Сустрэча з губернатарам Астраханскай вобласці Расійскай Федэрацыі Ігарам Бабушкіным

Прэзідэнт Беларусі Аляксандр Лукашэнка 2 мая сустрэўся з губернатарам Астраханскай вобласці Расіі Ігарам Бабушкіным.

Вітаючы кіраўніка рэгіёна, Аляксандр Лукашэнка заўважыў, што Ігар Бабушкін не раз бываў у Беларусі, добра ведае краіну і яе магчымасці і таму тут ён "даўні жаданы госць". "Калі губернатар чарговы раз з Расіі прыязджае да нас, я гэта вельмі цаню - значыць, у яго ёсць тут пытанні і значыць мы па якіх-небудзь напрамках можам больш глыбока супрацоўнічаць. Таму я вельмі рады, што вы са сваімі калегамі прыехалі ў Беларусь, і мы зробім усё для таго, каб тыя пажаданні, якія вы выкажаце, былі рэалізаваны", - запэўніў Прэзідэнт.

"Усё, што мы можам зрабіць для вашай вобласці, а значыць для Расіі, мы зробім, - падкрэсліў Аляксандр Лукашэнка. - Я абяцаў гэта Прэзідэнту Пуціну, у тым ліку на перагаворах у Валгаградскай вобласці. Па многіх прычынах мы тут абавязаны і павінны супрацоўнічаць і рухацца разам, каб забяспечыць свой тэхналагічны суверэнітэт (модна цяпер гаварыць). Мы аб гэтым дамовіліся з Прэзідэнтам. Таму ў гэтым плане мы гатовы перш за ўсё працаваць разам з Расійскай Федэрацыяй".

Кіраўнік дзяржавы, гаворачы пра гандлёва-эканамічнае супрацоўніцтва з расійскім рэгіёнам, адзначыў, што сальда складваецца пакуль не на карысць Беларусі. "Мы будзем імкнуцца да таго, каб выраўнаваць сальда", - сказаў Прэзідэнт.

"Не, мы па амерыканскім шляху не пойдзем, і вы таксама, - дадаў Аляксандр Лукашэнка, намякаючы на нядаўнія рашэнні Прэзідэнта ЗША Дональда Трампа па істотным павелічэнні пошлін для шэрага краін, што апошнім часам часта абмяркоўваліся. - Дзякуй богу, што Дональд зразумеў, што ў эканоміцы справы так не робяцца".

"Мы гатовы да супрацоўніцтва, каб павялічыць паток нашых тавараў у вашу вобласць, каб збалансаваць гандлёвае сальда", - падкрэсліў Кіраўнік дзяржавы і назваў асноўныя напрамкі, дзе бакі могуць развіваць супрацоўніцтва.

Размова ішла, у прыватнасці, аб павелічэнні наменклатуры і аб'ёмаў продажаў у Астраханскую вобласць беларускай сельскагаспадарчай тэхнікі і навяснога абсталявання для айчынных трактароў, якія ў значнай колькасці выкарыстоўваюцца на палях гэтага расійскага рэгіёна. Лагічна, што для сельгасработ неабходны плугі і іншае прычапное, навясное абсталяванне для трактароў, і ў Беларусі гатовы прапанаваць яго шырокую наменклатуру. "Павінен вам сказаць, што па якасці і цане канкурэнтаў нам няма ў Астраханскай вобласці", - адзначыў Прэзідэнт.

Паводле яго слоў, попыт на такую прадукцыю ёсць, асабліва з боку дзяржаў Афрыкі, таму лішніх запасаў на складах няма. Але пры неабходнасці беларускія прадпрыемствы гатовы вырабіць патрэбныя для расійскага боку аб'ёмы. "Мы заўсёды для Расіі вырабім. Хоць у трэцюю, хоць у пятую змену для вас заўсёды вырабім неабходнае прычапное абсталяванне для трактароў, сельгастэхнікі", - сказаў Аляксандр Лукашэнка.

Яшчэ адным напрамкам для развіцця супрацоўніцтва Прэзідэнт назваў пастаўкі пасажырскай тэхнікі. "Нават далёкія замежныя краіны робяць стаўкі не на нейкі асабісты транспарт, а на аўтобусы, пасажырскі транспарт. Аўтобусы, тралейбусы, трамваі - мы гэта ўсё вырабляем. Вельмі высокай якасці і добрага знешняга выгляду. Калі будзе жаданне ў вас і вашых спецыялістаў, паглядзіце на гатовыя вырабы, - прапанаваў Кіраўнік дзяржавы. - Калі вас нешта зацікавіць, пакажыце, будзем разам працаваць для таго, каб вырашыць тую ці іншую праблему".

Аналагічная з сельгастэхнікай сітуацыя і па пастаўках прадуктаў харчавання, у тым ліку дзіцячага харчавання. "Мы гатовы вам па вашых заказах заўсёды пастаўляць", - сказаў на гэту тэму Прэзідэнт.

Асобна Аляксандр Лукашэнка закрануў пытанне работы ў Астраханскай вобласці аднаго з вядучых беларускіх прадпрыемстваў па перапрацоўцы малака "Бабуліна крынка". Размова ішла пра будаўніцтва ў гэтым рэгіёне малакаперапрацоўчага завода і пошук інвестара для гэтага праекта. "Калі ў вас па-ранейшаму ёсць інтарэс да гэтага, скажыце, які інвестар з вашага боку будзе. Мы гатовы працаваць, і "Бабуліна крынка" пацвярджае гэта імкненне", - сказаў Прэзідэнт.

