Прывітанне Старшыні КНР Сі Цзіньпіну, удзельнікам пятай Кітайскай міжнароднай выстаўкі імпарту ў Шанхаі

Прэзідэнт Беларусі Аляксандр Лукашэнка накіраваў прывітанне ў фармаце відэазвароту Старшыні Кітайскай Народнай Рэспублікі Сі Цзіньпіну, удзельнікам і гасцям пятай Кітайскай міжнароднай выстаўкі імпарту ў Шанхаі:

"Паважаны Старшыня Сі Цзіньпін!

Паважаныя кіраўнікі дзяржаў, кіраўнікі ўрадаў, дамы і спадары!

Віншую ўсіх удзельнікаў і гасцей з адкрыццём пятай Кітайскай міжнароднай выстаўкі імпарту ў Шанхаі. Гэта мерапрыемства трывала замацавалася ў календары эканамічных падзей і сёння ўяўляе сабой адзін з найбольш запатрабаваных фарматаў узаемадзеяння.

Рады, што пасля двух гадоў вымушанай паўзы ў стасунках мы з дапамогай такіх сустрэч кампенсуем дэфіцыт кантактаў, гатовы падзяліцца атрыманым вопытам, прадставіць свае распрацоўкі і дасягненні па шэрагу напрамкаў.

Глабальны сацыяльна-эканамічны крызіс, выкліканы пандэміяй і ўзмацненнем геапалітычнай канфрантацыі, выявіў асаблівую неабходнасць у эфектыўнай міжнароднай каардынацыі, а таксама ў раўнапраўным і паважлівым партнёрстве.

З'яўляючыся важнай часткай еўразійскай прасторы, наша дзяржава стаяла ля вытокаў стварэння Еўразійскага эканамічнага саюза. Мы ўдзяляем асаблівую ўвагу праектам у рамках кітайскай ініцыятывы "Пояс і шлях", сярод якіх найбольш значны - размешчаны ў нас індустрыяльны парк "Вялікі камень".

Беларусь гатова да пашырэння сумеснай работы па пастаўках высакаякаснай прадукцыі і рэалізацыі новых праектаў у галіне электроннага гандлю. 

Гатовы прадоўжыць цеснае супрацоўніцтва з усімі зацікаўленымі бакамі для дыверсіфікацыі маршрутаў рэгулярных транзітных перавозак і ўкаранення інавацыйных лагістычных падыходаў. 

Беларусь прымае ўдзел у Кітайскай міжнароднай выстаўцы імпарту ў Шанхаі з першых дзён стварэння, штогод прэзентуючы на яе пляцоўцы свае ключавыя дасягненні і распрацоўкі. 

Наш удзел у выстаўцы 2022 года праходзіць у пачатку новага этапу развіцця беларуска-кітайскага ўзаемадзеяння. З'яўляючыся надзейнымі і праверанымі саюзнікамі, "жалезнымі братамі", мы эфектыўна працуем у галіне кааперацыі, інавацый, лагістыкі. 

У гэтым годзе ў мерапрыемстве ў Шанхаі ўдзельнічаюць два дзясяткі вядомых беларускіх вытворцаў. Экспаненты прэзентуюць нашы перадавыя напрацоўкі ў вытворчасці высокатэхналагічнага абсталявання, сферах інфармацыйных тэхналогій, медыцыны. 

Удзельнікі і наведвальнікі змогуць асабіста ўбачыць звышмалыя арбітальныя касмічныя апараты, серыю проціракавых лекавых сродкаў, беларускія электраскутары і шмат іншага. 

Асобнай увагі заслугоўвае стэнд індустрыяльнага парка "Вялікі камень". На ім прадстаўлены дасягненні і распрацоўкі рэзідэнтаў, што наглядна дэманструе інвестыцыйны патэнцыял парка. 

Наша краіна са шматвяковымі аграрнымі традыцыямі ўваходзіць у топ сусветных экспарцёраў малочнай прадукцыі і калійных угнаенняў, уносіць немалы ўклад у забеспячэнне сусветнай харчовай бяспекі. 

Нацыянальная экспазіцыя з уласцівай беларусам гасціннасцю прадэманструе ўжо любімую кітайскімі пакупнікамі харчовую прадукцыю, вырабленую ў адпаведнасці з сусветнымі экалагічнымі стандартамі. 

У рамках выстаўкі таксама будзе працаваць віртуальны павільён Беларусі. У ім прадставяць дасягненні прамысловасці, навукова-тэхнічныя інавацыі, турыстычны і культурны патэнцыял нашай дзяржавы. 

Дарагія сябры! 

Перакананы, што Кітайская выстаўка імпарту ў Шанхаі надасць магутны імпульс пашырэнню міжнароднага эканамічнага супрацоўніцтва і тэхналагічнай кааперацыі. 

На заканчэнне хачу падзякаваць арганізатарам мерапрыемства, а таксама пажадаць усім яго ўдзельнікам і гасцям плённай працы, новых прафесійных поспехаў і выгадных здзелак. 

Дзякуй вам за ўвагу".