Перагаворы з Прэзідэнтам Экватарыяльнай Гвінеі Тэадора Абіянгам Нгемам Мбасога

Сустрэча Прэзідэнта Беларусі Аляксандра Лукашэнкі з Прэзідэнтам Экватарыяльнай Гвінеі Тэадора Абіянгам Нгемам Мбасога прайшла 9 снежня ў Малаба.

Пасля афіцыйнага цырыманіялу з выкананнем гімнаў і ротай ганаровай варты пачаліся перагаворы кіраўнікоў дзяржаў.

У час перагавораў у вузкім складзе Аляксандр Лукашэнка заявіў, што бачыць вялікі патэнцыял для развіцця Экватарыяльнай Гвінеі.

Рэагуючы на словы свайго калегі аб тым, што Экватарыяльная Гвінея - невялікая па памерах краіна, Аляксандр Лукашэнка падкрэсліў: "Вы сапраўды невялікая краіна, але з велізарнымі магчымасцямі. Некаторыя аб'екты, якія я ўбачыў тут, проста ўражваюць сваёй прыгажосцю. Я падумаў, што і нам было б складана пабудаваць такое".

Беларусь гатова супрацоўнічаць, дзяліцца вопытам, тэхналогіямі ў розных сферах, дапамагчы з падрыхтоўкай кадраў.

"Я сказаў вашаму віцэ-прэзідэнту (у час сустрэчы ў аэрапорце. - Заўвага) адну рэч, з якой я прыехаў сюды: я лічу, што ваша краіна, валодаючы нават такімі багаццямі, не павінна імпартаваць тое, што можа вырабляць сама", - сказаў Прэзідэнт Беларусі.

"Цалкам згодны", - адказаў Тэадора Абіянг Нгема Мбасога.

Як вядома, з адкрыццём у сярэдзіне 90-х радовішчаў нафты, эканоміка Экватарыяльнай Гвінеі кардынальна змянілася. Раней яна мела аграрна-сыравінны, плантацыйны характар, а цяпер звыш 90% даходаў дзяржбюджэту фарміруюць даходы ад нафтагазаздабыўнога сектара.

Затым адбыліся перагаворы ў пашыраным складзе - з удзелам членаў дэлегацый.

Кіраўнік беларускай дзяржавы адзначыў, што гэта яго першы візіт у Цэнтральную Афрыку і ён уражаны тым, што ўбачыў у гэтай частцы цудоўнага Афрыканскага кантынента. "Прыгожыя лясы, горы, рэкі, багаты на рыбу Атлантычны акіян - сапраўды райскія скарбы. І я сказаў Прэзідэнту, што вы жывяце ў раі. Але самы вялікі скарб любой краіны, што аднолькава прымяняльна і да Беларусі, і да Экватарыяльнай Гвінеі, - гэта нашы людзі. Добрыя, працавітыя, якія шчыра жадаюць клапаціцца аб сваёй роднай зямлі, адкрыты новым ведам, вопыту, тонка адчуваюць сяброў і аднадумцаў", - сказаў Аляксандр Лукашэнка.

"За апошнія паўгода мы зрабілі ўражальны рывок - абмяняліся візітамі на вышэйшым узроўні, стварылі сумесную пастаянную камісію па супрацоўніцтве, правялі яе першае пасяджэнне, істотна актывізавалі дзелавую актыўнасць", - канстатаваў беларускі лідар.

Ён адзначыў амбіцыйныя мэты, накіраваныя на павышэнне дабрабыту народа Экватарыяльнай Гвінеі, якія ставіць перад сабой Прэзідэнт гэтай краіны: "Ваш Урад праводзіць палітыку адкрытасці, імкнучыся планамерна развіваць інфраструктуру, паскараць індустрыялізацыю краіны, забяспечыць эканоміку добра падрыхтаванымі кадрамі".

Аляксандр Лукашэнка адзначыў, што яго ўразілі словы, сказаныя Прэзідэнтам Экватарыяльнай Гвінеі на перагаворах у вузкім складзе, што, развіваючы інфраструктуру, у краіне пададсталі ў забеспячэнні самым неабходным людзей. Перш за ўсё гэта датычыцца прадуктаў харчавання. "Гэта трэба кампенсаваць. Я сказаў Прэзідэнту, што мы гатовы вам у гэтым дапамагчы. Такі вопыт ужо ёсць на вашым кантыненце. Гэта Зімбабвэ. Краіна, якая не магла забяспечыць хлебам свой народ, сёння, як гаворыць Прэзідэнт Зімбабвэ, экспартуе збожжа. Усяго за два гады мы разам вырашылі гэту праблему", - прывёў ён прыклад эфектыўнага супрацоўніцтва.

