Рабочая паездка ў Смалявіцкі раён Мінскай вобласці

Прэзідэнт Беларусі Аляксандр Лукашэнка ў палях праінспектаваў ход уборачнай кампаніі. Кіраўнік дзяржавы працаваў у Смалявіцкім раёне Мінскай вобласці.

Аляксандр Лукашэнка наведаў сельгаспрадпрыемства "Азярыцкі-Агра". Тут яму далажылі аб ходзе ўборачнай кампаніі ў гаспадарцы, а таксама вобласці і краіне ў цэлым. Акцэнт - на бягучых умовах і выкарыстанні айчыннай сельгастэхнікі.

"Нам трэба паскарацца, чаго б нам ні каштавала, - падкрэсліў Кіраўнік дзяржавы. - Своечасова трэба рабіць, і каб дысцыпліна была. Ні ў якім разе нельга прашлёпаць гэты год. Ураджай павінен быць добры, калі мы без страт убяром, наколькі гэта магчыма".

Аляксандр Лукашэнка растлумачыў, чаму для наведвання было выбрана менавіта гэта месца і гаспадарка ў Мінскай вобласці. Прэзідэнт хоча скласці агульнае ўражанне аб ходзе ўборачнай кампаніі, а тут якраз больш-менш усярэдненыя ўмовы. Гэта датычыцца і Мінскай вобласці ў цэлым, якую кіраўнік дзяржавы назваў складаным рэгіёнам.  Калі тут добра, то і ў сярэднім па краіне сітуацыя будзе нядрэнная - крыху горшая па поўначы ў Віцебскай вобласці, крыху лепшая - на поўдні і ў заходніх рэгіёнах.

"Гэта такі паказчык добры. Паглядзеўшы тут, мы будзем бачыць, як працуюць нашы камбайны, чаго нам не хапае", - сказаў Кіраўнік дзяржавы.

Аляксандр Лукашэнка адзначыў, што дзеля гэтай інспекцыі ў палях нават перанеслі іншае запланаванае мерапрыемства па сферы фармацэўтыкі. Але да гэтай тэмы вернуцца пазней.

Прэзідэнт канстатаваў, што ўборачная кампанія ў цэлым па краіне ідзе нераўнамерна, у залежнасці ад умоў надвор'я ў тых ці іншых раёнах. Таму Аляксандр Лукашэнка настройвае ўсіх: сушыць збожжа ў палях нельга, а прамаруджванне з уборкай прывядзе да страт збожжа. "Як толькі магчыма, трэба ўбіраць", - дадаў Прэзідэнт.

На прадэманстраваным Кіраўніку дзяржавы полі азімага ячменю ўраджайнасць складае 70 ц/га. Ды і ў цэлым па краіне, нягледзячы на складаныя ўмовы надвор'я, гэта культура дае вельмі нядрэнны рэзультат - больш як 40 ц/га. Уборка гэтай культуры блізкая да завяршэння, агульны намалот азімага ячменю чакаецца ў аб'ёме амаль 1 млн т.

"Калі будзе за 40 ц/га - гэта добры па краіне ўраджай", - сказаў Аляксандр Лукашэнка. Але трэба імкнуцца да такой ураджайнасці, як на сельгаспрадпрыемстве "Азярыцкі-Агра". Акрамя таго, Прэзідэнт звярнуў увагу, што патрэбны добрыя айчынныя сарты, і гэтым пытаннем трэба сур'ёзна заняцца.

"Словам, ячменю быць. Гэта добрая культура, яе будзем развіваць, - зрабіў выснову кіраўнік дзяржавы. - Тое, што мы пачалі больш вырошчваць ячмень, - гэта правільна. Сёння мы робім выснову, праз 3-4 гады, што мы зрабілі правільна па ўсіх напрамках, што вырошчваем ячмень. І ранняя ўборка... Сёння гэта большая частка нашай уборкі, а не проста размінка камбайнераў".

Паводле яго слоў, тое ж самае датычыцца і азімага рапсу. Абедзве культуры выгадна вырошчваць - гэта грошы для сельгаспрадпрыемстваў. А калі ўсё рабіць па тэхналогіі, то можна гарантавана разлічваць і на высокі рэзультат.

Кіраўніку дзяржавы далажылі аб ходзе ўборачнай кампаніі ў Беларусі і Мінскай вобласці. Рэгіён якраз паказвае прыкладна сярэднерэспубліканскія тэмпы на ўборцы. Ураджайнасць цяпер складае 41,4 ц/га. У параўнанні з мінулым годам гэта на 7,3 ц/га больш, нягледзячы на складаныя ўмовы надвор'я. Нядаўна аграрыі адрапартавалі аб уборцы першага мільёна тон збожжа. А па стане на раніцу 24 ліпеня - прыкладна 1,1 млн т.

"Думаў, ты больш маеш сёння, - заўважыў Прэзідэнт, звяртаючыся да Міністра сельскай гаспадаркі і харчавання Юрыя Горлава. - Два мільёны да канца тыдня будзе?"

