Разгляд кадравых пытанняў

Прэзідэнт Беларусі Аляксандр Лукашэнка 15 студзеня разгледзеў кадравыя пытанні.

Прэзідэнт назначыў:

Рагожніка Аляксандра Мікалаевіча - старшынёй Віцебскага аблвыканкама;

Лабовіча Андрэя Валянцінавіча - Міністрам працы і сацыяльнай абароны;

Харлап Таццяну Віктараўну - кіраўніком дзяржаўнай установы "Адміністрацыя Кітайска-Беларускага індустрыяльнага парка "Вялікі камень";

Біленка Алу Валер'еўну - намеснікам Старшыні Нацыянальнага статыстычнага камітэта.

Кіраўнік дзяржавы таксама даў згоду на назначэнне:

Клішо Ігара Лявонцьевіча - намеснікам старшыні Магілёўскага аблвыканкама (пытанні будаўніцтва і ЖКГ);

Асмалоўскай Наталлі Мікалаеўны - старшынёй Касцюковіцкага райвыканкама;

Патапенкі Максіма Валянцінавіча - старшынёй Слаўгарадскага райвыканкама;

Дарожкіна Сяргея Анатольевіча - старшынёй Чавускага райвыканкама;

Машарскага Кірыла Генадзьевіча - дырэктарам дзяржаўнай установы "Нацыянальнае агенцтва па турызме";

Парфіевіча Андрэя Мікалаевіча - рэктарам установы адукацыі "Брэсцкі дзяржаўны тэхнічны ўніверсітэт";

Назаранка Ірыны Вячаславаўны - рэктарам установы адукацыі "Гомельскі дзяржаўны медыцынскі ўніверсітэт";

Кулака Віталя Уладзіміравіча - першым намеснікам Міністра сельскай гаспадаркі і харчавання;

Дарафейчыка Ігара Аляксандравіча - намеснікам Міністра сельскай гаспадаркі і харчавання;

Кавалёва Аляксандра Валянцінавіча - генеральным консулам Рэспублікі Беларусь у г.Уфа (Расійская Федэрацыя).

"Адразу хачу сказаць для віцебскіх людзей: гэта не надзвычайшчына, - растлумачыў Кіраўнік дзяржавы сваё кадравае рашэнне па змене кіраўніка рэгіёна. - Але вобласць мае патрэбу ў нейкім прарыве".

На мерапрыемстве ў Кіраўніка дзяржавы таксама прысутнічалі Кіраўнік Адміністрацыі Прэзідэнта Дзмітрый Крутой, Старшыня Савета Рэспублікі Нацыянальнага сходу Наталля Качанава, Старшыня Палаты прадстаўнікоў Нацыянальнага сходу Ігар Сергяенка, які таксама з'яўляецца ўпаўнаважаным прадстаўніком Кіраўніка дзяржавы ў Віцебскай вобласці, памочнік Прэзідэнта - інспектар па Віцебскай вобласці Уладзімір Юргевіч і першы намеснік старшыні Віцебскага аблвыканкама Сяргей Ляўковіч.

Прэзідэнт адзначыў, што ў Віцебску 24 кастрычніка мінулага года адбылася нарада па развіцці рэгіёна, які знаходзіцца ў складанай сітуацыі. Пасля гэтага адказныя службовыя асобы высокага ўзроўню "вельмі сур'ёзна ўзяліся за гэту вобласць у плане вывучэння абстаноўкі, сітуацыі і кантролю за тым, што адбываецца, перш за ўсё ў сельскай гаспадарцы і прамысловасці", канстатаваў Кіраўнік дзяржавы. Аляксандр Лукашэнка разлічвае, што мясцовыя кадры мабілізуюцца і выканаюць тое, на што была звернута асаблівая ўвага. "Проста мы працавалі па-даўнейшаму, пра гэта ўжо таксама шмат гаварылася. Трэба свежым позіркам паглядзець на праблемы, якія там існуюць, і дзейнічаць", - арыентаваў Кіраўнік дзяржавы.

Ён падкрэсліў, што пакінуць Віцебскую вобласць без належнай увагі ці кінуць яе ніяк нельга. Хоць з пункту гледжання эканомікі для краіны не крытычныя тыя аб'ёмы сельскагаспадарчай або прамысловай вытворчасці, якія дае Віцебская вобласць.