Прэзідэнт таксама адзначыў, што Экватарыяльная Гвінея актыўна выступае за ўмацаванне афрыканскага адзінства, рэформу Савета Бяспекі ААН, што адлюстроўвае ролю Афрыкі на міжнароднай арэне, паглыбленне палітычнага і эканамічнага ўзаемадзеяння ў Цэнтральнай Афрыцы.

"Мець такога сябра - вельмі вялікі гонар. Беларусь з'яўляецца надзейным партнёрам для Экватарыяльнай Гвінеі. Сваю дружбу мы падмацоўваем не толькі словам, але і справай. У нас няма рознагалоссяў у палітычнай сферы і закрытых для абмеркавання тэм. Паміж нашымі краінамі дынамічна развіваюцца ўзаемавыгадныя, дружалюбныя і нават братэрскія адносіны", - падкрэсліў Аляксандр Лукашэнка.

Ён дадаў, што ў хуткім часе ў Малаба пачне працаваць пасольства Беларусі. Чакаецца, што да канца 2024 года пасольства Экватарыяльнай Гвінеі адкрыецца і ў Беларусі.

У час перагавораў Аляксандр Лукашэнка пацвердзіў гатоўнасць прадаставіць комплексныя рашэнні для развіцця Экватарыяльнай Гвінеі.

"Беларусь мае вопыт механізацыі і індустрыялізацыі сельскай гаспадаркі, наша тэхніка, тэхналогіі простыя і надзейныя. Мы выпускаем шырокі спектр машын і абсталявання для іншых галін эканомікі. Упэўнены, што наша грузавая, аўтобусная, дарожна-будаўнічая, камунальная, пажарная, кар'ерная, лесанарыхтоўчая тэхніка будзе запатрабавана пры рэалізацыі пастаўленых кіраўніцтвам Экватарыяльнай Гвінеі задач па паляпшэнні сацыяльна-эканамічных паказчыкаў і павышэнні ўзроўню жыцця насельніцтва. Мы ведаем аб патрэбнасці ў комплексных рашэннях і гатовы іх прадаставіць", - сказаў Кіраўнік беларускай дзяржавы.

Аляксандр Лукашэнка адзначыў хуткае развіццё супрацоўніцтва ў сферы аховы здароўя. Беларускія спецыялісты пачалі навучанне персаналу ў бальніцах Экватарыяльнай Гвінеі. "Мы пачалі ўжо і далей гатовы перадаваць вопыт і веды ў кіраванні бальнічнымі комплексамі, арганізацыі першаснай медыцынскай дапамогі вашаму насельніцтву, падрыхтоўцы кадраў, фармацэўтыцы. Гатовы паручыцца, што вынікі вас уразяць", - сказаў Прэзідэнт.

Ён таксама заявіў аб неабходнасці актыўна выкарыстоўваць магчымасці гуманітарнай сферы - адукацыя, навука, спорт, турызм, культура, - каб яшчэ больш зблізіць народы дзвюх краін.

У сваю чаргу беларускі бок зацікаўлены ў пастаўках гвінейскай какавы, трапічных агародніны і фруктаў, сумеснай перапрацоўцы рыбнай прадукцыі.

"Беларусь гатова стаць для вашай краіны мостам у Еўразію. Разлічваем на вашу сустрэчную падтрымку ў рамках Афрыканскага саюза і іншых інтэграцыйных аб'яднанняў. Перакананы, гэта будзе садзейнічаць росту дзелавой актыўнасці", - сказаў Аляксандр Лукашэнка.

Паводле яго слоў, сумесная работа бізнес-колаў і нацыянальных гандлёва-прамысловых палат павінна стаць ключавым звяном у працэсе выбудоўвання і фарміравання новых устойлівых бізнес-сувязей. "Мы адкрыты для дыялогу па ўсіх пытаннях, якія цікавяць, і гатовы да прадметнага абмеркавання ўсіх напрамкаў узаемадзеяння", - запэўніў беларускі лідар.

