Наведванне Свята-Пакроўскага храма ў Талачыне

Прэзідэнт Беларусі Аляксандр Лукашэнка ў светлае свята Вялікадня наведаў храм Пакрова Прасвятой Багародзіцы, размешчаны на тэрыторыі Свята-Пакроўскага жаночага манастыра ў Талачыне.

Пасля прыезду Кіраўнік дзяржавы пагутарыў з прыхаджанамі і настаяцельніцай манастыра ігуменняй Анфісай, якую распытаў пра тэрыторыю манастыра і гісторыю храма. У самім храме Аляксандр Лукашэнка запаліў свечку і звярнуўся да вернікаў.

Прэзідэнт адзначыў, што яму асабліва прыемна ў гэта светлае свята бачыць усіх прысутных з усмешкамі, у добрым настроі. "Перш за ўсё хачу вас павіншаваць і павітаць у гэта светлае добрае свята. Хрыстос уваскрэс!" - сказаў Кіраўнік дзяржавы. "Сапраўды ўваскрэс!" - адказалі прыхаджане.

"Колькі ні бываю ў нашых храмах, заўсёды гэты дзень адзначаюць як асаблівы, - прадоўжыў Прэзідэнт. - Якія б ні былі складаныя, цяжкія часы (а ў нашай гісторыі яны былі рознымі), мы заўсёды з вялікім натхненнем, вялікім жаданнем чакалі і чакаем гэта светлае добрае свята Уваскрэсення Хрыста, наш Вялікдзень".

Для беларусаў Вялікдзень знаходзіцца нараўне з такімі значнымі свецкімі святамі, як Дзень Перамогі і Дзень Незалежнасці, заўважыў Аляксандр Лукашэнка. А ў бягучым годзе яшчэ так супала, што Вялікдзень адзначаецца ў адзін дзень прадстаўнікамі некалькіх канфесій, і таму ўспрымаецца па-асабліваму. "Так супала, і гэта вельмі сімвалічна для нас, таму што наша краіна - гэта краіна адзінства, справядлівасці і ўзаемаразумення, узаемадапамогі", - падкрэсліў Кіраўнік дзяржавы.

Прэзідэнт звярнуў увагу, што гісторыя храма ў Талачыне налічвае больш за 400 гадоў, але ён выдатна захаваўся, у тым ліку дзякуючы таму, што яго даглядалі і падтрымлівалі ў парадку. "Уяўляеце, колькі ён бачыў на сваім жыццёвым вяку і колькі яшчэ ўбачыць дзякуючы нашым клапатлівым рукам. Ён акуратны, дагледжаны. Гэтак жа, як мы будзем даглядаць (я вельмі спадзяюся, разлічваю на вас), будзем глядзець за парадкам у нашай краіне ў Год добраўпарадкавання", - сказаў Кіраўнік дзяржавы.

Аляксандр Лукашэнка падкрэсліў, што гэты год для Беларусі асаблівы з-за важнай юбілейнай даты - 80-годдзя Перамогі ў Вялікай Айчыннай вайне. Віцебская вобласць была ў ліку найбольш пацярпелых у час той страшнай вайны. "Мы і цяпер, займаючыся доказамі зверстваў фашыстаў у нашай Беларусі, займаемся выяўленнем фактаў генацыду беларускага народа. І, ведаеце, вельмі шмат месцаў пахаванняў знаходзім на Віцебшчыне", - адзначыў Прэзідэнт.

У дату 80-годдзя Перамогі запланавана правядзенне многіх памятных мерапрыемстваў, прысвечаных гэтай даце і подзвігу савецкага народа. Яны будуць праходзіць як у Беларусі, так і ў Расіі, у тым ліку з удзелам лідараў дзвюх краін. Адно з такіх мерапрыемстваў адбудзецца ўжо ў бліжэйшы час. Гэта міжнародны форум у Валгаградзе да 80-годдзя Вялікай Перамогі, які пройдзе ў канцы красавіка.

