Урачыстая цырымонія ўзнагароджання работнікаў культуры і гала-канцэрт майстроў мастацтваў

Прэзідэнт Беларусі Аляксандр Лукашэнка ўручыў дзяржаўныя ўзнагароды работнікам культуры. Урачыстая цырымонія адбылася 3 ліпеня, у Дзень Незалежнасці, у Нацыянальным акадэмічным Вялікім тэатры оперы і балета.

"Сёння цудоўны вечар. Ён завяршае святочныя мерапрыемствы, прысвечаныя Дню Незалежнасці нашай краіны. Мы, як з вамі і дамаўляліся ў свой час, адзначаем яго тут, ужо традыцыйна ў нашым Вялікім тэатры. Рады бачыць усіх вас у добрым здароўі і павіншаваць з гэтым вялікім святам!" - пачаў урачыстую цырымонію Кіраўнік дзяржавы.

Прэзідэнт падкрэсліў, што для беларусаў незалежнасць - гэта свабода і жыццё, падораныя пакаленнем пераможцаў. "І мы помнім, што ў розныя перыяды гісторыі нашы продкі адстойвалі гэту свабоду не толькі са зброяй у руках", - адзначыў беларускі лідар.

"Ніводны народ у свеце не можа быць па-сапраўднаму незалежным, не валодаючы багатай культурнай спадчынай і не маючы моцнай духоўнай асновы, - падкрэсліў Аляксандр Лукашэнка. - Ствараеце яе вы - людзі мастацтва. Менавіта вы фіксуеце гістарычны момант, адлюстроўваючы яго ў мастацкім слове, музыцы, жывапісе, архітэктуры і скульптуры, на кінастужцы, у лічбе. Іншымі словамі - на стагоддзі складаеце летапіс жыцця пакалення, жыцця нашай дзяржавы. Мы адыдзем, а гэта застанецца".

"Ваша творчасць - гэта тое, што мы называем гістарычнай памяццю і нацыянальным здабыткам. Тое, што робіць нас нацыяй і з'яўляецца адной з умоў нашага суверэнітэту", - дадаў Кіраўнік дзяржавы. Ён падкрэсліў, што менавіта ад майстроў мастацтваў у многім залежыць, ці будзе незалежнасць Беларусі ўмацоўвацца і перадавацца з пакалення ў пакаленне. Пры гэтым важна помніць і аб тым, што менавіта мы перададзім наступным пакаленням.

Аляксандр Лукашэнка ў час цырымоніі звярнуўся не толькі да ўзнагароджаных дзеячаў культуры, а да ўсёй творчай сям'і, да наследнікаў пераможцаў, якія і ў мірны, і ў ваенны час заўсёды былі з краінай, са сваім народам: "Мастацтва набліжала Вялікую Перамогу. Артысты абаранялі Радзіму, уздымаючы баявы дух салдат сваімі канцэртамі на перадавой. А хтосьці і ваяваў, як артысты нашага Вялікага тэатра. Сёння, вядома, тэма грамадзянскага абавязку, патрыятызму, адданасці інтарэсам краіны і ў культурным асяроддзі, і ў сучасных творах не гучыць так востра, як тады. На жаль".

"Але не забывайце - мір вельмі няўстойлівы, - звярнуў увагу Прэзідэнт. - Так, мы жывём пад чыстым небам, але ва ўмовах вайны - вайны інфармацыйнай, эканамічнай. Ва ўмовах беспрэцэдэнтных выклікаў нашай незалежнасці. І ад вас залежыць, якім будзе заўтра Беларусі, якой будзе будучыня нашых беларусаў".

"У пагоні за гучнай славай не губляеце пачуцця меры і вашай асабістай адказнасці, - падкрэсліў Аляксандр Лукашэнка. - Перайсці мяжу, за якой пачынаецца чарнуха і здрадніцтва, вельмі лёгка. А вось значна складаней вярнуць давер. Я гавару пра давер усяго народа. Вы павінны творча працаваць для народа і ў імя міру".

Кіраўнік дзяржавы запэўніў, што сапраўдны талент у Беларусі заўсёды будзе ацэнены па заслугах і ніводны геніяльны праект не застанецца без увагі. "Гэта я вам гарантую", - сказаў Прэзідэнт. Ён пажадаў работнікам культуры творчага натхнення, прызнання і поспеху, а таксама новых яркіх праектаў на карысць роднай Беларусі.