"Мы, вядома ж, не прыехалі ў вашу краіну займацца дабрачыннасцю. Такой магчымасці ў нас няма, ды гэта і не трэба. Але і нажывацца за кошт вашых людзей, вашай краіны мы не збіраемся. Мы не каланізатары. Мы вашы сябры. Перадаючы вам тэхналогіі па многіх напрамках, у якіх вы маеце патрэбу, мы абучым вашых людзей гэтым тэхналогіям. Мы не будзем прысылаць да вас сваіх рабочых. Мы прышлём сюды дастатковую колькасць спецыялістаў, у сельскай гаспадарцы гэта, прамысловасці, ахове здароўя, ці адукацыі... А працаваць будуць вашы людзі. І наша задача - гэтаму навучыць вашых людзей", - сказаў Кіраўнік беларускай дзяржавы.

Аляксандр Лукашэнка падкрэсліў, што беларусы прыйшлі ў Экватарыяльную Гвінею як сябры, і прапанаваў зрабіць усё неабходнае, каб пашырыць супрацоўніцтва і на іншыя краіны рэгіёна. "Я вельмі хацеў бы, каб мы з вамі зрабілі ўсё, каб з Экватарыяльнай Гвінеі мы маглі рушыць у іншыя краіны Афрыканскага кантынента з тымі тэхналогіямі, якія мы асвоім тут. Мы павінны дапамагчы тым краінам, якія хочуць дабрабыту сваім народам і развіцця сваім дзяржавам. Думаю, гэта ў нашых сілах ажыццявіць", - сказаў ён.

На перагаворах у пашыраным складзе Тэадора Абіянг Нгема Мбасога заявіў аб рашучасці надаць імпульс стварэнню альянсу Беларусі і Экватарыяльнай Гвінеі, каб забяспечыць устойлівае развіццё і сумесна процістаяць глабальным выклікам. Размова аб забеспячэнні харчовай бяспекі, а таксама барацьбе з наступствамі глабальнага змянення клімату.

"Мы вельмі ўдзячныя за супрацоўніцтва дзвюх краін. І яно заснавана на нашым жаданні, імкненні развіваць, дыверсіфікаваць і пашыраць наша ўзаемадзеянне. Упэўнены, што наш альянс Беларусі і Экватарыяльнай Гвінеі будзе цвёрда развівацца, каб выканаць нашы абавязацельствы ў рамках парадку дня-2030. Для нас Беларусь з'яўляецца прыярытэтам у нашай знешняй палітыцы", - падкрэсліў Прэзідэнт Экватарыяльнай Гвінеі.

Паводле яго слоў, бакі маюць намер пашыраць супрацоўніцтва ў эканамічным, інвестыцыйным сектары, рэалізацыі сумесных праектаў, у тым ліку ў прамысловасці, ахове здароўя, адукацыі, турызме, сельскай гаспадарцы, харчовай прамысловасці, а таксама перадачы тэхналогій. "Таксама мы хочам умацаваць сістэму бяспекі і абароны, каб гарантаваць стабільнасць і абараназдольнасць, а таксама суверэнітэт, мір і тэрытарыяльную цэласнасць Экватарыяльнай Гвінеі", - сказаў Тэадора Абіянг Нгема Мбасога.

У сваёй заяве па выніках сустрэчы Прэзідэнт Беларусі назваў праведзеныя перагаворы з Тэадора Абіянгам Нгемам Мбасога вельмі змястоўнымі, бакі абмеркавалі шырокае кола пытанняў па розных напрамках.

Галоўны акцэнт быў зроблены на тым, што Беларусь можа прапанаваць Экватарыяльнай Гвінеі, якія праблемы з улікам вопыту і ведаў беларускага боку магчыма вырашыць. "Па выніках візіту і перагавораў мы, без перабольшання, далі старт новаму этапу ў адносінах Беларусі і Экватарыяльнай Гвінеі. Усяго за год праведзена работа, на якую ў многіх краін ідуць дзесяцігоддзі. Гэты факт вельмі выразна сведчыць аб узаемнай зацікаўленасці і імкненні вывесці партнёрства на якасна новы ўзровень", - заявіў беларускі лідар.

Паводле яго слоў, у практычным плане вызначаны ключавыя напрамкі, па якіх бакі будуць актыўна працаваць, улічваючы і магчымасці беларускага боку, і пажаданні афрыканскіх калег.