"Без той прадукцыі, асабліва сельскай гаспадаркі, якую вырабляе сёння Віцебская вобласць, краіна можа абысціся лёгка. І пасол у Расіі (Аляксандр Рагожнік да назначэння старшынёй Віцебскага аблвыканкама працаваў паслом Беларусі ў Расіі. - Заўвага) гэта ведае, як ніхто іншы. Дай бог прадаць і спажыць тое, што мы сёння вырабляем без Віцебскай вобласці. Але Віцебская вобласць - гэта частка нашай краіны, там жывуць добрыя людзі, - заявіў Аляксандр Лукашэнка. - Страціць яе мы не можам. Тым больш там велізарныя рэсурсы сканцэнтраваны. Проста трэба пераарыентавацца на гэтыя рэсурсы, паглядзець на людзей, якія там працуюць, вырашыць іх праблемы (тыя, якія мы павінны вырашыць, і перш за ўсё на ўзроўні вобласці) і потым патрабаваць з іх".

"Мы ніяк не можам кінуць Віцебскую вобласць. Яшчэ раз падкрэсліваю: гэта не размовы ўлады аб тым, што мы павінны забыць наш паўночны край", - дадаў Прэзідэнт.

Наконт кандыдатуры новага старшыні аблвыканкама Прэзідэнт адзначыў, што для Аляксандра Рагожніка назначэнне на новую пасаду не стала навіной. "Мы з ім сустракаліся, абмяркоўвалі, - сказаў Кіраўнік дзяржавы. - Я разумею, што гэта няпросты крок, я разумеў гэта, таму напярэдадні сустракаўся, абмяркоўваў з ім гэтыя праблемы". 

"Але мяне ў гэтым плане вабіць у яго рыса характару: гэта чалавек з жорсткім стрыжнем, дысцыплінаваны. А чаго не хапае сёння ў Віцебскай вобласці? Толькі дысцыпліны", - звярнуў увагу Прэзідэнт.

Ён яшчэ раз нагадаў свайму ўпаўнаважанаму па рэгіёне і першаму намесніку старшыні аблвыканкама, што яны разам з кіраўніком вобласці перш за ўсё нясуць адказнасць за тое, што адбываецца ў Віцебскай вобласці. І Кіраўнік дзяржавы чакае хуткіх і эфектыўных дзеянняў. "На жаль, часу на разварушванне я вам даць не магу. Яго проста няма. Вам трэба ўжо з сённяшняга дня не думаць, а дзейнічаць", - падкрэсліў Аляксандр Лукашэнка. 

"Часу на тое, каб разварушыцца, Аляксандр Мікалаевіч, гэтага часу няма. Ты ўжо прыгледзеўся, Міністрам працаваў (Аляксандр Рагожнік быў Міністрам прамысловасці ў 2022-2024 гадах. - Заўвага), збоку на Беларусь паглядзеў з галоўнага нашага рынку (у перыяд работы паслом Беларусі ў Расіі. - Заўвага). Табе і карты ў рукі", - сказаў Прэзідэнт.

Ён падкрэсліў, што адказныя за развіццё вобласці службовыя асобы высокага ўзроўню будуць аказваць усялякую падтрымку. "Ніхто табе перашкаджаць не будзе. Будуць толькі дапамагаць, - запэўніў Кіраўнік дзяржавы. - Ніякага націску. Я абяцаў, што перашкаджаць мы яму не будзем". Аляксандр Лукашэнка асабліва адзначыў садзейнічанне, якое павінна быць аказана з боку Камітэта дзяржкантролю. "Няхай там шукаюць разам вузкія месцы і ліквідуюць іх", - паставіў задачу Прэзідэнт.

"Дзейнічай, усё ў тваіх руках", - даў наказ новаму кіраўніку Віцебскай вобласці Кіраўнік дзяржавы.

І калі з вырашэннем бягучых задач у жыллёва-камунальнай сферы мясцовыя ўлады спраўляюцца, нават ва ўмовах моцных снегападаў, то ў іншых прыярытэтных для краіны сферах яшчэ ёсць над чым працаваць. 

