Сустрэча са старшынёй Партыі сацыялістаў Рэспублікі Малдова Ігарам Дадонам

Прэзідэнт Беларусі Аляксандр Лукашэнка 12 ліпеня сустрэўся з малдаўскім палітыкам і экс-прэзідэнтам Ігарам Дадонам, які цяпер займае пасаду старшыні Партыі сацыялістаў Рэспублікі Малдова (ПСРМ).

"Жывы!" - прывітаў Кіраўнік дзяржавы ў сваім рабочым кабінеце Ігара Дадона.

"Не дачакаюцца! - адказаў малдаўскі госць. - Аляксандр Рыгоравіч, вельмі рады!"

"Мы заўсёды гатовы да супрацоўніцтва з Малдовай, - заявіў беларускі лідар. - Хацелася б даведацца, як усё ж такі жывуць нашы браты-малдаване. Вельмі хацелася б, каб там быў парадак, каб вы перажылі гэты складаны час".

"Вы ад нас адарваныя вайной, на жаль. Лагістыка ўскладнілася. Але свет цесны. Няма безнадзейных сітуацый. Таму, калі ў кіраўніцтва Малдовы, у народа Малдовы будзе жаданне вярнуцца да нашага супрацоўніцтва і прымножыць яго, Ігар Мікалаевіч, ведайце, што вы для нас там не чужы чалавек. Мы гатовы праз вас, калі вы пагодзіцеся, аказваць садзейнічанне, аднавіць усё тое, што было страчана за гэтыя гады", - сказаў Аляксандр Лукашэнка.

Ён упэўнены, што аднавіць гэтыя адносіны не складана: "Шлях прабіты, пракладзены. Мы ведаем, што трэба Малдове. Вы ведаеце нас добра. Мы заўсёды былі абавязковыя ў адносінах з вамі і гатовы гэтак жа дзейнічаць".

Аляксандр Лукашэнка падзякаваў Ігару Дадону за тое, што той, нягледзячы на ўсе цяжкасці і складанасці, прыехаў у Беларусь, і пацікавіўся інфармацыяй з першых вуснаў аб тым, што цяпер адбываецца ў Малдове: "Мы ў асноўным атрымліваем са сродкаў масавай інфармацыі (звесткі аб падзеях у Малдове. - Заўвага). Зразумела, ёсць і іншыя людзі, якія нас інфармуюць. Але важна пачуць ад цябе абстаноўку і сітуацыю".

"Маё стаўленне да Малдовы ведаеш. Гэта квітнеючы сад, у якім жыве цудоўны народ, працавіты вельмі народ, вельмі падобны да беларусаў. На жаль, так склалася, што мне вельмі складана пабываць у Малдове з-за той палітыкі, якую там вы праводзіце цяпер", - адзначыў беларускі лідар.

"Не мы. Яны (цяперашнія ўлады ў Малдове. - Заўвага)", - удакладніў Ігар Дадон.

"Зразумела. Таму я сапраўды, калі даведаўся, што ты будзеш у нас, шмат думаў пра Малдову, успамінаў нашы сустрэчы. Успамінаў, як мы там спрабавалі пасеяць добрае насенне. Кажуць, нядрэнна ўзышло (у час візіту ў Малдову ў 2018 годзе Аляксандр Лукашэнка і Ігар Дадон на трактарах засеялі поле кукурузы. - Заўвага)", - прадоўжыў Аляксандр Лукашэнка.

"Найбольшае, што ў мяне выклікала жах, гэта размовы ў Малдове наконт нібыта страты незалежнасці Малдовы і ўключэння ў склад суседняй дзяржавы. Катастрофа, - сказаў Прэзідэнт. - Але я гэтаму не веру. Таму што малдаване, жыхары Малдовы, асабліва Кішынёва, людзі даволі разумныя".

"Няма такога народа, які самастойна пазбавіў бы сябе незалежнасці сам па сабе. Я гэта чую, але ў гэта не веру", - дадаў Аляксандр Лукашэнка.