Усе напрамкі і канкрэтныя праекты зафіксаваны ў дарожнай карце. Яна разлічана да 2026 года. "Тым самым мы паставілі наша супрацоўніцтва на цвёрды прававы фундамент. У дапаўненне да гэтага падпісаны пакет двухбаковых пагадненняў і дакументаў", - адзначыў Прэзідэнт Беларусі.

У ліку перспектыўных праектаў: будаўніцтва аграгарадка з неабходнай інфраструктурай; узвядзенне ста сацыяльных жылых дамоў; стварэнне завода па вытворчасці керамічнай цэглы магутнасцю да 40 млн штук у год; пастаўка пажарных машын, будаўнічай і іншай тэхнікі, у тым ліку для рэалізацыі сумеснага праекта па лесанарыхтоўцы і стварэнні новых сельгасугоддзяў; правядзенне работ па электрыфікацыі аддаленых раёнаў. "Я ўжо не гавару аб ахове здароўя, адукацыі і гэтак далей", - адзначыў Кіраўнік дзяржавы.

Ёсць дамоўленасці па вырошчванні асобных відаў сельгаскультур, адкрыцці аграхімічных лабараторый і іншыя.

"Хацеў бы асабліва адзначыць, што дасягнуты пагадненні па рэалізацыі першага этапу стварэння рэгіянальнага хаба па прасоўванні беларускай прадукцыі на рынкі краін Цэнтральнай і Заходняй Афрыкі", - заявіў Аляксандр Лукашэнка.

Беларускі бок таксама прадаставіў гранты гвінейскім студэнтам для навучання ў медыцынскіх ВНУ на тэрыторыі Беларусі. Акрамя таго, міністэрствы аховы здароўя дамовіліся аб арганізацыі перападрыхтоўкі ў Беларусі ўрачоў з Экватарыяльнай Гвінеі.

"Вырашана пачаць актыўную работу адразу - без разварушвання і бюракратычнай цяганіны. Усе ўзнікаючыя праблемныя пытанні будуць аператыўна вырашацца, калі спатрэбіцца - з падключэннем кіраўнікоў дзяржаў. Урадам дадзены даручэнні ў сціслыя тэрміны прыняць неабходныя меры - фінансавыя, прававыя, арганізацыйныя", - сказаў Кіраўнік беларускай дзяржавы.

Ён падкрэсліў, што ў Беларусі ёсць вопыт паспяховай работы ў Афрыцы і на іншых кантынентах, у чым Прэзідэнт Экватарыяльнай Гвінеі змог пераканацца ў ходзе размовы з калегамі на пляцоўцы кліматычнага саміту ў Дубаі на тыдзень раней. "Мы там з вамі арганізавалі, напэўна, пасяджэнне Афрыканскага саюза", - з доляй гумару адзначыў Аляксандр Лукашэнка.

Прэзідэнт выказаў упэўненасць, што зафіксаваныя дамоўленасці ў хуткім часе пачнуць працаваць на карысць народа Экватарыяльнай Гвінеі і ўжо ў 2024 годзе па ўсіх напрамках будуць атрыманы вынікі. Ён таксама падзякаваў за цяпло і гасціннасць, аказаныя беларускай дэлегацыі.

Падводзячы вынік перагаворам, Кіраўнік беларускай дзяржавы выказаў некалькі тэзісаў, аб чым гаварыў з кіраўніцтвам Экватарыяльнай Гвінеі. "Краіна не павінна траціць валюту на закупкі тых прадуктаў і тавараў, якія магчымы да вытворчасці ў Экватарыяльнай Гвінеі. Аксіёма", - сказаў беларускі лідар.