"Вы бачыце, Гасподзь нас правярае (і правільна робіць). Правярае нас на трываласць, на стойкасць. З гэтымі снежнымі заносамі мы справіліся (я ўпэўнены, што справіліся). Ну, разберацеся, як там у Віцебскай вобласці. У бліжэйшы час і я пагляджу. А вось захаванасць жывёлы, асабліва маладняку, - вам трэба сур'ёзна гэтым займацца, - абазначыў задачы на бліжэйшую перспектыву Кіраўнік дзяржавы. - І хачу вас папярэдзіць, барані бог, там у вас будзе назірацца мор маладняку".

Аляксандр Лукашэнка таксама папярэдзіў, што ва ўрадзе плануецца правесці нараду, у тым ліку па сітуацыі ў сельскай гаспадарцы. "Разбяромся з усімі абласцямі. У нас праблем хапае і ў Магілёўскай, і ў Віцебскай, і ў Брэсцкай, і ў Гродзенскай абласцях, і ў Мінску. Гэтыя праблемы ўсюды сустракаюцца. Але ў Віцебскай вобласці яны проста цвітуць і пахнуць, яны працвітаюць", - указаў ён.

"Таму адразу вас папярэджваю: барані бог, мне даложаць ці, не дай бог, я ўбачу, як вы ні хаваліся б, гібель маладняку жывёл. Раздайце па дварах, рабіце што хочаце, але трэба выратаваць і абараніць будучыню вашых зарплат і даходаў", - падкрэсліў Кіраўнік дзяржавы.

Паводле яго слоў, Прэм'ер-міністру дадзена даручэнне забяспечыць Віцебскую вобласць усім неабходным для таго, каб арганізаваць належныя ўмовы ўтрымання цялят, што набывае асаблівую актуальнасць у перыяд зімовых маразоў. Цяляты павінны знаходзіцца не на адкрытай прасторы ў пластыкавых боксах, а хаця б пад дахам. 

Пакуль, як заўважыў Прэзідэнт, прыкладаў бяздушнага стаўлення да жывёл у сельскай гаспадарцы хапае. Кіраўнік дзяржавы даручыў адказным асобам перадаць новаму кіраўніку вобласці звесткі аб гэтых і іншых раней выяўленых недахопах. "Яго як чалавека, які ў прамысловасці прапрацаваў, ахопіць жах, калі ўбачыць гэтыя "цуды", - сказаў Аляксандр Лукашэнка.

Сярод прыярытэтных задач у АПК для Віцебскай вобласці Прэзідэнт абазначыў будаўніцтва малочнатаварных комплексаў, комплексаў па адкорме і ўзнаўленні буйной рагатай жывёлы, а таксама свіней. "Там, па-мойму, аж паўмільёна тон мы некалі атрымлівалі. Сёння мы павінны крыху больш планаваць", - сказаў Аляксандр Лукашэнка.

У гэтым плане Віцебская вобласць можа ў поўнай меры разлічваць на дапамогу з боку дзяржавы. "Мы сваё плячо падставім, але мы павінны ведаць, куды будуць накіраваны дзяржаўныя грошы і, самае галоўнае, якая ад гэтага будзе аддача, - падкрэсліў Прэзідэнт. - Гэта нядобра, што мы комплексы пабудавалі (па краіне іх сотні пабудаваны ўжо), а яны не запоўнены добрай жывёлай. А некаторыя комплексы калі і запоўнены, то там карова дае малака, як каза. Паўстае пытанне, навошта мы будавалі гэтыя комплексы?"

"Таму правільна, што давялі паказчыкі для комплексаў: сем і вышэй тысяч кілаграм малака ад каровы. Інакш нельга", - дадаў Кіраўнік дзяржавы. І ў сувязі з гэтым перасцярог ад спроб завышаць даныя і рабіць прыпіскі: "Папярэджваю аб недапушчальнасці хлусні. Аляксандр Мікалаевіч, ніякай хлусні быць не павінна. Гэта недапушчальна".

"Вось на траіх вам задача. Справіцеся? Прыходзьце, патрабуйце і прасіце, у тым ліку ў мяне, тое, што вы палічыце патрэбным, - сказаў Прэзідэнт. - Не справіцеся - бяда. Адступаць далей няма куды". 

