Сустрэчы з прадстаўнікамі бізнес-колаў Кітая

Прэзідэнт Беларусі Аляксандр Лукашэнка 2 верасня правёў серыю сустрэч з прадстаўнікамі бізнес-колаў Кітая.

Пытанням беларуска-кітайскага супрацоўніцтва ў ходзе цяперашняга візіту Аляксандра Лукашэнкі ў Кітай, дзе напярэдадні завяршыўся саміт ШАС, адводзіцца значнае месца ў графіку Кіраўніка дзяржавы. Раней у Цяньцзіні прайшлі перагаворы беларускага лідара са Старшынёй КНР Сі Цзіньпінам, а цяпер двухбаковы парадак дня на вышэйшым узроўні атрымаў працяг у выглядзе кантактаў з кіраўніцтвам шэрага буйнейшых кітайскіх кампаній.

Частка сустрэч мела закрыты характар. На іх абмяркоўваліся перспектыўныя праекты, у тым ліку ў такіх сферах, як прамысловасць, аўтамабіле- і маторабудаванне.

"Перш за ўсё хачу вам падзякаваць за тое, што вы ў гэты няпросты для нас час, звязаны з розным націскам на Беларусь, вырашылі актыўна працаваць у Беларусі. Мы гэта бачым, мы гэта вельмі цэнім. Таму мая галоўная задача сёння на сустрэчы з вамі запэўніць, што мы свята будзем выконваць узятыя на сябе абавязацельствы. Тое, што вы вырабляеце, гэта нам вельмі патрэбна. Мы ўмеем рабіць рухавікі. У вас кампанія вельмі развітая. Гэта будзе добрая лінейка ў Беларусі, якой мы, на жаль, не валодаем, але спрабуем зрабіць. З вамі гэта будзе хутчэй. Усё гэта для нас сёння актуальна і патрэбна", - сказаў Аляксандр Лукашэнка.

Кіраўнік дзяржавы таксама сказаў аб магчымасці сумеснай работы па прасоўванні прадукцыі на рынкі краін Азіі і Афрыкі, якія сталі на шлях развіцця. Краіны, якія вызваліліся нядаўна ад каланіялізму і залежнасці ад іншых дзяржаў, хацелі б мець раўнапраўныя адносіны з іншымі дзяржавамі. "Мы прадукцыю гатовы з вамі вырабляць і прадаваць на рынках, якія развіваюцца. Вы, як чалавек практычны, разумееце, што вырабіць мы можам усё. А вось прадаць пры такой вострай канкурэнцыі - праблема. Мы гатовы быць карыснымі вам у гэтай справе", - сказаў Прэзідэнт Беларусі.

Яшчэ на адной сустрэчы Аляксандра Лукашэнкі ішла размова аб аўтамабілебудаванні. "Ведаю, што вы праяўляеце пэўную цікавасць да работы ў Беларусі. Нам ваша прадукцыя патрэбна. Вы ведаеце, на што мы здольны ў аўтамабілебудаванні. Пры гэтым мы праяўляем вялікую цікавасць у вытворчасці сумеснай з вамі ў аўтамабілебудаванні, якія (вырабляемыя тавары. - Заўвага) вы зможаце прадаць разам з намі на тых рынках, якія бліжэй да Беларусі. Мы ўсяляк будзем гэтаму садзейнічаць", - сказаў Кіраўнік беларускай дзяржавы.

Дзве сустрэчы з прадстаўнікамі кітайскіх кампаній былі прысвечаны перспектывам развіцця цяплічнай гаспадаркі. Кітай гатовы дзяліцца сваім тэхналагічным вопытам па вырошчванні агародніны, ягад і кветак - прадукцыі, якая не толькі запатрабавана на рынку Беларусі, але і мае добры экспартны патэнцыял.

Прэзідэнт, у прыватнасці, правёў сустрэчу з кіраўніцтвам кампаніі "Шаньдун Лісэнтэ Агратэхноладжы" на чале са старшынёй праўлення Ванам Шаўбо.