"Другое. Калі мы сустракаемся з некаторымі з прадстаўнікоў дзяржаў, у тым ліку і з маім сябрам з Экватарыяльнай Гвінеі, я заўсёды гавару пра тэхналогіі. І некаторыя пачынаюць крытыкаваць мяне: "Ну якія тэхналогіі, ну не гіганцкая краіна?" Павінен сказаць: так, мы не гіганцкая краіна, але ў нас дастаткова тых тэхналогій у сельскай гаспадарцы, прамысловасці і гэтак далей, каб Экватарыяльная Гвінея, скарыстаўшыся імі, на прыступку ці нават дзве прыступкі паднялася вышэй, - адзначыў Прэзідэнт. - І мы гатовы не проста прыйсці і тут уварваць нейкі куш, як гэта рабілі каланіялісты ў мінулым, а ў выніку нашага супрацоўніцтва навучыць гэтым тэхналогіям людзей у Экватарыяльнай Гвінеі. Тое, што ўмеем мы, мы перададзім народу Экватарыяльнай Гвінеі. Тое, што ўмее рабіць народ гэтай краіны, яны перададуць нам. У тым ліку і тавары. Вось у чым сэнс гэтага супрацоўніцтва".

Аляксандр Лукашэнка падкрэсліў, што Экватарыяльнай Гвінеі цяпер не патрэбны нейкія высокія тэхналогіі. Напрыклад, гэтай краіне не трэба запускаць у космас касмічныя апараты. Размова ідзе аб рэалізацыі больш прыземленых, але вельмі неабходных праектаў.

"Яшчэ раз хачу падкрэсліць (Прэзідэнт гэта ведае), я хачу, каб і народ Экватарыяльнай Гвінеі, і ў Афрыцы народы даведаліся: мы не ідзём сюды, каб нешта ўварваць. Мы хочам з вамі супрацоўнічаць на ўзаемавыгаднай аснове. Не дабрачыннасцю займацца - гэта пойдзе толькі на шкоду нашым народам. Мы будзем супрацоўнічаць у імя нашых народаў", - сказаў Прэзідэнт Беларусі.

Ён таксама выказаў здзіўленне ўбачаным на востраве, дзе размяшчаецца сталіца краіны - горад Малаба. "Як мне ўжо расказалі мае супрацоўнікі, на тэрыторыі, куды мы заўтра з вамі паедзем або паляцім, там яшчэ цудоўней. Трэба зусім крыху для таго, каб гэта быў сапраўды райскі куток. Хоць вы і так жывяце ў раі. Вы паставілі перад сабой грандыёзную задачу. Я абяцаю вам як свайму сябру, што гэту задачу мы можам вырашыць. Усе тыя праблемы, якія сёння трэба вырашаць у Экватарыяльнай Гвінеі, мы вырашалі ў Беларусі 30 гадоў таму. Нам гэта ўсё знаёма. Таму мы да вашых паслуг", - запэўніў беларускі лідар.

Прэзідэнт канстатаваў, што падпісаныя бакамі дакументы маюць агульны характар, але ў развіццё гэтых дакументаў ужо дамовіліся аб 74 канкрэтных праектах. "Вось гэта подзвіг, які здзейснілі члены ўрадаў Экватарыяльнай Гвінеі і Беларусі, нашы спецыялісты. 74 канкрэтныя праекты, якія мы павінны рэалізаваць у бліжэйшыя 2-3 гады. Заўтра пачынаем капаць зямлю ў Гвінеі і вырашаць праблемы", - рэзюмаваў Аляксандр Лукашэнка.

У сваім выступленні па выніках перагавораў Тэадора Абіянг Нгема Мбасога адзначыў вялікую колькасць падпісаных пагадненняў і сур'ёзнасць намераў па рэалізацыі дамоўленасцей, якая дэманструецца Беларуссю. "Я ўжо сказаў свайму сябру, за што мы змагаемся ў гэты момант - за эканамічную незалежнасць. Мы набылі палітычную незалежнасць, але ўсё яшчэ эканоміка працягвае заставацца стрымліваючым фактарам. Ёсць краіны, якія не хочуць развіцця для Афрыкі. Краіны, якія прыўносяць нестабільнасць, якія прыдумваюць усялякія змяненні, каб скарыстацца нашымі рэсурсамі, - сказаў Тэадора Абіянг Нгема Мбасога. - Але афрыканцы прачынаюцца. Мы бачым ужо, што нас падманулі. Мы расчараваны. І там, дзе мы мелі надзею, мы не зможам нічога атрымаць ад нашых былых каланізатараў".

У сувязі з гэтым, упэўнены Прэзідэнт Экватарыяльнай Гвінеі, неабходна мяняць сферы ўзаемадзеяння ў гэтым новым працэсе, і ў тым ліку сур'ёзна працаваць з беларускім бокам: "Гэта дысцыплінаваны народ. Гэта народ, які выконвае тое, што абяцае".

