Перагаворы з Прэзідэнтам Азербайджана Ільхамам Аліевым

Прэзідэнт Беларусі Аляксандр Лукашэнка 11 лістапада ў Баку правёў перагаворы з Прэзідэнтам Азербайджана Ільхамам Аліевым.

Кіраўнік дзяржавы прыбыў з рабочым візітам у сталіцу Азербайджана для ўдзелу ў Сусветным саміце па барацьбе са змяненнем клімату.

Прэзідэнты адзначылі інтэнсіўнасць сустрэч апошнім часам. У першую чаргу варта нагадаць пра дзяржаўны візіт Аляксандра Лукашэнкі ў Азербайджан у маі бягучага года. Тады кіраўнікі дзяржаў правялі плённыя перагаворы з акцэнтам на гандлёва-эканамічным супрацоўніцтве. Былі выпрацаваны 12 напрамкаў, якія як адразу, так і ў перспектыве павінны ўзняць узаемаадносіны дзвюх краін на больш высокі ўзровень.

"Шмат аб чым дамовіліся. Я думаю, у нас ёсць усё неабходнае для таго, каб рухацца гэтым шляхам. Якраз напярэдадні мы разгледзелі ўсе пытанні, якія з вамі ўздымалі. Яны для нас вельмі актуальныя. Думаю, калі нашы міністэрствы і пасол будуць варушыцца, то мы вельмі многае можам зрабіць на карысць і Беларусі, і Азербайджана", - сказаў на сустрэчы ў Баку Аляксандр Лукашэнка.

Прэзідэнты Беларусі і Азербайджана гэтай восенню таксама мелі магчымасць абмеркаваць тыя ці іншыя важныя пытанні ў Маскве і Казані, дзе яны прымалі ўдзел у самітах СНД і БРІКС.