Аляксандр Лукашэнка звярнуў увагу, што да выканання пастаўленых задач абавязкова прыцягваць і прадстаўнікоў мясцовай вертыкалі, і ў цэлым усіх жыхароў вобласці. У гэтым сэнсе новаму старшыні аблвыканкама трэба выбудаваць правільную кадравую палітыку. "Вызначайцеся, з кім вы будзеце працаваць. Запрашайце перш за ўсё старшынь райвыканкамаў. Закруціце работу апарату аблвыканкама, - арыентаваў Прэзідэнт. - І пачынайце працаваць. Задачы даведзены, вызначаны".

Асобна Кіраўнік дзяржавы закрануў пытанні развіцця прамысловага сектара Віцебскай вобласці, дзе таксама ёсць праблемныя аспекты. Аляксандр Лукашэнка бачыць неабходнасць больш задзейнічаць патэнцыял прадпрыемстваў дрэваапрацоўкі і льнокамбіната. 

У сувязі з гэтым ён згадаў аб выкарыстанні мясцовых відаў паліва і вытворчасці ў Гомелі цвёрдапаліўных катлоў, якія працуюць на пелетах, што падаюцца ў аўтаматычным рэжыме. "Гэта добра для нас. Тым больш у нас столькі лесу прападае, перапрацоўваем у пелеты, - заўважыў Прэзідэнт. - Дык давайце ў сябе будзем гэта рабіць. Паставіў кацёл, бункер, аўтаматычна загружаецца... Катлы вырабляюць і маленькія, і вялікія, і на пасёлак на цэлы. Трэба гэтым займацца. Гэта ж сабекошт. Які б танны прыродны газ ні быў з Расіі, тым не менш ён будзе ў тры-пяць разоў даражэйшы, чым уласная драўніна. Шукайце, дзе зарабляць грошы".

Прэзідэнт паабяцаў загрузіць на поўную моц на іншай пасадзе Аляксандра Субоціна, які пакінуў пасаду старшыні Віцебскага аблвыканкама ў сувязі з пераводам на іншую працу.

Кіраўнік дзяржавы заўважыў, што многія называюць Аляксандра Субоціна добрым чалавекам, і Прэзідэнт "абсалютна не супраць такога пункту гледжання".

"Але, магчыма, час прайшоў (усё ж такі пяцігодка, па-мойму, пяты год), напружанне было вельмі сур'ёзнае вакол, і, як Дзмітрый Мікалаевіч (Крутой, Кіраўнік Адміністрацыі Прэзідэнта. - Заўвага) кажа, выгараў. Я, вядома, з такімі фармулёўкамі не згодны. Ну, можа, выгараў. Можа, адчуў, што, напэўна, не яго. Усё ж такі быць кіраўніком - гэта вельмі-вельмі няпроста. Усе вы кіраўнікі, і гэта ведаеце і разумееце", - сказаў Аляксандр Лукашэнка.

"Таму, гаворачы пра Субоціна, я хачу сказаць, што гэты чалавек абсалютна не страчаны для краіны. І мы тут плануем - у бліжэйшы час даведаецеся - загрузіць яго на поўную моц, загрузіць яго з ног да галавы. Калі характар ёсць, то пацягне. Гэта датычыцца знешняга контуру нашай краіны і іншых напрамкаў, дзе трэба сур'ёзна папрацаваць, - расказаў Прэзідэнт. - Мы яго паспрабуем задзейнічаць па тым напрамку, якім ён добра валодае".

Узгадняючы назначэнне трох новых старшынь выканкамаў і намесніка старшыні Магілёўскага аблвыканкама, Аляксандр Лукашэнка сказаў: "Ад вас усё залежыць. Вы людзі зусім маладыя, але памятаеце, як яшчэ было ў Савецкім Саюзе. Раён быў нармальнай адзінкай. Былі свае абслуговыя прадпрыемствы - і будаўнічая ПМК, і дарожная. Яны цяпер у нейкім элеменце захаваліся. Райаграсэрвісы ёсць, мы іх цяпер аднаўляем. Я разумею, што вы ў тэме. Старшыня выканкама павінен пад рукой мець усё - ад будаўніцтва да вытворчасці і ў прамысловасці, і ў сельскай гаспадарцы. Вядома, у асноўным гэта сельскагаспадарчая вытворчасць, але ёсць і прамысловыя прадпрыемствы".

У сувязі з гэтым Кіраўнік дзяржавы адзначыў, што раён трэба рабіць адасобленай адзінкай, каб людзі, якія жывуць там, маглі атрымліваць адпаведнае абслугоўванне і паслугі: "Я не гавару пра школы, дзіцячыя сады (у нас іх хапае), пра ахову здароўя. Тут сістэма выбудавана, толькі (трэба. - Заўвага), каб парадак быў".

