Сустрэча з Патрыярхам Маскоўскім і ўсяе Русі Кірылам

Прэзідэнт Беларусі Аляксандр Лукашэнка 6 чэрвеня сустрэўся з Патрыярхам Маскоўскім і ўсяе Русі Кірылам.

"Яшчэ раз дзякую Вам за тое, што Вы знайшлі магчымасць на велізарнай тэрыторыі Рускай праваслаўнай царквы наведаць Беларусь. Я ўпэўнены, што сапраўды ў Вашым сэрцы Беларусь. Упэўнены, што Вы аддаяце належнае спакою і цішыні, у якой развіваецца наша краіна. Хоць, Вы бачыце, як бывала гэта раней, і нават на нашай з Вамі памяці - не ўсё спакойна вакол Беларусі. Заўсёды некаму нешта карціць. Але мы стараемся запаведзі Госпада не парушаць у Беларусі. Таму нам удаецца рэалізоўваць гэтыя (пачынанні і памкненні. - Заўвага) і жыць больш-менш спакойна" - сказаў Кіраўнік дзяржавы.

"Паспяхова рэалізоўваць", - заўважыў Патрыярх Кірыл.

"Не скажу, што мы вельмі багатыя. Хто як можа, як заробіць з дапамогай Госпада. Але калі сам працуеш, Гасподзь дапамагае, мы гэту таксама запаведзь памятаем", - дадаў Аляксандр Лукашэнка.

"Правільна", - пагадзіўся Патрыярх.

Кіраўнік дзяржавы запэўніў, што ў гэтым плане ў Беларусі і стараюцца арганізоўваць сваё жыццё: "За Беларусь Вы можаце быць абсалютна спакойны".

Аляксандр Лукашэнка расказаў, што нядаўна выступіў з ініцыятывай па стварэнні ў Беларусі рэлігійных цэнтраў розных канфесій. "Праваслаўе ў нас, каталіцызм. Гэта асноўныя нашы канфесіі. Вядома, пры пераважнай большасці праваслаўных (па колькасці. - Заўвага), - сказаў Прэзідэнт. - Ёсць і католікі. У Савецкім Саюзе гэта была другая каталіцкая канфесія пасля Літвы".

Што датычыцца праваслаўных, то такі рэлігійны цэнтр ужо створаны ў Жыровічах. "Мы вельмі многае там зрабілі. Я быў там, прынялі рашэнне з уладыкам (Мітрапаліт Веніямін. - Заўвага), што мы зробім там праваслаўны цэнтр паломніцтва. Многае зрабілі", - адзначыў Кіраўнік дзяржавы.

"Жамчужыну", - пацвердзіў Мітрапаліт.

Аляксандр Лукашэнка падкрэсліў, што змяніўся не толькі манастыр у Жыровічах, але і ўвесь край: "Менавіта край. Не толькі манастыр, царква. Увогуле ўсе землі, якія навокал. Уладыку аддалі - бярыце, апрацоўвайце там з людзьмі манастыра".

Патрыярх Кірыл на гэта заўважыў, што і Гасподзь сказаў Адаму: "Вось зямля, бяры і апрацоўвай".

Прадаўжаючы размову аб стварэнні рэлігійных цэнтраў, Аляксандр Лукашэнка заявіў, што і прадстаўнікі іншых канфесій займаюцца гэтым: "У нас такія ёсць цэнтры, якія трэба прывесці ў парадак. Ну і каб крыўды не было - калі ласка, выбірае дарогу да храма свайго кожны з нашых людзей. Таму мы рэалізоўваем гэтыя пачынанні. Я не бачу крыўды з боку мусульман, католікаў, іўдзеяў. Я не бачу ніякіх праблем. Яны ўспрынялі гэта добра".

"Так і павінна быць, - падтрымаў Патрыярх Кірыл. - Гэта традыцыйныя рэлігіі і ад іх наогул ніколі ніякіх адмоўных дзеянняў не было. У адрозненне ад розных сект, якія накіраваны на раздзяленне народаў. Секта - гэта частка. Філасофія і мэта секты - раздзяляць. Гэта небяспечна і для рэлігійнага жыцця народа, і для дзяржавы небяспечна. А традыцыйныя рэлігіі не маюць такіх мэт".

У час сустрэчы Патрыярх Маскоўскі і ўсяе Русі Кірыл узнагародзіў Прэзідэнта Беларусі Аляксандра Лукашэнку ордэнам Святога благавернага князя Данііла Маскоўскага І ступені.

Узнагароды Кіраўнік дзяржавы ўдастоены за ўвагу да развіцця царкоўна-дзяржаўных адносін.

Ордэн заснаваны ў 1988 годзе ў памяць аб 1000-годдзі Хрышчэння Русі. Указ аб узнагароджанні Прэзідэнта Рэспублікі Беларусь быў падпісаны Патрыярхам Маскоўскім усяе Русі Кірылам 30 жніўня 2024 года.

Патрыярх Кірыл падзякаваў Аляксандру Лукашэнку за тое, што адбываецца ў блізкай яго сэрцу Беларусі: "Велізарныя перамены ў жыцці краіны, і не толькі эканамічныя, не толькі ў дабрабыце народа, але і агульная атмасфера. Я, яшчэ калі быў Смаленскім мітрапалітам, часта бываў у Беларусі і магу параўнаць, якія велізарныя перамены адбыліся за гэты час. І ўсё гэта пры Вашым кіраўніцтве. Многія рэчы былі вынікам Вашага творчага ўяўлення - якімі павінны быць краіна, народ, горад. Гэта ўсё сапраўды рэалізуецца на карысць Беларусі".

Патрыярх Кірыл падкрэсліў асабліва добрыя братэрскія адносіны паміж народамі Беларусі і Расіі. "Патрыярх з'яўляецца Патрыярхам усяе Русі, у тым ліку Беларусі. І для мяне гэты фактар - сапраўднай дружбы, узаемадапамогі - з'яўляецца вельмі важным паказчыкам таго, што складваецца ў міждзяржаўных адносінах. Таму хацеў бы асабіста Вам падзякаваць, у Вашай асобе выказаць удзячнасць усяму беларускаму народу", - сказаў прадстаяцель РПЦ, звяртаючыся да Аляксандра Лукашэнкі.

Гаворачы пра ролю праваслаўнай царквы ў Беларусі, ён падкрэсліў, што яна з'яўляецца вельмі важнай сілай, якая аб'ядноўвае беларускі народ і навучае людзей, якія гатовы чуць слова Царквы, таму, каб яны рабілі добрыя справы на карысць Айчыны, на карысць народа, сваёй сям'і і ў мэтах выратавання сваёй уласнай душы.