Рабочая паездка ў Жыткавіцкі раён Гомельскай вобласці

Прэзідэнт Беларусі Аляксандр Лукашэнка 14 жніўня ў час рабочай паездкі ў Жыткавіцкі раён абазначыў галоўную ўмову для дзяржпадтрымкі ў сельскай гаспадарцы. 

Кіраўнік дзяржавы наведаў сялянскую гаспадарку Міхаіла Шруба, якая была створана ў 1993 годзе. У 2002-м у выніку далучэння да гаспадаркі калгаса "Шлях камунізму" плошча сельгасугоддзяў узрасла да 1860 га. Новы імпульс да развіцця быў атрыманы ў 2010 годзе - пасля наведвання Прэзідэнтам сялянскай гаспадаркі. 
 
Прэзідэнту падрабязна расказалі аб паказчыках і напрамках дзейнасці, дынаміцы вытворчасці, планах на будучыню сялянскай гаспадаркі Міхаіла Шруба. Яна спецыялізуецца на малочнай і мясной жывёлагадоўлі (БРЖ) і перапрацоўцы мяса, свінагадоўлі, вырошчванні агародніны і яе перапрацоўцы. Гаспадарка - валаўтваральнае сельгаспрадпрыемства Жыткавіцкага раёна, на яе прыпадае больш як 30% у кошце валавой прадукцыі сельскай гаспадаркі раёна. 

У мінулым годзе ў гаспадарцы атрымана больш за 27 тыс. т малака, амаль 3 тыс. т мяса, а таксама атрымана каля 11 тыс. т агародніны і больш за 7,5 тыс. т збожжа, уключаючы кукурузу. 

Адным з пытанняў стала далучэнне зямель праблемных гаспадарак да больш паспяховых. Міхаіл Шруб адзначыў, што ў яго ёсць патрэбнасць у дадатковых сельгасугоддзях. Раней яму былі перададзены ў  кіраванне землі адной з гаспадарак Жыткавіцкага раёна, але яны знаходзяцца на некаторым аддаленні, што выклікае пэўныя праблемы з лагістыкай. У сувязі з гэтым узнікла пытанне аб перадачы зямлі суседняй гаспадаркі, калі яна выкарыстоўвае іх недастаткова эфектыўна. Як адзначыў Кіраўнік дзяржавы, калі на добрых землях сельгаспрадпрыемства не паказвае адпаведны вынік, гэта выклікае заканамерныя пытанні: чаму так адбываецца? 

Аляксандр Лукашэнка даручыў прапрацаваць гэта пытанне, але і абазначыў умову, пры якой сельгаспрадпрыемствы могуць разлічваць на падтрымку з боку дзяржавы: "Галоўнае - вынік. Надышоў час адыходзіць ад хацелак". 

Кіраўнік дзяржавы назваў і іншы крытэрый, які ўлічваецца пры прыняцці рашэння аб далучэнні тых ці іншых зямель да фермерскіх гаспадарак. "Мы адразу глядзім, пад што гэтыя землі. Многія хочуць займацца раслінаводствам, але не жывёлагадоўляй. А чым мне людзей карміць, толькі хлебам? Трэба мяса, малако. Таму я арыентую фермераў, каб яны займаліся гэтымі пытаннямі комплексна", - растлумачыў ён. 

Прэзідэнт даручыў дэталёва прапрацаваць пытанне аб магчымым далучэнні зямель да сялянскай гаспадаркі і прапанаваць канкрэтнае рашэнне не пазней за лістапад. Пры гэтым трэба ўлічыць пазіцыі кіраўніцтва гаспадаркі і рэгіёна. Звяртаючыся да Міхаіла Шруба, Аляксандр Лукашэнка падкрэсліў, што для прыняцця рашэння трэба ў поўнай меры разумець яго пункт гледжання. "Гавары праўду, так, як ты думаеш. У адваротным выпадку для чаго я сюды прыехаў? Для будучага развіцця краіны мне патрэбна ісціна", - канстатаваў ён.

Паколькі сялянская гаспадарка, якую наведаў Прэзідэнт, знаходзіцца на тэрыторыі Прыпяцкага Палесся, ён звярнуў увагу на праграму развіцця гэтага рэгіёна на 2025-2030 гады. Мэта гэтай стратэгіі - прыйсці да канкрэтнага выніку, на што і ўказаў кіраўнік дзяржавы. "У гэтым выніку сутнасць усёй палескай праграмы, якую мы робім, укладаем немалыя грошы", - падкрэсліў Прэзідэнт.