"Добра, што няма беспрацоўя, але ёсць іншая праблема: недзе не хапае людзей. Але гэта мы прывыклі па-даўнейшаму: "Не хапае людзей". Людзей у нас хапае, толькі трэба арганізаваць так, як трэба. Кожны раён трэба зрабіць баявой адзінкай, дзе маглі б жыць людзі і атрымаць усё неабходнае: работа, зарплата, магазін, школа, ахова здароўя, дзіцячыя сады і гэтак далей. Асабліва для сельскай гаспадаркі райаграсэрвісы трэба аднаўляць. Вось замкнуты такі цыкл", - падкрэсліў ён.

Гаворачы пра развіццё рэгіёнаў, Аляксандр Лукашэнка звярнуў увагу і на такую ўдачную ідэю, як праграма "Адзін раён - адзін праект", рэалізацыю якой, паводле яго слоў, трэба прадаўжаць.

Прэзідэнт звярнуў асобную ўвагу на аграпрамысловы сектар і падкрэсліў, што кіраўніцтву раёна трэба бачыць кожную гаспадарку: "Іх стала значна менш, таму што аб'яднанне прайшло. Гэта буйнатаварныя вытворчасці калектыўныя. Іх разбураць не трэба".

Размова зайшла і аб паслугах ЖКГ, у тым ліку ацяпленні. Прэзідэнт зноў звярнуў увагу на неабходнасць больш шырокага выкарыстання драўнянага біяпаліва - у прыватнасці, пелетаў. "У нас ёсць катлы на пелетах, не трэба дровы падкідваць. Усё на аўтаматыцы - прыехаў, засыпаў... Але гэта ўсё трэба адбудоўваць, трэба гэта прыводзіць у парадак. Каб гэта не выглядала з майго боку нейкай казкай, якую вы паслухалі, пайшлі і забылі. Будзем у гэтым напрамку рухацца. У нас пяць гадоў для таго, каб вырашыць тыя задачы і тыя праблемы, якія мы павінны вырашыць. Гэта ваша задача", - сказаў Кіраўнік дзяржавы.

Аляксандр Лукашэнка таксама спыніўся на пытанні жылля: "Жыллё мы вам будзем дапамагаць будаваць арэнднае. Бясплатна нічога не будзе, нават не абяцайце".

Ён даручыў Кіраўніку Адміністрацыі Прэзідэнта Дзмітрыю Крутому, які з'яўляецца ўпаўнаважаным прадстаўніком Кіраўніка дзяржавы па Магілёўскай вобласці, арганізаваць кантроль за сітуацыяй у рэгіёне. "За табой кантроль, жорсткае запатрабаванне, каб Магілёўшчыну не давесці да Віцебскай вобласці. Хоць, давайце шчыра, недалёка яна па асобных напрамках. Там трэба працаваць і працаваць, укладвацца, асабліва ў вашых раёнах", - падкрэсліў беларускі лідар.

На заканчэнне Прэзідэнт заўважыў, што добра ведае раёны, кіраўнікі якіх былі ўзгоднены ў гэты кадравы дзень. "У вас там работы будзе дастаткова. І ў Слаўгарадзе, і ў Чавусах, і Касцюковічах. Усход... І ўсё ж такі, няхай невялікія льготы і іншае прадастаўляюцца. Проста трэба своечасова развівацца. Таму дзейнічайце", - даў наказ новым кіраўнікам раёнаў Аляксандр Лукашэнка.

Пры назначэнні Андрэя Лабовіча новым Міністрам працы і сацыяльнай абароны Кіраўнік дзяржавы заявіў: "Трэба, каб міністэрства гэта было відаць. Я не хачу папракнуць нашых жанчын, якія працавалі міністрамі да гэтага часу, але яны неяк сціпла выглядалі. Можа, гэта і добра? Трэба, каб міністэрства гэта гучала. З выгляду, напэўна, гэта вам падыходзіць. Трэба, каб быў рэзультат".