"Мая вам парада даўняга палітыка: не рвіцеся вы ні ў якія саюзы (гаворка пра Еўрасаюз. - Заўвага), ніхто вас нідзе не чакае. Вы бачылі, як любілі еўрапейцы, напрыклад, Украіну. Як толькі Украіна транзітам праз ЕС хацела паставіць збожжа ў мінулым годзе, яе пачалі блакіраваць, не далі правезці. Нават у Афрыку Украіна не магла паставіць гэта збожжа. Паводле той інфармацыі, якую мы атрымліваем. Вы што, думаеце, малдаван там чакаюць і асаблівае будзе стаўленне? Гэтак жа будзе з вашай аграрнай прадукцыяй, віном і гэтак далей і да таго падобнае", - сказаў Прэзідэнт Беларусі.

"Калі ты быў Прэзідэнтам, ты праходзіў ужо ўсё гэта. Я памятаю, калі табе даводзілася прасякаць акно зноў сюды на ўсход - у Беларусь, Расію - для таго, каб жыў народ Малдовы. Таму мая вам парада: шануйце сваю зямлю, няма больш цудоўнага кутка ў свеце, чым Малдова. Мне так здаецца з савецкіх часоў", - дадаў Аляксандр Лукашэнка.

Ён адзначыў, што ў савецкія часы шмат разоў бываў у Кішынёве і не толькі. "Вельмі прыгожы, вельмі добры, вельмі прыстойны народ. І мне вельмі хацелася б, каб менш было там праблем. Калі ад нас нешта залежыць, і ў гэтай сітуацыі, і ў будучым, - скажы, мы будзем побач з нашымі сябрамі", - запэўніў беларускі лідар.

Ігар Дадон у сваю чаргу адзначыў, што рады знаходзіцца ў Беларусі і мець магчымасць сустрэцца з беларускім лідарам. "Хачу адразу Вас запэўніць, што малдаўскія грамадзяне - не ўлада цяперашняя, а малдаўскія грамадзяне - у большасці сваёй лічаць беларусаў сваімі братамі. Паводле ўсіх апытанняў, Аляксандр Рыгоравіч Лукашэнка - у першых радках па падтрымцы лідараў іншых краін унутры Рэспублікі Малдова", - сказаў ён.

Малдаўскі палітык выказаў шкадаванне наконт таго, што апошнія 3-4 гады двухбаковы парадак дня паміж Малдовай і Беларуссю фактычна адсутнічае, што, безумоўна, у негатыўным плане паўплывала і на гандлёва-эканамічнае супрацоўніцтва. Немалаважным фактарам, які значна ўскладніў лагістыку ў гандлі, стала і сітуацыя ва Украіне. Але, тым не менш, намячаюцца некаторыя зрухі ў лепшы бок, адзначыў Ігар Дадон, і аб гэтым, паводле яго слоў, пойдзе размова ў час сустрэчы з Кіраўніком беларускай дзяржавы. "Мы хочам вярнуць наш стратэгічны дыялог, якім ён быў, калі мы займаліся нашымі двухбаковымі адносінамі", - выказаўся ён наконт будучага супрацоўніцтва з Беларуссю.

Палітык выказаў салідарнасць з меркаваннем Аляксандра Лукашэнкі аб неабходнасці для Малдовы зрабіць правільны геапалітычны выбар. Ён таксама падзякаваў Аляксандру Лукашэнку за тое, што ў 2018 годзе Прэзідэнт Беларусі і іншыя лідары ЕАЭС падтрымалі рашэнне аб прадастаўленні Малдове статусу наглядальніка ў ЕАЭС.

У час сустрэчы Ігар Дадон паднёс Кіраўніку беларускай дзяржавы сімвалічны падарунак. Ён нагадаў, што ў маі ў час прыезду ў Мінск міністр абароны Расіі Андрэй Белавусаў падарыў Аляксандру Лукашэнку набор "Узнагароды пераможцаў" з выкананымі ў натуральную велічыню копіямі ўзнагарод Савецкага Саюза. У гэтым наборы былі прадстаўлены выключна ордэны, але там не было медалёў, адзначыў Ігар Дадон. Таму ў якасці падарунка ён прывёз у Мінск набор медалёў часоў Вялікай Айчыннай вайны.