"Гэта вельмі-вельмі асаблівы год для Віцебшчыны, для нашай Беларусі. І мы фактычна робім першыя крокі па святкаванні гэтай Вялікай Перамогі ўжо сёння, - сказаў Кіраўнік дзяржавы. - Днямі мы прадоўжым гэтыя святы пад Сталінградам, на Валгаградскай зямлі. З Прэзідэнтам Расіі мы дамовіліся, там сустрэнемся, паразмаўляем з моладдзю, аддадзім даніну павагі тым героям, якія змагаліся на Волзе. Затым - парад у Маскве, у Беларусі. І да Дня Незалежнасці мы будзем аддаваць даніну павагі тым, хто прынёс нам гэта жыццё".

Прэзідэнт адзначыў, што ўжо ў бягучым годзе кожная з асноўных канфесій, прысутных у Беларусі, павінна пачаць ствараць свае цэнтры прыцягнення. Напрыклад, для праваслаўя такім цэнтрам стане Жыровіцкі манастыр - жамчужына беларускага праваслаўя, як сказаў пра яго Аляксандр Лукашэнка. А для католікаў адным з найбольш значных цэнтраў з'яўляецца Будслаўскі касцёл, дзе знаходзіцца важнейшая святыня - Будслаўскі абраз Божай Маці.

"Мы ў краіне дамовіліся, што ў бягучым годзе мы пачнём працэс стварэння цэнтраў асноўных рэлігій у Беларусі. Самая вялікая наша канфесія - гэта праваслаўе, больш за 85% (насельніцтва. - Заўвага), якія адносяць сябе да праваслаўя. Другая па значнасці - гэта католікі, з якімі мы сёння святкуем гэта свята, - сказаў Прэзідэнт. - Кожная канфесія ў бягучым годзе павінна пачаць ствараць цэнтры, свае цэнтры".

Аляксандр Лукашэнка таксама расказаў аб планах па стварэнні ў Мінску Музея гісторыі сусветных рэлігій. "Таксама мы створым Музей гісторыі сусветных рэлігій у Мінску, каб наша моладзь ведала, што такое рэлігія і адкуль карані гэтых рэлігій - і хрысціян, праваслаўных і католікаў, і мусульман, іўдзеяў і гэтак далей. У гэты цэнтр любы зможа прыйсці і паглядзець, адкуль усе мы, адкуль наша духоўнасць", - адзначыў Кіраўнік дзяржавы.

Прэзідэнт згадаў і яшчэ некалькі важных аб'ектаў - так званую беларускую ВДНГ, дзе будуць прадстаўлены айчынныя дасягненні ў розных сферах, і Нацыянальны гістарычны музей, прысвечаны гісторыі беларускай дзяржаўнасці.

"Канчаткова да 9 мая гэты цэнтр (Мінскі міжнародны выставачны цэнтр. - Заўвага) будзе адкрыты для наведвання ўсіх нашых беларусаў, каб яны, асабліва моладзь, прыйшоўшы туды, захапіліся і адзін у аднаго спыталі: "Няўжо мы ўсё гэта можам вырабляць? Няўжо мы гэта сваімі рукамі зрабілі?" - сказаў Прэзідэнт.

"Я ўжо гаварыў мінулы раз, на Раство Хрыстова, што гэта няпростыя гады, асабліва гэты год. Нам трэба мабілізавацца, з'яднацца і прайсці іх. Турбулентнасць, хаос, неразбярыха ў свеце вялізныя", - заявіў Аляксандр Лукашэнка. 

Прэзідэнт звярнуў увагу, што ўлады стараюцца ўберагчы Беларусь і беларускі народ ад гэтага хаосу. Зрабіць так, каб кожны беларус, займаючыся сваёй справай, бачыў вынікі сваёй працы, спакойна гадаваў дзяцей і стараўся даць ім адукацыю. 

"Але гады вельмі складаныя, вельмі цяжкія, асабліва ва ўмовах санкцый для нашай эканомікі. Эканоміка ў аснове ўсяго", - падкрэсліў беларускі лідар.

Прэзідэнт расказаў, што, пад'язджаючы да храма, ён абмяркоўваў са старшынёй райвыканкама работу Талачынскага раёна. Кіраўнік дзяржавы адзначыў, што па паказчыках гэта адзін з лепшых раёнаў не толькі ў Віцебскай вобласці, але і ў краіне. Тым не менш Прэзідэнт закрануў і надзённыя тэмы навядзення парадку на зямлі. Аляксандр Лукашэнка папярэдзіў, што па ўсёй Віцебскай вобласці пройдуць праверкі, асабліва па падзяжы жывёлы.

