Даклад аб эфектыўнасці работы аграпрамысловага комплексу

Прэзідэнт Беларусі Аляксандр Лукашэнка 29 кастрычніка заслухаў даклад аб эфектыўнасці работы аграпрамысловага комплексу.

"Ідучы да людзей сёння з экзаменам (яны ў нас прымуць экзамен за пяцігодку), мы павінны сказаць, што мы зробім. Канкрэтна. Вось і ўся палітыка. А прыгожа гаварыць мы ўсе ўмеем. У нас, напэўна, дзясяткаў пяць (чалавек. - Заўвага), якія прыгожа могуць падаць, нешта сказаць. Гэта трэба ўмець палітыку, будучаму Прэзідэнту. Але галоўнае - гэта канкрэтыка: што ты зробіш", - падкрэсліў беларускі лідар.

Гаворачы аб пытаннях развіцця АПК, Аляксандр Лукашэнка звярнуў увагу на тое, што ў краіне ўжо шмат зрабілі, маюць вопыт, але важна вызначыцца, як дзейнічаць далей. "Трэба сялянам дапамагаць. Ведаеце, людзей усё менш і менш (у вёсцы. - Заўвага). Уладзімір Яўгенавіч (старшыня Мінгарвыканкама Уладзімір Кухараў. - Заўвага) выцягвае з вёскі ўсё, што можна, у Мінск. Ужо 2 млн чалавек. Усё далей і далей. Ну дык трэба, каб і аддача была для вёскі, таму што людзей жа карміць трэба. Гэтыя 2 млн у Мінску - яны ж есці хочуць кожны дзень усе. Ад малых дзетак да дарослых. Мы навучыліся гэта рабіць. Мы робім гэта вельмі якасна", - адзначыў беларускі лідар.

Ён звярнуў увагу на тое, што якасць айчынных прадуктаў харчавання цэніцца і за мяжой, і нават кіраўнікі дзяржаў часам просяць яго прыслаць нешта на пробу.

"Таму мы навучыліся гэта рабіць. Але пакуль мы вось выйшлі на нейкую гарызантальную прамую і вышэй скакаць не можам. А трэба будзе скакаць. І гэта галоўная наша задача і абяцанне беларускаму народу ў гэты перадвыбарны перыяд", - заявіў Кіраўнік дзяржавы.

На даклад да Прэзідэнта былі запрошаны віцэ-прэм'ер Юрый Шулейка, Міністр сельскай гаспадаркі і харчавання Анатоль Ліневіч, старшыня Мінскага гарвыканкама Уладзімір Кухараў і старшыня Мінскага аблвыканкама Аляксандр Турчын.

"Як мы раней дамаўляліся, падбяром зручны час з пункту гледжання сітуацыі, як цяпер модна гаварыць, "на зямлі". З пункту гледжання сітуацыі ў полі і падрыхтоўкі да зімова-стойлавага перыяду", - адзначыў Кіраўнік дзяржавы.

І калі прысутнасць на мерапрыемстве профільных віцэ-прэм'ера і Міністра была зразумелая - далажыць аб сітуацыі ў АПК, то аб прычынах запрашэння да размовы кіраўнікоў Мінскай вобласці і Мінска Аляксандр Лукашэнка расказаў асобна: "Я запрасіў сюды губернатара, каб вы аб'ектыўна дакладвалі. Скажа, у чым дапрацавалі. Дзе - не. І ці ўсё так добра, як вы даложыце, або зусім дрэнна. Уладзіміра Яўгенавіча запрасіў для таго, каб мы маглі публічна сказаць, чым мы сельскай гаспадарцы дапаможам у будучым годзе".

Тут Прэзідэнт нагадаў аб тым, што Мінск некаторы час таму аказаў істотную дапамогу Мінскай вобласці ў будаўніцтве сучасных малочнатаварных комплексаў. Логіка такога рашэння была звязана з тым, што трэба дапамагчы тым, чыю прадукцыю спажываюць жыхары сталіцы. Але гэта справядліва выклікала пытанні з боку іншых кіраўнікоў рэгіёнаў, з якіх прадукцыя таксама ў немалых аб'ёмах рэгулярна паступае на прылаўкі сталіцы.

