе сітуацыя па продажах і цэнах на цукар была не вельмі, але да канца года і ў пачатку бягучага года цэны на цукар проста падскочылі. Якая сітуацыя ў вас цяпер?" - пацікавіўся Прэзідэнт.

Аляксандр Лукашэнка запатрабаваў далажыць аб прапанове пераўтварэння канцэрна "Белдзяржхарчпрам" у дзяржкарпарацыю.

"Ва ўрадзе намеціўся такі крэн па стварэнні дзяржаўных карпарацый. Чым яна, гэта дзяржаўная карпарацыя, будзе адрознівацца ад цяперашняга канцэрна? Канцэрн - гэта таксама дзяржаўнае аб'яднанне, - пацікавіўся Кіраўнік дзяржавы. - Карпарацыя так карпарацыя. Ніхто не супраць. Зразумела, што ад пачатку да канца ўвесь ланцужок сканцэнтраваны па вытворчасці ў адных руках. І продажы ў тым ліку. І прыбытак вы дзеліце. І гэтак далей. Але мяне цікавіць: гэта карпарацыя як ідэя або практыка ўжо кладзецца на вашу "грэшную" "Белдзяржхарчпрамаўскую" зямлю?"

Аляксандр Лукашэнка спытаў, што плануецца ў выніку атрымаць ад такога кроку. "Таму што рэформа дзеля рэформы нікому не патрэбна. Яна павінна быць эфектыўнай і прыносіць патрэбны, шуканы намі вынік. Перш за ўсё грашовы. Павінен прыбытак павялічвацца, рэнтабельнасць, эфектыўнасць функцыянавання гэтага аб'яднання", - падкрэсліў беларускі лідар.

Прэзідэнт запатрабаваў таксама надзейна забяспечыць захаванне інтарэсаў вытворцаў сельскагаспадарчай прадукцыі пры пастаўках перапрацоўшчыкам.

"Вы маеце цесныя адносіны, па прычыне таго што атрымліваеце сыравіну ад сялян, з сельгаспрадпрыемствамі. Гэта ўжо хутчэй да вас, Аляксандр Міхайлавіч, пытанне, якія ў іх ёсць праблемы ў гэтым плане, ці не крыўдзяць яны сялян", - адзначыў Прэзідэнт.

Аляксандр Лукашэнка падкрэсліў, што ні ў якім разе нельга крыўдзіць людзей, занятых у сельскай гаспадарцы. "І не таму, што вы застаняцеся без сыравіннай базы. Вы яе ніколі не страціце. Таму што дзяржава будзе рабіць усё для таго, каб гэта сыравінная база была. Але сялян проста па азначэнні крыўдзіць нельга. Яны ў нас не самыя багатыя", - акцэнтаваў увагу беларускі лідар.