Ён заклікаў і народ сваёй краіны дзейнічаць у тым жа ключы: "Мы павінны выканаць тое, што прадастаўляецца нашай краіне. Наш менталітэт з'яўляецца часткай тармажэння нашага развіцця. Таму я заклікаю суайчыннікаў уключыцца ў гэта супрацоўніцтва з вялікай дысцыплінай. Мы павінны зразумець і навучыцца ад нашай дружалюбнай краіны".

Тэадора Абіянг Нгема Мбасога таксама асабліва адзначыў, што Беларусь з'яўляецца самадастатковай краінай, якая паспяхова процістаіць выклікам і пагрозам, што зыходзяць з боку іншых дзяржаў.

"Мы павінны разарваць нашу залежнасць, залежнасць нашай эканомікі. Мы не зможам вырасці эканамічна, калі мы будзем мець патрэбу ў імпартуемых прадуктах, якія выпускаюцца іншымі краінамі", - падкрэсліў ён. Прэзідэнт Экватарыяльнай Гвінеі таксама звярнуў увагу, што часта замежныя кампаніі атрымліваюць у разы большы прыбытак, выкарыстоўваючы сыравіну, якая закупляецца ў Экватарыяльнай Гвінеі і іншых краінах Афрыкі.

Тэадора Абіянг Нгема Мбасога падзякаваў Аляксандру Лукашэнку за добрае стаўленне да Экватарыяльнай Гвінеі і заявіў аб гатоўнасці развіваць супрацоўніцтва. "Упэўнены, што гэта дасць добры вынік", - сказаў ён.

Пасля завяршэння перагавораў у Малаба прэзідэнты Аляксандр Лукашэнка і Тэадора Абіянг Нгема Мбасога падпісалі дарожную карту па развіцці супрацоўніцтва Рэспублікі Беларусь і Рэспублікі Экватарыяльная Гвінея.

Дарожная карта распрацоўвалася з улікам патрэбнасцей экватагвінейскага боку і мае комплексны характар. Дакумент ахоплівае 15 ключавых напрамкаў узаемадзеяння, уключаючы кааперацыйныя праекты, пастаўкі беларускай тэхнікі і арганізацыю яе абслугоўвання, сельскагаспадарчую сферу, ахову здароўя, фармацэўтыку і рэалізацыю медыцынскага абсталявання, лясную гаспадарку. Дарожная карта разлічана на 2024-2026 гады.

У прысутнасці кіраўнікоў дзяржаў таксама падпісаны пакет дакументаў, накіраваны на развіццё супрацоўніцтва ў розных сферах.

Кіраўнікі МЗС прынялі сумесную заяву па выніках візіту Прэзідэнта Беларусі ў Экватарыяльную Гвінею.

Падпісаны пагадненні аб заахвочванні і ўзаемнай абароне інвестыцый, аб прадухіленні двайнога падаткаабкладання і папярэджанні ўхілення ад выплаты падаткаў на прыбытак і маёмасць, аб супрацоўніцтве і ўзаемнай дапамозе ў мытных справах.

Бакі таксама падпісалі пагадненні аб супрацоўніцтве ў сферы турызму, аб узаемным прызнанні дакументаў аб адукацыі, аб супрацоўніцтве ў сферы навукі і тэхналогій.

Акрамя таго, на міжведамасным узроўні заключаны шэраг дакументаў, уключаючы мемарандумы аб супрацоўніцтве і ўзаемаразуменні.

Усяго падпісана паўтара дзясятка двухбаковых дакументаў.

Тэадора Абіянг Нгема Мбасога таксама ўзнагародзіў Аляксандра Лукашэнку ордэнам Незалежнасці Экватарыяльнай Гвінеі - гэта адна з вышэйшых дзяржузнагарод краіны.

"Для нас з'яўляецца вялікім гонарам прымаць на тэрыторыі нашай Радзімы такога вялікага чалавека. І мы не чакалі, што ён так хутка наведае нас", - сказаў Прэзідэнт Экватарыяльнай Гвінеі.

Ён адзначыў, што ўсяго некалькі месяцаў таму лідары краін сустракаліся ў Мінску, і праз кароткі прамежак часу Аляксандр Лукашэнка прыбыў у Экватарыяльную Гвінею. "Мы вельмі ўдзячны", - сказаў Тэадора Абіянг Нгема Мбасога.