"Вы памятаеце, што Шулейка, калі быў губернатарам (да назначэння віцэ-прэм'ерам Юрый Шулейка ўзначальваў Брэсцкую вобласць. - Заўвага), вельмі абураўся, што мы дапамаглі Мінскай вобласці. І цалкам справядліва тады як губернатар паставіў пытанне: "А чаму б і мне хаця б адзін жывёлагадоўчы комплекс Уладзімір Яўгенавіч не дапамог пабудаваць?" Таму што малако ж Мінску Брэст пастаўляе, як і ўсе вобласці", - адзначыў Аляксандр Лукашэнка.

"І потым, жарт - не жарт, калі мы ім не дапаможам, дык яны галасаваць за нас не будуць. Яны праваляць выбары. Таму трэба хаця б па адным комплексе паабяцаць ім, што мы пабудуем. Нават калі ты ў Мінску не знойдзеш поўнасцю грошай на гэта, дык я падстаўлю ўжо плячо", - звярнуўся Аляксандр Лукашэнка да Уладзіміра Кухарава.

Прэзідэнт падкрэсліў, што гаворыць аб гэтым цалкам сур'ёзна. "Сітуацыя сёння ў краіне такая, што проста расказваць і гаварыць… Ужо не тое што губернатары - народ не прыме. Людзям трэба дастаць і пакласці. Гэта правільна. Таму, ідучы ў прэзідэнцкую кампанію (я ж вас прадстаўляю, уладу), мы павінны народу сказаць", - адзначыў Аляксандр Лукашэнка.

Паводле яго слоў, сітуацыя ў цэлым памянялася, і важна таксама тое, што будзе за плячамі ў таго ці іншага кандыдата: "Калі нехта са старым багажом сюды на выбары спрабуе выйсці, трэба быць вельмі акуратным. Я, можа, і не павінен гэта гаварыць. Але, тым не менш, усе, хто сёння хоча, а такіх ужо нямала, - гэта ж людзі, якія пры нас, нават не пры мне, выраслі. Таму вось ім парада - што ты зробіш і наколькі глыбока ты разумееш гэтыя праблемы".

Гаворачы аб канкрэтыцы ў абяцаннях людзям, Аляксандр Лукашэнка прывёў шэраг канкрэтных прыкладаў.

Адзін з іх датычыцца будаўніцтва і эксплуатацыі дарог. "Калі дарогі - дзе і як. Я ўжо агучыў. Ад раённых цэнтраў да аграгарадкоў. Мы шмат зрабілі. Там зусім невялікія работы (засталіся. - Заўвага). Але і, міма пахадзіўшы, да аграгарадкоў мы павінны задзейнічаць і буйныя вёскі, якія некалі былі цэнтрамі гаспадарак. Не забываць пра іх. Таму што так, у аграгарадках у асноўным будуць жыць людзі, але і ў гэтых буйных вёсках, ды і ў маленькіх, там жа велізарная колькасць нашых людзей. І асабліва старых, якіх мы ні на чые плечы кінуць не зможам. Нам трэба пра іх паклапаціцца", - сказаў Прэзідэнт.

Калі весці размову аб якасці прадуктаў харчавання, то работа ў гэтым пытанні пачынаецца з фермы, малочнатаварнага комплексу. "Мы шмат ужо зрабілі. Мы ведаем, як, што рабіць, тэхналогіі. І гэтых комплексаў нямала пабудавалі. Мы павінны людзям адкрыта сказаць, што за наступную пяцігодку мы вырашым пытанне малочнатаварных комплексаў. Дойны статак, карова павінна стаяць у гэтым палацы. Для таго каб атрымаць чыстае малако. У рэшце рэшт, карова гэта заслужыла", - падкрэсліў Аляксандр Лукашэнка.

