Рабочая паездка ў Верхнядзвінскі раён Віцебскай вобласці

Прэзідэнт Беларусі Аляксандр Лукашэнка 15 кастрычніка зрабіў рабочую паездку ў Верхнядзвінскі раён Віцебскай вобласці, дзе азнаёміўся з сучасным праектам у галіне мясной жывёлагадоўлі.

Кіраўнік дзяржавы наведаў сельскагаспадарчы вытворчы ўчастак прыватнага прадпрыемства "Чырвоны Бор Агра", асноўнымі відамі дзейнасці якога з'яўляюцца гадоўля і развядзенне буйной рагатай жывёлы для атрымання мяса, а таксама вырошчванне розных сельгаскультур.

Аляксандр Лукашэнка запатрабаваў стратэгічна вызначыць, як развіваць тэрыторыі поўначы Віцебскай вобласці.

"Што будзем тут рабіць? Браслаў, Мёры, Верхнядзвінск, Расоны. Поўнач Беларусі. Якая стратэгія?" - паставіў пытанне Кіраўнік дзяржавы.

Адказы чыноўнікаў наконт гэтага, уключаючы кіраўніка Віцебскай вобласці і віцэ-прэм'ера Юрыя Шулейку, не задаволілі Прэзідэнта. Гаварылася аб павелічэнні ў рэгіёне пасеваў кукурузы і неабходнасці падабраць больш раннія сарты, каб паспяваць убіраць у тэрмін. Разлік на тое, што гэта дасць магчымасць атрымаць больш зерня.

Аднак Аляксандр Лукашэнка звярнуў увагу на адсутнасць стратэгіі самой па сабе, таксама з улікам мясцовых прыродна-кліматычных рэалій. "Мне больш не трэба. Мне патрэбна эканоміка, - падкрэсліў беларускі лідар. - Вакол балоты. Агідная работа на гэтым участку. Зямля не ўзарана. Кукуруза, якая стаіць у балоце (гаворка пра стан палёў пасля моцных ападкаў. - Заўвага), я не ведаю, як вы яе будзеце ўбіраць, Трактар даражэйшы за тую кукурузу, якую вы ўбераце некалі".

Прэзідэнт адзначыў, што з улікам умоў паўночных рэгіёнаў Беларусі з зонай нават не рызыкоўнага, а крытычнага земляробства асабліва важна дысцыпліна і аператыўнасць усіх работ. "Размоў быць не можа. Тут павінна быць ваенная жорсткая дысцыпліна. Але і людзям заплаціць трэба, калі яны працуюць", - сказаў ён.

"Толькі такая стратэгія. Іншай стратэгіі я не бачу. Загіне гэты край, калі гэта не зробім", - падкрэсліў Кіраўнік дзяржавы.

Аляксандр Лукашэнка арыентуе так працаваць у паўночных раёнах пры ўсіх складанасцях, каб можна было карміцца з гэтай зямлі. Акрамя сельскагаспадарчых угоддзяў, адзін з галоўных рэсурсаў тут - лес. Гэта не толькі сыравіна для дрэваапрацоўкі, але і турыстычны, рэкрэацыйны патэнцыял. Галоўная задача - каб мясцовае насельніцтва жыло нармальна.

"А каб карміцца, трэба развіваць тут усё. Трэба вызначыцца за зіму, як тут будзем працаваць. Трэба стратэгічна падумаць, што рабіць, - сказаў беларускі лідар. - Мне трэба выратаваць гэтыя раёны. Тут 4-5 раёнаў. Для мяне галоўнае - захаваць людзей тут. Захаваць гэту тэрыторыю".

У рэалізацыі задачы па развіцці паўночных тэрыторый Аляксандр Лукашэнка бачыць ролю і прыватнага бізнесу. У Верхнядзвінскім раёне кіраўнік дзяржавы наведаў новае сучаснае жывёлагадоўчае прадпрыемства "Чырвоны Бор Агра", уладальнікам якога з'яўляецца бізнесмен Мікалай Варабей.

Гэта прадпрыемства спецыялізуецца на мясной жывёлагадоўлі. Адпаведна, патрэбны землі для вытворчасці кармоў. Прэзідэнт яшчэ да прыезду ўважліва вывучыў карту раёна і вызначыў тыя землі, якія можна прапанаваць эфектыўнаму прыватніку пад развіццё вытворчасці. Такую перадачу актываў прыватнаму бізнесу Аляксандр Лукашэнка назваў крайнім варыянтам, але ў дадзеным выпадку гэты крок апраўданы.

