Прэзідэнты Беларусі і Расіі абмяняліся віншаваннямі з Днём яднання народаў
Прэзідэнты Беларусі і Расіі абмяняліся віншаваннямі з Днём яднання народаў дзвюх краін.
Старшыня Вышэйшага дзяржаўнага савета Саюзнай дзяржавы, Прэзідэнт Беларусі Аляксандр Лукашэнка ў сваім віншавальным пасланні адзначыў, што ва ўмовах беспрэцэдэнтных знешніх выклікаў і пагроз беларуска-расійскія адносіны дастойна прайшлі праверку на трываласць, стаўшы прыкладам сапраўднага партнёрства, заснаванага на прынцыпах узаемнага даверу, павагі і суверэннай роўнасці.
"Упэўнены, што паўнацэнная рэалізацыя дасягнутых дамоўленасцей адкрые новыя перспектывы саюзнага будаўніцтва, надасць імпульс паступальнаму развіццю эканомік, будзе садзейнічаць павышэнню якасці жыцця грамадзян нашых краін", - гаворыцца ў віншаванні.
Аляксандр Лукашэнка пажадаў Уладзіміру Пуціну моцнага здароўя, дабрабыту і ажыццяўлення маштабных дзяржаўных планаў.
У сваю чаргу Прэзідэнт Расіі ў віншаванні, якое паступіла ад яго, адзначыў: "Абапіраючыся на добрыя традыцыі дружбы і добрасуседства, што звязваюць расіян і беларусаў, нашы краіны і народы планамерна пашыраюць узаемавыгаднае супрацоўніцтва на ўсіх напрамках. Энергічна ўдасканальваюцца і механізмы Саюзнай дзяржавы. Нягледзячы на беспрэцэдэнтны санкцыйны націск звонку, мы эфектыўна каардынуем намаганні на міжнароднай арэне, у сферы абароны і бяспекі, паспяхова рэалізуем праграмы, накіраваныя на ўмацаванне фінансава-эканамічнага і навукова-тэхналагічнага суверэнітэту".
Уладзімір Пуцін выказаў упэўненасць, што далейшае нарошчванне ўсяго комплексу саюзніцкіх сувязей у поўнай меры адпавядае інтарэсам брацкіх народаў Беларусі і Расіі. Ён пажадаў Аляксандру Лукашэнку моцнага здароўя і поспехаў, а ўсім беларускім грамадзянам - шчасця і працвітання.
Аляксандр Лукашэнка таксама накіраваў віншаванні з Днём яднання Старшыні Савета Міністраў Саюзнай дзяржавы, Старшыні Урада Расіі Міхаілу Мішусціну, Старшыні Савета Федэрацыі Федэральнага Сходу Расіі Валянціне Мацвіенка, Старшыні Парламенцкага сходу Саюза Беларусі і Расіі, Старшыні Дзяржаўнай Думы Федэральнага Сходу Расіі Вячаславу Валодзіну, Дзяржаўнаму сакратару Саюзнай дзяржавы Дзмітрыю Мезенцаву, Патрыярху Маскоўскаму і ўсяе Русі Кірылу.