"Вельмі прыемная сустрэча не толькі таму, што я маю нейкія адносіны да зямлі, але і таму, што, вывучыўшы вашы магчымасці, вы для нас вельмі цікавыя. І нават нягледзячы на тое, што сельская гаспадарка ў нас мае вельмі высокі ўзровень развіцця і многія прадукты харчавання мы пастаўляем у Кітай", - сказаў Кіраўнік беларускай дзяржавы.

Аляксандр Лукашэнка адзначыў, што гэта кампанія ўжо не навічок на рынку Беларусі, супрацоўнічае са Светлагорскім ЦКК. У мінулым годзе паміж бакамі быў падпісаны кантракт на будаўніцтва цяпліцы 4-га пакалення для вырошчвання таматаў.

"Вы вельмі інтэнсіўна і актыўна супрацоўнічаеце з нашымі рэгіёнамі. У вас найноўшыя тэхналогіі, наколькі я валодаю сітуацыяй, па праектаванні, будаўніцтве і эксплуатацыі цяплічных комплексаў. Таму мы вас чакаем у Беларусі. Зямель і глебы, прыдатнай для цяпліц, у нас хапае. Калі вы выкарыстоўваеце штучнае арашэнне і падкормку раслін, мы крыху ўмеем гэта рабіць. Людзі, якія могуць працаваць на гэтых комплексах, у Беларусі ёсць", - сказаў Прэзідэнт.

Аляксандр Лукашэнка таксама звярнуў увагу на канкурэнтныя перавагі Беларусі для развіцця работы ў гэтым напрамку: "У нас прымальны кошт прыроднага газу, лішкі электраэнергіі (мы плануем пабудаваць другую атамную станцыю, мы яе абавязкова пабудуем). Таму вы можаце сур'ёзна разгарнуцца ў Беларусі, на нашым рынку. Што вельмі важна, мы вельмі шмат такой прадукцыі сёння прадаём у Расіі. Расійскі рынак неабсяжны. У Еўропе вельмі патрэбна гэта прадукцыя. Таму калі хутка разгорнемся, мы можам атрымаць любую агародніну і прадаць на неабмежаваных рынках".

Прэзідэнт у тым ліку прапануе ў далейшым пастаўляць вырашчаную прадукцыю ў Кітай. "Я ведаю, што вы цяпер часткова гатовы інвесціраваць у будаўніцтва цяплічных камбінатаў. Але я ўпэўнены, што літаральна праз год вы захочаце пабудаваць свае, кітайскія, са 100-працэнтным капіталам камбінаты для работы на тых рынках, - сказаў ён. - Словам, вы можаце разлічваць на падтрымку нашага ўрада ў Беларусі па вытворчасці агародніннай прадукцыі ў закрытым грунце. Можаце для Кітая вырабляць. Вось колькі вырабіце, столькі і забераце ў Кітай".

Яшчэ адна сустрэча ў Аляксандра Лукашэнкі ў Пекіне адбылася з кіраўніцтвам "Шаньдун Хуалян Грынхаус Інжынірынг" на чале з Чэнь Хунлянам. Гэта кампанія спецыялізуецца на вырошчванні кветак, у тым ліку архідэй.

"Вы, напэўна, самыя багатыя і самыя жаданыя госці будзеце ў Беларусі. Я маю на ўвазе тое, што мы адкуль толькі не завозім кветкавую прадукцыю. Аж з Эквадора. Таму, спадар Чэнь, вам вароты адчынены. Рынак не асвоены беларускі і расійскі, ды і еўрапейскія рынкі. Канкурэнцыі практычна няма ніякай. Калі заўтра пачняце прадаваць сваю цудоўную кветкавую прадукцыю, у тым ліку і архідэі, мы будзем вам вельмі ўдзячныя", - сказаў Кіраўнік беларускай дзяржавы.

Размова, зноў жа, вядзецца аб магчымасці будаўніцтва ў Беларусі цяплічных комплексаў, але ў гэтым выпадку па вырошчванні кветак. Гэта, напрыклад, ружы, архідэі, хрызантэмы і іншыя.