Прымаючы ордэн, Аляксандр Лукашэнка заявіў: "Выхаду няма. Экватарыяльная Гвінея павінна быць незалежнай!"

Пасля завяршэння перагавораў і цырымоніі падпісання дакументаў адбыўся афіцыйны прыём у гонар Прэзідэнта Беларусі Аляксандра Лукашэнкі ад імя Прэзідэнта Экватарыяльнай Гвінеі Тэадора Абіянга Нгемы Мбасога.

У час прыёму Кіраўнік беларускай дзяржавы заявіў, што настаў час Афрыкі, але краінам, якія здабылі палітычную незалежнасць, яшчэ давядзецца вызваліцца ад эканамічнай залежнасці.

"Свет мяняецца. Ён будзе іншым. І вяртання да таго, што было, ніколі ў далейшым не будзе. Народы свету ўсведамляюць. У большасці сваёй усвядомілі, што будучыня за Афрыкай. Настаў час Афрыкі. Скажу шчыра, што будзе вельмі складана такім краінам, як Экватарыяльная Гвінея, Беларусь, выстаяць паасобку ў гэтым шалёным свеце. І для таго, каб не проста выстаяць, а заняць сваё месца ў гэтым свеце, які бурна змяняецца, каб не загінуць, мы павінны быць бліжэй адзін да аднаго. Толькі разам, ідучы плячо ў плячо, трымаючыся за рукі, мы зможам у гэтым свеце выстаяць", - заявіў беларускі лідар.

Ён адзначыў, што многія з паўсотні афрыканскіх дзяржаў набылі палітычную свабоду, але гэта нават не палова шляху. "Вельмі цяжкі час наперадзе. Афрыканскім краінам давядзецца здабыць эканамічную свабоду і эканамічную незалежнасць. Амаль палова прыродных рэсурсаў тут, у Афрыцы. І гэта палова прыродных рэсурсаў свету павінна працаваць на карысць народаў Афрыканскага кантынента. У гэтым сутнасць эканамічнай свабоды, да якой вы павінны прыйсці", - сказаў Аляксандр Лукашэнка.

Ён запэўніў, што на гэтым шляху Беларусь будзе надзейным сябрам Экватарыяльнай Гвінеі і яе народа.

Кіраўнік беларускай дзяржавы згадаў словы свайго калегі, аб чым гаварылася і на перагаворах у Мінску, і ў Малаба, што ў Экватарыяльнай Гвінеі на працягу дзесяцігоддзяў будавалі і развівалі інфраструктуру, але крыху адсталі ў пытанні забеспячэння народа: "Я яму (Прэзідэнту Экватарыяльнай Гвінеі. - Заўвага) сказаў адкрыта: вы можаце разлічваць на Беларусь - у нас ёсць тыя тэхналогіі, веды, вопыт, адукацыя, якімі мы можам падзяліцца з Экватарыяльнай Гвінеяй".

"Мы да вашых паслуг. У нас ёсць тое, у чым вы маеце патрэбу. У вас ёсць тое, што трэба нам. Давайце разам зробім усё, каб народ гэтай цудоўнай краіны паказаў прыклад іншым народам Афрыкі, якім шляхам трэба ісці. Давайце зробім так, каб Экватарыяльная Гвінея адчыніла вароты для Беларусі ў іншыя цэнтральнаафрыканскія краіны", - заклікаў беларускі лідар.

Ён адзначыў, што міністры і спецыялісты абедзвюх краін за няпоўныя тры месяцы правялі каласальную работу, якая адлюстроўвае ўзаемную зацікаўленасць у дынамічным развіцці дружалюбнага і ўзаемавыгаднага супрацоўніцтва. Падпісана дарожная карта - план дзеянняў, які ўключае сем з паловай дзясяткаў праектаў. Вызначаны тэрміны іх рэалізацыі і адказныя асобы. "Давайце зробім усё, каб на працягу трох гадоў (дарожная карта разлічана на 2024-2026 гады. - Заўвага) рэалізаваць гэтыя праекты. Для таго каб ажыццявіць нашы планы, у нас ёсць усё. Але самае галоўнае, у нас з вамі ёсць жаданне і людзі, якія гатовы ажыццявіць запланаванае", - упэўнены Кіраўнік беларускай дзяржавы.