Разгляд кадравых пытанняў

Прэзідэнт Беларусі Аляксандр Лукашэнка 26 студзеня разгледзеў кадравыя пытанні.

Кіраўнік дзяржавы назначыў:

Вальфовіча Аляксандра Рыгоравіча - Дзяржаўным сакратаром Савета Бяспекі,

Герасімава Васіля Мікалаевіча - Старшынёй Камітэта дзяржаўнага кантролю,

Шулейку Юрыя Вітольдавіча - старшынёй Брэсцкага аблвыканкама.

Прэзідэнт таксама даў згоду на назначэнне:

Дзямідава Міхаіла Уладзіміравіча - старшынёй Клімавіцкага райвыканкама,

Ляшэнкі Ігара Васільевіча - генеральным дырэктарам ААТ "Гродна Азот",

Казакова Кірыла Уладзіміравіча - генеральным дырэктарам ЗАТ "Сталічнае тэлебачанне",

Любімава Андрэя Юр'евіча - членам Віцебскага аблвыканкама.

Назначаючы Аляксандра Вальфовіча на пасаду Дзяржаўнага сакратара Савета Бяспекі, Прэзідэнт падкрэсліў: "Ведайце, што час няпросты. Хістаць і разгойдваць нас будуць. Вы гэта бачыце па Расіі ўжо. Мы гэта ведалі і разумелі разам з кіраўніцтвам Расіі яшчэ ў сярэдзіне мінулага года. Для нас і для іх нечаканасцей тут ніякіх няма. Але тым не менш мы павінны навучыцца ў гэты цяжкі час процістаяць і ўнутраным нашым праціўнікам, і асабліва знешнім".

Гаворачы пра выбар кандыдатуры Аляксандра Вальфовіча, які да гэтага часу ўзначальваў Генштаб Узброеных Сіл, Кіраўнік дзяржавы адзначыў, што абмяркоўваў гэта пытанне з зацікаўленымі асобамі, у тым ліку Міністрам абароны. "Ён, вядома (як я зразумеў), як выканаўчы генерал, нічога не адмаўляў, на мае заўвагі і прапановы рэагаваў правільна, але з вялікай, я так адчуў у душы, нездаволенасцю згаджаўся на тое, што Вы пяройдзеце працаваць у Савет Бяспекі. Таму што, як ён сказаў, больш падрыхтаванага чалавека на сённяшні дзень у Генштабе няма. Вядома, напэўна, няма. Але мне здаецца, што знойдзем мы там людзей, якіх можна абучыць, якія могуць асвоіць гэтыя пасады. Мы проста абавязаны гэта зрабіць", - сказаў Аляксандр Лукашэнка.

Кіраўнік дзяржавы падкрэсліў, што Дзяржсакратар - гэта фактычна галоўны памочнік Прэзідэнта па рабоце з сілавымі структурамі. "Вы сістэмны чалавек, інакш не змаглі б працаваць начальнікам Генеральнага штаба, адукаваны і дасведчаны чалавек", - ахарактарызаваў Прэзідэнт Аляксандра Вальфовіча.

Больш таго, ён адзначыў, што менавіта Аляксандр Вальфовіч быў у эпіцэнтры ўсіх падзей і мерапрыемстваў апошняга часу. "Мы планавалі, перш за ўсё сіламі Генштаба, мерапрыемствы на знешняй граніцы па абароне нашай Айчыны, асабліва напярэдадні і пасля выбараў. Усе гэта памятаюць. І даволі паспяхова разгарнулі тады нашы падраздзяленні, вайсковыя часці. І адрэагавалі, спыняючы магчымыя нядобразычлівыя нападкі на нашу краіну і спробы стварыць нам залішнія праблемы. Гэта значыць, вось апошнім часам я вельмі блізка ўбачыў Вас на справе", - заявіў Прэзідэнт.

Звяртаючыся да Юрыя Шулейкі, які назначаны старшынёй Брэсцкага аблвыканкама, Кіраўнік дзяржавы адзначыў: "Мы з Вамі ўжо гаварылі на тэму Вашага назначэння. Мы грунтоўна абмеркавалі аспекты Вашай работы на Гомельшчыне і размаўлялі па Брэсце. Вы разумееце, што там трэба рабіць", - адзначыў Аляксандр Лукашэнка.

Прэзідэнт дадаў, што ён мае намер наведаць Гродзенскую вобласць, а потым будзе планаваць паездку ў Брэст. "Вы ўжо ўвойдзеце ў курс справы (думаю, Вам шмат часу для гэтага не трэба: Вы працуеце на такой пасадзе ў канкрэтным рэгіёне, ведаеце напрамкі работы, вопыт у Вас вялікі) і даложыце мне аб праблемах Брэстчыны і асабліва Брэста з улікам падзей мінулага года, каб мы маглі сарыентавацца па далейшай рабоце, - паставіў задачу Кіраўнік дзяржавы. - Брэст і Брэсцкая вобласць - рэгіён добры, людзі там нармальныя. Я там служыў, ведаю гэтых людзей. Але ёсць аблудныя, з імі трэба працаваць. Вы ведаеце і ўмееце з імі працаваць, у Гомельскай вобласці Вы гэтаму навучыліся".

