Сустрэча з Надзвычайным і Паўнамоцным Паслом Індыі ў Беларусі Сангітай Бахадур

Афіцыйны візіт Прэм'ер-міністра Індыі Нарэндры Модзі ў Беларусь можа стаць трыгерам у далейшым развіцці супрацоўніцтва. Аб гэтым Прэзідэнт Беларусі Аляксандр Лукашэнка заявіў 8 красавіка на сустрэчы з Надзвычайным і Паўнамоцным Паслом Індыі ў Беларусі Сангітай Бахадур, якая завяршае сваю дыпламатычную місію ў нашай краіне.

"Мне здаецца, што мы ўжо на працягу нашага супрацоўніцтва за апошнія два дзесяцігоддзі не толькі зразумелі, але і вывучылі магчымасці Індыі і Беларусі. Напэўна, настаў час, калі мы павінны перайсці да таго этапу адносін, калі трэба заключаць канкрэтныя дагаворы і кантракты і ісці наперад у нашым супрацоўніцтве. Я мяркую, што патрэбны нейкі штуршок, нейкі стымул для таго, каб мы пачалі практычна рэалізоўваць нашы задумы. Лічу, што добрым стымулам развіцця нашых адносін быў бы візіт Нарэндры Модзі ў Беларусь. Мы вельмі добра знаёмы, можна сказаць нават у нейкай ступені дружны, падтрымліваем адзін аднаго. Мне здаецца, што яму трэба было б пабываць ужо ў Беларусі. І яго афіцыйны візіт, мы яго прымем дастойна, стаў бы такім трыгерам у адносінах паміж нашымі краінамі па ўсіх напрамках", - сказаў Прэзідэнт.

Аляксандр Лукашэнка падзякаваў дыпламату за тую работу, якую яна правяла за невялікі тэрмін знаходжання на пасадзе пасла дружалюбнай Індыі ў Беларусі. Кіраўнік дзяржавы звярнуў увагу, што ў цэлым за два дзесяцігоддзі супрацоўніцтва тавараабарот паміж Беларуссю і Індыяй вырас у 10 разоў. "Крыху больш за паўмільярда долараў. Гэта, вядома, значна, але недастаткова для нашых магчымасцей. Мы можам больш. І вы гэта лепш за мяне ведаеце", - адзначыў Кіраўнік дзяржавы.

Прэзідэнт заявіў, што яму вельмі хацелася б, каб і наступны пасол Індыі прыбыў у Беларусь з такім жа жаданнем наладжваць добрыя і плённыя адносіны. "Каб ён развіў усе тыя задумы, якія былі ў Вас, у адносінах паміж Беларуссю і Індыяй. А пачынанняў нямала, ды і зроблена нямала", - канстатаваў беларускі лідар.

"Думаю, надышоў той час, калі нам трэба свае магчымасці і жаданні аб'яднаць і зрабіць некалькі крокаў да цеснага супрацоўніцтва", - дадаў Аляксандр Лукашэнка.

У сваю чаргу Сангіта Бахадур падзякавала Аляксандру Лукашэнку за магчымасць сустрэчы, што з'яўляецца вялікім гонарам. "Я добра ведаю, што не ўсе паслы ўдастойваюцца аўдыенцыі з Вамі", - сказала яна.

Кіраўнік дзяржавы ў адказ на гэта адзначыў, што яшчэ з савецкіх часоў паміж бакамі склаліся вельмі добрыя адносіны, а Індыя - адна з буйнейшых краін свету. "І не толькі. Вы - нашы сябры. Як я мог не прыняць Вас?" - падкрэсліў Аляксандр Лукашэнка.

"Я поўнасцю згодная і падзяляю Вашу пазіцыю па ўсіх аспектах двухбаковых адносін, якія вы згадалі. Сапраўды, мы шмат чаго дасягнулі за тры гады маёй кадэнцыі тут. Мы істотна нарасцілі гандаль, Беларусь нарасціла сваю прысутнасць у Індыі", - заявіла Сангіта Бахадур.

Яна таксама адзначыла актывізацыю супрацоўніцтва паміж прыватным сектарам Індыі і Беларусі, дасягненні па лініі супрацоўніцтва паміж БЕЛАЗам і індыйскай кампаніяй Coal India Limited. "Я помню час, калі спадар Мясніковіч (Міхаіл Мясніковіч з 1 лютага 2020 года ўзначальвае Еўразійскую эканамічную камісію, а да гэтага, у перыяд работы паслом у Беларусі Сангіты Бахадур, быў Старшынёй Савета Рэспублікі Нацыянальнага сходу. - Заўвага) задаваў мне пытанне, чаму Індыя не закупляе беларускую тэхніку. І тут я магу нясціпла заўважыць, што я сапраўды старалася, і сёння мы маем вынік", - сказала пасол.

Дыпламат дадала, што Беларусь таксама шырока прадстаўлена ў Індыі на рынку нафтапрадуктаў, сельскай гаспадаркі і сферы ІТ-тэхналогій.