Звяртаючыся да Андрэя Лабовіча, Прэзідэнт падкрэсліў, што ён цяпер у адказе за вельмі сур'ёзную і адказную сферу. "Нашы прыярытэты арыентаваны на тое, што мы ў чалавечы капітал павінны ўкладвацца. А праца і сацыяльная абарона насельніцтва - гэта твой прыярытэт", - сказаў ён.

Аляксандр Лукашэнка пацікавіўся ў Кіраўніка Адміністрацыі Прэзідэнта наконт далейшай работы былога Міністра працы і сацыяльнай абароны. Дзмітрый Крутой далажыў, што кандыдатура Наталлі Паўлючэнка прапануецца ў парламент для работы старшынёй адпаведнай камісіі па сацыяльных пытаннях. 

"Год жанчын. Жанчын крыўдзіць ні ў якім разе нельга. Таму... Яна ж згодна працаваць у парламенце?" - удакладніў Аляксандр Лукашэнка.

"Вядома, вядома", - пацвердзіў Дзмітрый Крутой.

Даючы згоду на назначэнне новых рэктараў у дзве ВНУ - у Брэсце і Гомелі, Аляксандр Лукашэнка сказаў: "Любімая мая пасада. Я рэктарам ніколі не працаваў. Але мне здаецца, калі б я быў рэктарам, я ні на якую пасаду іншую не пайшоў бы. Гэта самае цікавае. Людзі адукаваныя. Няпростыя, зразумела. Ну і мы ж таксама не лыкам шыты. Таму людзі няпростыя, выкладчыкі, але разумныя людзі, адукаваныя. І моладзь, з якой можна вылепіць, стварыць любога чалавека. Гэта наша работа. Цікавая работа, няпыльная, як кажуць. Хоць сваіх нюансаў хапае. Таму я вам жадаю поспехаў".

Аляксандр Лукашэнка пры ўзгадненні назначэння новага рэктара ў Гомельскі дзяржаўны медыцынскі ўніверсітэт успомніў, як раней яму прапаноўвалі закрыць гэту ВНУ. Але час паказаў, што прынятае Кіраўніком дзяржавы рашэнне захаваць гэту навучальную ўстанову апраўдала сябе.

"Можна сказаць, гэта (універсітэт. - Заўвага) - маё роднае дзіця. Чаму? Таму што і да прэзідэнцтва шмат розных размоў было. Асабліва калі я стаў Прэзідэнтам, многія прапаноўвалі яго проста ліквідаваць. У прынцыпе, матывацыя была зразумелая. Мы маглі на існуючых базах у Мінску, Віцебску, Гродне дастаткова падрыхтаваць спецыялістаў. Але мне шкада было Гомельскі ўніверсітэт. І разумею, што гэта рэгіянальная ВНУ, дзе для рэгіёна - паўднёвага ўсходу, Магілёўшчыны і іншае (рыхтуюць спецыялістаў. - Заўвага). Юнакі і дзяўчаты больш простыя, можна сказаць, у добрым сэнсе слова. Яны і будуць у асноўным працаваць у рэгіёне. Мне неяк стала шкада медыкаў, гэтага ўніверсітэта. Я добра з ім знаёмы быў да прэзідэнцтва, бываў там не аднойчы, калі быў дэпутатам. Таму я сказаў: "Не, у мяне рука не паднімаецца ліквідаваць гэты ўніверсітэт". І цяпер я пераканаўся ў тым, што гэты ўніверсітэт можа жыць і развівацца", - сказаў беларускі лідар.

Ірына Назаранка, якая цяпер узначаліла ВНУ, падзякавала Прэзідэнту за падтрымку. "Удзячнасць - гэта добра. Але ты ж ужо рэктар, з цябе патрабаванне будзе асаблівае. Таму трэба ўмець працаваць з усімі. Вы ж усе разумныя вучоныя, ледзь не акадэмікі або будучыя акадэмікі. Трэба ўмець працаваць з усімі. І знаходзіць лепшае ў людзях, - сказаў Аляксандр Лукашэнка. - І не дапускай тых памылак, якія вы часам дапускалі там ва ўніверсітэце. Да людзей па-чалавечы трэба ставіцца, асабліва да вучоных".

Прэзідэнт таксама пацікавіўся перспектывамі далейшай работы былога рэктара Ігара Стомы, які пакінуў гэту пасаду па пагадненні бакоў і выказаў жаданне прадоўжыць працаваць у гэтым універсітэце, але ўжо на іншай пасадзе. Аляксандр Лукашэнка прапанаваў пашукаць для яго і іншыя варыянты працаўладкавання.