Кіраўнік дзяржавы таксама ўзгадніў назначэнне Міхаіла Дзямідава старшынёй Клімавіцкага райвыканкама. "Што датычыцца Вашага раёна, які Вы пакідаеце, - гэта добры раён. Калі я вывучаў Вашы асабістыя матэрыялы, я падумаў, што Вы як спецыяліст, заатэхнік, урач перанесяце гэты вопыт на Клімавіцкі раён. Вельмі хацелася б. І ў гэтых адносінах мы будзем Вас падтрымліваць, - запэўніў Прэзідэнт. - Клімавіцкі раён - значны, асноўны раён на Магілёўшчыне. Вельмі хацелася б, каб у Вас атрымалася. Перспектывы ў Вас добрыя".

Аляксандр Лукашэнка паабяцаў у гэтым годзе абавязкова наведаць Клімавічы, магчыма, у час пасяўной або ўборачнай кампаніі. "Там ужо канкрэтна, увайшоўшы ў курс справы, Вы раскажаце, у якім напрамку будзе развівацца гэты раён", - сказаў ён.

Назначаючы Васіля Герасімава на пасаду Старшыні КДК, Прэзідэнт пахваліў Камітэт дзяржаўнага кантролю за аператыўнасць у апошні час і даў наказ дзейнічаць у такім рэчышчы і ў далейшым.

"Мне падабаецца аператыўнасць апошняга часу. Малайцы, і далей трэба дзейнічаць, цвёрда адстойваючы інтарэсы беларускай дзяржавы. У адпаведнасці з законам. У нас уся заканадаўчая база створана для таго, каб спыняць усялякія спробы дэстабілізацыі абстаноўкі ў краіне. І што датычыцца Камітэта дзяржкантролю, то гэта, перш за ўсё, фінансаванне з-за мяжы. І дзейнасць розных так званых камерцыйных структур і прадпрыемстваў, асобных дзялкоў. Камітэт дзяржкантролю навучыўся ў гэтым напрамку працаваць, і ў гэтым напрамку мы павінны дзейнічаць", - заявіў Кіраўнік дзяржавы.

Разам з гэтымі пытаннямі Аляксандр Лукашэнка адзначыў, што перад КДК стаяць і яго класічныя спецыфічныя задачы ў плане кантролю за расходаваннем бюджэтных сродкаў і ў сферы распараджэння дзяржуласнасцю. "Асабліва ўласнасць. Вазьміце, калі ласка, на кантроль заканчэнне будаўніцтва недабудаваных аб'ектаў. У нас вельмі шмат даўгабудаў. Зразумела, значна менш, чым гэта было 5 гадоў таму, але яны ёсць. Трэба ўзяць сіламі Камітэта дзяржкантролю на ўлік гэту дзяржаўную ўласнасць і прывесці ў парадак. А што датычыцца бюджэту - вельмі строгі кантроль за расходаваннем грашовых сродкаў. Трэба пазбавіцца ад усялякіх фінансавых мерапрыемстваў, без якіх мы можам абысціся на сённяшні дзень. А іх нямала. Аб гэтым мы гаварылі на апошняй нарадзе (з кіраўніцтвам Савета Міністраў 21 студзеня. - Заўвага)", - даручыў беларускі лідар.

Узгадняючы назначэнне Ігара Ляшэнкі генеральным дырэктарам ААТ "Гродна Азот", Кіраўнік дзяржавы адзначыў, што Ігар Ляшэнка даўно знаёмы з работай "Гродна Азота", паколькі ён курыраваў гэта прадпрыемства на пасадзе віцэ-прэм'ера і кіраўніка канцэрна "Белнафтахім".

"Гэта вельмі важнае прадпрыемства, стратэгічнае, - падкрэсліў Аляксандр Лукашэнка. - Мы шмат гаварылі аб тым, што ніякіх хістанняў на гэтым прадпрыемстве быць не можа, таму што не дай бог што здарыцца - зараза накрые ўсё Гродна. Таму там павінна быць строгая дысцыпліна. Не толькі тэхналагічная, але і ў арганізацыйным плане. Вазьміцеся за гэта. Шчыра скажу: шкадаваць некага за парушэнне дысцыпліны там не дазволена. Не дай бог што-небудзь здарыцца - страцім тысячы людзей, ні ў чым не вінаватых. Таму навядзіце парадак там".

Кіраўнік дзяржавы таксама ўзгадніў назначэнне Кірыла Казакова генеральным дырэктарам ЗАТ "Сталічнае тэлебачанне". "Так здарылася, што я асабіста ўбачыў Вас у рабоце. Канал вельмі падцягнуўся. Я, напрыклад, ужо амаль не бачу розніцы паміж СТБ і, як у нас прынята гаварыць, вядучымі каналамі. Хоць у Вас таксама адзін з вядучых каналаў", - падкрэсліў Аляксандр Лукашэнка.

Прэзідэнт адзначыў, што на СТБ з'явілася шмат новых асоб, "талковых і патрыятычных", у тым ліку моладзі, запусціліся новыя праекты. "Калектыў да вас добра ставіцца, - дадаў Кіраўнік дзяржавы. - Таму вельмі хацелася б, каб у Вас гэта работа атрымалася".