Сустрэча з Міністрам замежных спраў Расіі Сяргеем Лаўровым

Беларусь і Расія могуць выбудаваць такую канструкцыю адносін, што пазайздросцяць у свеце. Аб гэтым Прэзідэнт Беларусі Аляксандр Лукашэнка заявіў 30 чэрвеня на сустрэчы з Міністрам замежных спраў Расіі Сяргеем Лаўровым.

Сяргей Лаўроў перадаў Аляксандру Лукашэнку прывітанне ад Прэзідэнта Расіі Уладзіміра Пуціна, хоць кіраўнікі дзяржаў асабіста бачыліся ўсяго некалькі дзён таму. "Дзякуй, прыемна ўсё роўна", - сказаў Прэзідэнт Беларусі.

"Ён (Уладзімір Пуцін. - Заўвага) падтрымлівае прадаўжэнне нашага інтэнсіўнага саюзніцкага дыялогу", - дадаў кіраўнік расійскага МЗС.

"У гэтым Вы можаце не сумнявацца. Я думаю, Прэзідэнт Расіі таксама ў гэтым абсалютна ўпэўнены, - заявіў Аляксандр Лукашэнка. - Я некалі сказаў. Думаю, Вы падтрымаеце гэту ідэю. Упэўнены, што падтрымаеце. Што мы не настолькі неразумныя, каб кагосьці інкарпарыраваць, як на Захадзе кажуць, або ўключаць у склад ці то Беларусі Расію, ці то Расіі Беларусь. Мы даволі разумныя, каб дзве незалежныя дзяржавы маглі выбудаваць такую канструкцыю нашых адносін, што пазайздросцяць у свеце і іншыя. Мы да гэтага ідзём, рухаемся".

Беларускі лідар адзначыў, што ўжо споўнілася 30 гадоў з дня ўстанаўлення дыпламатычных адносін паміж дзвюма дзяржавамі, з якіх большую частку Аляксандр Лукашэнка знаходзіцца на пасадзе Прэзідэнта Беларусі. "Я ўвесь час чую: заўтра паглынанне, заўтра інкарпарацыя... 30 гадоў прайшло. Не інкарпарыравалі, не паглынулі. А калі ўжо шчыра, то мы ад Расіі атрымліваем усё тое, што патрэбна суверэннай незалежнай дзяржаве. Так, былі ў нас розныя часы. Мы і спрачаліся, як блізкія людзі", - сказаў Прэзідэнт.

Ён расказаў, што з Уладзімірам Пуціным яны часта абмяркоўвалі гэту тэму, і наяўнасць спрэчак Кіраўнік беларускай дзяржавы ацэньвае пазітыўна: "Я заўсёды гавару: гэтаму трэба радавацца. Таму што ніводная заходняя дзяржава (вось вазьміце апошнія саміты), ніхто нідзе ні з кім не спрачаецца. Прыйшоў начальнік ЦК, ці то "абкама" з Вашынгтона, нават не сказаў, а паглядзеў, і ўсе пабеглі".

"А ісціна нараджаецца ў спрэчцы, як вядома", - заўважыў Сяргей Лаўроў.

"Так, а мы спрачаемся. Таму што мы блізкія людзі. І сапраўды, ісціна заўсёды нараджалася ў спрэчцы і будзе нараджацца", - згадзіўся Кіраўнік дзяржавы.

Ён звярнуў увагу, што цяпер у Беларусі і Расіі адносіны асаблівага характару. "Час такі, Сяргей Віктаравіч. Калі не слухаюць вас, дыпламатаў, тады даводзіцца слухаць іншых людзей. Мы за тое, каб дыпламатыя працавала. Але што рабіць, калі ідзе гібрыдная вайна. Пачалі са сродкаў масавай інфармацыі. Потым заглушылі дыпламатаў, як бы адкінулі ўбок - ніводная міжнародная пляцоўка выніку не дае, у тым ліку і галоўная наша. Ну што нам рабіць? Нам даводзіцца абараняцца, супраціўляцца", - канстатаваў Аляксандр Лукашэнка.

У сувязі з гэтым кіраўнік расійскага МЗС нагадаў і пра блакіроўку Захадам расійскіх актываў. "Грошы аднялі", - заўважыў ён.

"Грошы аднялі, у эканоміцы душыць пачынаюць. Вось, калі ласка, гібрыд", - сказаў Аляксандр Лукашэнка.

"Ужо аб'явілі эканамічную вайну. Што такое транзіт закрыць? І ўсе крычаць пра нейкі Сувалкскі калідор. Слухайце, мы з вамі пра гэта не гаворым, а яны крычаць. Яны што, намякаюць?" - адзначыў Кіраўнік дзяржавы.

Аляксандр Лукашэнка падкрэсліў, што ў Беларусі і Расіі дастаткова сіл і сродкаў для таго, каб даставіць грузы ў Калінінград. "Без усялякіх войнаў і напружанняў. Мы з Пуціным вельмі сур'ёзна абмяркоўвалі гэтыя пытанні", - сказаў ён.