"Мы яму можам паглядзець і іншую работу. Стома - малады, перспектыўны чалавек. Калі ў яго ёсць нейкія недахопы, я не думаю, што ў яго там катастрафічныя недахопы. Стому нельга страціць. Гэта адназначна. Калі ён вельмі ўжо хоча працаваць ва ўніверсітэце… Проста, напэўна, ён не разглядаў іншыя варыянты з улікам некаторых нюансаў, - сказаў Аляксандр Лукашэнка. - Ён перспектыўны чалавек, на яго яшчэ можна грузіць, і ён павінен везці. І яшчэ і нямала вывезе. Таму Стоме можаце перадаць, што мы не хочам яго страціць. Я яго асабіста ведаю. Адукаваны, дасведчаны чалавек. А недахопы - у нас у кожнага яны ёсць. Трэба навучыцца іх зжываць, як раней гаварылі".

Узгадняючы назначэнне новага рэктара Брэсцкага дзяржаўнага тэхнічнага ўніверсітэта, якім стаў Андрэй Парфіевіч, Прэзідэнт расказаў аб планах стварыць у краіне адукацыйны цэнтр, куды збяруць лепшых студэнтаў па тэхнічных напрамках.

"Павінен сказаць, што мы разглядаем варыянт стварэння адукацыйнага цэнтра, назавём яго так. Можа, універсітэтам або цэнтрам (назавём. - Заўвага). Але сабраць туды па перспектыўных напрамках самых талковых людзей. Можа, іх тысяча будзе з часам, калі поўнасцю будзе ўкамплектаваны. Я чаму табе пра гэта гавару, таму што там ёсць чыста тэхнічны адзін напрамак, - адзначыў Кіраўнік дзяржавы. - Вядома, рэктары з нейкай рэўнасцю гэта ўспрымаюць. Тады я вырашыў проста рэктарам гэта даручыць стварыць".

"Па 20-30 чалавек мы будзем набіраць у год. І вось няхай тэхнары па краіне паездзяць. Вопыт ужо ёсць. Я сустракаўся з гэтым, таму што ў Пекінскі ўніверсітэт, дзе вучыцца малодшы, па краіне шукалі пяць чалавек. Ну я яшчэ 20 далучыў. Ён гаворыць, што вельмі моцныя хлопцы і дзяўчаты. Яны самі хочуць, іх не трэба прымушаць. Яны ведаюць, куды яны трапілі. Вядома, мы ва ўсе ВНУ такіх не знойдзем. Нам трэба будзе ў гэты цэнтр адбіраць, як зярняты, лепшых. І табе (рэктару ВНУ з Брэста. - Заўвага) давядзецца прыехаць лекцыю пачытаць або практычныя заняткі правесці, і з-за мяжы некага запрасіць", - сказаў Прэзідэнт.

Сярод перспектыўных запатрабаваных напрамкаў Аляксандр Лукашэнка назваў касмічныя апараты, праектаванне, будаўніцтва, біятэхналогіі на мяжы з медыцынай.

"Да гэтага трэба быць гатовымі. І без рэўнасці (з боку асобных ВНУ. - Заўвага), а, наадварот, сутыкнуцца і паўдзельнічаць у гэтым. Але вычленіць з грамадства вось гэтыя зярняты. Лепшых. Шмат іх не трэба. Часам адзін можа цэлы напрамак, школу стварыць і пацягнуць за сабой тысячы добрых спецыялістаў. Таму мы хочам стварыць такі цэнтр. Пакуль прапрацоўваем. У бліжэйшы час збяромся яшчэ раз, абмазгуем, падумаем. Тым больш што мы пабудавалі гэты цэнтр, яго трэба проста цяпер загрузіць", - сказаў Кіраўнік дзяржавы.

Аляксандр Лукашэнка пры ўзгадненні назначэння Кірыла Машарскага дырэктарам Нацыянальнага агенцтва па турызме актуалізаваў задачы, якія стаяць перад гэтай сферай.

