Другі дзень афіцыйнага візіту ў Экватарыяльную Гвінею

У другі дзень афіцыйнага візіту Прэзідэнт Беларусі Аляксандр Лукашэнка з астраўнога сталічнага горада Малаба прыбыў на мацерыковую частку Экватарыяльнай Гвінеі.

Прэзідэнцкі борт прызямліўся ў аэрапорце горада Менгамеен. Аляксандра Лукашэнку ля трапа сустрэў Прэзідэнт краіны Тэадора Абіянг Нгема Мбасога. Ён запрасіў беларускага лідара паглядзець на новую сталіцу Экватарыяльнай Гвінеі - Сьюдад-дэ-ла-Пас, назва якога з іспанскай перакладаецца як Горад міру.

Па гатовых аб'ектах будучай сталіцы прэзідэнты вырашылі паехаць на адной машыне. У час праезду па будучай сталіцы Прэзідэнт Экватарыяльнай Гвінеі паказаў Кіраўніку беларускай дзяржавы Афра-Амерыканскі ўніверсітэт Цэнтральнай Афрыкі, шпіталь "Ла Пас Аяла", Дом Урада.

Размова лідараў краін прадоўжылася за нефармальным абедам. Нягледзячы на больш аблегчаны фармат, Аляксандр Лукашэнка і Тэадора Абіянг Нгема Мбасога прадоўжылі сур'ёзную размову на тэму развіцця двухбаковага супрацоўніцтва.

Кіраўнік беларускай дзяржавы пагутарыў і з першай лэдзі Экватарыяльнай Гвінеі - жонкай Прэзідэнта Канстансіяй Манге дэ Абіянг, якая ўжо была ў Беларусі і курыруе ў сябе ў краіне сферу медыцыны.

Экватарыяльная Гвінея размешчана ў цэнтральнай частцы Афрыкі, на заходнім узбярэжжы мацерыка. Краіна складаецца з кантынентальнай часткі і астравоў у Гвінейскім заліве (агульная плошча - каля 28 тыс. кв.км, у тым ліку мацерыковай - 26 тыс. кв.км). На самым буйным востраве - Біёка - знаходзіцца сталіца - горад Малаба, куды Аляксандр Лукашэнка прыбыў напярэдадні і дзе вечарам 9 снежня адбыліся афіцыйныя перагаворы з Прэзідэнтам краіны Тэадора Абіянгам Нгемам Мбасога.

Цяпер у Экватарыяльнай Гвінеі рэалізуецца праект па будаўніцтве новай сталіцы краіны, якая прызначана замяніць у гэтым статусе Малаба. Горад размешчаны на ўсходзе кантынентальнай часткі краіны і раней называўся Аяла, але ў 2020 годзе быў перайменаваны ў Сьюдад-дэ-ла-Пас. Ініцыятыва пераносу сталіцы належыць Прэзідэнту Экватарыяльнай Гвінеі. Прадугледжваецца, што новая сталіца будзе спалучаць новыя павевы ў архітэктуры і традыцыйныя культурныя элементы, пашыраць ідэнтычнасць горада. Чакаецца, што ў гарадской гаспадарцы вялікая роля будзе адведзена аднаўляльным крыніцам энергіі.