"Мікалай, калі ты хочаш падтрымкі, я вось дома адзначыў, што ты павінен узяць. Я табе гатовы гэта перадаць, - звярнуўся Прэзідэнт да бізнесмена, паказваючы на карце канкрэтныя ўчасткі зямель. - Тут трэба кардынальна нешта зрабіць. Да гэтага комплексу (жывёлагадоўчага. - Заўвага) патрэбны кармы. Гэтыя землі, якія ёсць, яны павінны забяспечыць цябе кармамі. Прапануй да вясны мне план".

Аляксандр Лукашэнка таксама паабяцаў падтрымку гэтаму аграбізнесу нараўне з агульнымі падыходамі. "Вялікіх грошай няма. Будзем датаваць вас, як усіх", - сказаў ён.

Аналагічна Прэзідэнт выказаў падтрымку і праектам у галіне дрэваапрацоўкі і турызму. "Лес і зямля - тваё, турыстычны напрамак - тваё. Карміць людзей, якія прыедуць сюды адпачываць, - адсюль вазьмі, накармі людзей. Як ты гэта і робіш", - дадаў Кіраўнік дзяржавы.

"Ад лесу мы павінны мець больш. Свет пачынае паварочвацца ў бок перапрацоўкі лесу", - заявіў Аляксандр Лукашэнка.

У сувязі з гэтым ён звярнуў увагу на развіццё Афрыкі. Гэты рэгіён валодае значным патэнцыялам і дэманструе даволі высокія тэмпы эканамічнага росту. Аднак Афрыка не мае лясных рэсурсаў, і кіраўнік дзяржавы лічыць, што Беларусь можа спрацаваць у гэтым напрамку. "Багацее Афрыка, багацее Паўднёвы Усход Азіі і гэтак далей. Лесу там няма. А калі багацеюць, яны будуюць нядрэннае жыллё - гэта мэбля і гэтак далей", - падкрэсліў ён.

Прэзідэнт таксама адзначыў, што гэта пытанне асабліва актуальнае для Віцебскай вобласці, больш за трэць тэрыторыі якой займае лес: "Вам без лесу ў Віцебскай вобласці, як і нам у цэлым, жыць нельга. Палова тэрыторыі - гэта лес. Тут трэба развівацца".

Аляксандр Лукашэнка запатрабаваў ад старшыні Віцебскага аблвыканкама Аляксандра Рагожніка вызначыцца са стратэгіяй, у тым ліку звязанай з выкарыстаннем лясных рэсурсаў. "Вам трэба капейка нейкая - мы вас прафінансуем. Але вы павінны паказаць, што там мы будзем пілаваць, а там будзем рабіць мэблю. У вас пакуль гэтага няма, а вы гэта павінны зрабіць", - канстатаваў беларускі лідар.

Звяртаючыся да кіраўніцтва вобласці і сферы АПК, Кіраўнік дзяржавы яшчэ раз падкрэсліў, што ад іх патрэбна дакладная стратэгія, як у цэлым развіваць гэты паўночны край.

"З 2030 года забудзьцеся пра падтрымку Віцебскай вобласці так, як мы робім гэта цяпер. Яе не будзе. Мы павінны вызначыцца па стратэгіі, тактыцы, дзеяннях, - заявіў Прэзідэнт. - Пасля 1 студзеня размовы ўжо будуць спынены па тактыцы і стратэгіі. Вы павінны ведаць, якія трактары купіць, як зямля будзе апрацоўвацца, якія людзі будуць працаваць. Не дай бог у студзені вы будзеце мне тэорыю расказваць".

У ходзе рабочай паездкі Кіраўніку дзяржавы далажылі аб ходзе асенніх палявых работ. Паводле слоў Міністра сельскай гаспадаркі і харчавання Юрыя Горлава, пры правядзенні пасяўной акцэнт робіцца ў тым ліку на павелічэнні сяўбы азімай пшаніцы. Акрамя таго, павялічваюцца плошчы азімага ячменю. Пры гэтым па рэспубліцы скарачаюцца пасевы азімага трыцікале і азімага жыта. Як растлумачылі Кіраўніку дзяржавы, пры кармленні буйной рагатай жывёлы гэтыя культуры павінны прымяняцца ў невялікай колькасці.

