Кіраўнік Адміністрацыі Прэзідэнта Дзмітрый Крутой прыняў удзел у пасяджэнні Групы высокага ўзроўню Саўміна Саюзнай дзяржавы

Кіраўнік Адміністрацыі Прэзідэнта Беларусі Дзмітрый Крутой 27 верасня прыняў удзел у пасяджэнні Групы высокага ўзроўню Савета Міністраў Саюзнай дзяржавы.

"Галоўная мэта нашай работы - гэта, вядома, стварэнне камфортных умоў для жыцця грамадзян. Прэзідэнтам Беларусі падкрэслена неабходнасць удзяляць асаблівую ўвагу вырашэнню звычайных злабадзённых пытанняў, з якімі сутыкаюцца нашы людзі, каб яны бачылі, асабліва напярэдадні юбілею, што Саюзная дзяржава - гэта магутнае аб'яднанне, добры праект, здольны вырашаць усе праблемы. Праведзены комплексны аналіз пытанняў, якія патрабуюць неадкладных рашэнняў. Сёння мы заслухаем профільныя ведамствы аб сістэмных прапановах у розных галінах сацыяльна-гуманітарнай сферы", - сказаў Дзмітрый Крутой.

Так, у полі пастаяннай увагі Групы высокага ўзроўню знаходзіцца кошт роўмінгу на тэрыторыі Саюзнай дзяржавы. "Таксама ёсць добрыя зрухі па пагадненні аб узаемным прызнанні віз. Разлічваем, што сумеснымі намаганнямі мы нарэшце справімся з чэргамі на нашых граніцах - і сухапутных, і паветраных, і вырашым гэту праблему. З 1 лістапада будзе запушчаны дадатковы электрапоезд "Ластаўка" па маршруце Мінск-Масква. Гэта вельмі своечасовае рашэнне з улікам росту пасажырскіх перавозак паміж нашымі краінамі на 20 працэнтаў. Сёння ў нас у рэгулярных зносінах курсіруюць 22 паязды. Масква, Санкт-Пецярбург, Калінінград, Мурманск, Архангельск, Самара, Ніжні Ноўгарад - геаграфія расійскіх гарадоў расце. Нельга зніжаць работу і па прамых авіярэйсах. Але там таксама добрая лічба ад 30% да 40% росту", - адзначыў Кіраўнік Адміністрацыі Прэзідэнта.

"Тэма роўмінгу перацякае ад пасяджэння да пасяджэння. Дасягнута прынцыповая дамоўленасць, што лідары нашых краін на юбілейным пасяджэнні Вышэйшага Дзяржсавета дадуць старт гэтаму праекту. Можа, у пілотным рэжыме, можа, у паўнацэнным рэжыме мы яго запусцім. Гэта дакладна. Гэта ўжо фактычна 100%", - сказаў Дзмітрый Крутой.

У адказ на ўдакладняльнае пытанне ён пацвердзіў, што размова ідзе аб поўнай адмене роўмінгу ў Саюзнай дзяржаве.

"Тэма лічбавізацыі таксама актуальна. У Прэзідэнта на подпісы знаходзіцца рашэнне аб узаемным прызнанні электроннага лічбавага подпісу ў Беларусі і Расіі. Цэлы блок пытанняў мы гэтым разблакіруем, у тым ліку звязаных з доступам беларускіх кампаній да дзяржзакупак расійскіх карпарацый, з якімі ўжо адпаведныя перагаворы вядуцца. Для нас гэта таксама патэнцыяльна вялізны сегмент беларускага экспарту тавараў", - адзначыў Кіраўнік Адміністрацыі Прэзідэнта.

Таксама на пасяджэнні абмяркоўваўся шэраг галіновых пытанняў, звязаных з рынкам лесаматэрыялаў, прадукцыі лёгкай прамысловасці і іншымі напрамкамі. "Высветлілася, што існуе больш шырокая кааперацыя паміж нашымі кампаніямі, якая патрабуе большага ўключэння. Па рынку хімічных ніцей, хімічнай прадукцыі мы выйшлі на больш сістэмныя рашэнні. Гэта лішні доказ эфектыўнасці пляцоўкі Групы высокага ўзроўню. Мы стараемся тут выкрышталізоўваць тыя рашэнні, якія далей пойдуць на саюзны Саўмін і Вышэйшы Дзяржсавет", - падкрэсліў Дзмітрый Крутой.