Наведванне ААТ "Магілёўскі завод ліфтавага машынабудавання"

Прэзідэнт Беларусі Аляксандр Лукашэнка 10 ліпеня наведаў ААТ "Магілёўскі завод ліфтавага машынабудавання".

Адразу пасля прыбыцця Кіраўнік дзяржавы ўказаў на неабходнасць навядзення ў Магілёве парадку. Ён звярнуў увагу на праблемныя моманты ў гэтым плане з борта верталёта па дарозе на прадпрыемства. "Вы самі сябе губіце гэтай захламленасцю, - сказаў Прэзідэнт.

Размова аб тым, што часам вытворчыя тэрыторыі або ў раёне будоўляў утрымліваюцца ў непрыглядным выглядзе, няма парадку. Задача перад кіраўніцтвам вобласці і горада - вырашыць гэтыя праблемы.

"Наводзьце парадак. Каб на працягу года ўсё было прыведзена ў адпаведнасць. Мабілізуйце людзей, наводзьце парадак", - запатрабаваў беларускі лідар.

Гэта сітуацыя ў горадзе пацвярджаецца і матэрыяламі Камітэта дзяржкантролю.

"Мы ўсё крычым аб тым, што трэба танней прадукты харчавання і іншае. Добра, танней прадукты харчавання. Стрымліваем цэны. Але вы ж самі сябе губіце гэтай захламленасцю. Вы ж жыццё змяншаеце сабе. Там якія толькі заразы не сядзяць. І што за такая практыка: выкапалі катлаван, яшчэ нейкія адходы - побач выгрузілі недзе ў кусты... Там, дзе гэтыя кучы смецця і іншае, - гэта атрута для людзей", - падкрэсліў Аляксандр Лукашэнка.

Старшыня Магілёўскага аблвыканкама Анатоль Ісачанка далажыў Кіраўніку дзяржавы аб асноўных паказчыках сацыяльна-эканамічнага развіцця рэгіёна. Тэмп росту валавога рэгіянальнага прадукту ў Магілёўскай вобласці за студзень-май склаў 98,6% да аналагічнага перыяду мінулага года.

"Тры правалы ў цябе па вобласці. Самае дзіўнае, у цябе ж і прамысловасць правальваецца", - адзначыў Аляксандр Лукашэнка.

Як удакладніў Анатоль Ісачанка, выйсці на запланаваныя паказчыкі па ВРП не могуць з-за дрэнных вынікаў у прамысловасці, рознічным і аптовым тавараабароце. Што датычыцца прамысловасці, пытанні ёсць па двух напрамках - дрэваапрацоўцы і вытворчасці цэменту. Да канца года іх разлічваюць вырашыць, зрухі ўжо ёсць.

Прэзідэнт пацікавіўся тэмпамі будаўніцтва жылля, як вырашаюцца праблемныя пытанні на буйнейшых прадпрыемствах вобласці і як рэалізуюцца ў рэгіёне інвестыцыйныя праекты. "Пытанне не ў тым, каб заняць людзей. У нас з гэтым праблем амаль няма. Пытанне ў тым, каб кожны раён зарабляў сабе грошы, - падкрэсліў Аляксандр Лукашэнка. - І гэты праект, які яны там ствараюць, не проста стварыў - даў справаздачу".

"У кожным раёне свой праект. Праекты рознай накіраванасці. Яны літаральна ўсе ў рабоце", - адказаў губернатар. У якасці прыкладу ён прывёў развядзенне радужнай фарэлі на паўднёвым усходзе Магілёўскай вобласці. Штомесяц прадпрыемства атрымлівае 20 т рыбы, прадукцыя карыстаецца вялікай папулярнасцю ў гандлёвых сетках.

Кіраўнік дзяржавы на "Магілёўліфтмашы" наведаў вытворчыя памяшканні. Тут размова ішла аб далейшых перспектывах, у тым ліку павелічэнні аб'ёмаў і спектра выпускаемай прадукцыі, задзейнічанні дадатковых тэрыторый.

Затым Аляксандр Лукашэнка агледзеў экспазіцыю сучаснага ліфтавага абсталявання, якое вырабляюць на прадпрыемстве, у тым ліку ліфтавыя паркоўкі адкрытага і закрытага тыпу. Холдынг таксама выпускае электрарухавікі розных мадыфікацый, дрэваапрацоўчую, сельскагаспадарчую, бытавую тэхніку.

