Зменены парадак заахвочвання дзеячаў культуры і спартсменаў спецпрэміямі Прэзідэнта
Кіраўнік дзяржавы Аляксандр Лукашэнка 10 лістапада падпісаў указы № 350 і № 351, якімі ўдасканальваецца дзейнасць фонду Прэзідэнта Беларусі па падтрымцы культуры і мастацтва і рэгулююцца падыходы да заахвочванняў спецыяльнымі прэміямі дзеячам культуры і мастацтва, прэміямі "За духоўнае адраджэнне" і "Беларускі спартыўны Алімп".
Цяпер фонд Прэзідэнта Беларусі па падтрымцы культуры і мастацтва будзе таксама аказваць падтрымку праектам па патрыятычным выхаванні насельніцтва, захаванні нацыянальных духоўных традыцый, вяртанні культурных каштоўнасцей, а таксама сацыяльным праектам і ініцыятывам для асобных катэгорый грамадзян (дзеці-сіроты, інваліды, састарэлыя і іншыя).
Прадугледжваецца прапарцыянальнае фінансаванне рамонтна-рэстаўрацыйных работ на гісторыка-культурных каштоўнасцях са сродкаў мясцовых бюджэтаў, спонсарскай дапамогі, іншых крыніц і сродкаў фонду, сфарміраваных з адлічэнняў ад прадпрымальніцкай дзейнасці і кампенсацыі за ўрон, прычынены гісторыка-культурнай каштоўнасці. Падтрымка па рэгіёнах будзе размяркоўвацца раўнамерна.
У падставы для прысуджэння прэміі "За духоўнае адраджэнне" ўключана дзейнасць па патрыятычным выхаванні моладзі і рэалізацыі дабрачынных праектаў. Дапоўнены віды мастацтваў, у якіх прысуджаецца спецыяльная прэмія дзеячам культуры і мастацтва.
Значна павялічаны памер прэміі "Беларускі спартыўны Алімп" - да 350 базавых велічынь (па аналогіі з памерамі прэміі "За духоўнае адраджэнне" і спецыяльных прэмій дзеячам культуры і мастацтва). Дадзена магчымасць яе прысуджэння калектывам работнікаў арганізацый, якія ўнеслі значны ўклад у развіццё фізічнай культуры і спорту.
Таксама ўстаноўлены ўніфікаваны парадак пазбаўлення спецыяльных прэмій дзеячам культуры і мастацтва, прэмій "За духоўнае адраджэнне" і "Беларускі спартыўны Алімп" і аднаўлення ў правах іх лаўрэатаў.
