Сустрэча з губернатарам Ульянаўскай вобласці Расіі Аляксеем Рускіх

Прэзідэнт Беларусі Аляксандр Лукашэнка сустрэўся 5 кастрычніка з губернатарам Ульянаўскай вобласці Расійскай Федэрацыі Аляксеем Рускіх.

Вітаючы расійскую дэлегацыю, Кіраўнік дзяржавы звярнуў увагу на асацыяцыі, звязаныя з рэгіёнам, які яны прадстаўляюць. "Ульянаўская вобласць нам ідэалагічна не чужая. Гэта блізкая нам вобласць яшчэ і таму, што там нарадзіўся і свае першыя гады правёў чалавек, які стаяў ля вытокаў нашай агульнай дзяржавы (гаворка пра Уладзіміра Ільіча Леніна. - Заўвага). Не ведаю, як вы да гэтага ставіцеся, але я вельмі беражліва да гэтага стаўлюся, таму што гісторыя ёсць гісторыя, яе трэба паважаць, якой бы яна ні была ў мінулым", - сказаў Аляксандр Лукашэнка.

Прэзідэнт заўважыў, што губернатар Аляксей Рускіх ужо бываў у Беларусі: у мінулым годзе ён прыняў актыўны ўдзел у Форуме рэгіёнаў Беларусі і Расіі, пазнаёміўся з Гродзенскай вобласцю, наведаў індустрыяльны парк "Вялікі камень". У ходзе сёлетняга візіту дэлегацыя пабывала ўжо ў Брэсцкай вобласці, наведала мемарыяльны комплекс "Брэсцкая крэпасць-герой" і шэраг прадпрыемстваў.

Адносіны Мінска і Ульянаўска налічваюць не адно дзесяцігоддзе. Як падкрэсліў Прэзідэнт, Ульянаўская вобласць заўсёды вызначалася ініцыятывай, крэатыўнасцю, увагай да спраў моладзі і, што вельмі важна, да слабаабароненых слаёў насельніцтва - тых, хто мае патрэбу ў падтрымцы. "Сёння мы актыўна шукаем новыя агульныя інтарэсы з улікам ужо назапашанага патэнцыялу, наладжваем больш глыбокае ўзаемадзеянне праз кааперацыйныя сувязі, перш за ўсё ў вытворчай сферы. Цяперашняя сітуацыя дае нам магчымасць выйсці на новы ўзровень кааперацыі. Усе неабходныя рашэнні на ўзроўні кіраўнікоў дзяржаў прыняты", - падкрэсліў Аляксандр Лукашэнка.

Эканамічныя сувязі Беларусі з Ульянаўскай вобласцю, паводле слоў Прэзідэнта, грунтуюцца на прамысловай сферы з акцэнтам на навукаёмістыя тэхналогіі. Напрыклад, на працягу шэрага гадоў беларускія прадпрыемствы ажыццяўляюць пастаўкі прадукцыі на зборачныя канвееры УАЗ і УМЗ, завяршаецца праграма на 2021-2023 гады. Прадаўжаецца рэалізацыя сумеснага праекта па вытворчасці ва Ульянаўскай вобласці паўпрычэпаў на базе шасі МАЗ.

Яшчэ адзін напрамак, дзе наладжаны трывалыя кааперацыйныя сувязі, - радыёэлектроніка. Беларускі "Інтэграл" пастаўляе шырокі спектр электроннай кампанентнай базы, дысплэйныя модулі і відэаманіторы для расійскага абаронна-прамысловага комплексу.

"Буду вельмі рады, калі пачую вашы ацэнкі рэзультатыўнасці гэтай работы. Наколькі мы далёка рушылі наперад? Якія ёсць праблемы? Ці здольныя мы поўнасцю адысці ад імпартных камплектуючых?" - спытаў у губернатара Прэзідэнт Беларусі.

Гаворачы аб перспектывах супрацоўніцтва з Ульянаўскай вобласцю, Кіраўнік дзяржавы прапанаваў сумесна задзейнічаць тую сур'ёзную вытворчую базу, якая дасталася Беларусі ад СССР, для выпуску рознай тэхнікі - ад сельскагаспадарчых машын да неабходнай для рамонту самалётаў. "Мы гэту базу захавалі, прымножылі. Сёння мы сумесна можам яе выкарыстоўваць. Аб гэтым мы з Прэзідэнтам Пуціным дамовіліся", - адзначыў ён.

Важнейшым напрамкам у плане тэхнічнага прагрэсу, укаранення ў вытворчасць апошніх навуковых распрацовак Аляксандр Лукашэнка назваў авіябудаванне.

На мінулым тыдні гэта тэма абмяркоўвалася лідарамі Беларусі і Расіі. "Дамовіліся папрацаваць над сумесным выпускам самалётаў для рэгіянальных перавозак. У нас для гэтага ёсць адпаведныя кампетэнцыі, - падкрэсліў Кіраўнік дзяржавы. - Хацелася б ведаць, якія Вы бачыце магчымасці?"

"Гэта праект, арыентаваны ў будучыню, не на адзін год. Капіталаўкладанні чакаюцца значныя, але і станоўчы эфект каласальны", - акцэнтаваў увагу Прэзідэнт. Ён заўважыў, што асобныя кампаненты для гэтай галіны Беларусь ужо вырабляе, і заявіў аб гатоўнасці нашай краіны пашыраць наменклатуру прадукцыі.