"Пастараемся", - адказаў Міністр.

Адначасова з каласавымі збожжавымі ў краіне вядзецца ўборка рапсу. Аляксандр Лукашэнка цікавіўся асаблівасцямі гэтай уборкі ў бягучым сезоне. Як далажылі спецыялісты, трэба ацэньваць сітуацыю ў кожным канкрэтным выпадку, калі ў аптымальныя тэрміны пачаць уборку. Кіраўнік дзяржавы пацікавіўся, як зарэкамендавала сябе гэта культура ў "Азярыцкім-Агра". Кіраўнік гаспадаркі Анжаліка Гушчэня сказала: "Добры рапс. Самае галоўнае - захоўваць тэхналогію. Мы яго падкармілі, апрацавалі, фунгіцыдамі прайшліся два разы. Таму рапс выдатны".

Прэзідэнт адзначыў, што хацеў бы пазней асабіста азнаёміцца з уборкай рапсу.

Вырошчваюць у гаспадарцы "Азярыцкі-Агра" і бульбу, у тым ліку на насенне, якое прадаюць і ўсім жадаючым - дачнікам, фермерам. "Гэта правільна. Людзям трэба прадаваць, хто хоча", - адзначыў Кіраўнік дзяржавы.

Аляксандр Лукашэнка ў цэлым цікавіўся работай гаспадаркі, фінансавымі паказчыкамі, падкрэсліўшы асаблівую адказнасць Анжалікі Гушчэні, якая ўсяго паўгода як узначаліла гэту гаспадарку. "Паглядзеў усю тваю біяграфію ўчора позна вечарам. Шмат дзе папрацавала. Гэта добра. Калі яна пакажа сябе ў гэтай гаспадарцы, гэта вельмі перспектыўны чалавек. Ведае і банкаўскую справу. Даяркай пачынала працаваць, што вельмі важна", - сказаў ён.

Анжаліка Гушчэня далажыла, што з фінансамі ў гаспадарцы ўсё добра, развіваюцца за кошт уласных сродкаў, нядаўна пабудаваны новы зернесушыльны комплекс.

У час наведвання сельгаспрадпрыемства "Азярыцкі-Агра" Прэзідэнт закрануў тэму выканання тэхналогіі захоўвання сенажу. Умовы надвор'я не заўсёды даюць магчымасць захоўваць сена ў траншэях, і каб захаваць кармы для міжсезоння, іх загортваюць у плёнку з выкарыстаннем спецыяльнай машыны - прэс-падборшчыка. Але і ў гэтым выпадку важна ўсё зрабіць якасна і правільна "ўпакаваць".

Аляксандр Лукашэнка ўказаў на шырокае распаўсюджванне такой практыкі на Захадзе. Запатрабавана яна і ў Беларусі. "Прэсу быць, з плёнкай працаваць трэба, - падкрэсліў Прэзідэнт. - Прэс - гэта вельмі важна".

Кіраўнік дзяржавы пацікавіўся, як першы намеснік старшыні Мінскага аблвыканкама Васіль Сысоеў ацэньвае айчынныя прэсы, у тым ліку ў параўнанні з замежнымі. Паводле слоў Васіля Сысоева, у гаспадарках выкарыстоўваюцца прэсы, якія выпускаюць на прадпрыемствах у Барысаўскім раёне. І яны сябе нядрэнна паказваюць.

Аляксандр Лукашэнка ўпэўнены, што ад гэтых тэхналогій "адпіхвацца" не трэба. Што датычыцца такога складніка, як цана, з гэтым пытаннем трэба будзе разабрацца. Менавіта такое даручэнне кіраўнік дзяржавы даў старшыні Мінскага аблвыканкама Аляксею Кушнарэнку. "У нас кожны рве сабе: прэс даражэй прадаць, плёнку зрабіць даражэй... Хоць гэта элементарныя, здавалася б, справы - плёнку зрабіць", - заўважыў беларускі лідар.

"Прэс павінен быць, - яшчэ раз акцэнтаваў увагу Прэзідэнт. - Вось я як учарашні дырэктар кажу, што памёр бы, але купіў бы два прэсы. І чаго б ні каштавала плёнка, я заўсёды купляў бы і ў яе загортваў".

Кіраўнік дзяржавы таксама закрануў тэму робатаў для даення на фермах. Гэта ў тым ліку дае магчымасць у пэўнай ступені вырашыць кадравыя пытанні.

Аляксандр Лукашэнка чарговы раз нагадаў аб недапушчальнасці падзяжу ў жывёлагадоўлі.

"Не дай бог вы мяне раззлуяце ў гэтым плане! Мала не падасца. Я вам па 10 разоў гаварыць не буду. Падзеж - гэта непрымальна. У савецкі час гэту праблему ўжо вырашылі", - падкрэсліў Кіраўнік дзяржавы.