Аляксандр Лукашэнка адзначыў, што ў любой пазітыўнай сітуацыі, калі ўсё добра, знаходзіцца хто-небудзь, хто зайздросціць: "Камусьці добра, а нехта зайздросціць. Таму быць у акружэнні таго, што адбываецца каля граніц нашай краіны, такім некранутым кутком, дзе дзеткам добра і нам нядрэнна… Усё залежыць ад нас. Хочам лепш - будзе лепш. Не імкнёмся да лепшага - і не будзе лепшага".

"І не трэба ні ад кога патрабаваць потым нечага, калі ты сам недагледзеў, недарабіў, недапрацаваў", - дадаў Прэзідэнт.

Час зараз складаны і цяперашняму пакаленню даводзіцца няпроста, звярнуў увагу Аляксандр Лукашэнка. Магчыма, гэтак жа складана, як і папярэдняму пакаленню, якое аднавіла краіну з руін і попелу пасля вайны. "Не дай бог, вядома, перажыць тое, што было ў сярэдзіне мінулага стагоддзя на нашай зямлі", - заўважыў беларускі лідар.

"Складанасць у тым, што мы часам не бачым нашага праціўніка і ворага. Яго можаце ўбачыць толькі вы сваімі таленавітымі вачамі", - падкрэсліў Прэзідэнт.

Звяртаючыся да прадстаўнікоў таго пакалення, якое прыме эстафету ў цяперашняга, Кіраўнік дзяржавы сказаў: "Паўтараю каторы раз: будзьце вельмі акуратныя, не спяшайцеся, не дапускайце памылак. Памылкі вельмі дорага каштуюць грамадству. Асабліва памылкі творчых работнікаў. Таму што за вамі, за кожным стаіць шмат людзей, тысячы людзей, якія глядзяць на вас з надзеяй. Беражыце сваю Беларусь. Трэба нам зрабіць так, каб мы, і асабліва нашы дзеці, родныя і блізкія не зведалі тых жахаў, якія, на жаль, перажываюць некаторыя народы, родныя нам, і недалёка ад нашай краіны".

Кіраўнік дзяржавы ўручыў ордэн Францыска Скарыны пенсіянеру, заслужанаму работніку культуры БССР Галіне Качалавай. Медаль Францыска Скарыны прысуджаны артысту-вакалісту, вядучаму майстру сцэны Беларускага дзяржаўнага акадэмічнага музычнага тэатра Яўгену Ермакову, артысту хору Нацыянальнага акадэмічнага народнага хору Беларусі імя Г.І.Цітовіча Вікторыі Мачалінай, майстру народных мастацкіх рамёстваў Адэльскага цэнтра культуры і народнай творчасці Мар'яну Скрамблевічу і артысту тэатра лялек - вядучаму майстру сцэны Беларускага тэатра "Лялька" Юрыю Франкову.

У час цырымоніі Прэзідэнт таксама ўручыў нагрудныя знакі тым, хто ўдастоены ганаровых званняў. Народным артыстам Беларусі стаў артыст-вакаліст - вядучы майстар сцэны Нацыянальнага акадэмічнага Вялікага тэатра оперы і балета Станіслаў Трыфанаў. Звання заслужанага дзеяча мастацтваў Беларусі ўдастоены загадчык кафедры харэаграфіі Беларускага дзяржаўнага ўніверсітэта культуры і мастацтваў Святлана Гуткоўская і загадчык кафедры жывапісу Беларускай дзяржаўнай акадэміі мастацтваў Уладзімір Масленікаў.

За ўрачыстай цырымоніяй узнагароджання работнікаў культуры адбыўся гала-канцэрт майстроў мастацтваў, на якім прысутнічаў і Прэзідэнт. Лепшыя калектывы краіны і вядучыя артысты прадставілі на сцэне тэатра як сучасныя, так і класічныя творы. У адзіную канву праграмы святочнага гала-канцэрта былі зведзены творы розных стыляў і жанраў: нумары з класічных опер, балетаў, мюзіклаў і сучасныя харэаграфічныя эцюды, літаратурна-музычныя інтэрмедыі. Фінальнай кропкай паказу стала выкананне ўсімі ўдзельнікамі канцэрта песні "Край прыгожых людзей", у якой дамінантай гучыць важная тэма любові да роднай зямлі і людзей, якія тут жывуць.