Кіраўнік дзяржавы таксама заявіў аб гатоўнасці Беларусі забяспечыць патрэбнасці Ульянаўскай вобласці ў сучаснай пасажырскай тэхніцы - электробусах і аўтобусах на газаматорным паліве. Тым больш, што рэгіён надае вялікую ўвагу развіццю экалагічнага транспарта, стараючыся зрабіць яго акупным і адначасова даступным для ўсіх слаёў насельніцтва.

"Акрамя таго, мы вырабляем шырокі рад грузавых, сельскагаспадарчых, камунальных, дарожна-будаўнічых машын, - заўважыў беларускі лідар. - Мы гатовы і абучаць персанал, і абслугоўваць гэту тэхніку, пастаўляць запасныя часткі".

Улічваючы вялікія планы Ульянаўскай вобласці па мадэрнізацыі АПК, прадпрыемстваў па захоўванні і перапрацоўцы сельгаспрадукцыі, беларускі бок прапанаваў падзяліцца сваім вопытам і рашэннямі ў гэтай сферы.

"На мінулым тыдні Вы, наведваючы Кітай, абмяркоўвалі перспектывы супрацоўніцтва ў сферы інфармацыйных тэхналогій і лічбавай эканомікі. У нас назапашаны пэўны вопыт работы з Кітаем і прыкладнога выкарыстання такіх высокатэхналагічных рашэнняў. Я прапаную аб'яднаць намаганні па іх камерцыялізацыі. Нам, напэўна, ужо хопіць абслугоўваць заказы толькі заходніх кампаній. Няхай нашы спецыялісты больш папрацуюць на свае краіны", - прапанаваў Аляксандр Лукашэнка.

Акрамя таго, Прэзідэнт звярнуў увагу на магчымасці ўзаемадзеяння ў такіх перспектыўных галінах, як біятэхналогіі, мікраэлектроніка, энергетыка, кампазітныя матэрыялы: "Усё гэта сёння запатрабавана на рынку і дае магчымасць забяспечыць такі патрэбны нам тэхналагічны суверэнітэт".

Наступны напрамак, пра які ішла размова на сустрэчы, - ахова здароўя і фармацэўтыка. Добрым прыкладам супрацоўніцтва ў гэтых сферах Аляксандр Лукашэнка лічыць рэалізацыю праекта Саюзнай дзяржавы "Лячэнне грамадзян Беларусі і Расіі з выкарыстаннем пратоннай тэрапіі".

"Ведаем, што Ульянаўская вобласць славіцца сваімі інавацыйнымі падыходамі ў сферах адукацыі і выхавання моладзі. Мы ідзём паралельнымі курсамі. Як і ў вас, у Беларусі створана сістэма падтрымкі таленавітай моладзі", - сказаў у прадаўжэнне размовы Кіраўнік дзяржавы.

З улікам перспектыў уступлення Беларусі ў БРІКС асаблівую цікавасць, на яго думку, уяўляе дзейнасць ульянаўскага праектнага офіса міжнароднага маладзёжнага супрацоўніцтва "Расія - БРІКС". Сярод запатрабаваных праектаў, якія там рэалізуюцца, - грамадская дыпламатыя, валанцёрства, захаванне гістарычнай і культурнай спадчыны, адукацыя, спорт.

"Далёка не поўны пералік напрамкаў, па якіх нам давядзецца працаваць, дапаўняючы адзін аднаго, я выклаў. Мне дакладваюць, што бюджэт вашай вобласці на будучы год накіраваны перш за ўсё на выкананне сацыяльных праграм, тэхналагічнае развіццё і пашырэнне інфраструктуры. Гэта задачы, якія добра стасуюцца з ужо абазначанымі мной тэмамі. Калі патрэбна наша падтрымка, вы можаце на нас разлічваць. Нам, думаю, няма чаго канкурыраваць, трэба аб'ядноўваць намаганні. Ёсць з кім (іншым - Заўвага) канкурыраваць.Таму давайце працаваць разам. Калі ёсць якія-небудзь пытанні, праблемы, гаварыце адкрыта, прама, мы сёння гатовы прыняць любыя рашэнні, якія вас зацікавяць, - рэзюмаваў беларускі лідар. - Мы гарантуем вам, што заўсёды будзем прыхільныя не толькі да нашай інтэграцыі, але і да нашага адзінства ва ўсіх сферах".

У сваю чаргу губернатар падзякаваў за цёплы прыём дэлегацыі Ульянаўскай вобласці ў Беларусі. "Мы прыехалі не з пустымі рукамі, а з канкрэтнымі выгаднымі для ўсіх бакоў прапановамі, якія змогуць вывесці адносіны Беларусі і Ульянаўскай вобласці на якасна новы ўзровень. Усе нашы прапановы ўпісваюцца ў кантэкст Вашых дамоўленасцей з нашым Прэзідэнтам Уладзімірам Пуціным", - сказаў Аляксей Рускіх.

Ён таксама падкрэсліў, што Беларусь і Ульянаўская вобласць маюць даўнюю і вельмі добрую гісторыю адносін, паміж бакамі заключана пагадненне аб супрацоўніцтве ва ўсіх сферах, і гэты дакумент пастаянна актуалізуецца.

"Нас звязваюць цесныя партнёрскія дружалюбныя сувязі ва ўсіх сферах. Ад прамысловасці і сельскай гаспадаркі да культуры і абмену сацыяльным вопытам. Апошнія два гады мы назіраем моцны рост узаемадзеяння. У штомесячным рэжыме нашы прадстаўнікі знаходзяцца ў кантакце з вашымі калегамі, абмяркоўваюць актуальныя пытанні. Па выніках гэтай работы мы маем дакладнае ўяўленне, у які бок далей трэба рухацца", - сказаў кіраўнік Ульянаўскай вобласці.