"А куды ты трыцікале падзеў, калі ты яго сеяў?" - задаў заканамернае пытанне Аляксандр Лукашэнка.

"Мы рабілі камбікорм і ўводзілі ў яго састаў трыцікале - да 30%. Але наогул для буйной рагатай жывёлы ў ідэале (павінны выкарыстоўвацца. - Заўвага) ячмень і пшаніца", - сказаў Юрый Горлаў.

Прэзідэнт у сувязі з гэтым пацікавіўся меркаваннем спецыяліста прыватнага прадпрыемства "Чырвоны Бор Агра", на пляцоўцы якога і адбыўся даклад. Асноўным відам дзейнасці сельгаспрадпрыемства з'яўляецца гадоўля і развядзенне буйной рагатай жывёлы для атрымання мяса. Кіраўніка дзяржавы запэўнілі, што на прадпрыемстве для кармлення жывёлы выкарыстоўваюць у тым ліку трыцікале.

"Не трэба адразу выдаваць такія рэкамендацыі, - звярнуўся Аляксандр Лукашэнка да Юрыя Горлава. - Няхай практыкі-вучоныя сядуць і вызначацца на месцы, што ім вырошчваць у Расонскім або Верхнядзвінскім раёне і што на поўдні".

Прадаўжаецца ўборка бульбы, цукровых буракоў і іншай культуры. Юрый Горлаў далажыў, што гэтыя работы плануецца завяршыць да 20 лістапада.

"Капуста няхай сабе, але моркву трэба выхапіць хутчэй. А калі мароз? А ты хочаш яшчэ да канца лістапада ўбіраць", - заўважыў Аляксандр Лукашэнка.

Акрамя таго, неабходна ўбраць кукурузу на сілас. Гэтыя работы плануецца завяршыць да 1 лістапада. Што датычыцца кукурузы на зерне, то да гэтай жа даты плануецца ўбраць 237 тыс. га, або 71% да плана.

"Колькі ў цябе будзе збожжа ў гэтым годзе зыходзячы з ураджайнасці кукурузы?" - пацікавіўся Прэзідэнт. Кіраўнік Мінсельгасхарча адзначыў, што чакаецца не менш як 11,3 млн т збожжа з улікам рапсу. Гэты паказчык перасягае рэкордны ўраджай мінулага года прыкладна на 200 тыс. т. "Мне вашы паказчыкі важны, але не вельмі. Важны грошы", - падкрэсліў беларускі лідар.

Як было адзначана, "Чырвоны Бор Агра" прымяняе тэхналогію, якая дае магчымасць пазбегнуць лішніх затрат. Размова ідзе аб тым, што частка кукурузы ідзе на карнаж, які захоўваецца ў траншэях і можа ўбірацца нават у дажджлівых умовах. Кіраўнік дзяржавы парэкамендаваў старшыні Віцебскага аблвыканкама Аляксандру Рагожніку пераймаць гэты вопыт.

Аляксандр Лукашэнка заявіў, што ўдзяляе павышаную ўвагу сферы сельскай гаспадаркі, ставячы мэту яшчэ больш развіць гэты напрамак.

"Мы сваю сельскую гаспадарку ў цэлым выратавалі. Але трэба рухацца далей", - сказаў Кіраўнік дзяржавы.

Прэзідэнт у якасці аднаго з дасягненняў адзначыў, што краіна экспартуе прадукты харчавання на $10 млрд у год. У Беларусі не толькі накармілі сваё насельніцтва і значныя аб'ёмы пастаўляюць на экспарт, але і забяспечылі сярэднюю зарплату каля $1 тыс. у эквіваленце.

"Я ж перажываю за людзей. Некалі абяцаў $500. А сёння краіна мае $1 тыс. сярэдняй зарплаты. Мы гэта зрабілі. Але трэба рухацца далей", - акцэнтаваў беларускі лідар.

Прэзідэнт адзначыў, што цяпер у яго графіку ёсць шмат тэм са сферы прамысловасці, але ён удзяляе павышаную ўвагу сельскай гаспадарцы, вызначаючы мэты па яе далейшым развіцці. "Таму што для чалавека трэба перш за ўсё паесці. Потым ужо апрануцца", - падкрэсліў ён.