Аляксандр Лукашэнка ў тым ліку прыгадаў пра свой вопыт работы кіраўніком гаспадаркі: "Спецыялізаваныя комплексы будавалі для таго, каб ажыццяўляць адкормліванне, атрымліваць ялавічыну. Бычкоў - на асобны комплекс, маленькіх цялушак - на другі. І там гадавалі".

Кіраўнік дзяржавы нагадаў пра сваё безумоўнае патрабаванне, што калі гаспадаркі не могуць самі забяспечыць захаванасць цялят, то трэба "імем рэвалюцыі" перадаваць іх у іншыя гаспадаркі. "За грошы. Нават больш яму заплаціць. Хоць сялянам зарплату аддасць, - сказаў ён. - Трэба аддаць жывёлу туды, дзе яе нармальна будуць даглядаць і накормяць".

"Галоўны паказчык - гэта падзеж жывёлы. Як хочаце, мяне вы тут не пераканаеце ў тым, што нармальна ў вас, няма звышпланавага, як вы пішаце, падзяжу. Які звышпланавы, якія планы?!" - паставіў пытанне Аляксандр Лукашэнка.

Ён пацікавіўся ў Анжалікі Гушчэні - кіраўніка гаспадаркі "Азярыцкі-Агра", - як у гэтым плане ідуць справы ў яе. Падзеж складае літаральна долі працэнта, яго фактычна няма. Дырэктар гаспадаркі далажыла, як арганізавана работа з цялятамі і ў цэлым утрыманне жывёлы. "Проста і разумна. Нічога дзіўнага. Вось гэта трэба рабіць", - даў ацэнку Кіраўнік дзяржавы.

Аляксандр Лукашэнка дадаў, што калі ў іншых гаспадарках не могуць так працаваць, то можна прыехаць і пераняць існуючы станоўчы вопыт: "Няхай прыедуць, яна з задавальненнем пакажа, як гэта робіцца".

Прэзідэнт таксама падкрэсліў, што ў вырашэнні праблемы падзяжу важна жалезная дысцыпліна і правільная арганізацыя работы ветэрынарнай службы.

Аляксандр Лукашэнка ў гаспадарцы "Азярыцкі-Агра" азнаёміўся з уборкай азімага ячменю з выкарыстаннем айчыннай тэхнікі. Гэта культура ва ўрочышчы "Фрэгат" была пасеяна на плошчы 123 га. Ураджайнасць - 70 ц/га, што значна вышэй за сярэднюю па краіне. Такая высокая ўраджайнасць разам са складанымі ўмовамі надвор'я прад'яўляе асаблівыя патрабаванні да тэхнікі. На ўборцы задзейнічаны перадавыя айчынныя збожжаўборачныя камбайны GS12A1 PRO.

"Гэта мара. Калі ён (камбайн. - Заўвага) якасны - гэта мара. А калі добры механізатар на камбайне працуе..." - заўважыў Прэзідэнт.

Кіраўнік дзяржавы ўспомніў, як сам упершыню выпрабоўваў гэту тэхніку ў полі: "Страшна глядзець зверху - карабель".

Аляксандр Лукашэнка нагадаў, як у першыя гады яго прэзідэнцтва ў Беларусі прапаноўвалі не займацца распрацоўкай і выпускам айчынных камбайнаў, а закупляць гэту тэхніку за мяжой.

Каб даведацца пра якасць камбайна з першых вуснаў, Прэзідэнт паразмаўляў з механізатарам і падрабязна распытаў яго аб добрых якасцях і недахопах гэтай айчыннай тэхнікі. Аграрый прызнаўся, што працуе на гэтай мадэлі першы год, таму стараецца весці акуратна - да новага камбайна яшчэ трэба прыстасавацца.

"Я і бачу, што ты акуратна ідзеш. І правільна робіш! - сказаў механізатару Аляксандр Лукашэнка. - Ты перспектыву ў гэтага камбайна бачыш? Ён павінен быць, яго трэба рабіць?" Работнік адказаў, што намалаціў на GS12A1 ужо сто тон, і пакуль нараканняў не было.

"Камбайн добры. Будзем рабіць, - рэзюмаваў беларускі лідар. - Значыць, правільна зрабілі, што гэты камбайн пачалі вырабляць".

ле тэхніку мала проста вырабіць - яе яшчэ трэба зберагчы. Аб гэтым таксама ішла размова. Прэзідэнт сказаў пра недапушчальнасць сітуацый, калі машыны, якія выйшлі са строю, проста кідаюць "пад плот" замест таго, каб паспрабаваць аднавіць. Кіраўнік дзяржавы ўпэўнены: калі добра адносіцца да айчынных камбайнаў, то тэрмін іх службы можа быць супастаўны з замежнымі аналагамі. Акрамя таго, замежная тэхніка значна перавышае па цане айчынную. Так было і ў тыя гады, калі Аляксандр Лукашэнка сам кіраваў гаспадаркай.

"Камбайн купіш, памятаю, з ГДР - быццам нічога. А запчасткі дарагаватыя тады былі", - прывёў прыклад з уласнага вопыту Прэзідэнт.