Сустрэча са Старшынёй Прэзідыума НАН Беларусі Уладзімірам Гусаковым

Прэзідэнт Беларусі Аляксандр Лукашэнка даручыў больш актыўна прапагандаваць дасягненні айчынных вучоных. Аб гэтым ён заявіў 18 кастрычніка на сустрэчы са Старшынёй Прэзідыума НАН Беларусі Уладзімірам Гусаковым.

Кіраўнік дзяржавы даручыў прыкладна ў канцы лістапада - пачатку снежня бягучага года арганізаваць выстаўку навуковых дасягненняў: "Каб мы недзе вызначыліся і правялі выстаўку дасягненняў вучоных Акадэміі навук. Мы гэта ўмеем рабіць. Вы не раз гэта арганізоўвалі. Падбяром добрую залу. Не толькі для таго, каб зрабілі справаздачу, далажылі аб поспехах, але і як мага больш народу паказаць, што мы можам і што навука ў нас многае можа. На жаль, мы мала прапагандуем не толькі Акадэмію навук, але і дасягненні нашай навукі".

"Таму трэба прадумаць разам з Адміністрацыяй, Урадам, дзе мы можам паказаць людзям, што мы ўмеем рабіць. А паказаць ёсць што", - падкрэсліў беларускі лідар.

Аляксандр Лукашэнка даручыў пасля гэтай сустрэчы ўжо расказаць народу ў першым прыбліжэнні аб дасягненнях і рабоце Акадэміі навук. "З улікам таго, што мы павінны арганізаваць гэту маштабную выстаўку. Магчыма, нават у суседнім будынку (выставачны комплекс па суседстве з Палацам Незалежнасці. - Заўвага). Месца там дастаткова. Проста кампактна вынесці туды асноўныя нашы дасягненні акадэмічнай навукі. Ну і нядрэнна было б і прыкладной навукі. Ды і студэнты ўжо сёе-тое навучыліся рабіць, паглядзець бы там. Прадумайце, як гэта лепш зрабіць", - сказаў Прэзідэнт.

Што датычыцца тэматыкі рабочай сустрэчы, Аляксандр Лукашэнка папрасіў далажыць аб тым, як рэалізуюцца і выконваюцца даручэнні Прэзідэнта па асноўных напрамках. Напрыклад, у сельскай гаспадарцы, дзе вялася размова і аб новай пародзе жывёлы, новых сартах раслін і гэтак далей.

Яшчэ адзін важны напрамак, які знаходзіцца ў веданні НАН, - распрацоўка айчынных аўтамабіляў.

"Што вельмі актуальна, пра гэта будзем і ў пятніцу гаварыць, гэта нашы беспілотнікі. Як вы тут канкурыруеце з прыкладной навукай і з прадпрыемствамі, ствараючы новыя беспілотныя лятальныя апараты? Яны вельмі актуальныя, зыходзячы з урокаў вайны ва Украіне", - адзначыў Кіраўнік дзяржавы.

На абмеркаванне ў ходзе сустрэчы таксама быў вынесены праект абноўленага статута Акадэміі навук. "Мне падабаецца, што вы ідзяце па шляху дэбюракратызацыі, каб менш было валакіты. Гэта таксама ўрок канфлікту Расіі ва Украіне. Толькі ў іншым вымярэнні. Вось валакіты быць не павінна. Таму разгледзім асноўныя элементы статута. Ну а потым, у адпаведнасці з нашай працэдурай, я думаю, да канца года мы абавязкова павінны зацвердзіць новы статут Акадэміі", - сказаў Аляксандр Лукашэнка.

Работа Нацыянальнай акадэміі навук за апошні час зменена ў адпаведнасці з даручэннямі Прэзідэнта, яна строга арганізавана і нацэлена на самастойнае забеспячэнне фінансавымі сродкамі, расказаў Уладзімір Гусакоў Кіраўніку дзяржавы.

"Цяпер гэта ўжо не чыста бюджэтная арганізацыя, як яна была традыцыйна, і ўсе сядзелі, чакалі бюджэту. Я за бюджэтам цяпер не хаджу. І шэраг гадоў усе ведаюць, што нават пры недахопе сродкаў мы нацэльваем, каб людзі зараблялі грошы. І так на самай справе яно і ёсць", - падкрэсліў кіраўнік НАН.

Паводле яго слоў, за апошнія гады Акадэмія навук выконвала даведзеныя паказчыкі. "У нас не было ні зніжэння, ні зрыву. Гэта і аб'ёмы вытворчасці, продажу, выкананне ўсіх праграм, інвестыцыі ў асноўны капітал, гэта значыць набыццё прыбораў і абсталявання, гэта і заработная плата, і ўсе паказчыкі па бізнес-планах", - удакладніў Уладзімір Гусакоў.