Ён адзначыў, што ў гэтым плане ў Мінскай вобласці, каб канчаткова вырашыць гэта пытанне, спатрэбіцца яшчэ ўсяго пару гадоў. "Дзесьці трэба падцягнуць Віцебскую, Магілёўскую, часткова Гомельскую вобласці. Я не думаю, што там ужо такія вялікія праблемы, каб пабудаваць гэтыя комплексы. Самае галоўнае, мы ведаем, якія яны павінны быць і што там патрэбна. Прытым гэта імпартазамяшчальны прадукт. Тут імпартнага нам нічога не трэба. Мы ўсё можам пабудаваць самі", - сказаў Прэзідэнт.

Улічваючы сказанае, Кіраўнік дзяржавы настроіў адказных за АПК на больш актыўныя і рашучыя дзеянні: "Што датычыцца сельскай гаспадаркі, ну не вельмі мы ламануліся з новымі кадрамі. І віцэ-прэм'ер новы, і Міністр хвалёны новы. Але пакуль… Горш не стала, але і асабліва лепш не стала. Можа, акрамя Мінскай вобласці. Бог пашкадаваў яго і дапамог шмат у чым. І Уладзімір Яўгенавіч дапамог (з будаўніцтвам комплексаў. - Заўвага)".

Па тэматыцы нарады Кіраўніку дзяржавы дакладваў Міністр сельскай гаспадаркі і харчавання Анатоль Ліневіч. "Толькі не трэба нас засыпаць лічбамі, - адразу папярэдзіў дакладчыка Прэзідэнт. - А то ты зараз табліцу адкрыеш і будзеш гераізм свой паказваць. Давай асноўнае".

"Да 7 лістапада - вы кляліся, клятву давалі - палявыя работы скончацца (зябіць яшчэ будзеце), - нагадаў Прэзідэнт. - Раскажы, як вы скончылі?" Аляксандр Лукашэнка спытаў як увогуле аб завяршэнні ўборачнай кампаніі, так і аб выніках па асобных відах культур. "Колькі буракоў на палях? Бульба, магчыма, недзе засталася, капуста? Яблыкі, грушы, можа, недзе яшчэ на дрэвах? Кукурузу ці ўсю ты сабраў на зерне?" - абазначыў кола пытанняў Аляксандр Лукашэнка. Ён таксама пацікавіўся, як ідзе восеньская апрацоўка глебы пад веснавую сяўбу і як прайшла пасяўная кампанія па сяўбе азімых культур.

Анатоль Ліневіч, гаворачы аб завяршэнні ўборачнай кампаніі, праінфармаваў, што на гэтым этапе ўбрана 98% усёй кукурузы. Ён растлумачыў, што работы па ўборцы кукурузы на зерне яшчэ прадаўжаюцца (раней ставілася задача завяршыць гэты від дзейнасці да 10 лістапада), таксама трэба яшчэ ўбраць частку пасеваў кукурузы на сілас. Цяпер, паводле слоў міністра, "дапрацоўваюцца апошнія гектары".

Прэзідэнт Беларусі звярнуў асаблівую ўвагу адказных асоб на якасць прадукцыі, якая нарыхтоўваецца. "Я езджу на "Дажынкі" па ўсёй краіне. Паглядзець, падзякаваць людзям - гэта адно. А другое - я ж гляджу, як Аляксандр Генрыхавіч (Турчын, старшыня Мінаблвыканкама. - Заўвага) выконвае мае даручэнні, як арэ, культура земляробства як у яго. Я ж убачу, што вы там кладзяце ў траншэі", - папярэдзіў аб кантролі са свайго боку Кіраўнік дзяржавы.

У сваю чаргу кіраўнік Мінсельгасхарча запэўніў, што ўборка кукурузы як на сілас, так і на зерне завершыцца ў бліжэйшы час. Улічваючы тэмпы такіх работ, за 6-7 пагодлівых дзён ураджай плануецца сабраць, і гэта адбудзецца ў больш раннія тэрміны, чым у мінулым годзе.