Сярод аб'ектаў, якія паказалі Прэзідэнту ў сялянска-фермерскай гаспадарцы Міхаіла Шруба, было сховішча для агародніны. Кіраўнік дзяржавы азнаёміўся з тэхналогіяй сартавання, захоўвання, перадпрадажнай падрыхтоўкі, перапрацоўкі агародніны. Тэма важная ў маштабах усёй краіны, паколькі пераважна за кошт сялянска-фермерскіх гаспадарак запаўняюцца стабілізацыйныя фонды для рэспубліканскіх патрэб, каб забяспечыць наяўнасць у магазінах так званага баршчовага набору ў міжсезонне. Гэтыя гаспадаркі фарміруюць каля 68% закладкі бульбы і буракоў, 87% - капусты, больш як 70% - морквы і цыбулі.

Аляксандр Лукашэнка звярнуў увагу на адказнасць не толькі тых, хто павінен запаўняць гэтыя фонды, але і тых, хто бярэ на сябе абавязацельствы выкупляць прадукцыю стабфондаў, асабліва гандлёвых сетак. "Гэта на кантролі. Вырасцілі, дагаварыліся - забярыце", - сказаў Кіраўнік дзяржавы.

Кіраўнік гаспадаркі расказаў Прэзідэнту аб будаўніцтве сховішча для агародніны і тэхналогіях, якія выкарыстоўваюцца. Беларускі лідар у сувязі з гэтым арыентаваў на спрашчэнне праектных і будаўнічых норм пад адказнасць таго, хто ўзводзіць нескладаныя аб'екты. Па аналогіі з тым, як на заканадаўчым узроўні ўрэгулявана будаўніцтва пабудоў у вёсцы.

"Чаго мы павінны ўлазіць у яго праблемы? Калі прамысловы (аб'ект. - Заўвага), нейкі завод і іншае - так, там трэба экспертыза... Але кіраўнікам трэба даць права, трэба зрабіць, каб для іх будоўля не была праблемай, - падкрэсліў Аляксандр Лукашэнка. - Мы заарганізавалі многае. Трэба ім, кіраўнікам, даць поўную свабоду. Але калі што здарыцца - ён адказвае. Тады ён сам будзе ісці, каб яму нехта "кручок" паставіў (зрабіў экспертнае заключэнне. - Заўвага)".

Адказныя чыноўнікі запэўнілі Кіраўніка дзяржавы, што ў гэтай сферы прыняты ўжо неабходныя рашэнні. "Паглядзіце, можа, мы недзе штосьці ўпусцілі", - сказаў на гэта Прэзідэнт.

Пасля завяршэння наведвання Аляксандру Лукашэнку была прадстаўлена выстаўка-дэгустацыя прадукцыі фермерскай гаспадаркі Міхаіла Шруба: разнастайная агародніна, мясныя і кулінарныя вырабы, зробленыя па традыцыйных беларускіх рэцэптах, без выкарыстання штучных кансервантаў, - агуркі з бочкі, квашаная капуста, сальцісон, сала і іншае.

Падчас рабочай паездкі Кіраўнік дзяржавы заслухаў даклад старшыні Гомельскага аблвыканкама Івана Крупко аб ходзе ўборачных работ у паўднёвым рэгіёне рэспублікі. Як было даложана, у рэгіёне ўбрана 95% плошчаў збожжавых, зернебабовых і рапсу. Сабрана больш за 980 тыс. т толькі збожжавых каласавых, а ўжо заўтра выйдуць на мільён, што для рэгіёна з'яўляецца добрым паказчыкам. Чаканы валавы збор збожжа - 1051 тыс. т, што на 20 тыс. т больш за ўзровень мінулага года. Кукурузы плануецца сабраць 450 тыс. т і такім чынам выйсці на агульны валавы збор 1,5 млн т збожжавых. 

Цяпер прадаўжаецца ўборка саломы з палёў і падрыхтоўка вызваленых плошчаў пад азімую сяўбу. У сувязі з гэтым Прэзідэнт папярэдзіў, каб пры вырошчванні азімага рапсу строга захоўвалася тэхналагічная дысцыпліна, уносіліся неабходныя ўгнаенні, сродкі аховы, рэгулятары росту. Толькі такім чынам атрымаецца захаваць пасевы пры любых умовах надвор'я і атрымаць у будучым добры ўраджай. 