Адзін з акцэнтаў Кіраўнік дзяржавы зрабіў на пытанні энергазберажэння. Ёсць у арсенале прадпрыемства, напрыклад, і ўстройства для абеззаражвання ліфтаў і памяшканняў, што асабліва актуальна па прычыне нядаўняй пандэміі.

"Магілёўліфтмаш" актыўна працуе над імпартазамяшчэннем. На прадпрыемстве рэалізуецца некалькі інвестыцыйных праектаў, аб чым таксама далажылі Прэзідэнту.

У першую чаргу гэта мадэрнізацыя вытворчасці скорасных ліфтаў і ліфтаў з безрэдуктарным прыводам. Такі механізм мае высокі каэфіцыент карыснага дзеяння, павышаную надзейнасць і даўгавечнасць, а ліфты рухаюцца практычна без шуму і вібрацыі. На прадпрыемстве ствараюць вытворчасці электрарухавікоў, цягавых рухавікоў для электратранспарту і выбуховаабароненых электрарухавікоў для прадпрыемстваў горназдабыўной прамысловасці.

У час наведвання "Магілёўліфтмаша" Аляксандр Лукашэнка таксама сустрэўся з работнікамі гэтага прадпрыемства.

"Попыт на вашу прадукцыю вялікі. І не толькі на вашу", - сказаў Кіраўнік дзяржавы.

Ён адзначыў, што з кіраўніцтвам Расіі, кіраўнікамі рэгіёнаў часта гаворыцца аб запатрабаванасці беларускай прадукцыі: "Вельмі часта з вуснаў, як я жартам гавару, старэйшага брата, я чую апошнім часам: "Вось вы малайцы, вы гэта захавалі, тое захавалі, вам гэта ўдалося..." Хоць, заўважыў Прэзідэнт, у свой час было не проста пасля развалу Савецкага Саюза захаваць усё гэта - прадпрыемствы і калектывы.

Краіны сумесна працуюць над пытаннямі імпартазамяшчэння. Напрыклад, у сферы мікраэлектронікі. Але патрэбны і менш высокатэхналагічныя тавары, як тыя ж аўтобусы. Сярод такой запатрабаванай прадукцыі і ліфтавае абсталяванне.

Аляксандр Лукашэнка расказаў, што прыехаў паглядзець, ці здольна прадпрыемства нарасціць аб'ёмы выпуску прадукцыі. І тут, паводле яго слоў, важна працаваць разам у дзяржаўных інтарэсах. Калі побач з "Магілёўліфтмашам" ёсць недазагружаныя іншыя прадпрыемствы, а такія ёсць, то размясціць частку вытворчасці там, выпускаць тыя ці іншыя неабходныя вузлы і агрэгаты. "Нікуды не дзенешся. Вы вырабляеце такі прадукт, дзе трэба пастаянна змагацца, канкурыраваць. Нікуды не дзенешся. Таму вось мы з губернатарам вызначыліся, трэба нашых кіраўнікоў, чырвоных дырэктараў, крыху падкручваць, каб у іх быў дзяржаўны падыход", - падкрэсліў Кіраўнік дзяржавы.

"Шанц. Акно магчымасцей адкрыта. Так заўсёды не будзе", - сказаў Прэзідэнт, гаворачы пра цяперашні вялікі попыт на разнастайную прадукцыю ў адсутнасць на рынку шэрага заходніх канкурэнтаў.

Аб гэтым Кіраўнік дзяржавы гаварыў і раней у час агляду вытворчасці на "Магілёўліфтмашы": "Я чаму прыехаў на "Ліфтмаш" (гэтак жа, як і БЕЛАЗ трэба паглядзець, на МАЗе аўтобусы) - таму што попыт вялікі цяпер. Трэба задаволіць рынак. Таму ў мяне пытанне: а чаму мы большую колькасць пры такім попыце не выпускаем? Калі ў цябе (на "Магілёўліфтмашы". - Заўвага) мала магутнасцей, трэба задзейнічаць іншыя, калі трэба", - адзначыў беларускі лідар.