Прэзідэнт у сувязі з гэтым адзначыў палітыку Літвы, якая ў пытанні санкцый "бяжыць наперадзе паравоза": "Спіхваюць увесь час на Еўрасаюз. Маўляў, гэта не мы, гэта Еўрасаюз прыняў рашэнне. Дык там прымаюцца рашэнні кансэнсусам. Калі вы бачылі, што гэта можа нашкодзіць Літве, ну вы не галасуйце за гэта і рашэнне прынята не будзе. Або прымуць з якімі-небудзь выключэннямі. Але вы ж бачыце, што яны наперадзе паравоза бягуць. І заўсёды крычаць: "Душы, цкуй!". І гэтак далей. Ва ўрон сваёй дзяржаве. Для мяне гэта нядзіўна, таму што я назіраю гэта пастаянна. І я бачу, хто там выступае за такія рэчы".

"Ведаеце, што мяне здзіўляе... Цалкам нармальнае патрабаванне: не - нацыяналізму, які перарастае, я вам як гісторык гавару, у фашызм. Нам гэта не патрэбна, і Еўропе гэта не патрэбна. Яны ва Украіне гэта культывуюць, падтрымліваюць гэта. Добра. А калі заўтра гэта выльецца ў Еўропе? Ім гэта не патрэбна, - падкрэсліў беларускі лідар. - Еўропе гэта не патрэбна, асабліва Германіі. Там урокі гісторыі памятаюць. Яны ж павінны разумець, што гэта будзе прарастаць каранямі па ўсёй Еўропе".

Наконт гэтага Сяргей Лаўроў заўважыў, што партыя "Альтэрнатыва для Германіі" стварыла няўрадавую арганізацыю па барацьбе з русафобіяй. "Значыць, гэта пачынае ўжо праяўляцца і ў публічнай сферы", - звярнуў увагу ён.

"Сяргей Віктаравіч, Вы лепш, чым хто-небудзь, разумееце: нам іншага шляху не пакінулі, - сказаў Аляксандр Лукашэнка. - Прапаноўвалі (для калектыўнага Захаду. - Заўвага) і бяспеку напярэдадні аперацыі (ва Украіне. - Заўвага), і давайце падпішам дагаворы, за сталом перагавораў і іншае, без усялякіх аперацый і вайны, без усялякай страляніны. Не захацелі. Гэта іх выбар".

Згадзіўшыся з пунктам гледжання беларускага лідара, кіраўнік расійскага МЗС падкрэсліў, што на нядаўнім саміце НАТА ў дакументах альянсу Расія названа галоўнай пагрозай, Кітай - галоўным выклікам. "Зноў пацверджана так званая палітыка адкрытых дзвярэй і пацверджана рашэнне 2008 года, прынятае ў Бухарэсце, наконт перспектыў членства ў НАТА Украіны і Грузіі", - звярнуў увагу Сяргей Лаўроў.

"Вельмі ўзмоцніцца (НАТА. - Заўвага), - іранічна заўважыў Прэзідэнт. - Ну, Гасподзь ім у дарогу".

Аляксандр Лукашэнка адзначыў, што Беларусь і Расія яшчэ не адказвалі люстрана на трэніроўкі заходняй авіяцыі па прымяненні ядзернай зброі: "Ніякай інсцэніроўкі там не было. І пра ядзерную зброю і іншае. Мы яшчэ паўкроку зрабілі. Яны ж лятаюць, трэніруюцца. Навошта трэніруюцца, навошта ядзерныя балванкі возяць? Для таго, каб ядзерную бомбу заўтра ў самалёт пакласці і скінуць туды, куды трэба. Таму мы яшчэ люстрана не адказвалі. Склады боепрыпасаў ядзерных у Расіі, у нас іх няма. І, як Пуцін правільна сказаў, у шасці кропках, шасці краінах знаходзяцца іх ядзерныя боегалоўкі".

"І доўгія-доўгія гады, і яны лятаюць, і пускаюць пілотаў няядзерных краін да кіравання самалётамі, якія прызначаны для ядзернай зброі", - заўважыў Сяргей Лаўроў.

Паводле слоў кіраўніка расійскага МЗС, гэта парушае Дагавор аб нераспаўсюджванні ядзернай зброі.

"Але мы яшчэ гэта не зрабілі. Але мы павінны быць гатовымі", - падкрэсліў Аляксандр Лукашэнка.

Ён нагадаў падзеі 1941 года, калі пачалася Вялікая Айчынная вайна: "Мы павінны порах трымаць сухім па ўсіх напрамках. І не трэба там енчыць, крычаць, што "тут Пуцін захапіў Беларусь", "што хоча, то і робіць"... У нас узгодненая разумная палітыка дзвюх суверэнных дзяржаў, за якую перш за ўсё адказваюць Макей і Лаўроў".

"Пад кіраўніцтвам вярхоўных галоўнакамандуючых", - падтрымаў размову Сяргей Лаўроў.

"Але вы нам раіце, - сказаў у адказ Аляксандр Лукашэнка. - Але гэта не здымае з нас адказнасці. Мы абсалютна цвяроза разумеем, што вакол нас адбываецца. І лепш паказаць, што можа быць, чым гэта здарыцца. Нам гэта вайна не патрэбна".