Ён адзначыў, што па просьбе расійскага боку Беларусь істотна нарасціла аб'ёмы паставак ліфтаў і спадарожнага абсталявання. "Цяпер ідзе перааснашчэнне ліфтавым абсталяваннем ва ўсіх постсавецкіх дзяржавах (яно тады было ў асноўным з Расіі і Беларусі). Мы захавалі завод. Можам для вас зрабіць ад ліфтаў да эскалатараў - усё, што вам спадабаецца, - сказаў Аляксандр Лукашэнка. - Можаце быць упэўнены, што ў гэтым плане мы будзем па-ранейшаму для вас цікавыя і рабіць усё для таго, каб гэта абсталяванне вам паступала".

Прэзідэнт звярнуў увагу на вялікі вопыт Астраханскай вобласці ў правядзенні меліярацыі. Як вядома, Беларусь таксама актыўна працуе ў гэтым напрамку і гатова як пераймаць перадавы вопыт, так і дзяліцца сваімі напрацоўкамі. "Мы таксама краіна, можна сказаць, меліяратараў. Вельмі сур'ёзна цяпер працуем. Калі неабходнасць будзе, вы скажыце, дамовімся і будзем старацца і ў вас працаваць, і ваш вопыт прыцягваць у Беларусь", - сказаў Аляксандр Лукашэнка.

Акрамя таго, Прэзідэнт абазначыў зацікаўленасць беларускага боку ў транспарціроўцы грузаў праз парты ў Астраханскай вобласці. "У нас ёсць інтарэс. Мы працуем з вамі ў гэтым плане. Ёсць большая зацікаўленасць. Калі вы нам акажаце падтрымку, будзе ваша згода, мы з задавальненнем будзем працаваць праз астраханскія парты", - адзначыў ён.

У прыведзены Кіраўніком дзяржавы пералік трапілі, вядома ж, далёка не ўсе сферы ўзаемнага інтарэсу, іх значна больш. Таму Прэзідэнт прапанаваў кіраўніку расійскага рэгіёна за час візіту больш прадметна азнаёміцца з патэнцыялам Беларусі і падкрэсліў гатоўнасць развіваць узаемадзеянне па напрамках, якія зацікавілі.

У час сустрэчы з губернатарам Астраханскай вобласці, дзе прысутнічаў і пасол Расіі Барыс Грызлоў, Кіраўнік дзяржавы канчаткова расставіў кропкі над "i" ў пытанні нашэння і выкарыстання ў Беларусі сімволікі георгіеўскай стужачкі. Раней Аляксандр Лукашэнка выказваўся па гэтым пытанні ў Валгаградзе на перагаворах з Уладзімірам Пуціным. Такая ўвага звязана са спробамі ў пэўных колах штучна раскруціць гэта пытанне і зрабіць прычынай разладу ў беларуска-расійскіх адносінах. Бачачы гэту тэндэнцыю, Аляксандр Лукашэнка адкрыта адрэагаваў, каб спыніць магчымыя інсінуацыі.

"Ну мы вам адказалі з Уладзімірам Уладзіміравічам наконт стужачак. Што мяне здзівіла, ён кажа: "Слухай, раскажы мне, у чым справа". Я гавару: "Я думаў, гэта ад цябе ўсё ідзе". - Не, я першы раз чую. - Ну кажу, тады, напэўна, ад нашага агульнага сябра. - Ад каго? - Я гавару: "Ну як, ад Барыса Вячаслававіча (пасла Расіі Барыса Грызлова. - Заўвага)". Засмяяўся (Уладзімір Пуцін. - Заўвага), гаворыць: "Не, не можа быць". Ён кажа: "Адкуль?". Я гавару: "Ты паглядзі, можа, ад "Рассупрацоўніцтва" (расійскае агенцтва. - Заўвага). Я не сцвярджаю", - расказаў Аляксандр Лукашэнка падрабязнасці размовы з расійскім калегам.

"Хочаце са стужачкамі (я і яму сказаў) - калі ласка, хочаце з нашымі стужачкамі (беларускімі. - Заўвага) - калі ласка. Хто як хоча. Мы ж свае людзі. Мы ж не носім свастыку, як ва Украіне. Вы прапанавалі нам. У гэтым плане мы вызначыліся. Думаю, сваё павінна быць нейкае адрозненне", - сказаў Прэзідэнт.

Аляксандр Лукашэнка адзначыў, што ў Беларусі праводзяць акцыю "Беларусь памятае", якая падобна да расійскага шэсця "Бяссмяротны полк". "Тое ж самае фактычна. І партрэты нясуць. Хто нясе, хто не нясе - справа кожнага. Мы тады моладзі прапанову ўзялі (гэта было маё рашэнне) - моладзь прапанавала, камсамольцы нашы. Вось яны прапанавалі гэты варыянт. Тым больш, моладзь - будучыня. Добры варыянт. Не ўкраінскі. Я гавару: "Добра, няма пытанняў". Нехта хоча прайсці з георгіеўскай, нехта... Але не трэба проціпастаўляць адзін аднаму. Разам давайце", - заявіў Аляксандр Лукашэнка.

"Разам і ходзім", - адрэагаваў Барыс Грызлоў.

"Так, гэта і будзе правільна. А людзі няхай вызначаюцца, як яны. Таму вось, каб Вы ведалі, якая размова, калі Вы (Барыс Грызлоў. - Заўвага) мне некалі аб гэтым гаварылі", - дадаў беларускі лідар.