Кіраўнік дзяржавы заявіў, што трэба яшчэ шмат зрабіць, каб сельскую гаспадарку Беларусі ў цэлым вывесці на высокі ўзровень. У гэтым плане ён бачыць гарызонт задач на два дзесяцігоддзі наперад. "Таму я вас штурхаю, штурхаю... Каб разварушыць. Каб вы без мяне потым працаваць маглі. Таму я ўдзяляю ўвагу", - сказаў Прэзідэнт.

Нядаўна ў "Чырвоным Бары Агра" было завершана будаўніцтва комплексу па ўтрыманні і адкорме БРЖ абердзін-ангускай пароды на 3,2 тыс. галоў, арыентаванага на атрыманне ялавічыны з поўным цыклам. Пры гэтым у сельгаспрадпрыемства ёсць перспектывы пашырыць маштаб да 4,5 тыс. галоў статка. Ключавая асаблівасць комплексу - пашава-стойлавая сістэма ўтрымання. Праектная магутнасць аб'екта разлічана на штогадовую здачу 640 т жывёлы ў жывой вазе. Будаўніцтва дазволіць у разы павялічыць колькасць статка абердзін-ангускай пароды, якая на 1 верасня складала 735 галоў. Ёсць таксама планы па будаўніцтве двух малочнатаварных комплексаў.

Акрамя таго, на гэтым прадпрыемстве ёсць некаторая колькасць жывёл японскай пароды вагю. Галоўная яе вартасць - унікальная здольнасць фарміраваць інтэнсіўную ўнутрымышачную мармуровасць. Японская чорная пераўзыходзіць астатнія пароды вагю па ступені мармуровасці. Яе плануюць размнажаць і культываваць.

У час наведвання гаспадаркі Аляксандр Лукашэнка агледзеў мехдвор і пазітыўна ацаніў убачанае, адзначыўшы разумны падыход да стварэння аб'екта. Прэзідэнт таксама азнаёміўся з вытворчасцю каўбаснай прадукцыі і прадэгуставаў яе.

Прэзідэнту падарылі цяля японскай пароды вагю. Мянушка маладой цялушкі - Асвея. Яна мае чорную афарбоўку. Нарадзілася 1 ліпеня бягучага года.

Цяпер яе перавязуць у гаспадарку Прэзідэнта. Кіраўнік дзяржавы адразу папрасіў спецыялістаў даць падрабязныя інструкцыі, як карову гэтай пароды правільна трымаць і карміць. "Выгадую", - сказаў ён.

У час сустрэчы з жыхарамі гарадскога пасёлка Асвея ў Верхнядзвінскім раёне Прэзідэнт расказаў ім аб планах па развіцці паўночных тэрыторый Віцебскай вобласці.

"Нам трэба, каб вы жылі, і добра жылі на гэтай зямлі. Вы (Верхнядзвінскі раён. - Заўвага), Расоны, Браслаў, Мёры. Усю поўнач трэба прыводзіць у парадак, - сказаў Прэзідэнт. - У раі жывяце. Шчыра вам кажу. Я нават не чакаў, што такая прыгажосць у вас".

Але вось ад узроўню гаспадарання на землях у Кіраўніка дзяржавы пакуль засталіся цяжкія ўражанні. "Не навучыліся мы яшчэ, напэўна, на іх працаваць. Але сёння дамовіліся, што да 2030 года Верхнядзвінскі раён мы ў добрым сэнсе не пазнаем", - заявіў Аляксандр Лукашэнка.

Ён назваў тры складнікі для развіцця гэтых тэрыторый: турызм, сельская гаспадарка і лясная галіна.

Але задача стаіць не проста ўліць у гэтыя тэрыторыі сродкі, а зрабіць так, каб яны былі самадастатковымі. "Калі ласка, жывіце, працуйце. Пасля 2030 года дурніца скончыцца. Вось у вас ёсць час, каб мы прывялі ўсё ў парадак, навучыліся зарабляць грошы. Усё, што вы заробіце, гэта будзе ваша. Мы гаварылі аб стратэгіі. Цудоўныя мясціны для нашай краін, але іх трэба прывесці ў парадак. Шмат залежыць ад вас. Паціху мы за Віцебскую вобласць узяліся", - адзначыў Аляксандр Лукашэнка.