У мяне пытанне, каб мы не празявалі момант, забралі рынак. Калі сёння мы 16 тыс. (адзінак прадукцыі. - Заўвага) прадаць можам, а ён (на заводзе. - Заўвага) можа вырабіць 14 тыс., ну 2 тыс. трэба памерці, але вырабіць. Няхай ён асноўныя рабіў бы дэталі, а недзе нешта гнуць, паяць ці варыць - "Строммашына" або яшчэ нешта. Такім чынам мы рынак зоймем і тут прадпрыемствы зможам загрузіць", - прывёў прыклад Кіраўнік дзяржавы.

У час сустрэчы з працоўным калектывам "Магілёўліфтмаша" размова зайшла аб занятасці і мэтазгоднасці будаўніцтва новых вытворчасцей у вобласці. "Вы ж ведаеце мой "жудасны" праект: у кожным раёне павінны на працягу гэтага года - максімум наступнага стварыць высокатэхналагічнае прадпрыемства. 21 раён (у Магілёўскай вобласці. - Заўвага) - 21 прадпрыемства. Створым, пачалі рухацца. Грашымі дапамагаем. Туды патрэбны людзі - і людзі з добрымі мазгамі. Таму нам патрэбны будуць людзі. Прадпрыемствы мы пабудуем, гэта не пытанне сёння ўжо", - сказаў Аляксандр Лукашэнка.

Прэзідэнт таксама адзначыў важнасць дысцыпліны і якаснага выканання кожным сваіх працоўных абавязкаў.

Гаворачы аб прадпрыемстве, Аляксандр Лукашэнка сказаў: "Сёння малады кіраўнік (генеральны дырэктар Сяргей Чарткоў. - Заўвага). Наш, мясцовы. Разумее, ведае, што рабіць. Таксама паглядайце, каб не расслаблялася ваша начальства. І падказвайце, і недзе... Па-чалавечы. Але дысцыпліна павінна быць жалезабетонная".

"Ніхто ж не патрабуе нічога лішняга. Кіруеш холдынгам - адказвай за яго. За завод, за людзей. І кожны на сваім месцы. Зваршчык, мантажнік і іншыя людзі, бухгалтары, эканамісты - вы на сваім месцы, дайце свой вынік. Але дысцыпліна каб была. Таму што адсутнасць дысцыпліны - гэта правал. Правал - гэта вайна. Усё пачынаецца з эканомікі", - падкрэсліў беларускі лідар.

У гэтым плане Кіраўнік дзяржавы прывёў прыклад Украіны, дзе яшчэ да спецыяльнай ваеннай аперацыі абрушылі эканоміку. Такім чынам, акрамя знешніх, заўсёды ёсць і ўнутраныя прычыны. І тут Аляксандр Лукашэнка яшчэ раз акцэнтаваў адказнасць кожнага паасобку за стабільнасць і дабрабыт краіны: "За чалавека ніякая ўлада нічога не зробіць. Тое, што вы павінны зрабіць, - вы павінны зрабіць. Нікуды ад гэтага не дзенешся".

У час размовы з работнікамі прадпрыемства Прэзідэнт адзначыў, што рост тарыфаў на жыллёва-камунальныя паслугі павінен кампенсавацца ростам заработнай платы.

У чэрвені рост тарыфаў на жыллёва-камунальныя паслугі прывязалі да базавай велічыні. Цяпер максімальна дапушчальны рост плацяжоў насельніцтва не павінен перасягаць 0,5 базавай велічыні замест раней устаноўленага пяцідоларавага эквіваленту. У сувязі з гэтым работнікі прадпрыемства пацікавіліся, ці не паўплывае гэта на істотны рост камуналкі, паколькі сёння палова базавай велічыні (Br18,5) вышэйшая за $5 па бягучым курсе.

Кіраўнік дзяржавы адзначыў, што розніца неістотная і для работадаўцаў напэўна не будзе праблем, каб павысіць зарплату на гэту велічыню, тым больш на "Магілёўліфтмашы".

"Тое, што мы павінны гэта кампенсаваць у зарплату людзям, гэта дакладна. Нам трэба абавязкова паціху рухаць зарплату, - падкрэсліў Аляксандр Лукашэнка. - Будзем старацца ісці, павышаючы зарплату".