"Я заўважыў, што тыя, каму мы нямала дапамагалі, дрэнна працуюць. Таму - у царкве не хлусяць - павінен вам адкрыта сказаць: гэты год будзе вельмі сур'ёзны ў плане навядзення парадку ў нашай краіне", - сказаў Аляксандр Лукашэнка.

Гаворачы пра Год добраўпарадкавання, Прэзідэнт звярнуў увагу, што размова ідзе не аб тым, што трэба проста падмесці вуліцы і высадзіць дрэвы: "Кожны на сваім прысядзібным участку, калі гэта ў вёсцы, ды і ў гарадах, павінен навесці адпаведны парадак". Аляксандр Лукашэнка дадаў, што ў нашай краіне не павінна быць у тым ліку пустуючых і закінутых зямель.

Прэзідэнт падкрэсліў, што беларусы павінны дастойна пражыць гэты год, стварыўшы нармальныя ўмовы для жыцця, перш за ўсё нашых дзяцей. "Не заўсёды і не ўсюды так атрымліваецца, асабліва ў Віцебскай вобласці. Таму я і сказаў старшыні райвыканкама (прадстаўніку Прэзідэнта тут): інсайдарская табе інфармацыя - рыхтуйся да вельмі сур'ёзных кантрольных праверак", - сказаў Кіраўнік дзяржавы.

Паводле слоў Аляксандра Лукашэнкі,у час праверак трэба будзе ацаніць, чаго дасягнула Віцебская вобласць за мінулыя гады.

"Карыстаючыся выпадкам, знаходзячыся ў гэтым храме Божым, хачу вас папрасіць: рабіце на сваім месцы тое, што павінны рабіць. Гэта значна лягчэй, значна прасцей, чым у паўднёвых нашых суседзяў. Не хацелася б, каб мы да гэтага дайшлі. Таму трэба было працаваць і рабіць сваю справу", - адзначыў Прэзідэнт.

Кіраўнік дзяржавы паабяцаў, што ў аснове яго палітыкі будзе справядлівасць: зарабіў - атрымаў. "Гасподзь нам нафты-газу ў гэту зямельку не ўклаў, каб мы маглі напампаваць, па трубе некаму прадаць, а грошы падзяліць. У нас гэтага няма, мы ўсё сваімі рукамі закладваем. Напэўна, у гэтым нейкі сэнс, калі Ён так вырашыў. Таму давайце будзем карыстацца тым, што ў нас ёсць, і берагчы сваю беларускую зямлю", - заклікаў Прэзідэнт.

"Я жадаю вам самага галоўнага, што не купіш ні за якія грошы, - міру, здароўя. Вам, вашым дзеткам, каб вашы дзеці вас ніколі не засмучалі, каб былі такімі светлымі, добрымі, радаснымі, як у гэты святочны дзень, - пажадаў Аляксандр Лукашэнка. - Беражыце Беларусь - іншай такой не будзе. І не трэба, таму што яна самая прыгожая, цудоўная. Гэта месца для жыцця нас і нашых дзяцей. Шчасця, дабрабыту, радасці вам!"

Кіраўнік дзяржавы перадаў у дар храму абраз Божай Маці "Казанская". Гэта адзін з самых вядомых і асабліва шануемых праваслаўных вобразаў Багародзіцы. Падораны Прэзідэнтам абраз выкананы ў майстэрні Свята-Елісавецінскага жаночага манастыра ў Мінску. Выява Багародзіцы напісана акрылавымі фарбамі на драўлянай дошцы з вольхі. Сам абраз змешчаны ў бярозавы ківот, афарбаваны пад арэх.

Прэзідэнту перадалі ў дар абраз свяшчэннамучаніка Харалампія, створаны яраслаўскімі майстрамі ў стылі яраслаўскай школы іканапісу. Ён напісаны на драўлянай аснове тэмпернымі фарбамі і пакрыты сусальным золатам. На палях па золаце выканана разьба з роспісам арнаменту.