"Што датычыцца агенцтва па турызме, доўга ішлі дэбаты. Я наогул вельмі акуратна стаўлюся да перастановак, пературбацый, перападпарадкаванняў. Лічу, што ў любой сітуацыі ў краіне, дзе ёсць парадак і дысцыпліна (а ўсё ж нейкія парадак і дысцыпліна ў нас ёсць), то можна было працаваць і ў старой сістэме каардынат, - сказаў Прэзідэнт. - Але мяне падкупіла тое, што за пяцігодку яны дабавяць, аж у два разы павялічаць. Калі з 2% да 4,5% ВУП турызм прыбавіць, гэта будзе здорава. Але гэта і для цябе цяжка будзе. Я гэта ўсё памятаю. І патрабаванне будзе за рэзультат. Вядома, з Урада. І "рабочы конь" - гэта ваша агенцтва. Таму вы павінны разумець гэта".

"Калі б у нас было больш магутнасцей па турызме цяпер, мы ўжо добрыя грошы зараблялі б. І гэтыя 4-5% ВУП дакладна давалі б. Але ў нас гэтых магутнасцей не хапае. Трэба існуючую базу прыводзіць у парадак і нарошчваць яе. Гэта ўжо ведамства разумее. Трэба гэта скаардынаваць і пракантраляваць. Калі нешта - неадкладная інфармацыя ва Урад. Калі трэба, дакладвайце на ўзровень Прэзідэнта, будзем прымаць меры і патрабаваць", - адзначыў Аляксандр Лукашэнка.

"Вялікая справа - калі да цябе прыязджаюць турысты. Я часта гавару: не трэба вазіць, прадукцыю прадаваць нейкую. Яны з задавальненнем купляюць нашы прадукты харчавання, адзенне, абутак, касметыку. Усё купляюць. Чаму купляюць? Таму што прымальнай якасці яна і цана больш-менш нармальная, - сказаў Кіраўнік дзяржавы. - Едуць людзі багатыя, якія маюць грошы, якія могуць гэтыя грошы патраціць. Ну і добра, няхай трацяць, купляюць прадукцыю і самі вывозяць. Нам менш цэнтралізавана будзе работы, таму турызм - гэта выдатна".

"Я быў у Амане нядаўна, мы размаўлялі з адказнымі людзьмі, - яны вельмі моцна развіваюць цяпер турызм. У Эміратах гэта наогул першы артыкул даходаў. Не нафта, не газ (у Эміратах гэтага дабра хапае), а турызм ужо на першым месцы. А на другім ужо там нафта і гэтак далей. Людзі прыязджаюць, трацяць велізарныя грошы. Я не хачу сказаць, што ў нас будзе, як у Эміратах. Ды і не трэба адразу так. Грошы няма куды будзе дзяваць. Але паціху трэба ў гэтым напрамку рухацца. У нас ёсць што паказаць і прапанаваць людзям", - заявіў Прэзідэнт.

"Еўропу загадзілі даўно, як бы яны там ні фанабэрыліся, ні гаварылі. Засталіся Беларусь і Расія, куды можна прыйсці, падыхаць свежым паветрам. А ў нас яшчэ і абзавесціся добрымі таварамі. Таму турызм трэба развіваць. І вось гэта навастворанае агенцтва (я лічу, не перападпарадкаванае, а зноў фактычна ствараемае ўжо на самым версе - ва ўрадзе) павінна даць пэўны вынік. Я вам жадаю ўсялякіх поспехаў", - заявіў Аляксандр Лукашэнка. 

Пры назначэнні Таццяны Харлап на пасаду кіраўніка дзяржаўнай установы "Адміністрацыя Кітайска-Беларускага індустрыяльнага парка "Вялікі камень" Прэзідэнт сказаў: "Што датычыцца "Вялікага каменя", я так падумаў, а справішся? Там не проста будзе. Там ужо аснова ёсць, але кожны год трэба дабаўляць". 

Кіраўнік Адміністрацыі Дзмітрый Крутой на гэта заўважыў, што Таццяна Харлап была якраз у ліку тых, хто першапачаткова ствараў гэты праект. 

"Гэта ўсё ведаю. Але яна ж ужо консулам папрацавала", - адзначыў Аляксандр Лукашэнка. 

Таццяна Харлап у сваю чаргу запэўніла, што і на новым месцы работы прыменіць напрацаваны вопыт. 

"Галоўнае, што Кітай ведаеш. Парк сваё развіццё павінен атрымаць. Рэзультат давядзецца даваць", - сказаў Прэзідэнт.