Нарада па пытанні ўдасканалення інфармацыйнай палітыкі

Прапановы па ўдасканаленні інфармацыйнай палітыкі абмеркаваны 31 мая на нарадзе ў Прэзідэнта Беларусі Аляксандра Лукашэнкі.

Звяртаючыся да ўдзельнікаў нарады, Прэзідэнт заявіў аб неабходнасці абмеркаваць далейшую стратэгію процідзеяння сучасным пагрозам у сферы нацыянальнай бяспекі.

"Да гэтай тэмы мы звяртаемся не ўпершыню, таму што яна прадаўжае быць актуальнай. І не проста прадаўжае быць, але націск на нас у сувязі з гэтым узмацняецца. Таму і процідзеянне павінна з нашага боку быць адпаведным, - адзначыў беларускі лідар. - Вы ведаеце, што выклікі, з якімі мы сёння сутыкаемся, - абсалютна не новая гісторыя. Амаль трэць стагоддзя мы будуем сваю дзяржаву і пастаянна зведваем ідэалагічныя, інфармацыйныя, ваенныя і псіхалагічныя пагрозы. Мы знаходзімся фактычна пад гэтым прэсінгам з боку калектыўнага Захаду - Вашынгтона і яго саюзнікаў. Намеры вядомыя: дэстабілізаваць грамадства, змяніць канстытуцыйны лад, прывесці да ўлады патрэбных людзей, паслухмяных Захаду. Узровень тэхналогій, кінутых на рэалізацыю гэтых мэт, вельмі высокі".

Аляксандр Лукашэнка заявіў аб неабходнасці выпрацаваць механізмы процідзеяння, контрмеры ў інфармацыйнай прасторы. "Задачы перад намі стаяць няпростыя, але вырашальныя", - упэўнены Кіраўнік дзяржавы.

Кіраўнік дзяржавы адзначыў, што калектыўны Захад спрабуе ўздзейнічаць на Беларусь з выкарыстаннем псіхалагічных аперацый і методык уплыву на свядомасць людзей.

"Гледзячы на Украіну, мы разумеем, што там разгортваецца сцэнарый, не рэалізаваны на нашай зямлі. Калі задаём пытанне, а што было б з намі, калі ласка, глядзіце на Украіну. Мы разумеем узровень пагроз, актыўнасць якіх усяго толькі перамясцілася на тэрыторыю суседняй краіны", - заявіў Аляксандр Лукашэнка.

"Трэба разумець, што людзі, якія сочаць за навінамі, не заўсёды могуць аддзяліць праўду ад хлусні. Калі не з'яўляешся рэальным удзельнікам падзей і атрымліваеш вялікую колькасць інфармацыі ў выглядзе фэйкаў, сапраўды цяжка праўду ад хлусні аддзяліць. На Захадзе палітыку ў прынцыпе даўно ператварылі ў пастановачнае кіно, шоу. Людзей прывучылі да такога фармату падачы інфармацыі, таму праўда часам нецікавая. Больш цікавы фэйк, шоу. Таму што прыгожа пастаўлены", - сказаў Прэзідэнт.

Ён канстатаваў, што рэальнасць часам сумная і не такая яркая, як хлусня і фэйкі. "І ў гэтым галоўная праблема. У выніку мы бачым: нават прымітыўна сфабрыкаваныя сюжэты прымаюцца людзьмі на веру. А любая вайна, перш за ўсё негарачая, гібрыдная вайна, гэта барацьба за розумы людзей. І мы павінны абараніць нашых людзей. Пытанне, як. Аб гэтым мы і будзем размаўляць. Самае галоўнае - мы павінны ўмець весці контрпрапаганду, як яе называлі раней у Савецкім Саюзе, - сказаў беларускі лідар. - Я і сёння не адмаўляюся ад гэтага. Так, не трэба баяцца гэтага слова - прапаганда. Мы прапагандуем лепшае, агітуем за лепшае. Раней былі аддзелы прапаганды і агітацыі ў ЦК партыі і да райкомаў. Прапагандавалі свой лад жыцця, вялі барацьбу, агітавалі за ўсё лепшае, як мы гэта разумелі".

Паводле слоў Аляксандра Лукашэнкі, і цяпер так адбываецца, перш за ўсё на Захадзе. "Толькі з нас пасмейваюцца: "Прапагандысты, агітатары..." Чаму пасмейваюцца? Каб нас збіць з панталыку. Таму няма нічога небяспечнага, калі мы будзем прапагандаваць свой лад жыцця, сваё і агітаваць за гэта. Але трэба навучыцца весці і контрпрапаганду супраць той прапаганды, якая разгорнута супраць нас. Трэба выпрацаваць механізмы процідзеяння, контрмеры", - падкрэсліў беларускі лідар.