Разам з тым Прэзідэнт заўважыў, што, напрыклад, паслугі цеплазабеспячэння насельніцтва аплачвае не поўнасцю - 20-30% ад фактычных затрат. Астатняе кампенсуе дзяржава.

Аляксандр Лукашэнка таксама растлумачыў, чаму было прынята рашэнне адвязаць рост тарыфаў на ЖКП ад долара. "Долар для нас - варожая валюта. Вось яны пайшлі, разлікі ў доларах перакрылі нам, таму мы пераходзім на юані, расійскія рублі. Нас гэта задавольвае", - адзначыў ён. 

"Усё зводзіцца да таго, як будзем працаваць, так і будзем жыць. Жывём нядрэнна ў параўнанні з тым, што вакол адбываецца. Таму не перажывайце, калі будзе цяжка, плячо падставім", - падкрэсліў Кіраўнік дзяржавы.

Аляксандр Лукашэнка пацвердзіў план да 2025 года забяспечыць у сельскай мясцовасці шырокапалосны доступ у інтэрнэт: "План у нас ёсць у 2025 годзе гэту тэму закрыць. Мы павінны вырашыць гэту праблему. Мы ад свету не адстаём. У асноўным мы зробім гэту работу".

Разам з тым Кіраўнік дзяржавы звярнуў увагу, што людзям трэба расказваць, як бяспечна карыстацца інтэрнэтам. Паколькі інтэрнэт ва ўмелых руках можа быць фактычна зброяй, якую выкарыстоўваюць у тым ліку для дэструктыўнага ўплыву на грамадства, як у Беларусі ў 2020-м годзе. "Паглядзіце на сучаснасць. Калі б мы тады не выстаялі, мы як краіна не існавалі б. З намі даўно разабраліся б без вайны. І ўжо пад Смаленскам стаялі б НАТАўскія войскі", - сказаў Прэзідэнт.

"Ад гэтага нікуды не дзецца. Інтэрнэт павінен быць, і мы людзям павінны расказваць, як карыстацца гэтым інтэрнэтам. Таму што вялікая справа, але і памыйніца добрая", - заўважыў Прэзідэнт.

Раней Аляксандр Лукашэнка даручаў прапрацаваць пытанне будаўніцтва ў краіне другога азотнага комплексу і яшчэ аднаго цэлюлознага камбіната. У Кіраўніка дзяржавы пацікавіліся, ці магчыма рэалізаваць усё гэта на базе мясцовага горадаўтваральнага прадпрыемства "Магілёўхімвалакно". Тут, адзначылі работнікі, ёсць свае кадры, школа хімікаў і неабходная інфраструктура.

"Я не хацеў бы Магілёў перанасычаць гэтай хімічнай вытворчасцю. Але пры добрых тэхналогіях, калі нешта магчыма з гэтай вытворчасці, пра якую вы сказалі, перанесці на "Хімвалакно" і там развіваць, мы гэта будзем рабіць", - адзначыў Прэзідэнт.

Аляксандр Лукашэнка нагадаў, што раней была зацверджана праграма мадэрнізацыі "Магілёўхімвалакно". "Трэба перааснашчацца і вырабляць прадукцыю высокай дабаўленай вартасці. Гэта значыць не проста, груба кажучы, плёнку вырабіць і прадаць, а з гэтай плёнкі нешта зрабіць, - растлумачыў ён. - Вельмі спадзяёмся, што новая каманда мадэрнізацыю гэту завершыць і створыць чыстую вытворчасць".

Новы комплекс па вытворчасці азотных угнаенняў першапачаткова думалі пабудаваць у Віцебскай вобласці. Але потым вырашылі, што больш мэтазгодна яго ўзвесці ў Гродне, дзе ёсць і ўмовы, і падрыхтаваныя спецыялісты.

"Я не прыхільнік таго, каб аднекуль нешта забіраць і цягнуць у Магілёў. Тут шмат прадпрыемстваў. Ім трэба даць жыццё. І калі ўсе людзі будуць заняты, навошта нам тут лішняе прадпрыемства. Дай бог, каб людзей сёння хапіла. Некалі было беспрацоўе, а сёння нам усё больш і больш трэба людзей, таму што рынак патрабуе нашай прадукцыі", - падкрэсліў Кіраўнік дзяржавы.