Акрамя таго, кіраўнік рэгіёна далажыў аб павелічэнні аб'ёмаў вытворчасці сельгаспрадукцыі за студзень - ліпень бягучага года больш як на 18% у параўнанні з аналагічным перыядам мінулага года. 

Прэзідэнт нагадаў, што ў цэлым для аграрыяў рэспублікі вызначыў у якасці арыенціра рэкордны мінулагодні ўраджай. 

"Мінулы год быў рэкордны. Я ўсё ж такі ўстанавіў бар'ер - узровень мінулага года. Калі прырастаем да мінулага года па краіне, гэта ўжо добра, дадатная дынаміка. Таму вельмі важна да мінулага года прырастаць. Ён быў вельмі высокі, рэкордны", - падкрэсліў Аляксандр Лукашэнка.

Размова ішла таксама аб сітуацыі з уборкай у Жыткавіцкім раёне. Паводле слоў старшыні райвыканкама Уладзіміра Антоненкі, ураджайнасць вырасла на 6,8 ц/га да ўзроўню мінулага года - да 43,9 ц/га. "Для Палесся ў цэлым нядрэнная лічба", - заўважыў Кіраўнік дзяржавы. 

"Значыць, гэты год лепшы, чым мінулы?" - удакладніў Аляксандр Лукашэнка і атрымаў станоўчы адказ. 

"Чаго не хапае, з твайго пункту гледжання, на Палессі, каб мы не ўпустую спрацавалі з той праграмай, якую прынялі нядаўна па развіцці Палескага рэгіёна?" - прадоўжыў Прэзідэнт. 

"Усё ёсць. Патрэбны дысцыпліна і выкананне тэхналогій", - сказаў у адказ старшыня райвыканкама, дадаўшы, што не бачыць асаблівых праблем у развіцці рэгіёна. 

"Праблемы заўсёды ёсць, але ты гаворыш, што іх няма, таму што іх павінны вырашаць на месцы. Усё, што мы можам і нават не можам з боку дзяржавы, цэнтральных органаў улады, - па максімуму вырашаны пытанні", - падкрэсліў Аляксандр Лукашэнка. Прэзідэнт звярнуў увагу, што пры такім узроўні падтрымкі і садзейнічання сельгасарганізацыі павінны даваць адпаведныя вынікі, ва ўсякім разе працаваць не горш, чым сялянска-фермерскія гаспадаркі. 

"А калі ў яго (у СФГ Міхаіла Шруба, якую наведваў Прэзідэнт. - Заўвага) добра, а недзе ў цябе дрэнна (у падведамных сельгасарганізацыях раёна. - Заўвага), узнікае пытанне, чаму. Чаму не вучыцца ў яго? Гэта скарбніца. Прыйшоў і скапіраваў", - арыентаваў Кіраўнік дзяржавы.

Яшчэ адно пытанне, якое было абазначана Кіраўніком дзяржавы ў ходзе паездкі, датычыўся тэхнікі для касьбы поймаў рэк. Ён адзначыў, што буйнагабарытная энерганасычаная тэхніка не зможа падысці да поймаў рэк, каб выкасіць там траву. У сувязі з гэтым ён прапанаваў падумаць, якая тэхніка дае магчымасць правесці адпаведныя работы на належным узроўні. "Нам трэба падумаць над тэхнікай для касьбы поймаў рэк, - адзначыў Прэзідэнт. - Я аб чым гавару? Малыя касілкі, малыя трактары, рулонны прэс - скасіў і ў плёнку загарнуў". 

Ён даручыў узяць гэта пытанне на кантроль і адзначыў, што касьба поймаў дазволіць вярнуць у абарот пэўную колькасць зямель, якія не выкарыстоўваюцца. "Нам поймы трэба касіць усюды, мы губляем вялікую колькасць зямель", - сказаў Аляксандр Лукашэнка. 

Прэзідэнт звярнуў увагу і на другі бок пытання: касьба поймаў рэк дае магчымасць атрымаць дадатковае сена на корм жывёле. "Там корм хоць і не бясплатны, але танны", - падкрэсліў ён. 

Аляксандр Лукашэнка таксама адзначыў, што гэта пытанне актуальнае перш за ўсё для Гомельскай вобласці, дзе працякае Прыпяць. "Я бачу: некаторыя косяць, а некаторыя не. Таму пад адказнасць губернатара: трэба пойму касіць, - даручыў Кіраўнік дзяржавы. - Цяпер восенню касіць ніхто не будзе, але нам патрэбна малая тэхніка".