"Пакрыху гэта ўсё падцягваем, каб тут былі людзі. Гэта ж для дзяржавы вельмі важна. Якія б мы тут тэхналогіі ні ўводзілі, няма людзей - няма жыцця. Таму гэта стратэгічная вялікая задача. І я ўсяляк буду падтрымліваць вас, каб вашы дзеці нармальна жылі. Галоўнае, каб з дзецьмі быў парадак. Гэта я бяру на сябе, - запэўніў Кіраўнік дзяржавы. - Захочаце паехаць кудысьці... Усякае бывае. Але трымайцеся сваёй зямлі. Тут вашы карані".

Прэзідэнт асабліва падкрэсліў і адказнасць саміх людзей за тыя ці іншыя пытанні. "Тое, што павінны зрабіць, вы зрабіце самі. Тое, што дзяржава павінна зрабіць, - зробіць", - сказаў ён.

Кіраўнік дзяржавы расказаў, што часам у сацыяльных сетках людзі ўзнімаюць тыя ці іншыя пытанні, выказваюць крыўды. І не ўся такая інфармацыя на паверку аказваецца праўдай ці сапраўды патрабуе ўмяшання з боку дзяржавы. "Калі датычыцца лёсу, жыцця чалавека, - гэта на асаблівым кантролі. Але касіць, кветкі пасадзіць каля плота - гэта ўжо ваша справа", - прывёў прыклад Аляксандр Лукашэнка.

У час размовы з мясцовымі жыхарамі Прэзідэнт заявіў, што дзяржава ў Беларусі і далей будзе прытрымлівацца палітыкі, накіраванай на падтрымку шматдзетных сем'яў.

"Я не здымаю (з сябе. - Заўвага) адказнасці за трэцяе дзіця. Праўда, цяпер вал пайшоў пісьмаў: "Аляксандр Рыгоравіч, вы абяцалі, а ў мяне трое". Ну дык мы дапамагаем. Некаторыя траіх нарадзілі адразу. Гэта адзінкі, некалькі дзясяткаў. Мы выдзелілі ім жыллё. Траіх выносіць, нарадзіць - гэта ж нялёгка".

Аляксандр Лукашэнка адзначыў, што і іншым шматдзетным дзяржава таксама дапамагае з жыллём. "Мы ўсё роўна з трыма дзецьмі далі б кватэру. У нас ужо і чаргі шматдзетных (на жыллё. - Заўвага) няма - на працягу года атрымліваюць. Калі такое было? Ніколі не было. І мы небагатая краіна. Але я гэта раблю для вас, для дзяцей. Мы ад гэтай палітыкі не адыдзем", - запэўніў Кіраўнік дзяржавы.

Паводле слоў Прэзідэнта, у Беларусі будуць і далей рабіць усё неабходнае, каб у дзяцей як у гарадах, так і ў сельскіх населеных пунктах былі ўсе магчымасці для развіцця і нармальнага жыцця.

Кіраўнік дзяржавы адзначыў, што часам можна чуць фразу "людзі Прэзідэнта". "Галоўнае, каб вы разумелі, бацькі: самыя галоўныя мае людзі - гэта тыя, хто ўжо нарадзіў, у каго ў сям'і ёсць дзеці. Вось яны адразу пачынаюць разумець, што такое жыццё", - сказаў Аляксандр Лукашэнка.

Прэзідэнт заклікаў цаніць і берагчы жыццё ў вёсцы, у невялікіх населеных пунктах, дзе ў параўнанні з вялікімі гарадамі больш прыроды і прасторы. Што датычыцца магчымасцей для адукацыі, тут ужо задача дзяржавы зрабіць так, каб ураўнаваць магчымасці з горадам. "Будзем вам пакрыху дапамагаць. Каб дзеці вашы былі такія, як у горадзе, адукацыю атрымалі", - запэўніў беларускі лідар.

Ён таксама параіў імкнуцца прыцягваць дзяцей да пасільнай працы. "Гляджу на моладзь цяперашнюю. Я іх часта падкрытыкоўваю. Ну сядзяць яны і тыкаюць у гэтыя тэлефоны, "ціктокаюцца" і гэтак далей. Там (у інтэрнэце. - Заўвага) яблыкі не растуць. Мяса (не атрымліваюць. - Заўвага), малако там пакуль не дояць, - сказаў Прэзідэнт. - Штучным інтэлектам запалохалі ўвесь народ. Спакойна, разбяромся мы з інтэлектам і з усімі. Але мы зробім, каб вашым дзеткам было нармальна".